قمر وخالد ... قصه طويله بس حلوه ومؤثره

بسم الله الرحمن الرحيم

راح أنقل لكم قصه وايد أعجبتني انشالله تعجبكم بس وايد طويله وإذا طولت سامحوني تدرون فتره امتحانات

قصه قمر وخالد

الجزء الأول

في اكبر الفنادق و بأفخم صالتين بالفندق كانت حفله زواجهم خالد بن إبراهيم بن ظاحي على قمر بنت سعد بن ظاحي.. الكل كان يتحسب لهذا الزواج ويحسب له ألف حساب.. لان إن تزوج خالد قمر كل الأماني راح تتحقق وراح ترد العايله مثل ما كانت بعد انقطاع سنين من بعد وفاة اكبر الإخوان عبد العزيز بحادثه انتقام هشمت كل العلاقات وفرقت بين الإخوان والأخوات وما كان شي بينقذ هالكارثه إلا زواج العيال ببعض....

انيي أول للمعرس.. خالد المحطم اللي أنغصب على الزواج من بيت عمه عشان العايله واسمها ومصالحها اضطر انه يدوس على أحلامه وحياته واهم شي قلبه عشان هالزواج.. بصالة الرياييل الكل كان فرحان وكان مبتهج والدنيا مو شايلته.. إلا خالد اللي كان يطالع الناس والابتسامة الباردة على شفايفه اللي ترتعش من الغيض والقهر والألم العميق.. يتذكر حبه العنيف لندى ويتذكر أيامه وياها بلندن والجامعة.. أربع سنوات قضاها من أحلى سنوات عمره.. عاشها وكأنها أخر أربع سنوات بيعيشها بحياته.. يطالع الناس بعيون حيرانة يناشد أبوه وعمه الصديق جاسم إخوانه أهله أصدقاءه اللي انعزموا من كل بقعه وين ما كانوا بس محد يسمعه...

يقبض على مسند الكرسي بكل قوته واهو يكتم غضب عميق يحس نفسه مثل الكاسر المحبوس داخل قفص عظيم ما يقدر حتى انه يتنفس فيه حس البشت اللي عليه مثل سترات الميانين يحبسه عشان ما يتحرك..
الوحيد اللي كان حاس فيه اهو عمه جاسم لأنه يعرف كل شي عن خالد وندى وعن علاقة الحب القوية اللي كانت بينهم لان خالد كان يخبره كل شي من الألف إلى الياء..
جاسم عمره 25 سنه كبر خالد انولدوا بنفس الفترة وعاشوا وتربوا ويا بعض وما يتفارقون بس يوم قرر إبراهيم أبو خالد إن خالد يدرس برى البلاد اضطروا إنهم يتفارقون بالجسد بس ظلوا مع بعض بالروح..
جاسم قرب من خالد:يا خالد حاول انك تهدي روحك شوي أحس إن مسند الكرسي بينكسر الحين خفف شوي من عصبيتك
خالد:ما اقدر يا جاسم أحس إني بموت ما أبي هالزواج شلون يزوجوني من بنت آنا ما اعرف عنها إلا إنها بنت عمي واسمها قمر وأنا قلبي وكلي مع ندى..
جاسم:صل على النبي يا خالد علامك شوف أبوك وعمك شلون فرحانين بهالزواج أنت تناسى حزنك شوي مو عشان شي عشانهم بس..
خالد:ما اقدر يا جاسم لا تطلب مني المستحيل تدري شنو أفكر..أفكر أنحاش وأحطهم جدام الأمر الواقع جاسم هز راسه من كلام خالد وراح عنه اخذ زاوية بعيده عن الفوضى واتصل بمريم أخت خالد
مريم تتكلم بصوت عالي:هلا جسوم شصاير؟
جاسم:مو صاير شي شنو هالهيله اللي عندكم والله وناسه
مريم:هههههههههه أي والله الديجي لاعب بحسبتنا والأغاني على حدها وناسه
جاسم:يا حظكم مو إحنا يرقصون على الطيران والطبول
مريم:ههههههه يلا خلصني ليش داق؟
جاسم:عطيني رفيجتج نور والله إنها غوتني
مريم:جب تدري عاد اهيا قالت نفس الكلام
جاسم:ههههههه مريم ابيج توقفين يم خالد لما يدخل لأنه متضايق شوي
مريم:انشالله عمي ما طلبت شي

سكر خالد من عند مريم وراح عند خالد.جاسم كان وسيم بنيته قويه وجماله كان جمال عربي أصيل وعيونه ماشالله وايد حلوه..
أما خالد أوسم من جاسم بألف مره خالد طويل عريض مغرور لين يشوفه احد يحس انه شموخ العرب كله فيه خصوصا مع خشمه الطويل عيونه بنيه ورموشه كثيفة وحواجبه مرسومه على طول العين..

