الموضوع: رواية خوف من الحب

عمر دخل للصاله .الي كانوا اهله مجتمعين فيها .
رهف: هاه ليكون تركت منور مع طلال وحدهم
عمر: ههههههههه لا طبعا ليه منور ما جاتكم
فوزيه: لا
عمر: غريبه لها مده طالعه
رهف: اكيد فوق عن اذنكم بروح الحق عليها واخذ الاخبار
وقامت ركض رايحه لفوق.
سالم: هههههههههه هالبنت متى بتعقل.ها عمر بشر
عمر: ايش بعد بس شكل الرجال خوش ولد
سالم: الله يكتب الي فيه الخير والصالح

وصلت فوق الا تشوف عبدالعزيز توه طالع من غرفته كانت تلهث بسبب ركضها
رهف وهي مو قادره تتكلم من سرعه انفاسها: ووينهي منيره
عبدالعزيز: ماشفتها
حطت رهف ايدها على صدها واخذت نفس طويل: طيب سارا بغرفتها
عبدالعزيز اشر على غرفته براسه : ايه. طلع طلال
رهف: ايه خلاص راح
عبدالعزيز: اها
ونزل تحت اما رهف راحت لغرفه منيره ودقت الباب ماردت عليها حاولت تفتحه بس كان مقفل وهذا الشي مو من عوايد منور ما ارتاحت رهف على هالشي دق الباب مره ثانيه وما سمعت صوت لصقت اذنها على الباب يمكن تكون بالحمام وتسمع صوت الماي الا يجيها صوت واطي .عرفت ايش هوزاد طقها
رهف: منوووووووور افتحى بسرعه
محد رد
رهف: بتفتحين والا انادي امي او اخذ منها الماستر كي
سمعت حركه تقرب من عند الباب وصوت القفل وهو يدور .بعدين الحركه وهي تبتعد . مدت يدها وحركه مقبض الباب وتفتحته. وعلى طول عيونها مسح الغرفه بسرعه تدور منيره شافتها منسدحه على سرير على جنب بس وجهها مو واضح .عرفت ان الموضوع كبير منور ما تسوي هالحركه الا اذا كان في شي. قربت من السرير وجلست عليه مدت يدها وحطتها على ذراع منيره .
رهف: منور ايش فيك
اعتدلت منيره وجلست وهي تمسح الدمعه الي كانت على خدها .وشافت رهف بعيون غرقانه دموع
رهف: خرعتينى منور ايش فيك حبيبتى
ومن غير توقع رمت منيره نفسيها على رهف وقامت تصيح ضمتها رهف .وهي تحاول تهديها
رهف بصوت كله طمانينه: خلاص منور خلاص حبيبتى مافي شي يستاهل صياحك .
ردت عليها منيره بنشيج صياح
رهف: يوووه شكل الموضوع كبير ليكون المقرود ماعجبه شكلك ورفضك
ما قدرت منيره وضحكت وهي تصيح بنفس الوقت
رهف: ايه كذا اضحكي
بعدت منيره عن رهف . واخذت المنديل الي مدته رهف لها عشان تمسح دموعها
منيره بصوت لازال اثر الصياح فيه: رهوف ترى ما فينى شي اتركينى بس
رهف: لالا تعالى من جد ايش فيكشكله مو حلو على الطبيعه
منيره: وانا شفته
رهف: طيب انتى ما عجبتيه وما عاد يبيك
منيره بحسره: يا ليت
رهف: يوووووووووه منور
منيره: رهف انا مابي اتزوج
رهف: طيب ليييه
منيره: بس كذا مابي
رهف: اكيد في سبب
منيره: مابي اترك بيت اهلى مابي اترك امي وابوي
رهف: بس هذا مصير كل بنت
منيره: ادري. بس الزواج شقى مو سعاده
رهف: ليه تقولين كذا
منيره: انتى ما تشوفين سارا . ترى سارا مو الصديقه الي اعرفها نظره غريبه صارة ساكنه عينها يمكن انتى ما لاحظتى تغيرها بس انا لاحظت والمشكله انها ما تقدر تفضفض لي مثل اول لانى الحين اخت زوجها
رهف: بس انا الاحظها سعيده .
منيره: يتخيل لك .صدقينى ماهي سعيده وعزيز اخونا وحنا نعرفه مطنش سارا ولاهو معبرها ما تذكرين كلامه باول ليله جاو من شهر العسل
رهف: انتى ليه تقولين هالكلام
منيره: هذا الحقيقه وانا مابي يصير مصيري مثل سارا
رهف: يا مجنونه عزيز غير وطلال غير .
منيره: ادري .
رهف: الا تعالى ليه قمتى تصيحين الحين
منيره: تبين الصراحه مادري حسيت موضوع الزواج صار شي حقيقى والا يمكن عشانى كنت مرتبكه من اول ما دخلت المجلس وكان ودي اصيح . فاول ما طلعت مادري ليه طاحت منى دمعه والله رهف ماودي اتزوج الحين مانى مستعده
رهف بتفكير: طيب ارفضى مو احسن ترفضين الحين ليه ما تقولين لاهلى تراك توك صغيره
منيره: لا مابي ارفض بس خله ينتظر
رهف: اقول انقلعى ماعندك سالفه
منيره: اتكلم جد
رهف: المهم قولى لى كل شي بالتفصيل شلون شكله طويل والا قصير
منيره: والله ما امدانى اشوفه ولا شفت شي صدقينى
رهف: يوووووه انتى ما تبردين القلب ابد .
منيره: الا وين هي سارونه
رهف: بغرفتها .
منيره: عزيز معها
رهف: لا شفته يطلع
منيره: اوكي خل نروح لها وهناك اقول كل شي
رهف: هههههههههههههههههههههههاااااااااااي
منيره باستغراب:على ايش الضحك
رهف: على صياحك الي قبل شوي من جد ماعندك سالفه
ومن غير توقع ضرب منيره راس رهف بالمخده
رهف: ااااااااي
منيره: الشرهه مو عليك الشرهه على الي يفتح لك قلبه يالهطفه
رهف وهي تلمس راسها: وجع تراك عورتينى
منيره: تستاهلين اروح لسارا احسن لى




يـــتـــبـــع

الساعه 6 ونص الصبح من يوم الخميس والكل بالبيت نايم السكون عام المكان . اخترق صوت التليفون الهدوء. انتبهت فوزيه . مين الي بيدق علينا بهالوقت رفعت السماعه وبصوت كله نوم
فوزيه: الووووووووو
الطرف الاخر: الوو هلا عمتى
فوزيه: مين احمد
احمد: ايه عمتى انا احمد
فوزيه اول ما سمعت صوت احمد قامت من الفراش بحيث قومت معها سالم وطار منها النوم
فوزيه بخوف: نوره فيها شي. ليه داق الحين وانت وين؟
احمد: شوي شوي علي عمتى بس توقعت انك قايمه وحبيت ابلغك نوره مافيها الا العافيه وتراها جابت ولد
فوزيه ما قدرت تمسك نفسها وقامت تصيح: احلف يا احمد
خاف سالم يوم شاف زوجته تصيح اكيد الموضوع كبير .
سالم: خير ايش صاير
هزت فوزيه ايدها يعنى اصبر شوي
احمد: اكيد عمتى. واخيرا جا عبدالرحمن
فوزيه: متى ولدت طيب
احمد: توها طالعه الحين من غرفة العمليات
وكان ماي حار يكب على فوزيه غرفة العمليات
فوزيه: لليييييييه ماهي طبيعيه
احمد: لا ياعمتى بس نوره بخير لا تخافين
سالم: ايش السالفه
حطت فوزيه ايدها على السماعه: نوره جابت ولد
سالم: الحمد لله وليه تصيحين يا مره
فوزيه: يا حياتى ضناتي ولدت قيصري
سالم: المهم سلامتها
رجعت ام عمر لاحمد: اقول احمد انتوا باي مستشفى
احمد: بالمانع الجديد الي بالخبر
فوزيه: حنا جايينكم الحين
احمد: لا اصبري شوي لين تقوم نوره من البنج
فوزيه: لا ابد . بس انت قول باي غرفه
بعد ماقال لها احمد رقم الطابق والغرفه سكرت ام عمر التليفون
فوزيه: يالله سالم خل نروح المستشفى
سالم: تو الناس
فوزيه: لا سالم لازم اتطمن على بنتى يا حياتى انتى يا نوره عمليه مره وحده هالولد ما رضى يجي الا بعمليه
سالم: الله يهديك فوزيه البنت مافيها الا العافيه
فوزيه وهي تصيح: لازم اشوفها عشان اتطمن هذي عمليه يابو عمر
سالم: خلاص قومي واجهزي ولبسى عباتك وخل نروح
.

