LinkBack URL
About LinkBacks
22 *
يوم الخميس
العصر ,,, جالس بالصالة مهموم
كنت طوال اليوم وانا متضايق ,,, مدري وشلون القى وظيفة ثانية ,,, ياليت عندي سيارة يالييييييييت ,,,, كان اقدر اكد
اكد !!!!!!
اففففففف رجعت على طاري المكدة بعد
شسواااات الحين .؟
جاني سالم ومعه كتاب الرياضيات حقه
سالم = خالد حل لي الواجب
انا بضيق = رح لخلود
سالم بزعل = خلود عيت تعلمني
انا بضيق = سالم بتذلف الحين والا وشلون ,,, ماني فاضيلك
راح سالم وهو زعلان ,,,, وخلود الحمارة الثانية ليش ماتعلمه
افففففف اخوان يجيبون الهم
انتبهت على تلفون الشقة يرن
وقبل ماقوم عشان اخذ السماعة سبقتني عليه سلمى ,,, بسم الله الرحمن الرحيم ,,, مسرع وصلته ,, اخبرها عند التلفزيون تلعب بلاي ستيشن
سلمى = الووووووه ,,,, ايه ,,,, ابراهيييييييم ,,, ايه خالد هنا ,,,,, طيب ( والتفتت لي والسماعة باذنها ) خالد ابرهيم يبيك
استغربت ابراهيم متصل على الشقة ,,, ليه مايتصل على جوالي ,,, قمت واخذت السماعة من سلمى
انا = الو ,,, السلام عليكم
ابرهيم = وعليكم السلام ,,, وينك يارجال لك يومين مابيّنت ,,, وامس غايب .؟ ومن اليوم اتصل بجوالك ولا ترد
جوالي ! اييييه صح جوالي بغرفتي وعلى الصامت
انا بضيق = اوووه جوالي بغرفتي ولا سمعته
ابراهيم = طيب وينك ماتبيّن .؟
انا بضيق = متضااايق
سكت ابراهيم شوي
ابراهيم = خالد عسى خير على وش متضايق .؟
انا بحزن = والله مدري وش اقولك
ابراهيم = امممم وش رايك امرك ,,, انا اصلا كنت ناوي امرك نزور خالد ,,, لكن الحين نأجل الزيارة ونتمشى انا وانت وتفضفض وش رايك ,,, امرك .؟
انا = اممم طيب ,,, احتريك
ابراهيم = يله الحين جاي
علمت خلود اني بطلع ,,, ونزلت تحت للشارع احتري ابراهيم
بعد شوي وصل ابرهيم وركبت معه
ابرهيم = عسى خير خالد ,,, اقلقتني
انا بتنهيدة = المستشفى اللي اشتغل فيه طردوني ,,, مادري من وين احصل وظيفة غيرها
ابراهيم = لا حول ولا قوة الا بالله ,,, يحلها الله ياخالد ,,, الله هو اللي يرزق ,, واكيد راح تلقى غيرها انت بس اصبر
انا والدنيا مسودة بعيني = انا الوظيفة هذي يالله حصلت عليها وانت تعرف وضعي ماعندي لا شهادات ولا دورات ولا شي
سكت ابرهيم شوي يفكر
ابراهيم = امممم انا اذكر مرة قريت بالنت وظيفة بشهادة الثانـ ( وسكت بعد ماتذكر )
انا بحزن = هذا انت قلتها بشهادة الثانوي ,,, انا من وين لي شهادة ثانوي وانا الى الحين ماتخرجت
ابراهيم = هو صح صعب ونادر تحصل وظيفة بشهادة المتوسط وبدون دورات ,, لكن اللي يسر لك الوظيفة الاولى ييسر لك تحصل الوظيفة الثانية ان شاء الله ,,, طيب انت وشلون توظفت بالمستشفى بدون شهادات .؟
ابتسمت لما تذكرت خالد ,,, هو اللي تحدى وينلي عشان يتوسط لي هنا ,,, تحدى الشيفه اللي شفته بالرياض عشاني انا ( توسعت ابتسامتي اكثر لما تذكرت يوم يقوم خالد معصب ودار حولين مكتب الامريكي عشان يتعارك معه ) العلاقة بين خالد والامريكي علاقة اعداء علاقة كل واحد ماسك الثاني باليد اللي تعوره موب علاقة صاحب مستشفى ومديره والمصالح تكون مشتركة بينهم ومتفاهمين ,,, من زمان عنه والله لي يومين مازرته ولا ادري كيف صحته الحين
انتبهت على ابراهيم اللي يكلمني
ابراهيم = ماتبي تقولي وشلون توظفت .؟
انا بابتسامة = خالد هو اللي توسط لي
قطب ابراهيم حواجبه مستغرب
ابرهيم = خالد !( وكنه تذكر ) ايه صح قد سمعت انه ابوه عنده مستوصف اهلي بس بالرياض ( وابتسم ) ايه الله يجزى خالد خير
انا = ماهو لبوه ,, العيادة باسـ
وسكتت لما تذكرت ان خالد ملزم علي ماعلم احد ان العيادة باسمه ,,, بس معقول حتى صالح مايدري
ابراهيم مستغرب = ماهي لبوه .؟ ,,, اجل لمن
انا مرتبك = آآآ ,,, لا لا ولا شي ,,, صح انا بعد سمعت ان ابو خالد عنده عيادة بالرياض
