الموضوع: رواية رحله عمر

مشعل : بس مو زين لها تتذكر
محمد : يعني شسوي ؟ امنع عنها التفكير ؟
مشعل : انا بروح اشوفها
محمد : بس لاتضغط عليها خلها على راحتها يمكن ماتبي تتكلم
مشعل : بس هذي مو حاله اختك بتروح دام استمرت على هالحال
محمد : لاتحاول سوينا كل السبل معاها نفس النتيجه الانعزال والهدوء
مشعل انقهر الا يشوف حل
مشعل : انزين ترى بروح اشوف شفيها تجي معاي ؟
محمد : لا انا بقعد لاني ادري انها بتقول مافيني شي وخروا عني
مشعل : بس يمكن تستحي مني ولا تقولي هالكلام وتسمعني للأخر
محمد : مادري جرب وشوف
مشعل : يعني ماراح تجي معاي ؟
محمد : لا
مشعل : كيفك
راح مشعل وهو متضايق من الحال اللي توصلته ديمه . المفروض ماتسوي جذي بروحها وتسلم روحها للذكريات وتصير اسيرتها قرر يسوي اللي عليه بس يطلعها من هالحـاله ولو يخفف عنها أي شي

تقرب مشعل من النهر وصار خلفها شافت ظلاله قبالها وبلعت عبرتها ماتبي احد يخفف عنها بتنهار عمرها ماشكت ولا قالت اللي بقلبها الا له ولشبيهه الحين تأكدت ان وجود مشعل بحياتها بيسبب لها الالم فوق الالم اللي هي فيه فتح لها جروح قديمه حاولت تنساها بس الغريب من هذا كله انها ماشكت الا له !!
مشعـل : ديمه
ديمه لفت عليه : هلا
مشعل : امممم انا اسف نسيت والله (وحط ايده على راسه) نسيت ان المرحوم متوفي غرقان راح عن بالي ساعتها ماكنت ادري انج تخافين من البحر او النهر عشان هالسبب ماكان قصدي اقلب عليج المواجع
ديمه : ليش تتأسف انا كنت ناسيه اصلا لاني اشوف البحر او النهرعادي بس ما ادخله دايما كنت اقوله لا تدش البحر كان يقولي لازم نحدق انا وربعي وشالفايده ؟ راح اخاف والله اخاف من البحر غاامض والداخل فيه مفقود والخارج مولود
مشعل : مو مشكله اتخافين من البحر لانج مو محتاجته بشكل اساسي عشان تدخلينه اللي يحبونه يدخلونه بس المشكله انج تقوقعين نفسج بزمن ولا تطلعين نفسج منه خلاص انسي المرحله اللي طافت انتِ بمرحله جديده الضربه اللي ماتقتل شتسوي !!؟
ديمه بحزن : تقـوّي
مشعل : وانا ابيج قويـّه وابيج تنسين كل ذيج الذكريات اللي ما جنيتي منها الا الالم شاللي استفدتيه منها ؟ ضيعتي كورس كامل ضيعتي قعده اهلج ولمتهم وسوالفهم انعزلتي انطويتي على روحج ضيعتي صحتج ديمه اللي تسوينه لا ترضين فيه الله ولا رسوله انا ماقلت لج هالكلام االا لاني اشوفج عزيزه على الكـل ومحد يحب يشوفج بهالحـال انا مابي منج الا وعـد
ديمه : شنو ؟
مشعـل : تتغلبين على الصراع اللي داخلج وترسمين الابتسامه على وجهج على طول وتنهين صفحه الماضي ومن اليوم تفتحين صفحه جديده الجاي احلى صدقيني عطي دنياج فرصه تعطيج ماعندها مثل ماعطتج من مرّها تعطيج من حلاوتها
ديمه من سمعت كلامه لاشعوريا ابتسمت حست بشي غريب حست بهالانسان ساحر عرف يحط ايده على الجرح ويداويه وهي اللي عجزت تداويه شهور ديمه كانت محتاجه وقفت احد معاها تبي شي معنوي ماتبي الماديات مشعل بكلامه لها كان اكبر دافع لها لتغيير الحال اللي هي فيه عرف بكلامه يطلعها من حالتها المؤقته على الاقل عطاها روح المنافسه والتحدي وخلاها تتحدى ذاتها " اانا شلون ضيعت سنين عمري وانا مدفونه بذكريات راحت مالها رجعه صج ان كل انسان محتاج لذكرياته بس يتذكر الحلو منها ويترك المّر صحيح ان الفتره اللي مرت ماكانت كافيه اني انسى اللي صار لكن اانا اقوى من جذي لازم اسوي حد لكل هالصراعاااات اللي بداخلي لازم اغير نظره الكل فيني "
كلامه اثر فيها بشكل كبير حيل خصوصا وانها تعبتره عمها مبارك بكل شي فا تقبلت منه هالكلام اللي بيكون شمعه تنور عليها دربها من ظلام الذكريات
مشعل : توعديني ؟
ديمه هزت راسها بايجاب
مشعل : من اولها خنتي الوعد ؟
ديمه طالعته باستغراب
مشعل :وين الابتسامه اللي قلناعنها ؟
ديمه ابتسمت بشوق كبير انها تتغلب على اللي بداخلها وترضي ذاتها والكل
مشعل نادى محمد
محمد : يلا عاد وين اهلي؟
مشعل : مكاننا هذا واضح للكل اذا خلصوا من جولتهم بيشوفونا
قعدت ديمه ومحمد بالكراسي مشعل راح كوشك يبيع ايس كريم وخذالهم وقعدوا ينطرون ومرت نص ساعه ثانيه
محمد : بقى صورتين
ديمه : أي ديربالك لاتزيد عن خمس وراي اسبوع بصور فيهم
محمد : انزين زيدي لي وحده لاتصيرين بخيله
ديمه : يلا عاد حمود لاتصير جذي
مشعل ابتعد عن مكانهم وراح يشوف متى يوصل القارب الي فيه بومحمد واول ماردّ نادى محمد
ديمه قعدت تاكل ايس كريم ومستغربه شعندهم مشعل ومحمد يتساسرون ! بعدين راح محمد للمكان اللي كان فيه مشعل اول ورجع مشعل قعد بالكراسي
ديمه زهقت من القعده وشافت ان اهلها مطولين قامت تتمشى على النهر

مشعل : وين رايحه ؟
ديمه : بتمشى وبشوف حمود طوّل
توتر مشعل : لا تروحين الحين هو بيجي
ديمه : ليش ؟
مشعل : اهناك زحمه
ديمه : بس انا بتمشى على النهر ماراح اروح الساحه
مشعل ماقدر يضغط عليها اكثر سكت وتوتر اكثر
قربت اكثر ديمه من مكان الازدحام و انبهرت باللي شافته ارقوزات ومهرجان كبير واللي يرسمون وجوه واللي يرقصون استعراضات واستغربت " ليش مشعل مايبيني اجي هني ؟"

واستانست على الجو ودخلت معاهم و كانت هناك مجموعه من الفرق اسباني ايطالي فرنسي كانت تقام عروض بالساحات الموجوده ودخلت بالزحمه وقعدت تشوفهم وتصفق وانقهرت لان التلفون مومعاها مع محمد كانت تبي تصور ماكانت بتطوف هالفرصه وترجع راحت نص ساعه زياده وهي مو حاسه فيها من الاجواء اللي كانت فيها بجانب ثاني كانوا محمد ومشعل قاعدين
مشعل : أهي قالت بتتمشى وبتروحلك
محمد : لا ماشفتها
مشعل : لاتقول دشت الاحتفال !
محمد: ياخي خلها تستانس هي تعرف وينا
مشعل : ماكنت ابيها تروح تشوف ااستعراض الجلاب اللي مسوينهم وراحت دشت المهرجان ياسلام
محمد : هههههههههه اتصدق استانست

محمد : هههههههههه اتصدق استانست عليهم اشكالهم روعه
مشعل : أي اختك ان شافتهم بتسويلنا عرس جلاب
محمد : ههههههههههههههه انا بعرف اهي ليش عايشه خوافه درجه اولى
مشعل : ترى كل انسان عنده نقطه ضعف هي عندها الجلاب
محمد : مو بس الجلاب كل شي تخاف منه ههههههه انزين وانت ؟
مشعـل : انا نقطه ضعفي صج الدموع ماحب اشوفهم وخاصه دموع البنات احسهم ضعاف يكسرون الخاطر
محمد : انا مادري شنو نقطه ضعفي ؟
مشعل : اذا كبرت بتعرفها اكيد مو جنه هذاك ابوك ؟
محمد : واخيراااااا وصلوا مابغوا
وقربوا اكثر منهم
بومحمد : من متى انتوا هني ؟
محمد : من ساعه تقريبا
ام محمد : ديوم خليتوها بالفندق ؟
مشعل : لا دخلت المهرجان
انوار : اللله ابييييييي اروح لها
بومحمد : اوكي يلا نروح
ادخلوا كلهم المهرجان والناس كلها تصفق للفرق الاستعراضيه اول مادخلوا شافوا ديمه بالصف الثاني وراحوا لها
ديمه لمحمد : عطني التلفون بصوور بسرعه قبل لا يخلص العرض
محمد : انزين لا تاكلينا هاج
صورت ديمه العرض و انوار طلعت كاميرا الفيديوا وصورت العرض بالصوت والصوره وميشو كانت متعلقه بمشعل وكان شايلها وكالعادة قاعده تلعب بشعره محمد التفت يدور ميشو كان ماسكها بيدها تخرع الا تناديه من فوق
ميشوو : انا هنييييييي
طالعها محمد وفطس من الضحك وراح عند ديمه
محمد : اماااااااانه دقيقه بس صوره وحده
ديمه : ماتشوفني اصووووور ؟
محمد : والله صوره وحده حق ميشو بعد
ديمه : افففففف انزين بسرعه لا تطول
راح محمد مستاااااانس الا يصور ميشو وهي متعلقه على مشعل شكلها شاذي
صورهم محمد وكان مشعل طالع بالصور وهو يضحك عليها وهي شادة شعره حيل
ورجع التلفون لها وبعد ماخلص العرض راحوا كلهم مطعم ايطالي طبعا بيتزا لان ايطاليا مشهوره بهالاكله وتغدوا و قعدوا يتمشون لين وصلوا للسوق
انوار : يبااااا حبيبي بندش السوق
بومحمد : ليش؟
انوار : بشوف سوقهم
بومحمد : قصدج بخم سوقهم
ديمه : ههههههههههههههه
بومحمد : مع منو ان شاء الله ؟
ديمه : انا وياها
بومحمد : سوري رجلكم على رجلي شايفين الزحمه
انوار باحباط : بيروح معانا محمد
بومحمد : أي مو الخوف لاهو يضيعكم
ديمه : ههههههههههه حلوووه
انوار: عااااااد يباااااااا
بومحمد طالعه بنظره يعني انتهى
انوار قعدت تتحلطم وديمه كانت تضحك عليها
ديمه : جزاج من قالج ان احنا نبي السوق ؟
انوار : افففف امبلا نبي نشووووف سوقهم
ديمه : اعتقد انج شريتي من باريس بعد ماله داعي الصرف الزايد
انوار : قلت لج بشوووووووف ماقلت بشتري في فرق ترى
ديمه : انزين لاتعصبين ابوي مستانس لا تقعدين تكدرين عليه
انوار : افففف زين خلاص
وهم يتمشون رن تلفون مشعل وراح بعيد بس ينسمع صوته
مشعل : هلا والله بنور الدنيا
ام مشعل : لاتكلمني زعلانه عليك
مشعل : افاااااا ماعاش من يزعلج والله
ام مشعل : يومين ماتدق ولا تسأل عن امك شلونها شخبارها ؟
مشعل : والله يما انا مسافر ودقيت على البيت ردت الخدامه
ام مشعل : وين رايح ؟
مشعل : روما مع بومحمد
ام مشعل : منو بومحمد ؟
مشعل : يما جارنا من سنين ماتعرفينه ؟
ام مشعل : ايييييييي يما تذكرتهم وينهم شخبارهم صج دنياا ماشفناهم بالكويت تشوفهم بروما ؟ بس يما وتدريبك شلون ؟
مشعل : بقولج كل شي لي رديت ان شاء الله بس انا باجر راجع باريس واكمل التدريب الاسبوع الجاي الدوري
ام مشعل : الله يوفقك ياولدي شد حيلك ونبيك تبيض الوجه والله اني مشتاقتلك لاتقاطعني
مشعل : يما لاتخليني اقلبها مناحه والله لوتدرين شكثر مشتاقلكم جان قلتيلي رد اللحين بس انتِ ماودج تشوفين ولدج لاعب عالمي ؟
ام مشعل : دام العالميه غربه وعمات عين لايما
مشعل : ههههههههههه يما من الحين اشوفج تحطمين
ام مشعل : ماعليك مني المهم انك تشد حيلك
مشعل : يما بشريني عن ابوي ودلول وعبد الرحمن ؟
ام مشعل : كلهم بخير ويسألون عليك بس انت اللي ديربالك على روحك
مشعل : ولايهمج يما لاتحاتين بكون بخير ان شاء الله بس دعواتج الغاليه
ام مشعل : تراني ادعيلك وسلم على بومحمد واهله
مشعل : يوصل ان شاء الله