إبراهيم ابوخالد كان مريض بالقلب لذا ماسار ويا الناس بالزفة طلب من جاسم انه يوقف يمين خالد وخليل اخو خالد الكبير على يساره..

مصيبة ثانيه بغرفه العروس..............
أم خليفة: بسج عاد يمه والله ذبحتيني وأنتي تبجين ذبحتي هالبنيه واهي تعدل فيج وأنتي تخربين كل شي
قمر واهيا تصيح:يمه شسويت فيكم؟؟ آنا بنتج يمه كانت في بالي أحلام وايد تقومون تهدمون حياتي وتزوجوني من ولد عمي اللي ماشفته إلا مره وحده بحياتي..
أم خليفة:بس يا قمر بس بتفضحينا جدام الناس إذا مو عشانا عشان عمج التعبان واعليه حاول المستحيل عشان هالعرس..
قمر:ما أبي يمه أبوس ايدج تكفين مابي
أم خليفة عصبت:بسج قمر بتسكتيين وبتروحين الحين ابوج ينطرج على الباب الناس ليل خلينا نخلص ونفتك يا قمر
قمر سكتت ما باليد حيله تمشي على ريلها لموتها وحباتها المستقبليه تتزوج من إنسان ما تحبه ولا تعرفه قمر ما كانت حاطه في بالها إنها بعد ما تخلص الثنويه راح تتزوج ولا تكّون حياة زوجيه كانت تبي تروح الجامعة وتدرس عشان تصير مدرسه وتكون لإنسان يستحقها.. يحيها وتحبه بس كل هذا تهدم يوم زارهم عمها قبل شهرين وخطبها وأهلها وافقوا من غير ما يستشيرونها وما فتحوا معاها الموضوع إلا بعد ما خلصت المدرسة..
طلعت ام خليفه من الغرفه ودخلت عليها رفيجتها العزيزه لولوه وهذي لولوه كانت وايد غاليه على قمر وزاد غلاها بآخر سنه عشان اخوها زايد
لولوه:بسم الله ماشالله ماغلطوا يوم سموج قمر الف الف مبروك
قمر بصوت يقطع القلب:لولوه الغاليه انقذيني ما استحمل والله بموت احس اني مثل العنزه يقودونها للذبح شسوي بعمري يا لولوه ساعديني تراني بموت
لولوه:جبي زين وايد تمثلين انتي شنو بموت وبموت آنا ما توقعتج تقولين هالكلام والله انج بايخه قمور شوفي ريلج شحليله والله وقفت يم الرياييل وآنا اطالعه حتى حجابي طاح من كثر ما سرحت
قمر:والله انج متفرغه
لولوه:لا متفرغه ولا شي آنا وايد زعلانه يا قمر بس الله قسمه والله ونصيبه بس لازم تصبرين آنا تمنيتج حق اخوي عشان ما نتفارق ابد بس يا قمر احنا مو من مستواكم ولا انتي ناسيه احنه منو وانتو منو
قمر:لا تقولين جذي انا كنت مستعده اقبل بزايد
لولوه بابتسامه:ادري فيج حبيبتي بس عسى أن تكرهوا شيئا وهو خيرا لكم
قمر باستسلام:خلاص انا حياتي انتهت ولا يمكن ارد البنت اللي الكل يعرفها وابوي راح يعرف اهو شنو فقد في حياته يوم زوجني من هذا المغرور
لولوه بخبث:والله على الغرور اهو له الحق وايد حلو بس ما كان لابس بشت
قمر:بشت ولا بدون ما اشتهيه ياربي والله انه مغرور
لولوه:مادري بس انتي الحين جبي ويلا خلي البنت تعدلج ولو انج تخبلين بس يبيلج شوي هني تحت عيونج وانا بروح
قمر:وين خلج معاي ابيج تطلعين معاي
لولوه:ما يصير انا ما اقرب لج شي اخوج وابوج راح يدخلونج
بدخله ام خليفه لا حبيبتي انتي بتدخلين وياي وانتي يا لولوه اذا ما طلعتي وياها منو بيطلع وياها لطوف تعابل عيالها ومروو ماتبي تتحرك عشان لا يخترب شي فيها ونوفه ويا رفيجاتها ماكو الا انتي
لولوه بفرح:انشالله خالتي
قمر ويا افكارها والخوف الفظيع وشلون تعيش طول العمر مع انسان ما تحبه ولا تقدر تحس فيه واهيا موجها مشاعرها لزايد اللي يحبها من اول مره شافها لما كانت زايره اخته لولوه
قمر بنت ولا كل البنات جمال واخلاق ودين وستر قمر كانت البنت اللي تلبس حجاب وجلباب من بنات العايله كانت تحافظ على طول شعرها ولا تحط لها من المكياج الا الكحل الغامج اللي يبين جمال عيونها ويخفف حده النظرات اللي يسميها جاسم النظرات القاتله قمر كانت بطبعها هاديه واجتماعيه بصوره رهيبه تحب الاشياء الرقيقه وتحب الاصاله والعادات الشرقيه على غير خواتها.. جمال قمر كان فريد من نوعه عيونها لوزيه واسعه رموشها سود كثيفه متشابكه حواجبها مرسومه على عيونها مثل خالد بشرتها كانت بيضه ناعمه شفايفها ورديين وخشمها صغير نحيل..