ابراهيم = طيب مدام ان ابوه عنده مستوصف اهلي اكيد يعرف احد بالمسشتفيات يتوسط لك ( والتفت لي ) اجل وشوله متضايق قل لخالد يتوسط لك مرة ثانية او يرجعونك لوظيفتك الاولى ( وابتسم ) محلولة ياااخي
تبي خالد يتوسط لي مرة ثانية ويدخل بمشاكل مع وينلي وهالناصر ,,, قل الله يفكه من شرهم بس ,,, صح وشلون صحته الحين ,,, لي يومين مازرته
التفتت لبراهيم اللي يسوق
انا =متى اخر مرة زرت خالد .؟
ابراهيم = اخر مرة يوم الثلاثاء وامس كنت مشغول ,,, وش رايك نمره الحين .؟
انا = ماعندي مانع يله ,,,اممم بس اقول ابراهيم تدري وش صار على اللي مسكوهم .؟
ابراهيم بتنهيدة = طلعوا
طيرت عيوني ببراهيم بصدمة
انا = طـ ,,, طلعوا .؟
ابراهيم = يارجاااال خالد طاح برفقاء سوء لهم ظهر قوي ,,, قال خالد اصبروا اسبوع اسبوعين وبيطلعون وطلع صادق الرجال بس شف وشلون مالهم يومين الا وهم طالعين
انا بحزن = يمكن لأن محد من طرف خالد راجع الشرطة هناك عشان كذا طلعوهم بدري
ابراهيم = طبعا اكيد اذا ماراجع احد من الطرف الثاني اكيد بيطلعون ,,, هذا غير الواسطة القوية اللي معتمدين عليها ,,, خالد وخاله عليهم تفكير مدري وش يبي ,,, ابوي امس عازم ابو عبد الله على قهوة عندنا وقالنا كل شي والله لو تشوف ابو عبد الله ياخالد تقول كأن ميت له احد ,,, خاصة بعد ماعلمه الضابط انهم طلعوا من التوقيف ,,, الرجال منقهر وخايف ,, تصدق امس اسمعه يقول لبوي وللموجودين انه يبي يقنع خالد يروح يدرس بمدينة ثانية ,,, بس ياااخي تفكيره موب منطقي الى متى يعني بيتنقل خالد بين المدن كنه متشرد ,,, كل الموجودين حاولوا يقنعونه انه يوافق على كلام الضابط ويسوون كمين لهم بس معيي ,,,
انا بحزن = لا حول ولا قوة الا بالله ,,, ابو عبد الله يفكر بعاطفته مايفكر بعقله ,, على حد كلام الضابط الكمين مافيه خطر على خالد ونجاحها مية بالمية
التفت لي ابراهيم
ابراهيم = بيني وبينك حنا نضحك على انفسنا بس كل هذا عشان نقنع ابو عبد الله ,,, لا تنسى ان الكمين يعني القبض عليهم وهم متلبسين ,,, يعني القبض عليهم وخالد يكتفخ بين يديهم ووش يدرينا بعد يمكن تتأخر الشرطة ومايصلونهم الا وهم طاعنين خالد كم طعنة ( وابتسم ابتسامة واسعة )
سكتت شوي استوعب كلام ابراهيم وتخيلت خالد وهو تحتهم يتكفخ ويحتري الشرطة يقتحمون المكان ,,, وبعدها ضحكت
انا = هههههههههههههههههههههههههههههههه
ضحك ابراهيم معي ,,, عرفت انه متخيل خالد مثلي
ابراهيم = هههههههههههههههههههههههههههه صار طعم هذا ماصار خالد ههههههههه
انا = ايه نضحك على من اجل .؟ من عذر ابو عبد الله يرفض الفكرة اثره فاهم اكثر منا
ابراهيم = يتكفخ مرة ولا يتكفخ كل مرة ,,, وش يدرينا بعد يمكن يرجعون له مرة ثانية ,,, يعني خالد ماقدامه الا يتعاون مع الشرطة يسوون هالكمين واكيد الشرطة ماهم مخلينه لفترة اطول بينهم تراهم فاهمين شغلهم اكثر منا ,,, بس حنا علينا نقنع ابو عبد الله يوافق ( وتنهد ) توني افهم ليه خالد ترك مدارس الرياض وجا يدرس هنا وليتها كفته من شرهم شف هذا هم وصلوا له ,,, الحمد الله اللي هداه بس ,,, خالد بحاجتنا ياخالد المفروض مانتركه عشان مايرجع لرفقاء السوء مرة ثانية ,,, لازم نصير حوله نسانده خاصة انه ماله اخوان وابوه دايم مسافر
انا = ماحنا مقصرين عنه بشي باللي نقدر عليه ,,, ليت ابو عبد الله يقتنع بكلام الضابط بس ,, والله بيرتاح خالد منهم وللأبد
ابراهيم = تتوقع لو ابو عبد الله عنده عيال بيتعلق بخالد هالتعلق العجيب هذا ,,, ومثل ماقلت انت ,,, الرجال يفكر بعاطفته مايفكر بعقله اجل بيخلي خالد يدرس بمدينة ثانية وش هالتفكير ياااخي
سكتت ومارديت عليه فعلا لو ابو عبد الله عنده عيال بيتعلق بخالد هالتعلق .؟
وصلنا المستشفى وتوجهنا لغرفة خالد بالدور الثاني
وتفاجأنا بمحمد اخو صالح جالس قدام غرفة خالد
ابراهيم مستغرب = وش فيه هذا جالس برا ليه مايدخل .؟
انا مستغرب = انا ادري