مشعل اول ماصك من امه دخل السوق ويبي يشتري لأهله هدايا لانه ان رجع باريس بينحكر بالمعسكر فا لقاها فرصه وهو داخل يشتري دق عليه المدرب وقاله لازم يرجع باجر عندهم تدريب الساعه 8 بالليل فا يعني لازم بالكثير الساعه 3 اهو بالمترو فا هو بيروح الساعه 12 عشان يمديه يريح بالفندق وينزل المعسكر بالصوب الثاني عند النهر ديمه وانوار
ديمه تطالع القوارب على النهر وتفكر بحالها وتكلم انوار اللي كانت على يمينها
ديمه : انا لازم اتغير
انوار : بتسوين عمليه تجميل ؟
ديمه : الشرهه مو عليج على اللي يسولف معاج
انوار : ههههههههه والله اتغشمر معاج شلون يعني تتغيرين فهميني ؟
ديمه : ابي اكون احسن بطلع نفسي من عزلتي الحياه حلوه بس انا مافهمتها
انوار طالعت اختها بنظره ماكره
انوار : ديوم شاللي تغير ؟
ديمه : مو انتوا سفرتوني عشان اتغير كاني بتغير
انوار: لا ماما السالفه فيها ان منو اللي غير افكارج ؟
ديمه طالعتها وتنهدت : انتِ تعرفين كل شي ليش تسألين
انوار : كلمج هني ؟
ديمه : أي كانوا بيركبوني النهر وقلت لهم مابي اهو اصر يعرف ليش اخاف منه وهو بنفسه عرف
انوار : أي كملي
ديمه : وعاد اهو ذكرني بشي كنت جايه عشان انساه واهو بنفسه طلعني منه بنصايحه
انوار : زين سمعتييييي
ديمه : انا اصلا كنت زهقانه من نفسي اتصدقين وانا اسمع كلامه كأني اول مره اسمع هالكلام مو جنه اهلي صبح وليل يعيدونه حسيته يعني كل كلمه يقولها لي مادري شمعنى هو اللي سمعت له من بد الناس
انوار : قولي شمعنى هو من بد الناس شكيتي له
ديمه : شفتي حتى انتِ نفسي مستغربه
انوار : يجوز انج .؟
ديمه استغربت : انا شنو ؟
انوار : لالا ولاشي انا بروح عند ابوي
ديمه : اوكي ناديلي ميشوو بوريها الطيور
انوار: مادري يمكن راحت مع مشعل !
ديمه : لا كاهي مع امي
والتفت كأنها تدور شي
انوار ابتسمت : دش السوق
ديمه انحرجت ولفت على النهر " يما منها الساحره شلون تقرى افكـاري !!؟ "
ديمه تبرر : اصلا كنت ادور حمود
انوار وهي جاكتها : أي صدقتج يلا تشاو
بعد مرور ساعه شافوا مشعل جاي صوبهم وراح مع بومحمد يتمشون بومحمد قالهم اذا جاء المغرب بيمشون لان وده يشوف النافوره بالليل مع الليتات وهم يمشون
مشعـل : دق علي المدرب وقال باجر انت عندي
بومحمد : صج والله ؟
مشعل : أي وانا بطلع الساعه 12 عشان يمديني اوصل واريح التدريب 8 وحبيت اقولك من اللحين عشان يمكن باجر اطلع مبجر وانتوا تكونون نايمين ماحب ازعجكم
بومحمد : يلا الله يكون بعونك وشدّ حيلك نبيك تبيض الوجه
مشعل : افا عليك ولايهمك بس نبي دعاويكم
بومحمد : ولاتنسى توصل سلامي لأبوك
مشعل : أي ذكرتني الوالدة تسلم عليكم
بومحمد :الله يسلمهم من الشر والله اني منحرج من ابوك
مشعل : ليش؟
بومحمد : من عقب ماسود وجهنا محسن عنده
مشعل : محسن ؟ شسالفه عمي ؟
بومحمد : أي ياولدي سالفه طويله وان شاء الله ان ابوك نساها ولو اني ادري انه ما نساها
مشعل : والله خوفتني ياعمي
بومحمد : لا ماعليك انسى اوه مو جنهم فتحوا ليتاتها ؟
مشعل: ههههههههه هذا اللي تنطره من اليوم
بومحمد ينادي محمد
محمد: هلا يبا ؟
بومحمد : شغل الكاميرا
وقعد حمود يصور وحط على ابوه مع مشعل وهم يطالعون النافوره وهم منبهرين كان شي خرافه بعد ماظلمت الدنيا ردوا الفندق كانت اول طلعه رسميه تحسب لهم بروما صج استانسوا فيها والاهم ان ديمه قررت انها ترجع مثل ماكانت بعد ما اثر فيها كلام مشعـل اول ما رجعوا راحوا اللي تسبح واللي بدل ملابسه وبعد ماريحوا صارت الساعه 8
انزلوا كلهم تحت على القعدات اللي على النهـر
ام محمد : خلاص عفيه منصور مانبي نروح مطعم تعبت من المشي
بومحمد : ههههههه من اول طلعه هااه مافيج قوة تحمل
انوار: يما اجل لو دخلوج سرفايفر شتسوين !؟
ديمه : هههههههههه من اول اسبوع تطلع
ام محمد :أي اضحكوا علي بعد لاوصيكم !! شفت يامنصور عيالك
بومحمد : هااااه كلا والا امكم مارضى عليها باجر كلكم بتتزوجون وبتروحون محد بيبقالي غيرها
ام محمد : يعني عشااااان جذي بس وانا على بالي تحبني مالت
بومحمد : هههههههههههههه افا عليج نخطط للمستقبل
محمد : خلالاص نطلب أي مطعم سفري وناكل هنيه الجو ولا اروع
بومحمد : شتقول يامشعل ؟
مشعل : آآ كيفكم شوف رايهم ماعندي مانع مثل ماقال محمد الجو حلو
بومحمد يكلم محمد ولده: خلاص بعد نص ساعه انت ومشعل تروحون تجيبون لنا عشى امس شفت مطعم ورى الفندق لبناني
مشعل : والله زييين من زمان مشتهي اكل لبناني
نطت ديمه : حتى اناااا
الكل طالعها وهي انحرجت لانها قالتها بعفويه
طقتها انوار بكتفها يعني اسكتي
انوارتساسرها : انتِ ماتستحين ؟
ديمه : قلت رأيي حرام
انوار: بس اذا اهم يتكلمون انتِ تسكتين لي اسألونا ردينا
ديمه تفشلت وجهها قلب احمر : افففف زين
مشعل طالعها وابتسم وهي شافته وتذكرت الوعد وابتسمت ولف على بومحمد وقعدوا يسولفون مع مرور الوقت كان مشعل يتحاشى يشوف ديمه مايبي يعور قلبه وهو باجر بينحرم منها
مشعل : يلا حمود امش
محمد : وين بتروح انت
مشعل : العشى
محمد : مالي خلق روح لحالك
مشعل : مالك خلق من الحين وين اللي بيصير لاعب وين كلامك وانت مافيك لياقه شلون بتراكض بالملعب بعدين ؟
محمد : اذا رديت الكويت اتدرب
مشعل : لا بابا قوم معاي بنجيب عشى لاهلك لا يموتون جوع ونتوثم فيهم
محمد : هههههههههههه يلا مشينا
واهم رادين معاهم جياس الا يوقف مشعل على فاترينت محل رياضي وشاف كره دشت مزاجه ماتصور نفسه يقعد يومين بدون كره حس انها ادمان ويدخل يشتريها
محمد : خلنا نتعشى بعدين دربني
مشعل : تدري يوم واحد ما ينفع شوف انا بكلم لك صاحب النادي اللي انا فيه واخليه يدخلك ضمن اللعيبه الناشئين وانت شدّ حيلك
محمد : يعني بالكويت ؟
مشعل: أي متى ماردينا بإذن الله بكلمه لك واكلم ابوك يدخلك
محمد استانس : تسللللم والله يامشعل مادري شلون اردها لك
مشعل : دام عندك هالرغبه لازم تنميها وخصوصا ان الرياضه لعمرك بتفيدك بتلهيك عن سوالف الشباب البطاليه
محمد : اتصدق يامشعل حلمي اكون لاعب عالمي الجمهور كله ينادون باسمه ويشجعونه بس متى بيجي هاليوم
مشعل : انا حلمي اني ارفع راس ديرتي فا مالقيت الا اني انمي الرغبه اللي فيني لصالحها
محمد : تراك مو بعيد عن العالميه بس انت شد حيلك
مشعل : مخلي اهلي من اسبوعين وباقي بعد اسبوع شاد حيلي ومسوي كل اللي علي والباقي على الله
ماكان الجو بارد كان قريب من الدفى كلهم حاطين جاكيتاهم على الكراسي لان الجو متقلب ماعرفوله وصل مشعل مع محمد وشافوا ديمه مربعه ايدينها على الطاوله ونايمه وانوار كانت ماخذه تلفون ديمه وتشوف الصور وميشوو ماسكه الباربي وتسولف معاها وام محمد مع زوجها يسولفون من طاحت عين مشعل عليها كسرت خاطره مايبيها تنام بدون عشاء وده يصرخ بأعلى صوته ويقومها عشان ماينحرم من اخر اللحظات معاها ديمه قبل لاتنام قررت انها تشكر مشعل على كل اللي سواه معاها وخصوصا على الكلام اللي قاله اليوم لانه أثر فيها بشكل ايجابي وبعد ماسمعت اصوات ناس وجياس قامت بغت تتمغط وتمد ايدها بس داست انوار على رجولها واستوعبت انها مو بالغرفه وضحكت انوار عليها لان شيلتها صايره على صوب شكلها يفشل
انوار : روحي غسلي وجهج كلها نص ساعه امداج نمتي ؟
ديمه : اسمها غفوه مو نومه اليوم راح كله مشي تعبت
انوار: اووووش لاتقولين هالكلام جدام ابوي بعدين يقول انتوا مو كفو طلعات اصلا كل هالتعب بيروح مع النوم
ديمه : انزين انا جوعانه
انوار : هههههههههههه انزين يام بطن كاهم جابوا العشى
تعشوا كلهم وراح مشعل فوق ينام واصعدوا ام محمد وبومحمد مع ميشو بقى محمد وانوار وديمه كان محمد يلعب بالكره اما ديمه كانت مع انوار
انوار: اقولج وصتني مريوم على جنطه بس قالت لي مابي ماركه موجوده بالكويت
ديمه : كل الماركات بالكويت
انوار :لا اكيد في اشياء مو موجوده فا بدور لها
ديمه : أي اذا خلاج ابوي تدشين السوق
انوار : ماعليج اذا انا ابي شي اوصل له
ديمه : لازم اشكره صح ؟
انوار : منو؟
ديمه : مشعل
انوار : اهااااااااا قلتيلي مشعلل اممممم
وشقت ذيج الابتسامه اللي وراها قصد
ديمه : الصراحه وقفته معاي ما انساها له طول العمر وانتِ عارفه كل شي
انوار : الصراحه كلمه شكر شويه لازم تشكرينه من باب الواجب
ديمه : باجر ان شاء الله
انوار: ديمه مو ملاحظه انج تفكرين فيه زياده عن اللزوم ؟
ديمه : هاا لا افكر اني لازم اشكره على وقفته مافيها شي
انوار ماحبت تحرجها : امممم نشوف
وقاطعهم محمد
محمد : طولتوها ترى بردّ الجوو ماراح تصعدون ؟
ديمه : حمود حبيبي روح فوق احنا لي خلصنا هذره صعدنا ترى ندل الطريج
محمد : ههههههههههه تصريفه حلوه
انوار : االحمدلله يارب الولد يفهم التصريفات أي تصريفه فكنا ياخي
محمد : تكلمي عدل اول وبعدين انا تعبت اصلا يلا تصبحون على خير
ديمه تبتسم : وانت من اهله
من الناحيه الثانيه كان واحد واقف على البلكونه ويشوف النهر او بالاصح يشوف الانسانه اللي قاعده على النهر ووبقلبه كلام وده يقوله لها بس لا الوقت ولا اللسان يسعفه فتركه بالقلب نظراته كانت وداعيه يحاول يطبع صورتها بجفونه عشان تكون معاه بين رمشه وعينه اهو ميقن انه تعلق فيها وحس انها خلاص من مسؤولياته ماوده يتخلى عنها بس الظروف اكبر منه شكر هالفرصه السعيده اللي جمعته معاها وعلى الصدف اللي جمعته بانسانه نادره بكل الجوانب بحزنها نادر احد يتحمل اللي تحملته بعمرها بفرحها تسحر كل اللي حولها هدوءها اللي يعطيها هيبه ووقار بابتسامتها البريئه اللي تحاول تمسح فيها طيف الاحزان اللي مرت عليها بعنادها وكبريائها واخلاقها وضعفها نادره حس بشعور غريب اشبه ماله مغناطيس بعدوا سالبه عن الموجب شراح يصير !! بالضبط هذا شعوره ودعها بنظرات كلها الم لانه يكنّ لها مشاعر يمكن هي ماتكنّها له بس كل اللي يتمناه لها التوفيق وراح صلى العشاء وجهز اغراضه عشان يطلع باجر الصبح مايبي يلحق عليهم واهم نايمين لانه خلاص تشكر من بومحمد وسلم امانته ولازم يرجع رجع حط راسه بس تذكر كلام بومحمد عن اخوه محسن وقعد يفكر "شنو من الممكن اللي يخلي ابوي يزعل من محسن اخو بومحمد الكبير ؟ معقوله في سالفه وانا ماادري عنها؟ "على هالتساؤلات حط راسه ونام بهالوقت كانت ديمه تسولف وتضحك مع انوار بسوالف مختلفه لاحظت انوار الفرحه اللي بعيون ديمه حست انها فاتحه خير وان كلام مشعل جاب نتيجه وقعدوا تقريبا نص ساعه زياده وصعدوا غرفهم كملوا السهره وماناموا الا 2 الفجـر