بعد اخر نداء لها من لولوه تطلب منها انها تستعد عشان يطلعون.
دخلت لولوه واهيا متغطيه مع ابو خليفه.. لولوه امسكت ايدها وابوها ماسكها من جتفها وطلعوا مشوا وراهم الحريم والمصوره من جدامها قمر ما كانت تشوف شي لان ويهها مغطى عن الرياييل اللي كانوا بزفه خالد...
خالد بكشخته يمشي ويا اخوه خليل وعمه جاسم وابوه كان ورى تلاقوا عند باب الصاله...
جاسم:مبروك قموره
قمر:الله يبارك فيك عمي
خالد من غير نفس:الف مبروك يا قمر
قمر بداخلها (الف رحمه علي مو مبروك):الله يبارك فيك
مريم يلا بسرعه خلونا ندخل
ووقفت قمر يم خالد كان طويل ووصلت لجتفه ومشت معاه والاضاءه كانت خافته والجو صار ملائكي البنات كلهن ماتوا يوم شافوا خالد وشكثر كان وسيم... طبعا رفيجات قمر شافوا رفيجتهم احلى من ريلها بألف مره بس البنات اللي مايعرفن قمر قامن يقولن اكيد اهيا جيكره حذاله...
وسيمه اشطن رفيجات قمر تكلم ناديه: والله قهر مادري اخبصها بطراق على ويهها
ناديه: اووش وسيمه علامج بتتهاوشين هني بعد خليهم بينصدمون لين ترفع الغاليه الطرحه
وسيمه: بس شنو غاوي ريلها ياربي والله احلى عن زيود اخو لولوه
ناديه: احلى بس الا وايد احلى ويناسب قمر بس وايد مغرور
شهلا العيميه: يحق له احد يتزوج هالقشنقو هنيالج ياقمور قمر ماخذ قمر
ناديه ووسيمه: ايه والله