وصلنا له وسلمنا عليه
ابراهيم = وشفيك جالس هنا ,,, ليه ماتدخل .؟
انا = لا يكون ممنوعة الزيارة
محمد = لا ,,, بس خالد فاقد الوعي من الصباح وقلت اجلس برا احسن وشوله ادخل .؟
تفاجأت خالد مغمى عليه ,,, اخر مرة شفته كان يحس بكتمه وتعبان ,,, ( شهقت ) لا يكون صارله شي وانا مدري ,, ربي سترك
انا بخوف = آآآ ,,, ليه وش فيه ,,, من وش اغمى عليه .؟
التفت لي محمد وحرك اكتافه بعدم مبالاة
محمد = كالعادة ,,, امس كان مصدع وشكلها زادت عليه اليوم ,,, خالد مايمر شهر الا وهو طايح علينا ,,, تعودنا
اخذت نفس برتياح
انا = ياشيخ خوفتنا
محمد = هو المفروض يطلع اليوم بس تفاجأنا فيه مغمى عليه
انا مستغرب = مو يقول الدكتور لازم ياخذ خالد اسبوع راحة ,, ليه كتبله خروج بهالسرعة .؟ مامر عليه بالمستشفى الا ثلاث ايام
محمد = خالد نشب بحلق الدكتور لين وافق
انا مستغرب = ليه طيب ,,, وش وراه مستعجل
محمد بضيق = خالد عليه تصريفات مدري وش تبي
راح ابراهيم لباب الغرفه بيفتحه
ابراهيم = عنده احد داخل .؟
محمد = ايه ,,, ابو عبد الله
ابراهيم = اوووه ( ورجع وجلس بجنب محمد )
استغربت تصرفه
انا مستغرب = وشفيك ,,, ليه ماتدخل انت الثاني .؟
ابراهيم = ياخي ابو عبد الله امس شوي ويصيحني قدام الرجاجيل زين اني مسكت نفسي,,, تبيني ادخل وابو عبد الله عند خالد اللي مغمى عليه بصيح على طول ,, رح اذا كنت تبي تدخل رح الله يستر عليك
ابتسمت ,,, انا اشوفه عادي بس ابراهيم حساااس
انا = ههههههههههههه ياحسااااااس
التفت محمد لبراهيم بسخرية
محمد بطرف عينه = يااعيني يا مرهف الاحساس انته
ابراهيم بضيق = اففففففف
فتحت الباب ودخلت
لقيت الغرفة مظلمة ونور خافت يجي من الدريشة,, وجو الغرفة بااارد شوي وغارقة بالهدوء
وابو عبد الله جالس على كرسي بجنب سرير خالد ومعطي الباب ظهره ,,, اول مادخلت التفت ابو عبد الله يشوف اللي دخل
قربت له وسلمت على راسه وهو جالس
انا = السلام عليك ياعم ,,, وشلونك ,,, وكيف صحتك .؟
ابو عبدالله بصوت حزين = هلا ولدي وعليكم السلام ,,, الحمد الله وشلونك انت وشلون اخوانك .؟
انا بابتسامة = الحمد الله بخير دامك بخير
والتفتت لخالد المتمدد على السرير ,,, رحت للجهة الثاني من السرير عشان اسلم عليه مع انه موب حاس فيني
وقفت عنده ,, وجهه مايل لجهة ابو عبدالله ,, وانتبهت ان اللحاف كاشف عن صدره العاري ,,, ومشيوله عنه اللزقة الكبيرة ,,, طاحت عيني على الخياطة المعترضة نص صدره ,,, جتني رعشة من شكلها ,, تخررررررع خاصة مع الظلام صار شكلها مخيف ,,, ومؤلم
مديت يدي وخليت وجه خالد يلتفت لي
مغمض عيونه كنه نايم وانفاسه هادية ,,, والكدمات اللي منتشرة بوجهه بعضها تحولت للون البني ,,, او ازرق بس بسبب الظلام اشوفه بني
انحنيت عليه
وسلمت على جبهته وبعدها على خده وخده الثاني
انا بهمس = الله يقومك بالسلامة
ورفعت راسي والتفتت لبو عبد الله اللي يطالعنا بحزن ,,, شاقوله الحين وشلون اواسيه ( تنهدت ) من عذره ابراهيم يوم مادخل ,,,
انا = آآآ ,,, ان شاء الله يقوم بالسلامة
لا ياشيخ يقالي واسيته الحين ,,, والمشكلة ابو عبد الله مارد علي ,,, شاقول شاقول
انا = آآآ ,,, ان شاء الله ,,, آآآ ,,, شسمه ,,, هذا ,,, ايه
اففففففف شاقول ,,,, الناس وش يقولون اذا بغوا يخففون عن احد ,,,
التفتت لخالد بقلة حيلة ,,, اليوم الخميس المفروض يكون بالرياض خاصة انه وعد اخته رولا يجيهم خميس وجمعة ,,, ( شهقت ) صح يمكن هذا السبب اللي خلاه يلح على الدكتور يكتبله خروج اليووووووووم
ابتسمت بحزن يمكن رولا زعلانة على خالد الحين لأنه كذب عليها
= خالد وانا عمك
قطع تفكيري صوت ابو عبد الله والتفتت له
انا = آآآ ,,, سم
ابو عبد الله = ابيك ياولدي تقنع خالد يدرس بجدة ,,, قلت له امس وعيا ,,, قلّه وانا عمك يمكن يسمع منك
طيرت عيوني فيه ,,, صاحي هذا ,,, جدة
انا بصدمة = جدة !