ثاني يوم الصبح الساعه عشر قام مشعـل وهو كسلان اول ماقعد شاف جنطة صغيره تذكر انه مجهزها امس حاط فيها الهدايا وتضايق عرف ان خلاص قرب وقت الرحيل حاول انه يتناساها لين على الاقل يطلع من الفندق عشان ما يشوفها ويتهور ويقولها الكلام اللي حابسه بقلبه راح تسبح وصلى الفجر وهو منقهر من نفسه مو متعود يأخر صلاته ويحب يصليها بجماعه يحس بخشوع اكثر بس باريس مافيها الا جامع كبير وبعيد حيل وروما مافيها المساجد المنتشره اللي يقدرالواحد يصلي فيها كل الفروض صلاتهم الساعه سبع وهو نام متأخر من الافكار اللي حاست بباله فا صلى وستغفر ربه ودعى ان اموره تيسر وخصوصا وانه على طريق سفـر الظهر بيجمعها مع العصر بيكون على المتروا ولبس لبسه وطلع من الغرفه بعد ما سوولها جيك اب ومر من غرفه ديمه ومشى بسرعه خاف انها تطلع من الغرفه وتشوفه وهو ماوده يودعها خلاص امس ودعها بطريقته سلم المفتاح ونزل تريق بالفندق وطلع خذا نظره سريعه على القعدات اللي على النهر ويتذكر جمعتهم امس حس انه ينتمي لهم صار منهم بعدين حس على نفسه
" انا شقاعد افكر فيه ؟ امس يعني ذكريات راحت مالها رجعه ليش اتعب نفسي وانقهر خلاص انا استانست معاهم وصار لازم امشي هني دوري انتهى بحياتهم او بالاخص بحياتها ! آآه انا ليش واقف خلني اروح احسن لي من هالعذاب "

مشى مشعل وكمل دربه وترك وراه ذكريات من الصعب ينساها مشى بس قبل لا يكمل طريقه وقف والتفت على بلكونه غرفته وكان يدري ان الغرفه اللي يسارها غرفتها جاه شعور غبي ينطرها لين تقوم بس طالع البلكونه وابتسم بمراره وراح ركب التاكسي ووصل المترو وحرّك بعد ما تغدى الساعه 2 الظهر بالمترو نام باقي ساعه بس اول ما صك عينه جات صورتها فباله وانقهر ليش يعني ؟ خلاص من تكون عشان تقتحم فكره ومشاعره وتسيطر عليه حتى فمنامه !! " ياربي يعني بعاني على ما انسااها !! يارب عيني "
صك عينه وعاند نفسه وفكر بالتدريب ولهى عمره لين نام بعد ساعه وصل اول شي فكر فيه انه يسلم على ناصر بعدين تردد شاف انه لازم يصلي اول ويرتاح بعدين يسلم عليه لان يعرف ناصر ماراح يخليه الا يعرف منه السالفه كامله تنهد ودخل غرفته ولقاها مرتبه على حطتها حط الجنطه داخل الكبت وفتح الثلاجه طلع له ماي بارد وشربه حاس بعطش وتوضى وصلى اول ما قعد على السرير شاف تلفونه على الكومندينه مسكه وفتح الاستديو الصور وشاف صور روما صوره ميشو مع الباربي وصوره اهو معاها وهي شادّه شعره وصوره اهو وبومحمد ومحمد وصوره ميشو على ظهره اللي تعبه بالصور ان ميشو كلها ديمه نفس الشبهه قط التلفون على الجهه الثانيه من السرير وانسدح وخلى اصابعه تتخلل شعره بطريقه انسيابيه وبتوتر حس بفراغ كبير خلاص انتهت الرحـله وانتهت المهمه ماعرف شالسر ورى ظهور ديمه بحياته بمصادفه غريبه من نوعها وقعد عقله يناقض قلبه وخلاهم يتناقشون وحط راسه ونام نوم عمـيق خصوصا ان نومه المتروا ماكانت مريحه لانه نام وهو قاعد على الساعه خمس قام ولبس وطلع من الغرفه طق جرس على غرفه ناصر بس مالقاه وقال اكيد انه تحت بواحد من هالكوفيهات ونزل وراح كوفي العم صادق وسلم عليه
العم صادق : اهلين يابني انت من الكويت صح ؟
مشعل : أي ياعم
العم صادق : وين اخواتك اللي كانوا معك ؟
مشعل : أي خواتك ؟ انا معاي خوات
العم صادق : انت مش في فندق لاباغتيل ؟
مشعل : أي بالضبط
العم صادق : ايوا طب مهم في هذا الفندق برضوا
مشعل تذكر : اهااااا أي انت تقصد بومحمد
العم صادق : انا اللي بعرفوا من الكويت بنتين وصبي
مشعل : أي أي خلاص راحوا روما
العم صادق : صحيح يابني خساره كنت جايبلهم هدايا من الجزائر
مشعل : هههههه فيك الخير والله حتى اهم يسلمون عليك
العم صادق : الله يسلمهم من كل شر يارب تفضل يابني انا عازمك على قهوه عربيه بيحبها قلبك
مشعل : تسلم ولله
العم صادق : تحب تجلس خارج الكوفي اور داخل ؟
مشعل : اللي يريحك
العم صادق : خلاص في الخارج
استانس مشعل وخصوصا ان العم صادق ماعرفه الا عن طرف ديمه وطلعوا برى يشربون قهوه ويسولفون لين مرت ربع ساعه واستئذن مشعل وراح صوب الكوفي اللي متعود يقعد فيه اهو وربعه ومثل ماتوقع لقاهم كلهم مع ناصر ناصر اول ماشافه من بعيد قام ورحب فيه بالطريقه الخليجيه
ناصر: ياهلالالا والله ومرحباااااا حياك
مشعل : اهليييييين ناصررر والله اني مشتاقلك
ناصر يتكلم مصري : أي داااا ياخونااا دنتا سيبتني اربع ايام بليليها سيبني ياخاين
مشعل : هههههههههههههه عفست كلامهم اسكت بس
قعدوا بعد ماسلم عليهم كلهم وخذوا اخبار بعض وسوالف التدريب بعدين قام مشعل مع ناصر بطاوله ثاني
ناصر: تقولي يالخاين كل اللي صارلك اللحيييين
مشعل : المهم قولي شلون صحتك اول ؟
ناصر :الله يرضى لي عليك لا تضيع سالفتنا انا مثل منت شايف حصان اطامر قولي شسالفه روما ؟
تنهد مشعل وقال كل السالفه بشكل موجز وانه خذا غرفته لهالسبب ووصل البنت لي اهلها بروما لانهم اهل بشكل مختصر حيل
ناصر وكأنه ما اقتنع : انزين اجازتك خلصت وصلت البنت وش له تمددها يومين شكلك انبسطت على القعده هناك ؟
مشعل : ههههههه لا كنت العب بحديقه فندقنا مسوين فريق وطقني واحد بالغلط على ساقي يعني اصابه ورحت المستشفى لاني كنت اخاف ادوس عليها عطاني راحه من اللعب يومين لان الرضه قويه
ناصر : واستغليت الوضع وكيفت هاااا ؟
مشعل : ههههههههههه ياعمي روح هذول جيرانا من سنين
ناصر : بعددد ياسلام اقول بس قوم بروح الفندق خلنا نبدل عشان نلحق على التدريب
مشعل : ياني كليت لازانيا عجيبه هنااااااااك هم اهلها
ناصر : أي اقهرني بعد لاتحدني اركب المتروا والله مايردني احد فيكم ترى اخوك عليه فصلات ديربالك
مشعل : والله اشتقت لسوالفك مالت عليك امش بس
اول مارجع شاف ان تو الناس على التدريب باقي ساعه ونص فج التلفزيون وقعد يدور الريموت وراح لطاوله شاف اوراق وقلم ما ستغرب درى انهم من الفندق بس الغريب مكتوب فيهم كلام عربي ! قراهم وانصدم !!
---