وصلت قمر وخالد للكوشه...الشباب كانوا يرقصون ومتلثمين لانهم استخفوا يوم شافوا البنات والبنات يضحكون جاسم اولما شاف لولوه ما شال عينه عنها ولولوه طبعا لاحظت عيون جاسم وتاكد انه مو المعرس مثل ماتوقعت واهيا انعجبت فيه بس عطته نظرات لامبالاه وزاد عناد جاسم بنظراته.. ركبت قمر قمر الكوشه على هدوء ومريم ولولوه يساعدونها
مريم لخالد:تقدر تساعد ولا ايدك منشله؟
خالد:مو شغلج محد قالها تلبس جذي
مريم:مو وقته هالكلام يلا ارفع طرحتها
خالد واهوا ماله نفس رفع طرحتها.. اول مارفعها وقف قلبه ماشالله على جمالها حس عمره يرجف ما ظن ان قمر الياهل تطلع نفس الحوريه قمر ما شافته ولا عطته ويه.. الكل شهق لما شافوا قمر..
مريم:مدي ايدج قمور
قمر:ليش؟
خالد بهدوء:ما تبين دبلتج يعني
قمر استحت ومدت ايدها واهيا ترجف لبسها الدبله وباسها على راسها..جاسمك لاحظ على خالد انه متعجب من جمال قمر مع انه مو معطيها ويه الكل بارك للعروسين ابو خليل لبس قمر خاتم ذهب مرصع بالماس...وام خليل بعد عطتها خاتم.. قمر كانت تتمنى ان يدها يكون موجود لان مستحيل يخليهم يزوجونها غصب..

بعد ما هدى الجو على الكوشه قعدت الفرقه عند الطرف خلف الستار مريم ونوفه يرقصون من خاطر حتى لولوه ووسيمه وشهلا وناديه وكانوا يرقصون بآخر الصاله.. جاسم يطالع لولوه باعجاب بالغ واهيا ما تعبره.. قعدت قمر مع خالد كانت المصوره تبي تاخد لقطات رومانسيه بينهم بس ما قدرت بعد ما راحت المصوره قمر التفتت لخالد وتخبلت عليه صج وسيم اخر مره شافته قبل خمس سنين كان للحين بالكويت صار اوسم من قبل استوى ريال ولا كل الرياييل..
خالد كان يفكر بندى ويتخيلها على الكوشه معاه.. يو رفيجات قمر يسلمون عليها وخالد كان يسمعهم
وسيمه:الف مبروك يا قمر صج لي قالوا الميك اب يلعب دور يالجيكره
قمر:طالعه عليج
وسيمه:لا حبيبتي انا لو تاخذين من ملامحي تصيرين ملاك..صح كلامي ندوي
خالد التفت من الاسم علباله ندى
ناديه:أي صح بس قمر ماشالله صج قمر
شهلا:بس عاد فضحتونا يم المعرس..الف مبروك عليك قمر تراها غاليه حطها بعيونك تراها اهيا نجحتنا من البراشيم
وسيمه:ويه المديره هني لا تسمعنا تخلينا نعيد السنه والله يخلوني اقعد اول كرسي
الكل ضحك حتى خالد اللي ما كان يبي يضحك يطالع قمر واهيا تضحك بحياء جدامه..
وسيمه:لا صج عاد خالد قمر عزيزة وغالية حاسب عليها وحطها بقلبك قبل عيونك
خالد:انشالله
لولوه:يلا يا بنات ورانا درب
قمر:وين رايحه؟
لولوه:زايد اخوي ينطرنا يبي يوصلهم
قمر زعلت يوم اسمعت اسمه كان كل يوم يوصل ورده جوري لقمر كانت قمر تحتفظ فيها بدارها
لولوه:لاتحاتين ربع ساعه وارد
وسيمه بدت تبجي:بتوحشينا يالكريهه
قمر بجت ووسيمه لمتها:فديت عمرج قمور
ناديه:حبيبتي قمور لا تنسينا تكفين تراج بالقلب ياروحي
قمر:وانتي ندوي لا تنسيني خاصة اذا بغيتي شي ول ا محتاجه اذا مو انا اهلي موجودين (ناديه بنت شهيد ومن اسره محتاجه وقمر ما تقصر معاهم) والله يخليج يا بنت الشهيد
البنات ودعوا قمر وقمر تتذكر ذكريات المدرسه وتتذكر اول مره شافت زايد واهو تخبل عليها كانت تصده مع انها تعزه.. خالد من طرف ثاني كانت عيونه موجهه على الباقه ما يطالع الناس وما لاحظ البنت اللي قاعده تطالعه وتبجي كانت اغنيه مبروك عروستنا ليوسف العماني مشغله وقتها..
منو تتوقعون اللي قاعده تبجي؟؟