يوووووووووه الواحد ما يقدر ينام بهالبيت . لازم هالازعاج والقرف سرك هذا والا حيقة حيوان قامت من فراشها وشافت الساعه توها 11 ونص الصبح حتى بيوم الخميس الواحد ما يقدر يرتاح . انا ما صدقت افتك من شي اسمه جامعه وقومه الصبح بدري فتح باب الغرفه الا تشوف حصه وهند ومي يلعبون يناقزون .وضحك هند عالى بشكل مزعج
رهف بصراخ: هيييييييييييييييييييييييييييييييه انتوااااااااااا
اول ما شافت هند خالتها . ركضت لها .
هند: خااااااالتى
رهف: وجع اقول ذلفى عن وجهي ابي انام
انصدمت هند من خالتها. واهتز ذقنها وتنفجر بالصياح
رهف: يوووه وانا فاضيه لكم خلاص هنوده خلاص حبيبتى انا اسفه . بس انتى اسكتى تبين حلاوه
الكلمه السحره الي خلت دموع هند تجف بقدره الله ولا كنها قبل شوي تصارخ وتصيح .
رهف: اااااااااه منكم ومن امكم ايش عندها تجيبكم الحين
حصه: ماما ما جات معنا
رهف: بعد تركتم تغثونى لوحدي
حصه ببرائه ولا فهمت على خالتها: لا ماما بالمستشفى مع البيبي
رهف: نوره ولدت والللللللله .ووين امي
مي: جده وجدي راحوا لعمتى
رهف: ومنيره
مي: مادري ما شفتها
رهف: طيب كملوا لعب
وتوها برجع غرفتها الا تمسكها هند من بيجامتها
هند: خالتى رهف ابي حلاوه
رهف: اه منك يالله تعالى
حصه تلحق اختها: وانا بعد
رهف وهي تشوف مي: وانتى ما تبين .؟ يالله تعالوا الله يعينى بيدي تشغيل البيبي ستر

يوم جا العصر وبعد ما ارتاحت نوره شوي وافاقت من البنج راحت رهف ومنيره وسارا مع عبدالعزيز يزورنها بعد ما مروا باتشي واخذوا منه شاكليت ومن جاردينا باقه روز احمر كبيره . جلسوا عندها لبعد المغرب ومروا على دحومي الصغير عشان يشوفونه .وبسبب ولادة نوره تكنسلت عزيمه العشا الي كانوا سارا وعزيز ناوين عليها . حصه وهند جلسوا في بيت اهل امهم . وبعد اسبوع طلعت نورا من المستشفى لبيت اهلها عشان تتنفس هناك.

.


