يوم الوداع

[بَرَِآءَةْ دَمَعَتِي]

الوداع, يوم

يوم الوداع




يوم الوداع اللي طوى وأتعب الحال
جت آهةٍ تكوي القلوب المشافيق
هي آهةٍ متحديه صبر رجّال
لين إن سَمعوها جميع المخاليق
هزّت صمودي يوم صبري ملى الجال
في حرّها نارٍ وفي ثقلها طويق
أبلغ من التعبير لاخِط وإنقال
في لحظةٍ وعيي بها يغيب ويفيق
أحسها جمرٍ على القلب شعّال
بانت ولاتبغى لها زود تبريق
والله ماسترها عن الناس لو قال
أقشر عباد الله هرجٍ مالا أطيق
تسمّع آهة خافقٍ صوتها إدلال
تنبيك عن قدرك بوسط المعاليق
لاتنتظر مني من الهرج مثقال
أبيك تعذرني نشف مني الريق
وضاع الحكي واستعسرت كل الأقوال
أجمّعه ميٍ من الفكر ويريق
وياصاحبي يامن زهى راسه الشال
هذا شعوري يوم حان التفاريق
أنت أول إنسانٍ له القلب ميّال
وأنت آخر إنسانٍ ولافيه تنميق
لكن أبا أوصيك لو الزمن طال
أبيك تذكرني غروب ومشاريق
وأنا أوعدك مايغيب ذكرك عن البال
يبقى شجر ذكراك خضر ومواريق



الشاعر مفلح بن غالب

---

d,l hg,]hu