اول ما قامت ديمه كانت الساعه تقريبا اربع العصر كانت مصدعه على الاخر ضغطت على روحها وقامت ولفت وشافت انوار نايمه ومغطيه روحها بالبطانيه من اولها لي اخرها ما يبين منها شي استغربت منها لو هي جان اختنقت وماتت قامت وتسبحت عشان تصحصح عدل صلت ورتبت الغرفه وتقوم انوار بصوت عالي
انوار : خلاص درينا انج قمتي لازم الفريج كله يدري
ديمه : أي فريج انتِ بعد قومممي يلا بنشوف برنامجنا اليوم وين
انوار : بس هذا اللي همج الهياته ماتشوفين اختج نايمه تعبانه
ديمه : لا اختي اقوى من الف حصان ماشاء الله
انوار : يالله صباح خير بدينا يومنا بعين ارض جو الناس صباح الخير شي حلو مو انتِ
ديمه : ماما اول شوفي ساعتج بعدين تكلمي قصدج مساء الخير اللحين تلقينهم طلعوا وخلونا وخلي تفيدنا سهرتج المحترمه
انوار : انا ماطقيتج على ايدج عقلج براسج تعرفين خلاصج
ديمه : خلصي قومي اختنقت من الغرفه بطلع بتمشى
انوار قامت ودشت الحمام وهي تتحلطم
بعد ماطلعوا من الغرفه
انوار : وين نروح ؟
ديمه : انا طليت لقيتهم تحت على النهر
انوار : اوكي نزلنا
بعد مانزلوا
ديمه : انا جهزت كل الكلام اللي بقوله
انوار :اللي يشوفج يقول محاضره اقصاها كلمه من ثلاث حروف شكرا ترى حتى اللي بالروضه يعرفون يقولونها
ديمه : هيييه انتِ شفيج نفستج بخشمج
انوار : مادري حيل مسويتله اعتبار شكرا والسلام وبس
ديمه اسكتت
"معاها حق انوار مشعل حيل استغل اكبر قدر من تفكيري هالايام ليش الله اعلم !!"
بعد راحوا لأهلهم
بومحمد : ياهلا والله زين قمتوااا
انوار+ ديمه : راحت علينا نومه
ام محمد : جم مره اقولكم لاتسهرون نفسي نتريق كلنا مع بعض
ديمه تأشر لأنوار : كله منها
انوار : انتِ شغلج بعدين
وتأشر لديمه وديمه تضحك والا ميشوو جايه ركض
ميشوو : باباااااا وين مشأل حبيبي ؟
ام محمد : من وين جايبه كلمه حبيبي بعد !!
ديمه وانوار ماتوا من الضحك ديمه استانست لان هالسؤال كانت بتسأله بس انحرجت
بومحمد : خلاص راح
ميشو : لاح ؟ شلون وانا منو بيشيلني فووووق
بومحمد : ههههههههه انا اشيلج ولا يهمج
ويشيلها وشافت شعره
ميشو : بابا انت شعرك دقيل (صغير) هو شعره واااااااجد
ام محمد : عز الله حت شعر الرجال
الكل : هههههههههههههه
الا
ديمه خرت على طولها عالكرسي وفقدت اخر امل بقى لها
" خلاص راح !! "


--------

:: الجــزء العــاشر ::

انصدم مشعل بعد ما قرى الورقه شافهم خواطر استغرب وقعد يفكر منو من الممكن انه يكتبهم بغرفته ؟ منو دخل غرفته بغيابه وهالخواطر اسلوب بنت واسعفته ذاكرته ورجعته ليومين ورى تذكر ان ديمه كانت بغرفته واستوعب انها اكيد كانت قاعده بنفس المكان اللي اهو قاعد فيه وكتبت الخواطر ونستهم بالطاوله حس مشعل انه انشغل بالترتيب المنطقي للاحداث وترك الاهم وهو الخواطر ومحتواها استانس على هالفضول اللي حس فيه وعمرها ديمه ما وضحت له انها تكتب خواطر او اتحبها وهذا الشي اللي ادفعه انه يقراها بتمعن بيعرف هالبنت شنو داخلها بيعرف شنو نوعيه المشاعر اللي محبوسه فيها واللي مفرحه انه لقى خواطر لها والخواطر معروفه انها تعبير شبه مباشر عن مكنون الذات قعد يقراها على رواق شاف ان الخاطره الاولى كانت كلها حزن على الماضي وكأنها تطلب من الزمن انه يخفف عليها اعبائه اما الثانيه كانت كأنها تدورعلى عالم كله فرح وكانت تدور على السعاده و تدور فارس احلامها اللي بينقذها من عالمها الكئيب اما الثالثه واللي هزت له كيانه وعصفت كل ذره احساس فيه كانت كل كلمه منها كفيله انها اتغير له مجريات حياته !!

"رأيته نعم فهو فارسي الذي احلم به بليلي ونهاري هو الذي سينتشلني من دوامة همومي وأعاصير ذكرياتي هو هو بعينه رأيته ورأني وشكيت له وواساني آه ما احلى قربه وماأقسى جفاه دخل حياتي من باب الصدف وغير مجرياتها للأفضل آه ليته يبقى لا اعلم ما سرّ تيقنّي بأنه هو وهو بذاته من سيقتلعني من جذور عالمي الكئيب إلى العالم الآخر الذي كنت احلم فيه وجدته ولكن أأمل أن لا تكون رؤيته حلم جميل ينتهي عند استيقاظي ويكون كل الذي رأيته خيال بخـيال!"

نزل ايدينه الثنتين وقطهم قط على الكرسي وكان مسمر عيونه على الورقه اللي على الطاوله ماله حيل يشيلها من الصدمه
" ديمه اتحب ؟ ديمه لقت فارس احلامها !! يعني خلاص راحت ديمه من ايدي !! منو منوووو هذااا ؟ ياديمه منوو ؟! آآآه "
حس انه بينشل اذا طوّل على هالحـال طلع من الفندق وحاط الورقه بجيب بنطلونه حاس بقهر فظيع ليش بعد ما حصل حلم عمره ونصه الثاني يضيع من ايده بشربه ماي بعد ما هدت نيران اللي تشتعل بقلبه قعد على الكراسي اللي بالحديقه وكان الجو ربيعي دافي فصخ الجاكيت وطلع الورقه كان مهيأ انه يستوعب اللي فيها بدون تدخلات من القلب حاول انه يفسر مضمون هالخاطره بمنطقيه اكثر قعد يفكر وحط كل الاحتمالات الممكنه والمنطقيه بعدين جته فكره سخيفه وحط نفسه من بين هالاحتمالات وشي بعقله الباطن تكلم وكان نداء من داخله من صميم اعماقه سمعه مشعل بتركيز وحاول يفسره بتمعن

" ليش ماتكون انت يامشعل !؟ اهي ماكتبت هالخاطره الا بغرفتك يعني كانت عايشه الحاله بوقتها ومحد طلع لها صدفه وفجأه بذيج الفتره الا انت واكبر دليل على كلامي انها ارتاحت لك انت وشكت لك انت وهي اللي ماشكت لحد قبلك وفضلتك على اهلها وفضفضت لك وهي كانت خايفه انك تختفي من حياتها مثل الباقي اللي اختفوا كانت خايفه انك تكون بالنسبه لها خيال فخيال مشعل ديمه اتحبك خلنا نكون صريحين انت كنت تدري انك المعني بهالكلام من اول مره قريت فيها الخاطره لكن الصدمه من اللي عرفته كانت اكبر من انك اتصدقها خلاص يامشعل كل شي وضح وبان ديمه اتحبك اتحبك انت فاهم !! "
كأنه هالكلام له مفعول مخدر سرح فيه مشعل وحس ان كل هالكلام صح بالمنطق وبالعقل وبالقلب واخيرا اتفق قلبه وعقله على هالشي قام مشعل من كرسيه وصرخ صرخه قويه وكأنه فاز بشي غالي بشي من سابع المستحيلات انه يحصل عليه فاز بقلبها
مشعل : هـــيّا
خذا نفس قوي كل الهواء اللي برئه مشعل تبدل وتغير وتجدد الابتسامه كأنها حالفه انها ماتفارق وجهه من عرف بهالخبر صفط الورقه ورجعها بجيب البنطلون وطلع وهو مستانس من قلب جاته كذا فكره جنونيه انه يرد روما ويشوف ديمه ويعترفلها بحبه لكن الخط الفاصل بين الجنون والعقل هو اللي منعه استسلم بالاخير وبس كان وده انه يتطمن عليها ويشوفها هل هي قد الوعد وكان وده يعرف أخبارها من بعد ماخلاها بدون لا سلام ولا وداع مثل الناس كان وده يرجع عشان يشوف تأثير الكلام اللي قاله لها هل نفع فيها والتزمت فيه والا كان كلام مثل غيره تبخر بالهواء!!؟ كان وده يروح لها ويسألها هل الخبر اللي اكتشفه صحيح اهي تحبه !؟ كان في مليون سؤال وسؤال وده يسألها لكن لا المكان ولا الوقت ولا الظرف يسمح انه يرد وعلى أي اساس يرد ؟ اهو ما سوى الا الواجب طلع مشعل من كل هالافكار بشي واحد وهو الاهم ديمه اتحبه واقل شي انه يمثل مواصفات فارس الاحلام بالنسبه لها وهذا الشي الكفيل بأنه يفرح لي هالدرجه رجع الفندق وشاف ناصر واقف باللوبي وكان لابس لبس التدريب وشايل جنطته الرياضيه والشرار طالع من عيونه خاف مشعل ان صار شي من بعد ماطلع خصوصا وهو طالع بدون تلفون وباب غرفته كان مفتوح ماصكره لانه كان فحاله ماسمحتله يفكر بشي
ناصر بصوت عالي : كان ابطيت اكثر !! لا يارجال روح كمل مشوارك انتظرك ماعندي مانع !!
مشعل تفشل من روحه : خير ياناصر عسى ماشر شفيك معصب ؟
ناصر : واللي يرحم لي والديك عليك برود اعصاب خيالي ممكن اتسلفني منه شوي ؟

