~[ تكافؤ النسب في الزواج بين الشرع والراي العام ! ]~

كل الشكر لك أخي المطيري على طرحك موضوع مثل هذا ..

واشووف ان اغلب الردود تناقش بس مسألت الزواج متجاهله مسألت الابناء مدري هل يحكمون على مجرد قصص تسمع من قبل اكثر من 300سنه ولايحكمون من واقع حاصل في مجتمعنا ...

انا ماني متكلم عن تفرق الزوجين لان هذا واضح وكل يعرف عنه ولكن الابناء محد فكر فيهم عيالك اذا جبتهم من انسانه اقل منك نسب ماقد فكرت وشلون نظرت المجتمع لهم ممكن البعض يستغرب من كلامي لكن هذا واقع شفته بعيوني محد قالي .. وانا اعرف واحد من اخوياي قبيلي لكن خواله خضيريين وتجار لكن مايعني انهم تجار شي واول ماتزوج ابوه من امه على حسب كلام عيال عمه وكلامه لما سألته خمس سنوات ابوه محد يكلمه من جماعتهم حتى امه ماتكلمه مدة خمس سنوات مع ان ابوه كان ملتزم ويخاف ربه وكمل مع ام خويي وعقب خمس سنوات من الزواج وعقب ماصار له ولدين من زوجته صارو يكلمونه الجماعه واهله بمافيهم امه والكل يعرف حب الام لولدها مدري كيف تخلت عنه خمس سنوات المهم مهو هذا موضوعي الولد الحين عمره حول 19سنه ومهو اكبر اخوانه ولكن الي اشوفه ان ربعه وعيال عمه اذا شافو منه زله قالو ايه ماجاء من غريب طالع على خواله يعني خضيري لكن بطريقه ثانيه وعلى ذا الحال كل الي يعرفون انه خواله خضيريين مايعتبرون للولد اي اعتبار واذا صار منه شي ولا اش قالو ايه طالع على خواله مع ان الولد يفتخر في خواله ودايم اذا قعدنا معه يقول انا خوالي تجار ومن ذا الكلام لين مره سأله واحد قاله من خوالك وش عيالتهم تدخل واحد قال خط 110يعني صلب اوخضيريين لكن بلهجه العاميه الولد وجهه صار الوان ومره قدامي نفس الموال فتح طاري خواله وكان ولد عمه موجود اول ماجاب طاري خواله اشوف ولد عمه ناظره نظره (كانه يقوله اسكت ) الولد على طول غير الموضوع << هذا قدامنا كذا وحنا غرب ابي اعرف كيف يعاملونهم مع اهلهم والي يعني لفت نظري ان الولد هذا مايعترفون فيه عيال عمه اوخلني اقول مايحرصون عليه لانه خواله مهو نفسهم قبيليين << بالله بسألكم اذا واحد منكم كان مكان هذا الولد وش يكون شعوره كيف يكون احساسك وكل من حولك يناظرك نظره نقص ؟

فيه احد منكم يتمنى ان الناس تعامل عياله كذا ؟ <<< اكيد محد يبي يرضى ولكن ماتقدر تغير في الناس شي عشان كذا الافضل انك ترقع الثوبك برقعه نفس لونه حتى مايلفت الناظر ..

والي استغرب منه اكثر تفكير المجتمع انا اعرف واحد متزوج من ابريطانيا عادي محد قال وش قبيلتها وش اصلها لاعادي الكل ياخذها في الاحضان .. ممكن تقولون هذولاء بريطانيين كيفهم طيب انا اعرف ناس متزوجين من الشام بدون تحديد دول ماقد احد سأل وش اصل الزوجه هذا اذا كان لها اصل في الاساس ولاحد يفهم من كلامي انه اخواننا اهل الشام مالهم اصل لاانا ماقصد الشي هذا بس الواحد اذا جاء يتزوج من السعوديه لزم ياخذ قبيليه نفسه واذا تزوج خضيريه قومو الدنيا ولاقعدوها بس يتزوج من برا عادي حتى لوكانت مقطوعه من شجره بدون اصل خير شر ؟

في الاخير اقول الافضل رقع الثوب برقعه مثل الثوب مهو الواحد يسوي لي فيها يبي يصلح المجتمع ويتزوج ويضلم زوجته وعياله ..

اتمنى اني ماجرحت احد لكن والله ان هذا واقع ماجبت شي من راسي ..

تحياتي أخوكم / أبوعبدالله ..