ابو عبد الله = اعرف واحد بجدة يجهز اموره وامور الشقة وكل شي بس ابيه يوافق يروح يدرس بعيد عن اللي مايخافون الله
انا بتنهيدة = ياعم انت مكبر الموضوع وهو صغير ,,, ومشكلته مع بدر وربعه بسيطة والضابط مستعد يقبض عليهم ويعاقبهم بس يبي خالد يتعاون معه
ابو عبد الله = ماحد يعرف مصلحة ولدي اكثر مني ,,, ابيك تقنعه بس يدرس بجدة
التفتت لخالد متضايق ,,, اسكت عنه احسن ,,, ابو عبد الله ماهو بعقله الحين
ابو عبد الله بترجي = خلاص اعتمد عليك ياولدي .؟ ابيه يدرس النصف الثاني بجدة
انا بضيق = يصير خير ( وقلت اغير الموضوع ) آآآآ ,,,, ليه كاشفين عنه اللحاف ماهو برد عليه .؟
ابو عبد الله = عشان الخياطة ,,, خالد الله يصلحه فك اللزقة عنه ومارضى يحطوله وحده ثانية
اخذت شوي وبعدها طلعت من الغرفة ولقيت ابراهيم ومحمد قاعدين يسولفون
محمد بضيق = وينه ابو عبد الله وش يسوي داخل مليت ياخي ابي اروح
انا باستبهال = داخل
محمد = لاه ,,, تصدق حسبته برا
ابراهيم = طيب خلاص انت رح وانا وخالد نوصّل ابو عبد الله
انا = انتم تحترونه الحين يصحى عشان يطلع والا وشلون .؟
ابراهيم = ايه تحترونه الحين يطلع والا وشلون .؟
محمد بضيق = افففف والله مدري عن ابو عبد الله ,,, حنا جايين على اساس يطلع بس تفاجأنا فيه مغمى عليه ,,, ومن الظهر نحتريه يقوم نشوف يبي يطلع يبي يقعد مدري
وبعد مشاورات قررنا انه يقعد ابراهيم مع ابوعبد الله لين يشبع من خالد وانا ومحمد نرجع
بعد صلاة العشا
كنت بالصالة احاول اتصل بجوال خالد اشوفه صحى ولا بعده
ولارد
بعد ربع ساعة عدت الاتصال ولا رد
وبعد ماتعشينا اتصلت مرة ثانية عليه وفرحت يوم سمعت صوته
خالد = الووووووه
صوته تعبان وخفيف
انا بفرح = هلااااا والله ,,, عاااااش من سمع صوتك ,,, وشلووونك ياغالي كيف صحتك الحين
خالد بتعب = هلا خالد عاشت ايامك ,, انا بخير ,,, وشلونك انت وشلون سالم وسلمى ومعاذ .؟
انا = بخييير دامك بخير ,,, من اليوم اتصل عليك توك صاحي والا وشلون .؟
سكت خالد شوي
خالد = انت زرتني اليوم .؟
انا بابتسامة = ايه ,,, انا وابراهيم ,,, توك تقوم .؟
خالد بتنهيدة = لا ,,, قمت المغرب واسمع جوالي يرن من اليوم ,,, بس كنت اصلي الصلوات اللي فاتتني
انحرجت اثرني ازعجه وهو يصلي
انا بحرج = اوووه آسف اجل ازعجتك
سمعته يضحك ,,, وابتسمت وشفيه يضحك ذا
خالد = ههههههه ايه ازعجتني
انا بمزح = احسن
خالد = هههههههههههههههههههههههه
سكتت وانا ابتسم مستغرب ضحكه ,,, سكت خالد من الضحك وبعدها تنهد
خالد بتنهيدة = المفروض اطلع اليوم
انا = ليش مستعجل ,,, الدكتور يقول لازم تاخذ اسبوع على الاقل راحة
خالد بهمس = انا ابخص من الدكتور بنفسي
رفعت حاجب واحد بسخرية
انا = لا ياشيخ
خالد = المهم انا بطلع بكرة ,,, تكفى خالد تعال بدل خالي مابيه يتعنى
انا = ومن يقنع خالك مايجي ,,, اليوم كان مسنتر عندك وانت مانت حوله
خالد بتنهيدة = ايه ادري ,,, علمني ابراهيم برسالة جوال ,,, يقول ابراهيم يالله اقنعته يرجع ,,, خالي وامي بتصرافتهم احس كني بزر من خوفهم علي ( وتنهد ) ابي اعرف وش بيسون لو عرفوا اني فـ
وسكت
انا = وش فيك سكتت ,,, كمل انك وش .؟
خالد بهمس = آآآ ,,, لا لا ابد ولا شي
انا مستغرب = يله عاد خالد كمل انك وش .؟
خالد = خلاص خالد ولا شي ,,, امممم اقول دريت ان بدر وراكان والباقي طلعوا
اعرفه يغير الموضوع ,,,
انا = ايه علمني ابراهيم ,,, ان شاء الله مايتعرضون لك مرة ثانية
خالد = هه بس انا موب مخليهم ,,, تدري انهم الحين سهرانين باستراحتي
انا = وش دراك انهم باستراحتك الحين وانت توك صاحي