يــــتــــبـــع

الفصل كان فاضي ومظلم كل الطالبات طلعوا للفسحه مر شهرين على بدء الدراسه دخلت فصلها عندها كذا دفتر تبي تصلحه قبل لا تبدا الحصه الجايه . فتحت النور وجلست على مكتبها امسكت اول دفتر الا تسمع صوت انين تركت الي في يدها وركزت على الصوت عشان تعرف مصدره لاحظت انه يصدر من زاويه الفصل. وقفت وقرب شافت جزمه صغيره طاله من تحت الطاوله . لفت ورى الطاوله كانت جالسه على الارض وراسها بين ركبتينها الي رافعتم وضامتهم بايدينها . وشعرها القصير مره مو موضع راسها ابدا قربت من عندها وجلست جنبها كانت عارفه ان مي حست فيها . ومع كذا ما تكلمت لصقت منها لدرجه ان كتفها لامس جسم مي الصغير ومن غير ما تتكلم مررت ايدها على شعرات مي القصير .ظلت مي تصيح وكتوفها تهتز من صياحها . ومع الوقت حست فيها تهديشالت ايدها من على شعرها وحطتها على كتفها وقربت الجسم الصغير من جسمها اكثر حركه ما توقعتها مي ابدا حست بتصلب جسم البنت بين ايدها ومع كذا شدت عليها وقربتها اكثر هنا ارفعت راسها عشان تشوف وجهه معلمتها ابتسمت لها جواهر ومدت ايدها الثانيه لوجه مي بالاول اجفلت منها بعدين اطمانت لها يوم شافتها تمسح دمعتها وابتسمت لها ابتسامه مرتجفه
جواهر: تبين تقولين لى ليه تصيحين والا لا
هزت مي راسها بعلامه لا
زاد ضم جواهر لمي ماتدري ليه تحس هالبنت قريبه منها كثير.
جواهر: انتى تحبينى يا مي؟
هزت مي راسها
جواهر: ما سمعتك
مي بهمس: ايه
وقامت جواهر من مكانها رجعت لمي وبايدها ورقه وقلم حطتهم بالارض قبال مي شافتها بنظره حيره
جواهر: خذي القلم مي
مافهمت عليها بالبدايه ابتسمت لها جواهر
جواهر: مو قلتى تحبينى
هزت مي راسها
جواهر: طيب خذي القلم
بعد ما مدت مي يدها واخذت القلم رفعت راسها عشان تشوف جواهر الي كانت واقفه
جواهر: ايه حبيبتى مو لازم تقولين لاحد ايش فيك بس هذي الورقه قدامك سوي فيها الي تبين انا بجلس هنا واذا خلصتى قولى لى .
وامسحت ايدها على راس مي الصغير وراحت لمكتبها . فكرها ما كان معها ما قدرت تصلح ولا دفتر طول الوقت انظارها على مي لاحظت التردد والخوف الي كانت عايشته البنت الصغيره ومع كذا انتظرت لازم تعبر عن نفسها لازم تترك لها فرصه وبايد خايفه ترتجف مدتها للورقه ورسمت الخط الاول وفوقه الثانيه انقلبت الخطوط الى خرابيش وزاد الضغط القلم على الورقه لدرجه شوي وتنشق ازداد تنفسها وكانها بوسط عراك مع الورقه وزادت حركة ايدها
مي : ما احبك ما احبك
ازداد صوتها مع كل كلمه تنطقها وانقلب الصوت لاصراخ ردة فعل ما توقعتها جواهر خلتها تسمر عيونها على مي
مي: ما احبك . اكرهك انا
تحول الصوت لصياح قامت على اثره جواهر من ورى مكتبها ركضت عند مي . كانت مي لازالت تشخبط على الورقه وهي تصرخ وتصيح بنفس الوقت دموعها ماليه عينها . وخدودها غرقانه بالدموع خصلات شعرها القصيره ملتصقه بوجهها من دموعها . والورقه تمزقت من شده ضغط القلم على الورق وجواهر الي كانت واقفه وحيرانه بنفس الوقت ماكانت تتصور ان هالشي الي عطته مي بيخليها تنفجر لهالدرجه مين الي ما تحبه ايش فيها البنت ما قدر قلبها يصبر على منظرها الي يقطع القلب نزلت لها ورفعت ايدها عن الورقه . اخذت راسها الصغير ودفنته بحضنها . وعلى الطول اليدين الصغيرين تمسكت بكتف جواهر باقوي ما عندها والصياح بدل ما يقل زاد . اخذت ايد جواهر تمررها على ظهر مي وتهمس لها تهديها والبنت متعلقه فيها بكل قوتها .
مي بين صياحها: ليه اتركتنى
جواهر بحيره: مين
مي: كل البنات عندهم الا انا راحت وتركتنى بروحي
وزاد صياحها ماقدرت جواهر تصبر اكثر من كذا وضمت مي لها لدرجه اكبر ياربي هالبنت تقطع القلب
جواهر: اششششششششششش حبيبتى
تمت فتره كانها ساعات ومنظر جواهر ومي على ارض الفصل مي مرميه بحضن جواهر وجواهر تربت على ظهر مي ومسح راسها . وتهمس لها بكلمات تريحهاتحول الصياح لشهقات .بعدت جواهر راس مي المدفون بصدرها ورفعت راسها كانت عيون الصغيره منتفخه مدت يدها تبعد الشعر الي لاصق بخدودها وتمسح دموعها . شافتها مي بنظرات انطقت بالي ما نطقه لسانه منظر ذكرها بطفله صغيره كانت هي بيوم من الايام طفله عانت من حرمان الام بسن صغير وفقدت الحنان الي يحتاجه كل انسان بالدنيا وهنا فهمت كل شي. مافي احد يصيح بهالشكل وهو بهالعمر الا اذا كان .
ابتسمت لها جواهر ابتسامه طفت النيران المشتعله بصدر البنت رمت مي جنب راسها على صدر جواهر كان شكلها تعبان مره
جواهر بحذر لانها خايفه ترجع مي للصياح: طيب ليه ما تحبينها
مي ولا زالت بحضن جواهر ومن غير ما تشوفها كان صوتها فيه اثر الصيح صوت صغير بس مبحوح
مي: هي ما تحبنى هي راحت عنى
جواهر: الله اخذها
مي: ايه هي ما تحبنى يقول بابا ان ربي يبيها عشان كذا راحت لو تبينى ما راحت
بدى صوت مي يرتجف علامه ان صياحها قرب
جواهر: حبيبتى مي اششش لا تصيحين .اقول لك قصه عن بنت صغيره اعرفها مثلك.
هزت مي راسها الي بحضن جواهر
جواهر وهي تزيد ضمها للصغيره: في بنت صغيره تحب امها وهي تحبها ومره قامت الصبح ولا شافتها دورتها بكل غرفه بالبيت . اسالت ابوها والكل يقول لها انها راحت فوق راحت لعند ربي ماكانت تعرف ايش يعنى ربي لانها صغيره مو مثلك الحين . جلست تصيح وتقول ابي ماما ابي ماما . الي ان صارت تعبانه وامها ما رجعت كان كل الي عندها صورتها بعدين كبرت وبدت تكره امها لانها مثلك تقول انها اتركتنى وما تبينى بس الحين غير عرفت ان امها ماكنت تبي تروح عنها كانت تعبانه وما قدرت تصبر والي صار لها غصب عنها وعرفت بعد ان امها ولهانه ومشتاقه لها كثير مثل ماهي مشتاقه لامها ولازالت الى الحين مشتاقه وعرفت انها بتشوفها انشالله وان امها عايشه ومو ميته وانها قاعده تراقبها الحين وتحرسها بكل مكان ويوم عرفت كل هذا رجعت تحبها مثل اول لا بالعكس صارت تحبها اكثر لانها بالاول بس كانت تحبها بس الحين هي تحبها ومشتاقه لها بعد وهي تعرف الحين ان امها قريبه منها اكثر من اول تعرفين ليه .
مي الي كانت مندمه: ليه
جواهر ودمعه تسيل من عينها : لانها عايشه هنا
واشرت على قلب مي .
جواهر: صارت الحين اقرب لها من اول والحين تقدر تكلمها باي مكان وباي وقت لانها عايشه بقلبها وتعرف انها تسمعها
مي: يعنى ماما بقلبي
جواهر وهي تمسح دمعتها عشان مي ما تنتبه لها: ايه عايشه هنا وبتظل عايشه على طول ومن بعد كذا ما صار تصيح البنت ابد على امها لانها تعرف ان هالشي يضايق امها وهي ما تبيها تتضايق
مي: يعنى لو صحت ماما تتضايق
جواهر: أي بتعرف انك حزينه وهي تحبك ما تبيك تصيرين حزينه
مي : واذا اشتاقت لها البنت وجاتها الصيحه ايش تسوي
جواهر: ما تصيح تكلمها وتقول لها انها مشتاقه لها كثييييييييير وهي راح تسمعها
مي: انا مشتاقه لماما كثير ودي المها (اضمها)
جواهر وهي تضم مي من جديد: وهي بعد مشتاقه لك بس لازم ما تزعلينها وتصحين
مي رفعت راسها: والحين البنت ايش تسوي
جواهر ابتسمت لمي: البنت الحين كبرت وصارت كبيره وكل يوم تكلم امها وتقول لها ايش سوت
مي: يعنى لو كلمتها بتسمعنى
جواهر: ايه بس ماراح ترد عليك راح تسمع بس
مي: ليه ما ترد
جواهر: لانها بقلبك والقلب ما يتكلم .
مي: بكره البنات كلكم بيجون امهاتهم الا انا . بعدين بيعرفون ان ما عندي ام
هنا عرفت جواهر سبب صياح وبكاء مي . اليوم الصبح وزعوا على الطالبات اوراق استدعاء الامهات للقاء الي يتم بين الام والمعلمات اذكرت جواهر كلمتها للبنات
جواهر: لا تنسون اليوم تعطون الورقه هذي مييين
الفصل بصوت جماعي وعالي: ماما
مع ان مي ما جاوبت وكانت بعينها نظره الانكسار بس هالشي ما لفت نظر جواهر شكل البنت تاثر مره وانتظرت اول فرصه تفضى فيها عشان تعبر عن شعورها.اخذت تعاتب جواهر نفسها المفروض تعرف طالباتها زين هالشي مو فخر لها خصوصا ان شهر مر عليهم وتوها تعرف بفقدان مي لامها لفت نظرها شي . كانت بقايا ورق مشقوق مقطع مرمي تحت الطاوله الله يا مي الي في قلبك مو بس حرمان لا قهر من غيرك من البنات
جواهر: مي حبيبتى مو كل البنات يجون امهاتهم ومو لازم ماما تجي عشان تسال عنك بالمدرسه مين جا معك اول يوم
مي: عمتى منيره
جواهر: خلاص تجي عمتك هنا
مي: بس انا ما بي عمتى ابي ماما
جواهر: مي ايش قلت لك انا قبل شوي
ينفح الباب بقوه ويتدافعون البنات للفصل بعد ما سمعوا جرس المدرسه يدق يعلن انتهاء الفسحه المدرسيه
مناير: ابله جواهر ايش تسوين بالارض مع مي
تضايقت جواهر من الانقطاع الي تم . ماكان بوقته وتجمع الطالبات الصغار حولهم ضايقها وقبل لا ترد قامت مي من حضنها وقالت
مي: انا طحت وتعورت
ابتسمت جواهر وقامت توقعت من مي الابتسامه اذا لفت لها بس الوجهه الي قابلها فاجاها كثير رجعت تعابيرها مثل اول رجع الغموض لوجها الصغير ولا كانها البنت الضعيفه الي كانتها . راحت لمكانها . وجواهر لمكتبها وبدت الحصه الرابعه .




