خلاصه عن الانتفاخ والمغص 2013 . لو ابنك عنده مغص ادخلى 2013

السلام عليكم ورحمة الله وبركاته
بالنسبة للمغص اللى عند الطفل ده طبيعى جدا خاصة في أول شهور من عمر الطفل الرضيع
 لأنه وهو بيرضع بيدخل جسمه غازات كتييييير لانه بيشفط هوا مع الرضاعة سواء الطبيعية او الصناعي خاصة في أول شهرين من عمره ، فدايما يا عيني بيكون عنده انتفاخ وتقلصات ، ولو زادت الغازات في جسمه ومتخلصناش منها بتسبب قئ لا قدر الله

 الحمدلله أنا ابني حاليا عنده 4 شهور وأسبوعين ما شاء الله لا قوة إلا بالله ، وهو أول طفل ليا بفضل الله
 وهو للأسف بيرضع صناعى والحمدلله على كل حال

 أنا حقولكم على خلاصة تجربتى مع ابنى والمغص ، وأقولكم واحده واحده تعملوا ايه يمكن حد منكم يستفيد من التجربة
 وأساعد انكم رتاحوا وية من عناء المغص والانتفاخ عند أطفالكم
 ولو عجبك الموضوع واستفدتي منه ياريت تدعيلي دعوة حلوة بظهر الغيب

 أولا :
جيبي من الصيدلية حاجتين مهمين جدا جدا ودايما خليهم في البيت (زي الحفاضات كده مينفعش يخلصوا من عندك دايما يكونوا متوفرين)

 أول حاجة : دوا شرب اسمه (أكوافيرا) Aqua Vera
 وخلي عندك في البيت على طول سرنجة نضيفة ، شيلي السن بتاع السرنجة واستخدمى جسم السرنجة البلاستيك بس

لو ابنك أقل من شهرين يبقى اسحبى بالسرنجة 1.5 سم وفضيها في فم ابنك من الجنب كده علشان مش يقع الدوا من فمه
 واديله الأكوا فيرا ده 3 مرات في اليوم (يعنى مرة كل 8 ساعات)
بس الانتظام في الجرعة مطلوب علشان معدته ،، يعنى كل مرة تديله 1.5 سم بس مش تكترى ولا تقللي
 وأصلا الدوا معاه مكيال بلاستيك كده شفاف ومتدرج بأكتر من تدريج ،، لو مش عندك سرنجه ، فضي في المكيال 2.5 مللي لو ابنك أقل من شهرين ،، ولما يعدي الشهرين تبدأي تديله 5 مللي ، يعنى بالسرنجة =3 سم
 بس السرنجة حتسهلك كتير في اى دوا شرب
 اكوا فيرا مهم جدا لطفلك وصحى جدا دايما خليه عندك واديله منه كل يوم ، لانه أصلا اعشاب طبيعية مفيدة مفيهوش مواد كيميائية
 والطفل بيحبه لأنه طعمه حلو ومستساغ

 ثاني حاجة : دوا نقط اسمه (سايمثيكون) أو (ثيميثيكون)

تدي لطفلك النقط على حسب وزنه ،، يعنى مثلا لو وزنه 5 كيلو تديله 5 نقط على اللسان (والزجاجة معاها قطارة)
 الدوا ده بردو ياخده 3 مرات في اليوم (يعنى مرة كل 8 ساعات) و عند النوم بالليل علشان الطفل يتخلص من الانتفاخ وينام مرتاح
 وبردو الانتظام في الجرعة مطلوب جدا علشان معدته مش تتلخبط

 كده احنا قولنا على دوا المغص الجاهز
في علاج تانى اللى هو الأعشاب الطبيعية اللى بنعملها بالماء المغلي
 في حل من اتنين انا جربتهم واستقريت في النهاية على الحل التانى