خالد = علمني صادق قبل يغمى علي انهم ناوين سهرتهم الليلة باستراحتي وهددوه اذا علمني واخذوا المفتاح منه بالقوة
انا مستغرب = من صادق .؟
خالد = عامل الاستراحة ,,, والله والله ياخالد لادفعهم الثمن ,,, وقريب
يهدد المروح وهو تعبان ,,, اجل من عذر خاله وامه يعاملونه كنه بزر
سألته خايف من تهوره
انا = وش بتسوي يعني .؟ ,,, لا تنسى ياذكي هم اربعه وانت واحد
خالد = الحين ماني مسوي شي ,,, خلهم يسهرون ويستانسون باستراحتي زي مايبون
انا بعصبية = ايه يعني وش بتسوي ,,, يامروح
سكت خالد شوي
خالد = اولا ,,, المروح انت
ابتسمت
انا = وثانيا
خالد = وثانيا بعد انت المروح
ابتسمت اكثر ,, ههههههههه خبل
انا بابتسامة = طيب وثالثا
خالد = وثالثا بروح للرياض ,, تروح معي .؟
شهقت
انا بصدمة = وش ,,, تروح للرياض ( وبعصبية ) خبل انت خبل
خالد ويتصنع البراءة = ليه .؟
قهرني ,,, خاله ابو عبد الله حالته حاله يحاول يبعده عنهم وهو بيروح لهم برجليه
انا بصراخ = وليه تبي تروح لهم يابقرة ,,, يااااخي تبي تفتك منهم تعاون مع الشرطة وسو الكمين اللي يبونه
خالد بهدوء = ايه ان شاء الله ابسويه بس آجله الضابط لين اتشافى تماما وخاصة الجرح اللي بصدري
سكتت شوي مستانس ,,, زين الحمد الله بيتعاون مع الشرطة بيرتاح منهم وللابد ,,, بس لحظة ليه يبي يروح للرياض
انا = طيب ليه تبي تروح للرياض .؟
خالد = عشان اسلم على اهلي تسلم معي ,,, آآآ ,,, اقصد تروح معي .؟
ضحكت عليه هههههه يوم اقولكم خبل ,,,
انا بابتسامة = هههههههههههههههه ,,, لا ماني مسّلم معك ( وسألته بتشكك ) اكييييد بتسلم على اهلك .؟
خالد = ايه ان شاء الله
انا بشك = طيب والجروح اللي بوجهك وش بتقول لامك اذا سألتك عنها .؟
خالد = ماني رايح الاسبوع هذا ابروح الاسبوع الجاي ,,, الاسبوع هذا دبرت لامي عذر ومشى الحال ,, واذا ماخفت الجروح لين الاسبوع الجاي بقول لها امممم تهاوشت مع صالح هههههههههههه
انا = ههههههههههههههههههههههه زين والله تستفيد من صالح شوي هههههههههه المهم خالد خسرتني تراك ,, مع السلامة
خالد = مرني بكرة لا تنسى
انا = ياخي بكرة الجمعة مايجي الدكتور
خالد = ماعليك دبرتها انا ,,, واخذت موافقته اليوم قبل ينتهي دوامه ,,, انت بس تعال كمل اوراق الخروج
انا = طيب وخالك كيف اقنعه مايجي
خالد = انا ابتصل عليه الحين ماعليك
انا = طيب وشلون اجيك وانا ماعندي سيارة
خالد = سيارتي تلقاها مع سعد لانه علمني انه لقى السيارة واقفة عند المقهى و تقدر يطلع لها مفتاح جديد بدل اللي ضاع ,,, مره انت بكره وخذ السيارة منه
انا = اهاااااا طيب ,, ممكن تفارق الحين
خالد باستهبال = ايه خذ راحتك بس سكر على وجهي برقة لا تصير دفش
سكرت بوجهه وانا اضحك
والله ينخاف عليك ياخالد ,,, اجل بتروح للرياض عشان تسلم على اهلك ,,, وتهديدك لبدر وراكان يقول عكس كلامك ,,, تلعبها على مين .؟ لايمكن اخليه يروح للرياض لحاله شكلي غير اعلم ابراهيم ,,, انا ماقدر اروح معه مرة ثانية
خلود = يتعرضون لك مرة ثانية و كمين واربعة وانت واحد وتعاون مع الشرطة ,,, وش السالفة .؟ ومن هذا اللي تكلمه .؟
التفتت لخلود ,,, توني انتبه اني اكلم من اليوم وهي عندي
انا = هذا خالد
خلود = اهااا بس بس فهمت تقصد يتعاون مع الشرطة عشان يمسكون على اللي اعتدوا عليكم يوم الاحد اللي راح .؟
انا = ايه
خلود = طيب وش قصة الكمين .؟
وعلمتها
خلود بخوف = اووووه وبيسويه وابو عبد الله مو راضي
انا = عشان يرتاح لازم يسويه ياخلود ,,, الشباب لهم واسطة قوية بالرياض والكمين بس عشان الشرطة تستدرجهم هنا وهم متلبسين طبعا