يــــتـــبــــع


-

ام عمر: ها يا نوره تبين شي
نوره: وين يمه
ام عمر: بروح للملحق عند ابوك واخوانك
نوره: بتقولين لهم على طلب خالتى مريم
ام عمر: والله مادري
وبهالوقت قام دحومي الصغير يعفس وجهه وشوي يصيح
ام عمر: شوفي ولدك رضعيه شكله جايع
اخذت نوره ولدها من سريره الصغير الي بجنب سرير امه .
نوره: تهقين يمه ابوي بيوافق
ام عمر: ماقلت له عشان ادري.تبين نادي لك وحده من البنات
نوره: لا ما يحتاجيكفينى هالقمر
ام عمر: أي قمر كتله لحم حمره
نوره وهي تبوس ولدها: حرام عليك شوفيه كله ملح على ابوه
ام عمر: ههههههه الله يخليهم لك وعقبال ما اشوف اولاد اخونك
نوره: أي اخوان قولى عزيز ايه بس عمر مستحيل
ام عمر: وليه مستحيل تاليه يوافق ويفرح قلبي بولده
نوره: اميييييين
منيره وهي داخله الغرفه: وينه وينه هالجنى الصغير ما شبعت منه اليوم
وقربت من سرير نوره
نوره: اتركيه خل ارضعه
منيره: لا ما يصير بعدين بينام
ام عمر: هذا منيره عندك اذا بغيتى شي قولى لها
منيره: ليه يمه وين بتروحين
ام عمر: بروح لاخوانك
منيره: بجي معك
ام عمر: لا خلك عند اختك
وطلعت فوزيه رايحه للملحق كان عمر وعبدالعزيز مع ابوهم هناك بعد ما طلع من عندهم احمد من نص ساعه.اول ما اقبلت لهم فوزيه قاموا العيال وباسوا امهم على راسها وجلست بينهم
سالم: اشوفك يا فوزيه جالسه بين عيالك وتاركتنى
عمر: هههههه تغار يبه
فوزيه: هم الي جرونى والا انا لى غنه عنك؟
سالم: ايه اغار هذي الغاليه
فوزيه: خلاص بو عمر
عبدالعزيز وعمر وسالم: هههههههههههه
فوزيه: الا بغيتكم بموضوع اليوم ام خالد جايه وطالبه منى طلب
سالم : خير
فوزيه: الخير بوجهك ابد تقول طلال يبي يكلم منيره ايام الخطبه
عمر : بس هو ما بعد يملك عليها
فوزيه: ادري وقلت لها هالشي ما يصير مير تقول انهم سائلين الشيخ وهو يقول اذا الخطبه منتشره وبعلم الاهل يجوز
عمر: أي هالخرابيط هذي
عبدالعزيز: أي خرابيط عمر مو يقولين شيخ
عمر: يعنى انك موافق
عبدالعزيز: مو احسن لها تتعرف عليه
عمر: وليه انت ما كلمت سارا قبل ما تملك عليها
عبدالعزيز : ما كنت ابي ولا تنسى انا وضعي غير
عمر: وهالطلال لازم يبي سخافه مالها داعي كلنا ما كلمنا قبل لا نتزوج لا لا ما يصير
فوزيه: انا جايه اخذ رايكم مو تتهاوشون
سالم: لا وبعد قاعدين يتكلمون ولا كانى موجود من الحين بتستلمون مكانى
عبدالعزيز: ايش دعوه يبه انت الكل بالكل
عمر: اكيد بس هالحركات ما نبيها
سالم: حنا ما امدانا نسمع الكلام عدل من امكم
عمر: يبه ايش نسمع مابقى الا يطلع معها بعد
عبدالعزيز: هدي ياعمر ماله داعي كل هالعصبيه
فوزيه: انا ماكانت موافقه وقلت للمراءه بس هي اصرت وقالت اذا من ناحيه الشرع نسال لنا شيخ
عبدالعزيز: من ناحيتى انا موافق
وقام من جلسته
عبدالعزيز: عن اذنكم الحين بروح
سالم : وين
فوزيه: مابعد خلصنا
عبدالعزيز وهويبتسم و يطالع عمر الي كان معصب : عنى موافق وبالعكس عشان ما تتوهق بعد الزواج وتتطلق
فوزيه: بسم الله على بنتى فال الله ولا فالك
عبدالعزيز: ههههههه يالله تصبحون على خير
الكل: وانت من اهله
طلع عبدالعزيز ولا زال الحال بالغرفه يدور بعد ما دخل البيت وهو راقي من الدرج سمع اصوات بالغرفه الي فيها نوره وحب يدخل يشوفها لانه ماشافها اليوم
نوره: اشوي اشوي عليه لالا لا تضغطين عليه بقوه اييه حطي ايدك كذا
رهف: ههههههههه. افا يا سوير ماتعرفين تشيلين بزارين
سارا: لا عيال خوانى مااقرب منهم الا اذا صاروا يجلسون ولاعمري شلت بزر بهالعمر خلاص نوره خذيه مابي اشيله خفيف مره اخاف يطيح
نوره: تعلمي يالله شدي حيلك وجيبي لعبدالرحمن ولد خال يلعب معه
عبدالعزيز: ومين قال ان ولدي بيلعب مع ولدك.
اول ما دخل عبدالعزيز الغرفه وقف بمكانه ما تحرك كانت نوره منسدحه على السرير ورهف جالسه على طرفه اما منيره قاعده قبال التلفزيون تقلب تشوفه وسارا واقفه قبال نوره وهي شايله ولدها كل هذا مالفت نظره الا منظر سارا وهي ضامه عبدالرحمن لصدرها اثر فيه كثير ونظره الرعب الي ساكنه بعينها خايفه ان الولد يطيح من ايدينها واحمرار وجهها من كلمات نوره لها كل هذا فجر مشاعر جديده بداخله بعد ما قال الي قاله الكل عليه ابتسمت له سارا بتلقائيه مثل عادتها
نوره: وليه طيب ما بيلعب
دخل عبدالعزيز ووقف عند سارا نزل شوي عشان يشوف عبدالرحمن ما كانت امه لافته لابس قميص الاطفال حديثى الولاده الطويل الي كله ازرار كان يلعب بايدنه بالسما وسارا شايلته بكل حذر. مد عبدالعزيز ايده وحط اصبعه الكبير بايد دحومي الصغيره .
عبدالعزيز: تعرفين ولدي ماراح يلعب مع أي احد
نوره: وليه ولدي أي واحد
عبدالعزيز: يا حليله نوره مو كأن ولدك صغير مره ظفر اصبعي اكبر من يده عطينى اياه سارا
مدت له سارا الولد وشاله جلس على الكنب والصغير بحضنه.
نوره: هو اقل عيالى وزن حصه وهند كلهم جبتهم وهم حول 3وننص الا هو 3
منيره: بس يهبل والا اشرايك عزيز
عبدالعزيز: يعنى لو كان يشبهي يمكن
نوره: حرام عليك عزيز
رهف: هههههههه تركيه محتر خل يجيب ولد مثله بعدين يتكلم
عبدالعزيز: اكيد بجيب واحد احلى منه من وين له الشيانه وانا ايش حلاتى وزوجتى قمر
وهو يتكلم كان يشوف سارا الي من اول ما دخل عبدالعزيز وهي مو على بعضها ايش جايه اليوم طالع طيب لا وبعد يتغزل فينى قدام خواته اول مره يسويها . كان قاعد يشوفها ويبتسم لها ودحومي عنده وبهاللحظه تصورت الي بحضنه ولده ولده وولدها كانت غريزه الامومه متملكتها الحين كثير ياترى متى يجي اليوم الي بيكون عندي عيال عيال من الانسان الي احبه واعشقه ردت لعبدالعزيز الابتسامه وخدودها حمرت من الخجل من ان زواجهم مر عليه فتره مو قليله الى الحين تستحي منه يمكن لقلة وجوده حولها دايما.
منيره: الله الله ياعينى على الي يمدحون
رهف: لا وياليتها عاد مثل ما يقول بذمتك هذي قمر
عبدالعزيز: ههههههه ليه شايفتها مثلك
قام عبدالرحمن يصيح ووزادت حركته بحضن خاله
عبدالعزيز: يووه شكل الولد زعل
نوره: ايه منك . عطنى اياه
بعد ما عطاها عبدالعزيز : الا وينهم بناتك
نوره: نايمات فوق
عبدالعزيز: وانا بعد بنام سارا يالله نرقى فوق
رهف: توها عشر حشى دجاج تنامون الحين
عبدالعزيز: وراي دوام واليوم ما نمت العصر
نوره: انت ما نمت بس سارا نامت
سارا: لا انا رايحه يالله تصبحون على خير
منيره: لحظه سوير بقول لك شي بس مو هنا
نوره: ليه يعنى سر؟
منيره: ايه سر .
عبدالعزيز: بكره قوليه لها . يالله سارا
وطلع من الغرفه ابتسمت سارا باعتذار لمنيره ولحقت زوجها لغرفتهم