 ثانيا:
 الحل الأول : أعشاب من الصيدلية اسمها (بيبي كالم) من سيكم
 دي بتكون باكيتات زى الباكيت بتاع الشاي ،، تحطي الباكيت على 250 مللي
بيبي كالم عباره عن (كراوية - يانسون - كاموميل - شبت)
 ايه بقى فايدة البيبي كام والفرق بينه وبين بيبي درينك مثلا
 البيبي كالم أنسب لعلاج المغص والانتفاج والامســــــــــــــــــــاك
 لان اليانسون طارد للغازات ومهدأ للتقلصات ومنظم لعملية الهضم ، ويساعد على التخلص من الامساك
 والكراوية بردو بتقضي على الامساك بإذن الله
 والاتنين دول مش موجودين في البيبي درينك
 البيبي درينك بس بيهدى اعصاب الطفل ويساعده على الاسترخاء فينام
 لكن البيبي كالم بيساعد الطفل على الاسترخاء والنوم لانه بيقضي على التقلصات والمغص والانتفاخ وكمان يخليه يعمل براز ، فيرتاح وينام
 ملحوظة : لو طفلك كان متعود على بيبي درينك من البداية ورفض ياخد البيبي كالم ممكن تحطي فيه مكيال (أكوا فيرا) على حسب عمر طفلك (يعنى لو أقل من شهرين يبقى حطى 2.5 مللي ولو أكتر من شهرين يبقى 5 مللي)

 الحل الثاني : (وده اللى انا بعمله دلوقتى)
 اشتريت باكيتات يانسون وكراوية وكاموميل من شركة ايزيس (جيبتهم من السوبر ماركت أوفر وأرخص من الصيدلية)
 وكل يوم بغلي ماء ومرة احط فيه يانسون بس (خاصة لما يكون عنده كحة) ، ومرة احط يانسون وكاموميل ، ومرة احط يانسون وكاموميل وكراوية ، يعن بنوع ، واسقي ابنى منهم طول اليوم ، خاصة في الصيف لانه بيحتاج سوايل كتير يعوض بيها السوايل اللى بيفقدها في العرق
ودكتور الأطفال قالي ان كده تمام وصحى جدا للطفل من جميع الجهات

بكده احنا عالجنا المغص (بإذن الله) اللى عند ابنك
وكمان تخلصنا من الامساك المزعج بواسطة الأعشاب الطبيعية خاصة اليانسون والكراوية اللى عملناها في الماء المغلي
 وزي ما قولتلك كل ما طفلك يشبع، كل ما حتنتظم عملية اخراج البراز عنده ويتخلص من الامساك بإذن الله

 حاجة تانية بقى مهمة جدا
بلاش رضاعة بالليل (يعنى لما طفلك يكون نايم بالليل ، ويصحى من النوم بيعيط ، مش تسكتيه وتنميه بانك تديله صدرك أو تديله الببرونة) أطباء الأطفال نصحوا ان الطفل لما يقلق بالليل ويصحى يعيط اديله أعشاب (ده لو كان نام أصلا بعد رضعة مشبعة تماما) يعنى تكونى رضعتيه رضعة تمام شبعته الحمدلله ، فراح في النوم ، ورجع صحى تانى مثلا بعد ساعتين او 3 ، مترجعيش ترضعيه تانى ، لأ تديله أعشاب وتنيميه بالراحة ، ولما يصحى تانى بقى ابقي رضعيه منك ،، ليه بقى بنعمل كده ، لأن بالليل وخاصة لما الطفل يكون نايم جهازه الهضمى مش بيكون بيعمل بكفاءته ، بيكون في خمول للجهاز الهضمى ، فاحنا لما نأكله تانى ، ده بيخلى الطفل معدته تتملى أكل زايد عن طاقتها في الهضم ، فيجيله عسر هضم 0لا قدر الله- يزيد من المغص عنده ، وكمان يزيد من الانتفاخ والغازات
 فالأعشاب بتساعدنا بإذن الله على التخلص من كل ده وتنظيم عملية الهضم


أنا كده خلصت نصايحي ليكم بناء على تجربتي مع ابني
 ويارب يبعد الشر عن كل أولادنا وبناتنا
 وربنا يحميلكم أولادكم ويبارك فيهم

منقـــــــــــــــــــــــــــولــــــــــه

oghwi uk hghkjtho ,hglyw 2013 > g, hfk; uk]i lyw h]ogn 2013