شهقت خلود بخوف
خلود = طيب خالد انت خلك بعيد ,,,, خل خالد خويك هو اللي يتعاون مع الشرطة لحاله انت لا تتدخل
ابتسمت بوناسة خايفة علي هههههههه
انا بابتسامة = انا مالي لزمة ,,, الشغل كله على خالد هو الطعم زي مايقول ابراهيم ,, بس الصراحة اذا احتاجني خالد ماني مقصر والله ,,, خالد يستاهل اللي يوقف معه
خلود بضيق = خلاص عاد انت وتكلمت عن خويلدووووه اففففف
يوم الجمعة
العصر طلعت من الشقة ورحت لسعد عشان اخذ السيارة منه وبعدها مريت على ابو عبد الله بعد ماقالي خالد الظهر برسالة جوال انه محتاج ملابس غيار
وبعدها اخذت السيارة وطلعت من الحارة
وصلت المستشفى ورحت للدور الثاني لغرفة خالد
دخلت عليه ولقيته جالس على السرير وعنده ممرض وممرضة قاعدين يغيرون الشاش اللي بعضده
التفت لي خالد وابتسم ابتسامته العذبة لكن مخرب عليها الكدمات والخدوش اللي بوجهه ,,, انا الكدمات اللي بوجهي اخف منه بكثير
خالد بابتسامة = هلا والله
انا بابتسامة = هلا فيك ,,, جبت لك غيار ,,, ابروح انهي الاوراق واجي ,,, القاك جاهز
خالد = ايه ,,, اصبر
ومد يده يبي يفتح الدرج اللي بجنب السرير بس الممرض الفلبيني منعه يوم خرب عليه خالد لف الشاش
قربت منهم
انا = وش تبي .؟
خالد = بالدرج فيه اوراق ابيهم
فتحت الدرج وطلعت ورقتين وحدة كبيرة والثانية صغيرة عرفت ان الورقة الصغيرة ورقة وصف الدواء للصيدلية
عطيت الاوراق خالد ,,, واخذهن مني وعطاني الورقة الكبيرة بس
خالد = هذي ورقة من الدكتور اخذتها منه امس ,,, خذها معك وخلص اوراق خروجي ,,, ماتقدر تكمل اوراق خروجي الا بذي
انا = اهااا طيب ( ومديت يدي ) عطني وصف الدواء ابمر صيدلية المستشفى بطريقي
خالد = آآآ ,,, لا خلها انا اذا طلعت اجيب العلاج ,,, لا تشيل هم
مديت يدي وسحبت منه الورقة بالقوة
انا = هات بس ,,, من صيدلية المستشفى ماني دافع شي من جيبي
خالد = ايه ادري بس انا ابـ
قاطعته
انا = فيه شي غيره بروح
تنهد خالد وحرك راسه بلا
انا = خلك جاهز
وطلعت ,, بعد نص ساعة انهيت اوراق الخروج ورحت لصيدلية المستشفى
وصرفت العلاج ,,, بس انصدمت بكمية الادوية اللي عطانيها الصيدلي
وش ذا ,,,
انواع كثيرة من الحبوب اشكال واحجام ومراهم ,,, صاحيييييين
المراهم وعارفين لأيش ,,, نقول عشان الخياطة والكدمات
بس وشوله كل هالحبوب
يمكن غلطان هالصيدلي وصارف لي علاج لواحد ثاني
التفتت للصيدلي وسألته
انا = اخوي متأكد من اللي صرفته لي .؟
الصيدلي = ايه نعم ,,, هذا وصف العلاج اللي وصفه الدكتور .؟ ليه في مشكلة
انا = آآآ ,,, لا سلامتك
ورجعت لغرفة خالد وانا مستغرب من كمية هالحبوب ,,, والله لونه وش ,,, ترا كل الدعوة طعنة باليد و جرح بالصدر وحرق بسيط بالبطن وكم كفخة بالوجة ماله داعي كل هالحبوب ,, صدق هالاطباء يخلون من الحبة قبة
دخلت على خالد الغرفة ولقيته جالس ويده اليسرى معلقة بشاش ثاني على رقبته وماغير ملابس المستشفى
رفعت حواجبي مستغرب
انا = ليش ماغيرت
خالد وعيونه على كيس الادوية = جيت .؟
انا = لا رحت
وقربت عنده
انا = وش فيك خالد قم غير ملابسك خلنا نمشي
رفع نظره لي وطالعني شوي وبعدها قام ببطئ بسبب الخياطة اللي بصدره
واخذ كيس الادوية مني ونزله بالسرير وبعدها طلع من الكيس اللي من خاله بنطلون وراح للحمام
جلست على السرير انتظره يخلص ,,, مرت عشر دقايق وخالد ماطلع
كلمته بصوت عالي عشان يسمعني
انا بصوت عالي = يله خالد ,,, وش تسوي بالحمام ياااخي
رد علي خالد بصوت عالي من داخل الحمام
خالد = والناس وش تسوي بالعادة بالحمام ياغبي
ضحكت
انا = هههههههههههههههههه مايسوون شي اطلع اطلع بس