يـــتـــبـــع

-

بعد ما دخل غرفته لازال مو عاجبه الموضوع الي قالته له امه بس اتفق مع ابوه انهم يسالون شيخ المسجد حقهم اذا السالفه ما فيها شي ومنيره موافقه بحيث ما يتعدى الموضوع التليفون بس في ذاك الوقت بيوافق. فسخ الثوب ورمى نفسه على السرير كان تعبان مره ويحتاج للنوم غمض عيونه وخطوط الارهاق واضحه على جبهته سمع حركه عند الباب بعدين انفتح بهدوء وصوت خطوات تقرب من السرير حس باحد ينسدح بجنبه ويقرب من عنده الى ان لصق فيه و ذراع صغيره التفت حوله ابتسم ووهو لا يزال مغمض.
لاحظت مي ابتسامه ابوها من نور الباب المفتوح .
مي: بابا
عمر وهو مغمض: هممم
هزت مي كتف ابوها: انت نايم يا بابا
عمر: ايه
مي: بابا شلون تكلمنى طيب
عمر: نامي حبيبتى.
مي: بنام جنبك
عمر: بكيفك بس خلينى انام
وبعد فتره من الصمت
مي: بابا اليوم كلمت ماما
انصدم عمر وعلى طول يفتح عيونه ويلف وجهه على جهه مي الي كانت منسدحه وهي ضامه عروستها سوسو .
عمر وهو معقد حجاته: كلمتى ميين
مي باتاكيد: ماما
عمر شاف بنته بنظرات ليكون بنتى انجنت وانا ومادري
عمر:وين
مي: اليوم بغرفتى بعد ما رجعت من المدرسه
عمر: مي حبيبتى ماما مو هنا شلون تكلمينها
مي: لا ماما ما راحت
ضم عمر بنته لصدره: خلاص ماما ما راحت بس انتى نامي ولا تفكرين
الي استغرب منه عمر اكثر شي ان هذي المره الاولى الي تتكلم فيها مي عن امها بس ما حب يشغل بنته كثير فحب يسكر الموضوع
مي: يعنى انت تعرف انها ما راحت
عمر: نامي مي
بعدت مي عن ابوها .
مي ووجهها جدي كانها تعلم ابوها: لا يا بابا ماما ما راحت والله
عمر: حبيبتى ماما ماتت الله يرحمها
مي: ايه بس ماراحت
عمر:شلون
مي: انا كلمتها اليوم واسمعتنى
عمر: ميييي
مي: والله بابا اقدر اكلمها وتسمعنى . ابله جواهر تقول كذا
ازاددت العقده بين حواجب عمر: مين ابله جواهر
مي: ابلتى بالمدرسه
عمر يفكر شكلنا ماراح ننام الليله
عمر: ايش تقول ابله جواهر
مي: تقول ان ماما عايشه هنا .بقلبي
واشرت لقلبها
مي: وتقول انى اقدر اكلمها باي وقت وهي تسمعنى وما تبينى اصيح لانها بتعرف انى حزينه بعدين تحزن وان ماما ما كانت تبي تتركنى بس الله اخذها وهي الي الحين تحبنى .
رجعت صوره فاطمه الله يرحمها لخيال عمر. شاف وجهها بوجهه بنته بس مصغر شي بداخله تحطم ما تدرين يا مي شلون كلماتك تاثر فينى وتحطمنى . امك مو بس عايشه بقلبي امك ماليه كيانى كله وحبي لها يزداد يوم عن يوم . وكل ما اشوفك اذكر كيف كانت غاليه. ابتسم عمر لبنته وقربها زياده من عنده
عمر: ايه صح ماما تحبك وانا بعد . يالله مي نامي
مي: بس بابا اذا تبي تقول لماما شي قول لى وانا اقول لها طيب
وسعت ابتسامه عمر وحب بنته على راسها: طيب حبيبتى بقول لك
مي وباين ان النوم بدي يسيطر عليها: تصبح على خير بابا
وغرقت بنوم عميق وهي بين ذراعين ابوها



يـــتــــبــــع

-

الفصل الثامن

الجزء الثاني



بكره عنده كويز والكتاب مرمي على السرير له ساعات يحاول يدرس مو قادر يستوعب شي. المكان بدى يضيق عليه عرف ان جلسته ومذاكرته الحين ماراح تفيده يروح يشم هوى احسن له لبس ثوبه وحط الشماغ على كتفه وطلع من الغرفه . وهو مار من عند الصاله.
لطيفه: على وين رايح يمه
يوم سمع صوت امه دخل للغرفه شاف امه وابوه جالسين .قرب من عندهم وحبهم على روسهم
سلمان: انا طالع يالغاليه توصين على شي
صالح: بهالوقت
سلمان: ايه
لطيفه: تعال اجلس معنا
سلمان: عذرينى يمه بس ابي اشم لى هوا شوي البيت كاتم علي حاس نفسى شوي وانخنق
صالح: يعنى البيت هو الي مضايقك
سلمان: يبه وراي كويز بكره ابي اغير جو
لطيفه: ايش كويزه بعد ذا
سلمان: هههههه قصدي اختبار قصير
لطيفه: اها . طيب في حفظ الله لا تتاخر
سلمان : اكيد يمه يالله عن اذنكم
بعد ما طلع منهم لف صالح على لطيفه .
صالح: اقول يام محمد شخبارها سارا من زمان ما شفتها
لطيفه: أي من زمان توها قبل يومين جايتنا
صالح: المفروض تجي كل يوم
لطيفه: أي كل يوم الله يهديك يابو محمد البنت الحين مو فاضيه وراها زوج ودراسه غير ان نوره عندهم والضيوف داخلين وطالعين ما يصير كل يوم تجينا وتترك بيت رجلها
صالح: الله يوفقها انشالله . لطيفه ما كاننا زوجناها وهي صغيره
لطيفه: صالح ايش فيك اليوم .
صالح: مادري حاس بالذنب خصوصا انها ماكانت موافقه ولا سوينا لها حفل حتى بعد ما رجعت
لطيفه: ما يحتاج حفل ولا شي المهم ان الله يوفقها وعبدالعزيز خوش رجال . ياما بنات كثار سوا لهم اعراس تكلمت عنها اهل الشرقيه كلها وما استمروا بزواجهم الا كم شهر وتطلقوا المهم التوفيق
صالح: كلك درر يام محمد
لطيفه: هههههههههه صالح
صالح: يا حلوك وانتى تستحين .الا تعالى عبدالله ما شفته لي مده
لطيفه: يا حياتى هالولد من طلعتك كل يوم الساعه 7 ما يرجع الا على الخمس بعدين يرجع يطلع حتى مها ما تشوفه الشغل ماخذ كل وقته
صالح:محد قال له يشتغل لوحده والا احد يترك ابوه ويفضل يشتغل بروحه
لطيفه: تركه يابو محمد خل يعتمد على نفسه
صالح: هوما يبي يعتمد على نفسه لو يبي ما سكن عندنا بالبيت .
لطيفه عصبت شوي: ايش هالكلام
صالح: وانا الصادق والا حنا متى نشوفه
لطيفه: تركه يابو محمد خل يسوي الي يريحه والمهم التوفيق
صالح: والله انى وانا اشوف عيال سالم عبدالعزيز وعمر حول ابوهم وانا ماعندي الا محمد
لطيفه: وسلمان لاحقه
صالح: هذا اذا ما سوى سلمان مثل اخوه وتركنى
لطيفه : عبدالله ما تركك .
صالح: الله يعين بس.قومي يا مره خل ننام احسن لنا