مشعل حاول يمتص غضب ناصر واشرله يقعد ناصر رفض بالاول لكنه قعد تحت ضغط من مشعل لان مشعل ضغطه من كتوفه لين انجبر ناصر انه يقعد خصوصا ان مشعل يتمتع بجسم رياضي مرن وضخم

مشعل : اهدى اول شفيك علي انا طلعت الحديقه شوي ورجعت شصاير ؟
ناصر: ياخي التدريب باقي عليه نص ساعه انت من جدك لا لحين قاعد لي بخلقتك ذي روح البس اخلص علي ورانا طريق النادي ماهوب قبال فندقك عشان تتمشور لي الحديقه وتشم هواء روح الله يرضى لي عليك اخلص وتلقاني بالكوفي مع الجماعه ننتظرك عشان نركب سوى بالباص
مشعل : صار ولا يهمك بس اروح اتسبح والبس وجايك برق بس الحلو لا يعصب علينا
ناصر راح عند ربعه بالكوفي وراح مشعل فوق تسبح ولبس ملابسه الرياضيه و خذا جنطته وطلع خذت منه الحكايه ربع ساعه طلعلهم وهم يركبون الباص
مشعل غمز لناصر : خلصنا بوقت قياسي
ناصر : تدري شاللي بيشفي غليلي منك انه بيجيك تدريب يكسر ظهرك متحلفلك المدرب خصوصا انك اربع ايام مريح
مشعل : امش امش الله يستر بس من هاليوم مابقى على الدوري الا ثلاثة ايام بس فبيكرفوني اليوم كرف
ناصر يضحك وكأنه متعود على كراف النادي : جزاك تستاهل
قعدوا اماكنهم وحرك الباص

---------

حسوا بصوت ارتطام قوي على الكرسي ولفوا ام محمد وبومحمد وانوار على مصدر هالصوت شافوه من ديمه وكانها دايخه قعدت على الكرسي بكل قوتها وكأن عظام ايدها ماساعدتها ضعفت وعطتهم الحريه بالحركه وركزت نظرها على الفراغ تشوف كل شي فراغ ما قامت تحس بلون النهر بشكل الطير بصوت السيارات بحركه اهلها كانت تشوف كل شي بمنظور ثاني مخليه نظرها يسبح بالفضاء بشكل مستقيم حست كأنها تسمع صوت اهلها او بالاحرى تسمع اسمها بصوت عالي الدنيا كانت تلف من حولها اتحس فيهم لكن اتحس انهم مزعجين اشكالهم ماي على ضربات خفيفه استوعبت الوضع
ديمه : انا زينه شفيكم ؟
انوار : شفيج جذي قعدتي ؟ ولا تحسين فينا ؟
ديمه : لا احس بدوخه
ميشو : لا تقصين علينا ماطلع فوق راسج صعروره عليها نجوم !!؟
كانت ميشو كعادتها اتدش عرض وتستعبط لكن ديمه شافتها وتذكرت للي سمعته
"راح مشعل !! ( ابتسمت بتعب) كلهم مشتركين بخيانه كبيره كلهم يطلعون بحياتي فجأه ويختفون فجأه !!"
عرفت انوار من نظرت اختها باللي فيها
بومحمد : ديوم حبيبتي انتِ ماكله شي اول ما قمتي ؟
انوار : لا يبا ترى ماكلت شي
بومحمد : عدل اكيد هبوط روحي يبا انتِ واختج غرفتكم وبطرش لكم الريوق لي الغرفه عشان ترتاح اختج
انوار : اوكي
وساندت اختها ووصلتها لي الغرفه ودشوا وعلى ما ارتاحوا وبدلوا لبسهم
انوار : ديمه شفيج ؟
ديمه : ماكلت شي
انوار: لا حبيبتي هالكلام مو علي هذاك على ابوج ديوم انا فاهمتج بس ابيج تتكلمين وتفضفضين اريح لج

ديمه طالعت انوار بنظره استغراب
" شلون اتعرف اللي فيني ؟ معقوله انا شفافه ويبين علي كل شي !؟
انوار تكلمت بعد هدوء دام جم دقيقه : ديمه اللي بعرفه هل اللي صارلج له علاقه بروحه مشعل ؟
ديمه لفت بسرعه على انوار : مشعل
انوار : أي مشعل
ديمه : لا شكو مشعل !!
انوار : ديمه لا تعبّيني معاج حبيبتي انا اختج وحاسه فيج اذا ماقلتي لي بتقولين لمنو ؟
ديمه : وليش اقول اسكت احسن !
انوار : اها وصلنا خير يعني في شي بتقولينه ديمه قولي صدقيني ماراح تتعبين لان كل الكلام اللي بتقولينه عندي خبر عنه
انصدمت ديمه
ديمه : ماحب الالغاز انتِ شتعرفين ؟
تنهدت انوار : مشعل ماخذ حيز بحياتج !؟
دخلت ديمه داخل فراشها وغطت روحها بالبطانيه وطلعت وجهها عشان تتنفس
ديمه : انا بناااااام
انوار انقهرت لانها ماعبرتها ولا ردت عليها لكن بتفتح لها هالموضوع بعدين بظرف احسن من هذا وبوقت مناسب اتكون فيه ديمه قابله للنقاش
انوار : انزين لاتتكلمين بس الريوق منو بياكله ؟
ديمه : اكليه مالي نفس اكل شي تصبحين على خير
انوار : توج قايمه بتردين اتنامين ؟
ديمه : اقولج صداع وصداعي مايروح الابالنوم اعرفه خبره سنين
انوار : اوكي على راحتج
من ساعتها نامت ديمه وراح يومها كله نوم من التعب اتحس بخمول بجسمها فظيع
ماكلت شي يوم كامل + الصداع + التفكير كانوا هذول اغلب دواعي الخمول اللي تحس فيه

----

الساعه 11 بالليل ردوا مشعل وناصر من التدريب و ناصر اليوم معطينه تمرين مكثف لان الدوري قرب اما مشعل هلكوه تدريب وخصوصا واهو غايب مده اربع ايام أي لاعب ينقطع من التمرين ويرجع له بيحس بعظامه متكسره رجع مشعل غرفته وتسبح ونزل مع ناصر يدورن على مطعم فاتح يتعشون فيه بالاخير لقوا مطعم صييني وطلبوا وقعدوا فوق وكان الجو حلوو بس مايل للبروده
مشعل : شوي شوي لا تاكل الصحن بس
ناصر : انت احمد ربك متعشي ماهوب انا اللي ميت جوع
مشعل : والله محد قالك فوت بريك العشاء
ناصر :شسوي لازم اكلم الاهل
مشعل : ياخي امك طمنها عليك وسلم على اهلك باختصار ماله داعي تاخذ نص ساعه تكلم فيهم اهلك
ناصر : لا ماهيب امي امي كلمتها امس وتطمنت عليهم اليوم المدام
مشعل :اووووه دام المدام مانقدر نتكلم
ناصر : اسكت شانه علي حرب البسوس تقول من طبيت باريس ماكلمتني الا مرتين
مشعل : احلللف؟ عاد ليش حرام عليك
ناصر : اهي ماهي نفس امي سلام واعرف احوالهم واقفل لا اهي تبيني اسولف معاها وانا نادر ما افضى شايفنا مكروفين
مشعل : ولو لازم اتفرغ نفسك
ناصر : منت شايف مالقيت وقت الا عشاي وفضيته لها والله محد يعرف شكثر مشتاق لها لكن ظروفي كذا وش اسوي ؟
مشعل : ياه والله الزواج حوسه
ناصر : لا بالعكس الزواج حلو لانك اتحس ان في احد يشاركك حياتك افراحك واحزانك وكل شي تمر فيه
مشعل : يالله الله يعين
ناصر : ماقلت لي شوراك ما عزمت تتزوج وتودع العزوبيه ؟
مشعل : تو الناس على الزواج
ناصر : بالعكس سنك مناسب جدا
مشعل : شلون
ناصر : شوف الزوج التكانه بتلاقي عمره من 24 وفوق تحت هالسن تلقاه طايش وماهو قد مسؤوليه وبيت وعيال
مشعل : انا مأجل هالسالفه لي السنه الجايه احسن
ناصر : طيب اللي تشوفه احنا نصحناك وراك ماكليت ؟
مشعل شاف صحن ناصروقارنه بصحنه
مشعل : انا كنت متعشي لكن اللحين من بعد التمرين جعت وكليت خفيف اما انت ماتعشيت لاتقارن نفسك فيني
ناصر : ههههههههه لاتذكرني بالعشاء اللي طافني
مشعل: عساه بينّ بالمدام
ناصر : لا انسى يبين فيهم
مشعل : هذا اللي ينصحني على الزواج هاااا ؟
ناصر : ههههههههه اخلص اطلب لنا ايس كريم بس
مشعل : توني ماخلصت اكلي انت انشفحت وقضيت على كل شي وتبي بعد ايس كريم !!
ناصر خذا الكلينكس وقطه على مشعل
ناصر: قووووول ماشاء الله وجع لا تنضلنا
مشعل : ههههههههه تبارك الله زين
بعد ماخلصوا ردوا الفندق وحطوا روسهم لكن مشعل ماقدر ينام وقعد يفكر بالدوري شراح يسوي فيه ناوي يرفع راس اهله وديرته ويسوي كل اللي يقدر عليه قعد يفكر بيوم السبت الجاي اليوم اللي بيبدا فيه الدوري واليوم اللي بيرد فيه بومحمد واهله الكويت !!
-----
قامت ديمه الساعه سبع الصبح وراحت صلت وتسبحت وشغلت التلفزيون وقعدت عليه واستانست لقت عرض الازياء اللي تبيه مرايم بنت خالتها وفجت الكاميرابسرعه وصورته من اوله لي اخره وعلى الساعه ثمان وربع شافت ان انوار اختها ماقامت وحست انها تبي تقعد مع نفسها اكثر نزلت تحت وطلبت لها ريوق وقعدت على النهر كانت تبي تحط حل نهائي لحالتها وكان اليوم الي راح كله تفكير واليوم هذا بيكون نهايه كل التفكير اللي اتعبت منه اقتنعت اخيرا ان مشعل ماهو الا سحابه صيف مرت وهلت عليهم بالخير وراحت بسلام مشعل سوى شي اهلها ماقدروا يسونه عطاها المعنويات واهلها ماعرفوا غير الماديات عطاها روح التحدي العزم والاصرار على انها تتغلب على نفسها وتقتل شبح الذكريات اللي ملاحقها وين ماراحت علمها تزرع بسمتها على وجهها دام ان اهو اللي سعى انها اتغير نفسها للاحسن ليش تجي هي اللحين بعد ما راح وتخرب كل اللي سواه رفضت تلبس ثوب الحزن على رحيله اسألت روحها ليش صارلها اللي صار يوم درت برحيله ؟ ديمه خافت لانها اكتشفت امس مشاعر جديده يوم درت انه راح خافت من هالمشاعر تبي تقتل كل المشاعر اللي بقلبها له وتأقلم نفسها على الوضع الجديد اللي بحياتها لانها في مرحله تغيير واقتنعت ان محد يقدر يساعدها كثرها هي بنفسها تذكرت كلامه يوم يقولها ان التغيير لازم يكون نابع منج انتِ بعدين لاحظت ان مشعل كان طيف عابر صج انه غير مجريات حياتها للافضل لكن يضل هو من بعد الله صاحب الفضل بتغيير حالتها
" خلاص راح الله الحافظ لكن اجي اخرب شي اهو صلحه مستحيل اللي علي التزم بالوعد واتغير وبس ولازم انساه عشان اعيش مرتاحه "
مع هالوعود اللي قطعتها ديمه على نفسها ثارت في نفسها روح التحدي واصعب تحدي هو تحدي الذات لان الانسان يكون يعارض شي اهو متعود عليه لكن هالتحدي بيفيده لان بيغيرله حياته للافضل تغلبت ديمه على ذاتها بمساعده ارادتها على انها تمنع أي شي بحياتها يذكرها بذكريات قديمه حزينه قررت انها من اليوم تكون انسانه جديده وتنسى مشعل عشان مايكون اهو العقبه الوحيده امامها من بعد ماكان اهو المشعل الي نور لها دربها