خالد = اصبر خالد انا ماستخدم الا يد وحدة و صعب اغير
افففففففففف
انا بضيق = طيب قلتلك خلك جاهز ليـ
وقطع علي رنين جوال خالد
القيت نظرة عليه وانتبهت ان شاشة الجهاز مصلحها
( مامي يتصل بك )
ضحكت هههههههه حلوة مامي هذي
تذكرت مامي انا
صح وش صار على امي مو تقول خلود انها المفروض تجي للشرقية الاسبوع اللي راح ,,, انا انشغلت باللي صار ,,, لازم اسأل خلود لازم
طلع خالد من الحمام وقرب عندي ,,, وطلع بلوزة من الكيس اللي بجنبي على السرير
انتبهت ان اللزقة الكبيرة ماهي عليه والخياطة اللي بصدره تصيبني قشعريرة كل ماشفتها
قمت و مديت يدي ومررت اصبعي على الخياطة اللي بصدره
انا = شكلها يخرع
نزل خالد نظره يشوف الخياطة
خالد = تبي اقولهم يسولك وحدة مثلها
شهقت وضربت راسه
انا بعصبية = فال الله ولا فالك
خالد = ههههههههههههههههه
لبس خالد البلوزة بصعوبة وخاصة كم اليد اليسرى
انا بضيق = يله والا عاجبك ريحة المستشفى
خالد = طيب ساعدني وسكر ازارير البلوزة انت
انا = اعتمد على نفسك
خالد = مالك عليك
خلص خالد اخيرا ,,, واخذت كيس الادوية ورفعته اوريه خالد
انا = شف ماهو صاحي دكتورك ,,, كل هذي حبوب وعلى وش .؟ ,,, على كم جرح
اخذ خالد الكيس مني
خالد = هذا انت قلتها ماهو صاحي
طلعنا من المستشفى وانا فرحان بطلوع خالد بالسلامة ,,, وطوال الطريق اسولف معه وانا اسوق ,,, التفتت لخالد لقيته يطالع الدريشة اللي بجنبه وسرحان
انا بابتسامة = وش فيك لا يكون زعلان لانك طلعت من المستشفى هههههههه تبيني ارجعك
التفت لي وابتسم
خالد = ماني زعلان ولا شي
انا بابتسامة = طيب ليه سرحان ,, بأيش تفكر .؟
التفت خالد مرة ثانية للدريشة اللي بجنبه
خالد بهمس = مافكر بشي
انا = اممممم اقول كيف صلحت شاشة جوالك وانت بالمستشفى ,, والا احد صلحه لك .؟
التفت لي خالد مرة ثانية وابتسم
خالد بابتسامة = صالح اخذه مني ووداه يصلحونه
التفتت له متفاجئ
انا = صالح صالح ماغيره .؟
خالد = ايه
طالعت قدام اقلب المسألة براسي وشلون صالح يصلح جوال خالد ,,, وش صاير بالدنيا
التفتت لخالد ماني مصدق
انا = يمكن محمد اخو صالح .؟
توسعت ابتسامة خالد
خالد = لا ,,, صالح ماغيره
التفتت قدام وسكتت ,,, غرييييييييبة صالح ,,, وابتسمت يوم تذكرت كيف تفاجأ صالح يوم عرف بتوبة خالد وابتعاده عن رفقاء السوء ,,, ويوم قال لنا ابراهيم وحنا بالمدرسة اننا لازم نكون حوالين خالد نسانده على التوبة خاصة بعد ماعرفوا انهم يلاحقونه ويمكن يرجعون له مرة ثانية كان صالح هو اكثر واحد منا معصب على بدر وربعه واذكره يوم يقول لنا وحنا بالمدرسة
صالح بعصبية = ليتهم يطيحون بيدي لاكسسسسسسر عظامهم الكلااااااااب
انا وابراهيم وماجد تفاجأنا من عصبيته خاصة ان المتضرر خالد اللي هو صالح بنفسه دايم يتهاوش معه
ماجد بطرف عينه = الله الله كل هذا عشان خالد ,,, طيب انت دايم تكفخه وماتمر ساعة الا وانت وخالد متهاوشين
تلعثم صالح وقال يرقع
صالح = ايه ,,, أأأ ,,, انا غير ,,, انا بس يحق لي اتهاوش معه ,, ماهو قريبي .؟
ضحكنا عليه وهذاك اليوم كل شوي نعيد كلمته ونستهزء فيه
التفتت لخالد اللي سرح بعيد عني وهو يطالع قدام
انا بابتسامة = شفت يوم اقولك صالح طيب
التفت لي خالد وبعدها ابتسم
خالد = ههههه يمكن
وصلنا بيت ابو عبد الله ونزلت قبل خالد ورحت للباب اضرب الجرس وخالد الى الحين ينزل بهدوء وببطئ بسبب الجرح اللي بصدره صارت حركات خالد بطيئة
فتح لي الباب صالح
مدري ليه ضحكت على طول يوم شفت صالح
صالح مستغرب = شايف مهرج الاخ على وش تضحك .؟
انا بابتسامة = احم ,,, لا ولا شي