من طلع سلمان من البيت وهو يدور بسيارته ماعنده هدف معين . المحلات خلاص سكرت . والكورنيش تقريبا فاضي. تذكر ان اليوم دقت عليه لمى وهو نايم وما رد عليها.طلع جواله وضرب رقم اعتاد يدق على بكثره الفتره الاخيره .
صوت كله نعومه ورقه: الووووووووووووووووووووووووووو
سلمان : هلا لمويا
لمى: اهليييييين سلمان وينك اليوم ليه ما رديت
سلمان: كنت نايم
لمى: توك قايم
سلمان: لا بس انشغلت شوي
لمى: تنشغل عنى حبيبي
سلمان: وانا اقدر
لمى: هههههههههههههه يمه منك ومن كلامك يجنن الواحد
سلمان: لا انا مابي حبيبتى تصير مجنونه خلا ص بطلنا
لمى: لا يا شيخ بالعكس قصدي يجنن يعنى يهبل
سلمان: لا بعد تصيرين هبله
لمى: لالالا ما فهمت قصدي . سلماااااااااااان بلا حركات
سلمان: هههههههههههه ماقلتى ايش عندك داقه
لمى بزعل: يعنى لازم يصير عندى شي عشان ادق عليك مو ممكن ابي اعرف ايش مسوي حبيبي
سلمان: الا ممكن وحبيبك تمام انتى شخبارك
لمى: انا بخير.بس متضايقه اليوم
سلمان: ليه
لمى بدلع: لانى ما سمعت صوتك
سلمان: هههههههههههههههه وتقولين انا الي كلامي يجنن
لمى: هههههههههههههههه
سلمان: لمى ابي اشوفك
لمى: هاه شلون
سلمان: ليه نسيتى انتى بايش واعدتنى
لمى: ايه سلمان انا عارفه بس قصدي وين وشلون
سلمان: يعنى انتى موافقه
لمى: اكيد.
سلمان: حلو ايش رايك بكره امرك واخذك من الجامعه
لمى: لا سلمان اخاف توهم صايدين بنت وفاصلينها
سلمان: عادي كانى اخوك
لمى: لازم يكون عندك تصريح
سلمان: انا عندي عشان اختى كنت احيانا اخذها
لمى: مادري والله . الا على طاري اختك تصدق انى الى الحين ما شفتها
سلمان: وانتى ليه مهتمه تشوفينها
لمى: بس ودي اتعرف عليها كافي انها اختك
سلمان تضايق من كلامها شوي: ماله داعي
لمى باستغراب: ليه سلمان ما ودك اعرفها
سلمان: اصلا شلون تتعرفين عليها باي صفه
لمى: على انى صديقة اخت زوجها.مع انها ما تستاهل
سلمان معقد حواجبه: انتى تعرفين اخت زوجها
لمى: ايييييه يووه من جد مالها داعي مادري شلون سارا تتحملها
سلمان: ميين
لمى: اخت زوجها مغروره وشايفه نفسها ما ادري علي ايش.بالاول انخدعت فيها وكنت اظنها طيوبه بعين طلعت على حقيقتها
سلمان: شلون تقولين عنها كذا وانتى صديقتها ومين هذا
لمى: يوووووووه حبيبى قلت لك اخت زوجها. انا مو صديقتها صديقتها بس اعرفها. بنت خالتى هي الي صاحبتها.وكذا مره اشوفها بمكان
سلمان: مو فاهم عليك مين الي تشوفينها
لمى: سلمان ايش فيك .شفت زوج سارا اختك . عنده اخت هذي الي اتكلم عنها
سلمان بدت دقات قلبه تسرع: أي وحده فيهم منيره والا رهف
لمى: لا رهف انت تعرفهم
سلمان: يعنى ايش رايك مثل ما قلتى خوات زوج اختى
لمى بضيق: بس مو شرط تعرفهم
سلمان: ليه انتى ناسيه اننا نعرفهم من وحنا صغار حتى اذكر انى كنت دايم العب معهم
لمى: منيره مادري عنها بس هالرهف مادري ايش فيها خصوصا علي
سلمان: ليه . ايش تسوي لك
لمى: اذا مريت جنبها ما كانها تعرفنى
سلمان: يمكن ما تشوفك
لمى: الا انا متاكده انها تشوفنى .تطيح عينى بعينها لا واذا مشت راسها فوق ولا تلتفت لاي احد يالله متكبره ومغروره من جد ثقيله دم
سلمان من غير ما يحس: هيه حدك عاد
انصدمت لمى من نبره صوته الحاده
لمى: حدي على ايش
سلمان خلاص تبدل مزاجه وانقهر من الكلام الي قالته لمى عن رهف
سلمان: ماله داعي الكلام الي تقولينه عن البنت
لمى: طيب ليه معصب
سلمان: انتى اللي ما تعرفين تسولفين
لمى: سلمااااان
سلمان من غير نفس: خير ايش عندك بعد
لمى: ايش فيك حبيبي
سلمان: مافينى شي بس عندي دراسه وراي كويز بكره .
لمى بدلع: افا حبيبي الدراسه اهم منى
سلمان: والله انتى ماراح تعطينى بكره الدرجات
لمى : سلمان ايش فيك
سلمان رفع صوته شوي: قلت لك مافينى شي انتى ما تفهمين بس ابي ادرس تاخر الوقت وانا الي الحين ما خلصت المحاضره
لمى: طيب طيب ماراح اعطلك بالنسبه لموعدنا ترى ما اتفقنا
سلمان: خلاص غيرت رايي مابي اشوفك عندك شي ثانى
لمى بدت تزعل: لا ما عندي .باي
سلمان وكانه ما صدق: مع السلامه
لمى: سل.

وتوها ما بعد تكمل جملتها اسمعت صوت رنت التليفون ما اسرع ايش فيه هذا ليه تبدل فجاه انا ايش قلت له او سويت عشان يصير كذا لا بعد اوضح له انى زعلت ويسكر بوجهي . وتدق عليه مره ثانيه ولا يرد عليها.حطت الجوال الصباح رباح بكره ادق عليه اذا روق واشوف ايش سالفته.

سلمان الي تبدل مزاجه من جابت لمى طاري رهف مايدري ايش السبب وليه هذا التبديل وليه يرد على لمى بهالاسلوب حس انها ثقيله دم ولصقه اول مره يحس بهالشي مع انها من اول كذا . بهاللحظه كان كارهها من قالت اسم رهف وهو مو قادر يسمع صوتها اكثر من كذا والي استغرب منه اكثر انه حس بالخيانه والخداع كانه يخون احد . او غدر بشخص. رهف ااااااه منك يا رهف مادري انتى ايش بالنسبه لى وليه انزعجت من الكلام الي انقال بحقك يمكن لانه طلع من وحده مثل لمى حس بالافكار تتزاحم بباله . وما قدر يركز على السواقه وقف السياره على جنب ضرب راسه بالداركسون (مقود السياره) بقوه .وصرخ بصوت ملى الجو الهادي الي حوله
سلمان: انتى ايش بالنسبه لى اييييييش!!!!!!!!!

.