بعد ماخلصت ريوقها اصعدت فوق ودشت غرفه حمود وميشو لقتهم ياكلون كورن فليكس ويطالعون رسوم متحركه طقت لهم التحيه اللي متعودين عليها وكأنهم يشوفون ضابط وقعدت معاهم
محمد : تبين ترى في حليب الكورن فليكس على الطاوله حياج
ديمه : لالا تريقت الحمدلله عليكم بالعافيه
ميشو : الله يدفيج
محمد : يعااااااافيج مو يدفيج ليش اهي شكت لج قالت انها بردانه ؟
ميشو : انت لا تصارخ علي
ديمه : هههههه لا حمود انت اخوها المفروض اتعلمها مو تصارخ عليها
محمد : اللهم طولك ياروح
ميشو : قوم قوم انا زعلت
ديمه : وين بتروحين ؟
ميشو : مالكم دخل فيني ماحبكم
محمد : لا تطلعين ترى ياخذونج الحراميه
ميشو : هئ هئ عبالك تقص علي انا اعرف حركاتك انت جذاااااااب
محمد : تعاااااااالي وين بتروحين
ميشو : وخر عني بروح اطق على مشأل حبيبي الباب بيخليه يشتري لي مشط حق عروستي واخليه يوديني عند الماي والسفينه اللي تحت
محمد : الحمدلله والشكر اولا اسمه نهر وبعدين اسمه لنج مو سفينه ثانيا اختي العزيزه مشعل سافر يعني مو بغرفته
ميشو : ادري بابا قالي انه امس راح بس كل اللي يروحون يردون امس بابا راح مطعم بعدين رد عادي كلنا نروح انرد
محمد : اذبحج انا ؟ قلتلج سااااااااافر
ميشو : اففففف ماعرف شنو يعني
محمد :يعني مثلنا احنا سافرنا من الكويت لي هني
ميشو: اهاااااااا طياااااااااالالالا
محمد :علييييييج نور طياره
ديمه كانت تطالعهم وساكته " خلاص لاتجيبون طاريه خلوني انساه تكفون "
ديمه : أي علمها جذي مو بالهواش
ميشو : ديوم تذكرين يوم صكيتي علي الباب وانا اصيح وانتِ رحتي وخليتيني ومشأل انقذني
ديمه تذكرت وضحكت على اختها على بالها بسبيس تون قاعده
ديمه : ياماما انسي وبعدين انا خليت مشعل يفج لج الباب
ميشو تطالعها بنص عين : لالالا مو انتِ اصلا اهو ايحبني لانه شالني فووووووق
ديمه : ههههههههههه انزين مبروك درينا انه يحبج
محمد : مشكله هالبنت محد يعطيها وجه
ديمه : يلا تروحين معاي تحت ؟
محمد : انتِ اربع وعشرين ساعه تنزلين النهر مازهقتي ؟
ديمه : حرام عليك هالمنظر ينزهق منه ؟ والله انه يرد الروح
محمد : يقولون ابوي مجهز لنا طلعه اليوم ؟
ديمه : مادري امس ماكنت معاكم
محمد : أي امس انتِ في سباتٍ عميق
ديمه تدزه : قول ماشاء الله
ضحكوا ونزلت ديمه مع ميشو تحت ينطرون اهلهم متى يقومون عشان يطلعون اليوم على الساعه تسع قامت انوار وانزلت لهم وكانت عيونها منتفخه من النوم لانها من الزهقه امس ماكان عندها احد تسولف معاها نامت الساعه 10 بالليل
ديمه ترحب بأختها من بعيد : الله حيهم
انوار : الله يحيج زين قمتي
ديمه : لاوالله ؟ تتكلمين عن روحج شوفي عيونج قارصتج ذبانه النوم
انوار : اناااااااا؟ والاانتِ لا تقهريني
ديمه : هههههههههه هدي ياجميل لا تعصب
انوار : هذي شمقعدها الحين ؟
كانت اتأشر على ميشو اللي تمشط الباربي
ديمه : لا والله ؟ شوفي ساعتج حبيبتي كل خلق الله قايمه
انوار : أي ابوي مجهز لنا طلعه محترمه
ديمه : صج ودي اطلع واصور واستانس
انوار تطالع اختها مستغربه مو هذي ديمه اللي امس !!
انوار : أي صج كاهي امي جات يلا ميشو روحيلها
راحت ميشو عند امها وجت امهم وتطمنت على ديمه وشافتها اليوم متحسنه خافت لايكون امس اللي جاها هبوط بالضغط او شي لكن اليوم متحسنه بشكل واضح
انوار : قومي ديمه بنروح محل هدايا بوريج اياه
ام محمد : لا تروحون اللحين ابوكم يجي ونطلع
انوار : لالا يما شوي واذا تأخرنا لج علي ارتب جنطه ميشو كلها
ام محمد استانست على هالعرض لان جنطه ميشو شي تعجيزي : اووكي روحوا بس لاتطولون
قاموا البنات وراحوا صوب المحلات
ديمه : وين المحل اللي قلتيلي عنه ؟
انوار : ليكون صدقتي ؟
ديمه : ها اجل ؟
انوار : لا بس انا كنت عازمتج على كوفي عشان عندي موضوع لازم اكلمج فيه بعيد عن اهلي
ديمه : انوار انا عارفه هالمووضوع حبيت اقولج هالشي انتهى ولاتناقشيني فيه
انوار : يماما الاصول تقبلين العزيمه عشان اتعرفين الموضوع اولا بلا لقافه
ديمه : بس اناااا اعــ
قاطعتها انوار : ادري انج اتعرفين الموضوع بس ياخي بتردين عزيمتي
ديمه :اف زين ماراح اردج بس اختصري
انوار : ولايهمج
قعدوا على الكوفي وكان قريب حيل من فندقهم كان بقفاه وبعد ما شربوا الكوفي وكلوا الجيز كيك
انوار : ديمه انا اللي شفته امس انج تأثرتي يوم راح الي بعرفه اهو يعني لج شي ؟
ديمه : الجواب اللي طالبته مني ماله فايده لاني خلاص قررت اليوم اغير كل شي كان بالماضي ومشعل امس يعني ماضي وانا قررت اتخلص من كل ذكريات الماضي وابدا رحله جديده واخذ من الماضي الشي اللي بيسعدني اذا تذكرته
انوار : يعني انتِ اتحبينه ؟
ديمه نزلت الكوفي وغمضت عيونها
انوار : نصيحه لاتتعلقين وراء هالحب لانه يمكن يطلع وهم وبعدين لاتتعلقين وراء شي صار سراب هو تقريبا اختفى من حياتج خلاص المهم اللحين انج تنسينه
ديمه : أي جنج تدرين اني اليوم مفكره بكلامج خلاص قررت امسح كل شي ممكن انه يتعبني بالمستقبل
انوار : دامه غير حياتج للاحسن لا تخلينه يقلبها للاسوء
ديمه : أي مو هذي هي الفكره مابي اخرب شي اهو صلحه اللي علي بلتزم بوعده وبغير نفسي وابيج اتساعديني وغيره محد له شي عندي
انوار : ههههههههههه حشى ديون وطلابين
ديمه : هههههههه مادري عنج
انوار : اشوى انج فاهمه وعاقله
ديمه : ليكون جايبتني اتعلميني العقل والصح والغلط
انوار : ليش لأ احنا علينا ننصح وخاصه للناس اللي انحبهم
ديمه : هههههههه اتغشمر والله لولاج مادري شسوي
انوار : احنا فاهمين بعض ولو
ديمه : يلا مشكوره على العزيمه وقومي لا نتأخر عليهم
انوار : عزيمه طياريه
ديمه : ههههههههههه مابي تفوتني الطلعه

ارتاحت ديمه بعد ماعرفت ان اختها فاهمتها لان من طبع انوار تقرى الانسان بدون لا يتكلم وهالشي فاد ديمه حيل .طول رحلتهم اللي قضوها

-----
اليوم الثاني الساعه 4 العصر كانوا كلهم بأحد المجمعات التجاريه بروما وكانوا البنات مع ابوهم كان متعمد يخليهم معاه لانه يدري اذا خلاهم على راحتهم بيشترون الاولي والتالي والجناط خلاص ماقامت تسمح بأي زياده وبهالطريقه تأكد انهم ماراح يشترون وبعد ماقعدوا بمقهى بنص المجمع كأنه تذكر شي وراح شرى كرت دولي واستأذن من المطعم بتلفون وعطوه تلفون لا سلكي لي الطاوله وطلع بومحمد بين اوراقه ولقى ورقه صغيره ودق الرقم اللي فيها وقعد خمس دقايق لين رد عليه

بومحمد : الوو السلام عليكم
مشعل : وعليكم السلام والرحمه ياهلا والله بومحمد
بومحمد : ياهلا فيك هاه شلونك من بعد رحله امس ؟

مشعل : ابد والله جيت وريحت وطلعنا التدريب
بومحمد : وشلون ساقك مع التدريب ؟
مشعل : لالا تشيل هم ماعليك حصان الحمدلله
بومحمد : نبيك تشد حيلك الا متى يبدى الدوري ؟
مشعل : خلاص بعد يومين السبت هذا
بومحمد :بيوم رحلتنا
مشعل بحزن : خلاص عزمتوا ترجعون !؟
بومحمد : أي الحمدلله الكل مستانس ومشتاقين للكويت
مشعل : لاتذكرني والله اني مشتاق لاهلي بس مصبر نفسي هانت كلها اسبوعين
بومحمد : ماعليك بتروح بلمح البصر بس المهم انتبه على نفسك
مشعل : لا توصي حريص ولا تنسى اتسلم لي على عمي بومحسن
بومحمد : يوصل ان شاء الله وسلم على ابوك سلام ٍ كثير
مشعل : يوصل عمي وتوصلون بالسلامه ان شاء الله
بومحمد :الله يسلمك ونبيك ترد لنا بالكاس
مشعل يضحك : ابشر من عيوني
بومحمد : تبشر بالجنه ان شاء الله يلا ماطول عليك البنات بيطلعون
مشعل : سلم لي على ميشوو وعلى حمود
بومحمد : هههههههههه جان خذيتها معاك وفكيتني منها
مشعل : دامكم ماتبونها عطوني ياهاا حرام عليكم احبها
بومحمد : ههههههههه ابتلشت انها اتحبك ومأذيتنا عليك
مشعل : بجيب لها الكاس لعيونها
وقعدوا يضحكون ومن بعد السلامات صك بومحمد التلفون والغريب ان ديمه تبتسم ولا كأن صار شي انوار حبت هالشي وشافت انه تطور كبير لديمه فمسيره تغيرها اما مشعل كان مستانس ان بومحمد تذكره ودق عليه يتطمن بومحمد من طبعه حبوب وعايلته كلها تنحب بسرعه وماينسى الواجب وخصوصا ان مشعل قام معاه بالواجب