التفت صالح يشوف خالد اللي قرب عندنا
صالح باستهبال = اوووووووووه حبيبتي شو هيدا المكياج بيجنن
قطب خالد حواجبه مستغرب
خالد = مكياج .؟
مت ضحك عليهم صالح يقصد الكدمات والخدوش اللي بوجه خالد ,,, أشرت لخالد افهمه يعني الكدمات
ابتسم خالد يوم فهم عليه
خالد = كلو لعيونك حبيبي
ضحكت اكثر على تعليق خالد
دخلنا البيت ورحنا للمجلس ,,, وقبل نجلس جانا ابو عبد الله وهو فرحان بطلوع خالد
راح له خالد يسلم عليه وحب راسه
ابو عبد الله والفرحة بوجهه سبحان الله امس كيف واليوم كيف
ابو عبد الله = هلا والله بوليدي ,,, الحمد الله على سلامتك ,, مأجور وانا ابوك مأجور ,,, تعال ارتاح
ومسك يد خالد يبيه يطلع من المجلس
خالد = ابجلس هنا ياخال
ابو عبد الله = لا لا رح لغرفتك وانا ابوك ,,, انت تعبان ولازم ترتاح الله يرضى عليك
خالد = لا ,,, مانيـ
ابو عبد الله = تعال الله يصلحك تعال
انا = خالك معه حق رح لغرفتك
بعد ماصرينا عليه رحنا للملحق وسدحه ابو عبد الله غصب على السرير
اخذنا شوي وبعدها اذن لصلاة المغرب وطلعنا انا وصالح وابو عبد الله نصلي ,,, وبالمسجد شفت ابراهيم وكان هو الامام
فرصة لازم اعلم ابراهيم واقوله عن توعد خالد لبدر وربعه وانه ناوي يروح للرياض الاسبوع الجاي
بعد الصلاة والحمد الله تحسن ابراهيم بالإمامة ,,, صار مايركبك ولا شي ,,, عادي بالعكس صوته احلى من اخوه فايز
طلعت من المسجد ووقفت انتظر ابراهيم يطلع
عشر دقايق وهو طالع ,,, رفعت صوتي اناديه
انا = ابراهيم شوي ابيك
التفت لي وجا
ابراهيم = هلا خالد ,,, يقول صالح انك رايح تطلع خالد من المستشفى ,, طلعوه .؟
انا = ايه
ابراهيم = زين ,, الحمد الله على سلامته ,,, بغيت شي .؟
انا = ابراهيم عندي اخبار ماتسر
تغيرت ملامح ابراهيم وسكتت ينتظرني اكمل
انا = ابراهيم خالد قالي امس ان الشباب اللي اعتدوا عليه سهرانين باستراحته وخالد معصب منهم وسمعته يتوعدهم والمشكلة انه ناوي يروح للرياض الاسبوع الجاي
طير ابراهيم عيونه فيني
ابراهيم بصدمة = صاااحي هذا .؟
انا = جاك العلم ,,, ابراهيم تكفى رح معه للرياض اخاف يتهور
ابراهيم = اصبر اصبر خلني افهم اول ,,, الاستراحه لأبو خالد والا لخالد نفسه ,,, اذا كانت لأبوه يعلم ابوه احسن عشان مايدخلونها مرة ثانية
انا بحزن = لا للأسف الاستراحة لخالد
ابراهيم = ماشاء الله عنده استراحة
حركت راسي باية ,,, سكت ابراهيم يفكر شوي
ابراهيم = لازم نعلم الضابط
انا = ماراح نستفيد شي ,,, هم بالرياض والضابط شغله هنا ماله دخل بالرياض
ابراهيم = هذي المشكلة ( وسكت يفكر ) سمعته يتوعدهم ,,, وش قال بالضبط .؟
انا = يقول ابدفعهم الثمن ومدري ايش وبعدها على طول قال ابروح للرياض ,,, واضحة يابراهيم
ابراهيم معصب = الصراحة خالد يبي من يعطيه كف يرجعه لعقله
انا بتنهيده = خالد اخذ من الكفوف لين قال بس
ابراهيم معصب = ابو عبد الله امس مثل المجنون يبيه يدرس بمدينة ثانية وهو بيروح لهم بنفسه
انا = ايه انا قلت كذا بعد ,,, ابراهيم شسوات .؟
سكت ابراهيم شوي
ابراهيم = ماتقدر تروح معه انت .؟
انا = الصراحة لا مااقدر اترك اخواني مرة ثانية ,,, بس اذا كنت ماتبي تروح انت ,,, آمري لله ابحاول اروح معه
ابراهيم = امممم خلاص انا ابروح ونشوف عقله وين يوصله
انا بتحذير = بس تكفى ابراهيم لا تقوله اني انا اللي علمتك حط نفسك انك تبي تخاويه كذا بس بدون سبب او حط نفسك ان عندك شغل بالرياض وتبي تخاويه
ابراهيم = ايه اكيد طبعا ( وتنهد ) الله يستر
**************************************
**************************
******************
************
******