يــــتــــبـــع


_

البست مي زي المدرسه ونزلت تحت عشان تفطر كان نوره نايمه مع البيبي بغرفه الضيوف اما فوزيه فجالسه تعدل الفطور على الطاوله
مي: جده وين شنطتى
فوزيه: عند الباب حبيبتى.
وقفت مي تتامل الفطور الموجود . كان مكون من نواشف لبنه وزعتر وتوست وبيض وزيتون والخلطه السريه وروب وخبز .ظلت فتره تشوف وهي معقده حواجبها
فوزيه: ليه مو عاجبك
مي: ابي كورن فلكس
فوزيه: مادري ليه ما تبين الشي المفيد لا اكلى هذا
ومن غير جدال جرت مي الكرسي وجلست عليه وهي تشوف الاكل. نزل عمر ومعه منيره.
منيره: صباح الخير يمه
فوزيه: صباح النور. وينهي اختك
منيره: تقول ماتبي تروح الجامعه
عمر: هالبنت مستهتره من اول الايام. مادري ايش بتسوي بعدين هلا يمه
وقرب من عند امه وحب راسها . وجلس جنب بنته
منيره: اتوقع بتروح متاخر تقول اول محاضره عندهم د كتور ريحته خايسه ويطلع نوافير من فمه
عمر: وهي ايش دراها ان ريحته خايسه لاصقه فيه
منيره: لالا بس ما تحب تجلس ورى لان صوته واطي وما تسمع
فوزيه : وليه ما تجلس وراى احسن من انها تغيب
منيره: كيفها يمه انا ايش علي منها
عمر: طيب يحطون لها غياب
منيره: لا تخاف دقت على هنادي وقالت لها توقع عنها
عمر: هالحريم كيدكم عظيم . يعنى تغش عشان تنام . حبيبتى مي ليه ما تاكلين
مي: ابي كورن فلكس
عمر: طيب قولى للخدامه تجيبه لك
فوزيه: اتركها ولا تدلعها خل تاكل من هنا احسن لها
عمر: ما تحبه يمه ومابي بنتى تروح المدرسه وهي جايعه
فوزيه: خلاص قومي قولى لماريا تسوي لك كلولكس
منيره: هههههههههههههههاااي يمه اسمه كورن فلكس مو كلولكس
فوزيه: وانا ايش درانى عنكم
قامت مي وراحت للمطبخ عشان تاخذ فطورها
فوزيه: عمر ما يصير الي تسويه كذا بتخرب البنت من كثر التدلع
عمر: يمه ما ادلعها ولا شي
فوزيه: وايش تسمي الي تسويه
منيره: ماعليك عمر من امي بالعكس ليتنى انا بعد احد يدلعنى
فوزيه: انتى جب ولا كلمه مافي مثلكم ابوكم مدلكم دلع
منيره: يعوض عنك يمه
فوزيه: الدلع ما وراه خير ياعمر خف شوي
عمر: يمه مابيها تحس انها غير العيال مابيها تفقد امها
فوزيه: لو ما تبيها تفقدها تزوج
منيره: ترالا ترالا رجعت حليمه لعادتها القديمه
فوزيه بعصبيه: انا ايش قلت لك
عمر: يمه ترى مالي خلق هالسالفه .
فوزيه: وانت لك خلق شي
منيره: خلاص يمه لا تتضايقين
فوزيه: انتى تخلون الواحد ما يتضايق
عمر: افا الوالده زعلانه من جد
وقام من مكانه
عمر: اسفين يالغاليه وهذا راسك احبه حنا ما نبي الا رضاك
فوزيه تستغل الموقف: انت تعرف ايش يرضينى
عمر بضيق: يمممممه طالبك
فوزيه: خلاص بسكت


يـــتــــبـــع

منيره: يالله يمه انا بطلع الحين توصين على شي؟
عمر: صبر منور انا بوديك الجامعه
منيره باستغراب: ليه
عمر: باخذ مي معي وبالطريق بنزلك
منيره: بس مدرسه مي مو على الطريق
فوزيه: اخوك يوصلك احسن .الا نسيت اسالك عن سارا
منيره: سوير ما عندها محاضره الحين
فوزيه: الله يخليها هالبنت والله انى احبها
منيره: كلنا نحبها
فوزيه: انا بروح اشوف نوره يمكن تحتاجنى او تبي شي.
وطلعت من الغرفه
عمر: منور نادي مي تاخرنا مادري ليه تاخرت
مي: انا جيت بابا
لف عمر على بنته شافها توها داخله من الباب
عمر: مي روحي غسلي وجهك
منيره: هههههههه طالع لك شنب ابيض ايش كنتى تسوين بالمطبخ
مي بابتسامه بريئه شاقه وجهها: كنت اشرب حليب
عمر: شاطره حبيبتى يالله روحي تغسلي وجيبي شنطتك عشان نروح للمدرسه
مي:طيب بابا
وطلعوا كلهم للسياره بعد ما وصلوا لمدرسه مي ووقفت السياره عند الباب نزل عمر مثل دايما عشان ينزل بنته ويوصلها لعند الحارس.فتح الباب الي ورى وانتظر بنته تنزل بس مي ما نزلت
عمر: مي ايش فيك انزلى
مي وهي مبرطمه: مابي
عمر باستغراب: ليه حبيبتى
مي : مااقدر
منيره لفت لورى لعند مي.
منيره: ميونا حبيبتى لييه
مي: بس مااقدر
دخل عمر راسه لداخل السياره .
عمر: وليه ما تقدرين
مي : انا نسيت
منيره: ايش الي نسيتيه
مي: اليوم يوم الامهات وانا ماما مو هنا عشان تجي معي
حس عمر بايد تعصر قلبه ماتوقع كذا اما منيره الي ظلت ساكته مو عارفه ايش ترد
عمر بهمس: طيب تروح معك وحده من عماتك
مي: لا هو حق الامهات مو العمات
عمر: عادي حبيبتى المهم السؤال عنك
مي: انا ابي ماما
عمر: اعرف ميونا بس ماما مو هنا
مي: عشان كذا مابي اروح
عمر: نسيتى ايش قلتى لى امس
مي تشوف ابوها بعيونها الكبار الدوائر الي تلمع بسبب تجمع الدموع
عمر: الحين عمه منيره تروح معك . عشان تستانس ماما والا بتعرف انك حزينه وتحزن
مي مدت يد مرتجه وفركت عينها : اصلا ماكنت بصيح
عمر: ادري حبيبتى والحين عمه منيره بتجي المدرسه وتسال عنك طيب ماما
هزت مي راسها حب عمر راس بنته وطلع جسمه من السياره وهو ماد ايده مسكته مي وطلعت
عمر: متى قالوا يجون الامهات
مي بحيره: مادري
عمر: ماعطوك ورقه
مي: ضاعت
راح عمر لعند منيره الي من سمعت مي تجيب طاري امها .وهي ما تدخلت ولا تكلمت يالله ايش كثر تكره سيره الموت وايش كثر يتقطع قلبها على بنت اخوها ووضعها ما تتخيل انها بيوم من الايام ما يكون عندها ام او اب.
عمر: اقول منيره تقدرين تدخلين مع مي الحين؟
تذكر منيره المحاضره المهمه الي حرصت الدكتوره عليها ومع كذا ما قدرت ترفض وتقول لا هزت راسها وهي تحمد ربها انها مغطيه وما شاف عمر تعبيرات وجهها ودموعها.نزلت من السياره ومسكت بايد مي الثانيه ودخلوا للمدرسه .
كانوا البنات يلعبون ويتراكضون . مابعد يبدا الطابور الصباحي والوضع شوي فوضى. مشت منيره مع مي وراحوا لفصلها . الي كان مليان شنط من غير طالبات . الا بنتين
منيره: وين هي معلمتك ميو
مي: مادري يمكن ما جات
وحده من البنات: لا ابله جواهر جات بس هي راحت شوي
منيره: طيب مي حبيبتى حطي شنطته وانا بجلس انتظر ابله جواهر
راحت مي وحطت شنطتها باللوكر حقها وطلعت منه كتابها ودفترها وحطتهم على طاولتها .وباللحظه دخلت ابله جواهر .اول ما دخلت استغربت من الانسانه الكبيره الي كانت واقفه تتامل اللوحه المعلقه الي فيها اسماء البنات وصورهممعقوله هذي ام بس الحضور مكتوب الساعه تسع مو سبع غير ان هذي شكلها صغير على ان تكون ام لبنت بالمدرسه .
جواهر: السلام عليكم
انتبهت منيره لجواهر ولفت عليها بابتسامه تنور وجهها .
منيره وهي تمد يدها: وعليكم السلام . هلا ابله جواهر
جواهر وهي تصافح منيره: هلا بك .ام طالبه
جات مي ووقفت عند منيره وعيونها على معلمتها حطت منيره يدها على راس مي
منيره: انا جايه بخصوص مي اعذرينى بس ماعرفنا وقت الاجتماع وجيت الحين
تذكر جواهر الورقه الي شقتها مي وما احتاجت احد يقول لها ايش هي هالورقه
جواهر: لا عادي أي وقت .
كلمت البنتين الجالسات داخل الفصل
جواهر: يالله بنات الطابور برى . حتى انتى مي روحي للطابور
وطلعوا البنات من الفصل
جواهر: تفضلي اختي اجلسي.
جلست جواهر ورى مكتبها . ومنيره قدامها
جواهر: اتوقع انك عمة مي
منيره باستغراب: ايه ايش دراك
جواهر: بالاول انتى صغيره عشان تكونى ام لوحده بالمدرسه . ومي قايله لي ان عمتها بتجي
منيره: مي. غريبه
جواهر: ايش الغريب
منيره: لا بس مي ما تقول شي لاحد واخر شي توقعته انها تقول لاحد عن اهلها
جواهر: انا لاحظت انطوائيتها وعدم تجاوبها مع الفصل ومع كذا البنت مره ذكيه وعندها مواهب تدهشنى
ابتسمت منيره:مشكوره على هالكلام
جواهر: ما قلت شي من عندي. تعرفين انا مبسوطه انك جيتى بوقت مبكر غير الوقت المحدد عشان اكلمك بانفراد
منيره: تفضلى
جواهر: مي مثل ما فهمت منها امها متوفيه بس ودي اعرف متى حصل هالشي
من نظره منيره عرفت جواهر ان منيره فهمت سؤالها على اساس الفضول
جواهر: لا تفهمينى غلط او تظنين ان قصدي الفضول.
منيره: اكيد
جواهر:امس مي تكلمت عن امها وكانت مره متاثره ومتحسسه من هذا الشي كثير
منيره باستغراب: غريبه . مي عمرها ما تكلمت عن امها الا اليوم بالسياره جابت طاريها
جواهر: هذا الي توقعته هي بالبدايه رفضت تقول لي كانت جالسه تصيح بس بعدين قدرت اسحب منها الكلام.ماقلتي لى من متى توفت اذا ماعندك مانع طبعا
منيره: اكيد ماعندي مانع فاطمه الله يرحمها قبل ثلاث سنوات توفت بحادث
جواهر: يعنى مي توها ام 3 سنين ولا تذكر امها
منيره: ما اظنها تذكرها وثاني شي اخوي مو تارك لها فرصه معوضها الاب والام والعيله كلها
جواهر: الله يخليهم لبعض.
منيره: ومي شخبارها مع الدراسه انشالله ماشيه
جواهر: ماشالله عليها ذكيه . بس ماتحب تبرز نفسها بالفصل وانطوائيه شوي يعنى اذا طلعوا البنات بالفسحه يلعبون ماعمري شفتها تلعب مع بنت دايما لوحدها ولعبها مره هادي
منيره: هي مستغربه من الوضع جديد عليها تتعود مع الايام. تدرين الى الحين انا مستغربه شلون قدرتى تعرفين كل هالشي عن مي وعن طريقها هي مو من شخص ثاني
جواهر ابتسمت لها: يمكن لانها تذكرنى بنفسي
منيره: مافهمت عليك شلون
جواهر: طفولتى كانت شبيهه من طفولتها
منيره: يعنى انتى امك توفت وانتى صغيره
جواهر: انا امي ما شفتها ولا عشت معها حتى 3 سنوات
منيره: الله يرحمها
جواهر: اميييييين عشان كذا حسيت بمي قريبه منى نظراتها باول يوم وتصرفات تدل على بنت اكبر من عمرها بنت شايله هم مضايقها .
دخلوا البنات الفصل بعد ما انتهى الطابور الصباحي . قامت منيره وسلمت على جواهر
منيره: اسعدنى التعرف عليه والحمد لله ان بنت اخوي عند معلمه مثلك
جواهر: لي انا الشرف بتعليمها
لفت منيره لمي الي جلست بكرسيها
منيره: مي حبيبتى انا خلاص بروح تبين شي
هزت مي راسها . وبعد ما سلمت منيره على جواهر طلعت من الفصل . قاموا البنات يتهامسون
البنت الي جالسه جنب مي بهمس: هذي امك مي
شافتها مي ولفت عيونها اتجاه جواهر الي ابتسمت لها
مي: لا عمتى
هلا: وامك ليه ما جات
جواهر وهي تصفق بايدها: هدوء بنات . يالله نبدى الدرس اليوم .

