~[ [©]*~^~^~^~][ عند النهاية تهت في وصف مبداي ][~^~^~^~*[©] ]~

عند النهاية تهت في وصف مبداي .......................كيف ابتدي دامي وصلت النهايه


يوم التفت ودفتري حول مركاي .......................الصوت هو صوتي وهذا صدايه


قلت احسب اصحابي وقلت احسب اعداي ................منهو وقف ضدي ومنهو معايه


واخذت درس من التجارب بدنياي ......................ادرس بصبحي واختبر في مسايه


لو ما عرفت بعلتي ما اعرف ادواي ...................ولا ارتوي لو ما شعرت بظمايه


لولا الامل ما عاش من ضيع الراي ...................ولولا الالم ما هيضتني حكايه


اصل الحكايه جرح داخل حناياي ..................والجرح ما هو موهبه او هوايه


جرح تسبب في بكا عازف الناي .................وانا احسب انه هيضه صوت نايه


ما كنت غامض في كلامي ومعناي .............شرحت بلساني مطالب خفايه


ما هي غريبه نبرة الحزن بغناي ..................ما دام كان من الطفوله شقايه


حبيتك بعمر الطفوله من اقصاي ....................واليوم صرتي تلبسين العبايه


كانت نواياك بطهارة نواياي ...................... واليوم صرتي تسمعين الوشايه


ليتك تشوفيني وانا رايح جاي ....................امشي ولا ادري وين تمشي خطايه


ما ادري قصر ممشاي او طال ممشاي ..........لين انتبهت وكنت واصل بنايه


بيتك عرفته ما وصلته من ارضاي ..................ولا كنت تايه لا تقولين تايه


في غفلتي ساقتني لبيتك اخطاي ..................وادري فهمتيها وسيله لغايه


مثل المرايه ما عرفتي خفاياي ....................وغير المظاهر ما تعكس المرايه


نسيت شي وطبع الانسان نساي ....................غير الحكايه والالم والروايه


ناتج حسابي الاصدقايه مع اعداي ................اكثر من اعداي بكثير اصدقايه



وسلامتكم




اخوكم

صحححححححح لسانك اخوي مهند على هالقصيده الجميله
وصف مبدع من شخص مبدع
سلمت يمينك يالذيب
لاعدمناك ولا حرمنا من ابداعك الرائع

تقبل خالص تحياتي

اخووووك/عـــز الـــخــوي