مرّت 3 ايام وديمه بدت تتغير جذرياً يوم عن يوم وبدا اهتمامها بفوفو يقلّ يوم بعد يوم وصارت الابتسامه جزء من ملامح وجهها

يوم الجمعه بالليل
انوار : آه ياربي مشتاقه للكويت
ديمه : باجر بإذن الله انتِ فيها
ام محمد : نبي ديرتنا نبي نسمع صوت الاذان
انوار : أي يمه صج انهم عطونا مواقيت الصلاه لكن احس اني ضايعه
ام محمد : الا بذكر الله تطمئن القلوب
ديمه : يما انتِ ماجبتي معاج قرآن ؟
ام محمد : امبلا جبته والا شمصبرني انا على القعده بعد كل صلاه اقرا لي صفحتين
ديمه : يما اتصدقين التزمت بطريقتج بالقرايه والله اتريح
ام محمد : أي بعد كل فرض اقريلج صفحتين وبجذي بالشهر تختمين القران على كثر ماتتعودين راح ترتاحين لانج ماراح تهجرين القران ومع الاستمرار راح يكون عليج الحفظ سهل
انوار : وانتوا ليش ماعلمتوني هالطريقه
ديمه : اللي بقلبه صلاه بيصلي
انوار : خلاص يما بس المشكله انا وديوم ماجبنا الا قران واحد
ديمه : بسيطه ابدي من باجر اذا ردينا الكويت
انوار : أي يمى ذكرتيني انا ومريوم بنشترك بدار حفظ القران
ديمه : وانااااااااا ليش ماتقولون
انوار : انتِ حافظه من الثانويه يما منج
ديمه : لا بس جزء عم ابي احفظ القران قوليلها تسجل اسمي
انوار : انزين انتِ نشبه معانا بكل مكان
ام محمد : أي جذي تعاونوا على الخير مو الفنانه الفلانيه لابسه كيت وبتقلدونها قلدوا بعض بالخير
ديمه : ههههههههه الحمدلله انا ماقلد فنانات لاني واثقه بروحي
انوار : لا والله واللي حجزت لي موديل نوال حق عرس خالد ولد خالتي منو
ديمه :ههههههههههه لج انتِ مو لي
ام محمد : يلا بنات جهزتوا اغراضكم ؟ باجر بنرد نبي كل شي جهاز على 11
انوار : ابشررررررري يا نظر العييييييين
دخلت عليهم ميشوو : ماما باجر بروح عند رغد ؟
ام محمد :أي وعند مريوم وعند خالتج نوف
ميشو : ماما انا بعطي رغد عروستين
ام محمد : جنطه كامله تعطينها بس عروستين لا حبيبتي عطيهم اكثر عشان تلعبون مع بعض
ميشو : بس انا باخذ اللي شعرها طويل
ديمه : يما هالبنت لاتقصين شعرها اخاف اذا كبرت تستخف وتلبس بواريك
انوار : هههههههههههههههههههههه تخيلت شكلها
ميشو : ماماااا شوفيهم يضحكون علي
ام محمد : اففف منكم يلا انا بروح غرفتي تعالي ميشو معاي بنات رتبوا الاغراض وانوار عليج جنطه ميشو يلا تصبحون على خير
طلعت امهم وصكت الباب مابقى الا ديمه وانوار بالغرفه
انوار : لالالالالا عاد جنطه ميشوو حوست العالم فيهاااااااااااااا متى اخلصها
ديمه : بساعدج لاني جهزت اغراضي
انوار : تسوين خييييييير
وقعدوا يرتبون الاغراض
انوار : تعالي انتِ اغراضج اللي شريتيهم من باريس وينهم ؟
ديمه : بالجنطه البيضاء مافتحتهم لانهم جدد بفتحهم بالكويت
انوار : يلا عاد فجيهم بشوف ملابسج
ديمه : لالا تراها حيل ضيجه بالكويت بفتحها عشان احطهم بالكبت وبعدين بتشوفينهم
انوار : اففف منج عنيده
ديمه : امبي مومصدقه هذا اخر يوم لنااااااااااا ؟
انوار : انتِ مو ملاحظه شي ؟
ديمه : الا قولي اشياء ههههههههه
انوار بنظره حنان : تغيرتي 180 درجه
ديمه بفرحه : صج
انوار : والله العظيم بهالثلاثه ايام راقبتج اربع وعشرين ساعه ماكنتي تسرحين ابد ولا اهتميتي بفوفو ولا تسألين عنه ولاحظت ان البسمه انزرعت بوجهج تغيرتي والله حتى كلامج كله فيه امل وانج بتسوين وبتحطين ماقمتي تتكلمين عن ايام قبل مثل اول انا مستانسه ان هالسفره غيرتج عكس قبل بس تبين تقعدين بروحج وكلا هاديه اللحين ماتبين تقعدين فاضيه ابد كلا تمشين وتصورين وتضحكين و تلعبين قسم بالله ريحتيني حتى اهلي لاحظوا

ديمه متشققه من الوناسه : آه الحمدلله هذا اللي انا ابيه وعسى الله يتمم علي صدقيني ترى كل اللي شفتيه ماجاء بهالسهوله عانيت على ما وصلت له بس ان شاء الله اتم على هالحال واحسن ولا اتغير
انوار : اهم شي راحه البال والصحه
ديمه : الحمدلله عدت هالرحله على خير وخذيت من خيرها وتركت المر منها
انوار : تقصدين مشعل ؟
ديمه : خلاص انا وعدت روحي ما اتكلم بـ كـان كان مشعل يحتل جزء من حياتي والحين طلع منها
انوار : يلا باجر من نرد الكويت بتنسين كل شي ونرد حياتنا الطبيعيه
ديمه : الحمدلله يارب احمدك واشكرك على كل حال

-------
اليوم السبت المباراه الاولى الساعه 1.30 الظهر كان فريق مشعل يلعب بهالمباراره وناصر كانت له المباراه الثانيه اللي كان توقيتها 5.30 المغرب كانت المباراه الاولى بالدوري حماسيه وكان فيها روح القتال وتميزت بالمدّ والجزر بين الفريقين لين انتهت المباراه بالتعادل الايجابي 1/1وطلع مشعل من هالمباراره الكل يهنيه على هالاداء الحلو كان هو رأس حربه وكل هجمه يقوم فيها يشجع الفريق كله على اللعب ماخلوا الجمهور يملّ وبالاخير طلع من الملعب بعد ما اثنى عليه المدرب وخلوا اللاعبين بالاستراحه يرتاحون وركبوا الباص وردوا الفندق وتسبحوا وريحوا لكن ناصر كان بالملعب ماقدر يقعد معاه بس شافه من بعيد وأشر له بأيده علامه اوكي من بعد ما انسدح مشعل على السرير شاف ساعته وفز من مكانه واتصل على الخطوط الجويه الكويتيه وسأل عن رحله روما للكويت الساعه جم ؟ قالوله بعد نص ساعه صك مشعل التلفون وهو متوتر

" خلاص انتهت رحلتهم !! ياترى شصار عليج ياديمه !؟ "

بهالوقت كانت طياره بومحمد تعلن اقلاعها من الاراضي الايطاليه متجهه الى الاراضي الكويتيه وهم بالمطار سمعوا النداء بالتوجه الى الطياره انوار اسمعت من النداء اسم الكويت ونطت لهم وخلتهم يغصون بالعصير اللي يشربونه من فرحتها
انوار : قوووووموا اعلنوا رحلتنا
بومحمد : خلي اخوانج يكملون عصيرهم
انوار : الخير واجد بالكويت حبكت على العصير
ديمه : ههههههههههه الحمدلله والشكر والله الكويت ماراح اتطير موجوده بس انتِ قلبج لا يطير
انوار : ياااااربي متى بنوصل واكحل عيوني واشوف ديرتي
ديمه : انتِ مو كفو سفره حشى ولا مهاجره سوت نفسج
انوار : اقول بس كملي عصيرج لا اكبه فوقج
ديمه : هههههههههههههه
محمد جاهم ومعاه ليبل مال الجناط
محمد : يبا هذا شسوي فيه انت قلت لي خله معاك
بومحمد : ايي خله لا يضيع نحتاجه بمطار الكويت
محمد استانس انه خاش شي مهم : اوكي ولايهمك
ميشو : بابااااااا شيلنييييييي كل الناس طويله الا انا قصيره
بومحمد ضحك وشالها فوق وحست بفرحه اتشوف الناس وهي اعلى منهم وهم يمشون تجر شعر اللي تشوفه لين ابوها طقها على ايدها قالها عيب
ميشو : لا بابا انا بشوف منو احلى شعرهم والا شعر عروستي ؟
ديمه : والله انج قاضيه مره وحده
محمد : تلوموني فيها انا زين مخليها عايشه لي اللحين
انوار : ديوووم شوفي كويتين هالصوب
ديمه : أي اكيد هذي رحله للكويت بتشوفين كويتيين
انوار : االله شوفي هذيج البنت شكلها كوول وتفرفش يارب تقعد عندي بالطياره
ديمه : اشوف من الحين بدينا بالخيانه !!
انوار : لا يعني انتِ يميني واهي يساري
ديمه : ماشاء الله اوكي نشوف
محمد : يبا يلا الكل ركب
بومحمد : يلا توكلنا على الله
ووركبوا الطياره وكانت ديمه على الدريشه وانوار على الممر استانست انوار ان الكويتين معاهم بالدرجه السيااحيه بس انقهرت لان المكان اللي بالنص مافيه احد فاضي والبنت كانت بالصف اللي قبله
انوار : شفتي الحظ الزفت
ديمه : شتبين بخلق الله يمكن مالها خلق اتسولف ؟
انوار : انا ياحبيبتي اخلي الصخر يتكلم
ديمه : استغفر الله
انوار : أي يعني ماعندي احد يقعد هادي ومستحي اعرف اطلع السوالف منهم
ديمه : أي تعلميني فيج ؟
ام محمد اول ماحطت السماعه بإذنها حطت على سديس وهو يقرى كان صوته يخشع القلوب ولا اراديا بجت من اسمعت القران حست انها من زمان ما سمعت صوت اذان ولا صوت قارئ خشعت وهي تسمعه ومن طول الرحله نامت وباذنها السماعات ولين بومحمد شال السماعات وخلها تنام بوضعيه مرتاحه فيها وعدل لها راسها وهو مايل على الدريشه ومن الجانب الثاني
انوار لابسه السماعات: جم رقم اغاني خليجيه ؟
ديمه : حطي رقم سته
انوار حطت رقم سته سمعت صوت سديس وتنهدت بصوت عالي
انوار براحه : صوته يريح
ديمه عدلت لها السماعات
ديمه : احسن لج من الاغاني الخليجيه واحنا بين السماء والارض
انوار : هههههههههه
بعد نص ساعه قامت ام محمد وشافت بومحمد قايم وياكل وجبته
ام محمد : متى بنوصل
بومحمد : مابقى شي ساعتين
قعدت ام محمد اتعدل شيلتها وشافت بومحمد سرحان ودرت انه يفكر بشي مهم
ام محمد : شفيك منصور ؟
بومحمد: تتوقعين صج هالسفره غيرتها ؟
ام محمد : انت لا لحين تسأل كل شي واضح
بومحمد : اتصدقين اني ارتحت وخصوصا بأخر ايام بروما حسيت انها خلاص تغيرت 180 درجه
ام محمد : الاهم ان حتى طيرها ماقامت تسأل عنه
بومحمد : الله يتمم عليها
ام محمد : امين يارب