.


يــــــتـــبـــع

بعد نص ساعه طلعت وشافت اخوها داخل السياره وفاتح على المسجل وهو مرجع السيت على ورى . كان لابس نظاراته الشمسيه وفاسخ الشماغ. اول ما فتحت منيره الباب عدل عمر السيت .
منيره: شكلى تاخرت عليك ورحت بسابع نومه
عمر: ما نمت بس ريحت شوي
منيره: يووه عمر معلمه مي عسل حبيتها مرره
عمر: عرفتى ليه يبون الامهات
منيره: أي عادي اجتماع طبيعي دايما يسوونه بعد فتره من الدراسه
عمر: وايش قالت عن مي
منيره: هههههههه لا تخاف مدحتها
عمر: زين وبعد
منيره: ولا شي تعرفت على معلمتها حليوه مره تدري ايش يا عمر
عمر : ايش
منيره: مي قايله لابلتها عن فاطمه
عمر: ادري
منيره: ايش دراك
عمر: قايله لى امس
منيره: ايه المفروض اعرف ان مي ما تخبي عنك شي. لا بعد ما دريت
عمر : اييش بعد
منيره: جواهر بعد ماتت امها
عمر معقد حواجبه: أي جواهر
منيره: ابله مي بعد مين
عمر: مين قال لك
منيره: هي
عمر: وهي تدق اعلان على هالمعلومه
منيره: لا مو كذا بس هي جات بالسوالف
عمر: انتوا الحريم تسولفون باي شي. المهم تبين انزلك بالجامعه
منيره: ايه
بعد فتره صمت .
عمر: مشكوره منور
منيره: على ايش
عمر: لانك رحتى مع مي
منيره وهي تضرب اخوها بملفها: روح بس ما بيننا شكر
عمر: يالدفشه ليه تضربين الله يعين رجلك بس
منيره: هو حاصل له وحده مثلي
عمر: اقول بس لا تغترين بنفسك الا على طاري طلال قالت لك الوالده
منيره :لا ما قالت ايش
عمر: ولد الاجاويد يبي يكلمك بالتليفون
منيره: شلون
عمر: ايش بعد شلون يبي يكلمك
منيره: بس حنا ما ملكنا
عمر: ادري
منيره: طيب كيف يبي يكلمنى اجل
عمر: مادري عنه . المهم انتى ايش رايك
منيره تغير صوتها: ايش رايي بعد طبعا لا والاهم ان هالشي ما يجوز
عمر: اهله يقولون انهم سائلين شيخ وقايل مافيها شي اذا خبر الخطبه منتشر وبمعرفة الاهل
منيره: ولو مااتخيل اكلم واحد غريب
عمر: خطيبك هو
منيره: انت موافق عمر
عمر: مو مهم رايي المهم انتى
منيره: انا لا والف لا
عمر: بس هو يبي وابوي ناوي يسال الشيخ
منيره: لا تسؤلون شيخ ولا شي. انا مابي واذا هو ميت على هالمكالامات يدور له وحده غيري
عمر: الله الله مره وحده
منيره: من جد اتكلم عمر لا تفكرون تجبرونى على هالشي كافي انى بتزوج وبترككم
عمر:منور حنا ما جبرناك على الزواج
منيره تنهدت: ادري مو هذا قصدي بس مكالمات ايام الخطبه مابي
عمر: براحتك




يـــتـــبـــع