من الجانب الثاني بالطياره التفتت البنت عليهم
البنت : بنات لو سمحتوا التلفزيون يشتغل عندكم ؟
انوار مستانسه : أي يشتغل
البنت : اجل شفيه ما يشتغل عندي
انوار : يمكن المقعد اللي انتِ قاعده عليه خربان
البنت : الظاهرجذي لان ابوي يشتغل عنده
انوار: ااها على العموم ترى في مقعد فاضي هني
وتأشر لها على المقعد اللي عندها
البنت : عادي اقعد مو مكان احد ؟
انوار :لا عادي فاضي
وقعدت عندهم البنت واستغلت الفرصه انوار واخذي واعطي معاها لين تعرفت عليها ومثل ما توقعت انوار طلعت هالبنت من طقتها فرفوشيه وراعيه سوالف وغشمره
انوار : اقول رناد ترى لفت انتباهي اسمج حلوو شنو معناه ؟
رناد : على ما اعتقد انه كسره العود
انوار : واااااو رووعه
رناد : ببدايه الامر تعقدت منه احس انه غريب واكون معروفه بالمدرسه بس بالاخيراقنعوني اهلي اني مميزه عن الكل
انوار : اييييي ياحظج
رناد : ماقلتي لي من متى انتوا بروما ؟
انوار : من اسبوع

رناد : عاد حلوه ليش ماطولتوا
انوار : اسكتي انا ابي الكويت بستخفففف
رناد : هههههههه عاد اسبوع ما امداج تشتاقين لها
انوار :شنو اسبوع !!قبلها اسبوع كنا بباريس
رناد : اهاااا عشان جذي زهقتي
انوار :مازهقت بس خلاص ابي ارد الكويت ابي ارد لحياتي الطبيعيه
رناد : والله احنا لوتشوفين رحلتنا تموتين من الضحك
انوار : ليش وين رحتوا
رناد : من كل بلاد قطره نمسا يومين سويسرا يومين لندن يومين باريس يومين روما يومين
انوار : ووناسه يعني 10 ايام قسمتوا هم عدل
رناد : طاح حيلي من طياره لي متروا
انوار : ههههههههههههههه احلى شي تحسين بطعم السفره
وبعد السوالف ماحسوا بالرحله وديمه نفس امها من حطت سديس بإذنها نامت وحست براحه الدنيا كلها بقلبها ونامت تقريبا ساعتين اول ماقامت شافت رناد مع اختها وقعدوا يسولفون ويضحكون دشت معاهم ديمه بالجو وشوي شافوا ان الدنيا صارت ليل وحطوا مسرحيه مصريه كوميديه يتابعونها ويعلقون عليها ويضحكوووون
ديمه : اووش رناد طلي شوفي في احد جدامنا ؟
رناد : لا ماكو الاخدامتنا نايمه بسابع نومه
انوار : اشوى يعني نضحك على راحتنا
ديمه : اشوى هالرحله مو زحمه مثل جيتنا
انوار بصوت واطي : يابعد عمري يالكويت . لاتلوموني اذا ذبت بهواها اوتماديت بمحبتها وغلاها القمر وده يسمونه الكويت والنجوم اتغار والله من حلاها
رناد : لاتخليني ارقص
ديمه : ههههههههههه صج مو صاحين
يوم اعلن كابتن الطياره انهم الحين في دوله الكويت وقالهم يستعدون للهبوط اهني انوار كل شوي وتوقف تطل من الدريشه
انوار حاطه ايدها على قلبها : ابراج الكويت !!
رناد : اللي اشوفه برج التحرير
انوار : يابعد برج ايفل والله
ديمه : ههههههههههههههه لا انا اتوقع باجر قصيده وطنيه نازله بالجرايد
انوار : ديوم جبي تكفين خلاص هبطنا
ديوم ميته من الضحك لان انوار جاتها حالت طوارئ واختبصت من قلب حدها مستانسه
ديمه : وراي مليون شغله اذا رديت بسويها
انوار : ذكريني انزل خبر عاجل بالاخبار اني وصلت وافتح تلفوني لاستقبال المكالمات
رناد : عشتواااا الا على طاري التلفون عطيني رقمج خلني اكون من المهنئين
انوار :ههههههههه أي ذكرتيني وانتِ بعد عطيني رقمج والله ان قاطعتي تعرفين شغلج
رناد : هههههههههههه خوفتيني لا خلاص مابي
ديمه : عادي ماشفتي شي اخذي وخلي
انوار : وان شاء الله عبالج بعطيج رقمي جذي بسرعه لا حبيبتي لازم تقدمين جم طلب
رناد انقهرت وطقتها على جتفها : خلصيني عطيني يلا وصلنا الحين بيقومون

وخذوا ارقام بعض قاموا كل الركاب ونزلوا من الطياره ديمه بشكل لا ارداي تذكرت مشعل وتذكرت ان اليوم الدوري بيبدا حطت ببالها كذا سؤال " ياترى هل بتسعفني ارادتي واكمل اللي بديته بروما ؟ وخصوصا اني رديت اخاف يرجع لي الروتين القديم !! ياترى مشعل شسوى اليوم بمباراته ؟ يلا الله يوفقه ان شاء الله "
خلاص سفرتها لي هني انتهت ياترى شراح يصير في المرحله الجايه !!؟
-----

:: الجــزء الحـادي عشــر ::
وصلوا عايله بومحمد مطار الكويت الدولي الساعه 11.30 بالليل وسووا الاجراءات وخذوا الجناط وهم يمشون بالمطار شاف بومحمد وجه مو غريب عليه
بومحمد : جراح !
وكأن اللي نادى عليه ما انتبه له وعلا صوته بومحمد شوي لينالتفت اهو عليه وتأكد بومحمد ان هذا هو جراح ولد اخوه
جراح : هلا والله عمييي الحمدلله على السلامه
بومحمد : الله يسلمك شلونك انت وشلون ابوي ؟
جراح : كلهم تمام يسلمون عليك وينطرونك
كان جراح مع ربعه وتركهم وجاء سلم على عمه لكن ديمه وانوار ومحمد وميشوو كلهم كانوا واقفين مع ابوهم
جراح شافهم : هذول عيالك ؟
بومحمد : ليش ماتعرفهم ؟
جراح : وين اشوفهم عمي واحنا مانشوفكم الا بالعيد ماعرف منهم الا حمود !
بومحمد : اسأل امك ليش مانجي الا بالعيد
جراح تنهد: ماشاء الله عندك بنات كبار (ويبتسم ) هاه عمي تزوجنا !!
بومحمد وهو يضحك : انت اصغر منهم كلهم الا اذا تبي ميشو لكن سوري بنتي مخطوبه
جراح : افاااا راحت بنت العم !!
وقعدوا يضحكون
بومحمد : الا انت وين رايح ؟
جراح : على لندن بلتحق بعايله هناك لين ما اهلي يجون ونرد مع بعض
بومحمد : ماقالي محسن انه بيسافر !! وبعدين مابقى شي على الدوامات والدراسه ؟
جراح : هههههه لا عمي لاتحاتي انا مضبط روحي من ناحيه الدراسه وبعدين ابوي تجاره حره وامي بتاخذ اجازه من دوامها
بومحمد : وشلون ابوك خلاك تسافر لحالك مع ربعك ؟
جراح : عمي ترى عمري 16 يعني اعرف ادبر روحي وربعي ماشاء الله ابوي يعرفهم كلهم مايحتاج يخاف علي
بومحمد : شايف هذا (يأشر على محمد ولده ) ما يسافر لحاله لو تم عمره عشرين
جراح : هههههههههههه يووو ه الله يعينه اجل
وابتعدوا البنات عنهم ورد محمد وسلم على ولد عمه وقعدوا يسولفون لين تأكدوا ان كل جناطهم وصلت وبالاخير
انحرج جراح من بنات عمه كانوا واقفين بعيد وشكلهم يتأففون واستئذن منهم وراح
جراح كان الوحيد من عيال محسن الطيب المسالم بس حيل شايل ايده من العايله لانه يدري انها كلا مشاكل فا مريح روحه بالسفر وعايش حياته مع ربعه ولكن أي احد من اهله يحتاجه يجيه من اخر الدنيا ويساعده البنات تعرفوا على فرد جديد من عايلتهم
طلعوا من المطار وكان السايق ينطرهم عند الباب وربكوا السوبر على ما ركبوا اغراضهم وجناطهم وهم بالطريج
انوار : ياحلو حرّ الكويت ياناااااااااس
ديمه : أي حرّ !! قولي رطووووووبه موت
انوار : نار بلادي ولا جنتهم
ديمه : هههههههههههههه يلا هاتي من الاخر اذا في شعر ارتجالي قوليه
انوار تقصر صوتها عشان ابوها مايسمع : جبي انتِ بس طايحه فيني تطنز !
وتلتفت انوار على سايقهم راجوا
انوار : راجوا في احد دق علي بالبيت ؟
راجوا يهز راسه : انا مايعرف
انوار قعدت تتحلطم: وهذا اللي انت فاالح فيه انا مايعرف انا مايدري !! وانا مايدري وانا مايعرف !!!
بو محمد : مابي احد ينزل وايده فاضيه الكل ينزل شايل شي والكلام موجه لج ياجاره
ويلتفت على انوار
انوار : يبا عااااااد انا عندي اولويات اهم من الجناط
ديمه : خلاص يبا خلها لأولوياتها انا بشيل عنها
بومحمد : لا دام السالفه جذي محد منكم يشيل شي كل الاغراض تنزلها انوار سمعت راجوا لاتنزل شي
انوار فتحت عيونها بصدمه والكل ضحك
بعد ما وصلوا وريحوا بعد ساعه تقريبا الكل تجمع بالصاله
بومحمد : يلا اللحين راح وقت الضحك والسفر والتمشي والوناسه جاء وقت الجد الحمدلله سافرنا وغيرنا جو واستانسنا اللي علي سويته اللحين ابيكم تجازوني وابي مثل ماعطيتكم تعطوني
الكل مستغرب ! يطالعون بعض
بومحمد : يعني مثل مافرحتكم بهالسفره ابيكم اتفرحوني بالنتايج الحلوه ابي تشدون حيلكم عشان نسافر بالعطله الجايه احسن من هالسفره بعد
انوار : لالا يبا مانبي نسافر خلاص
ديمه : لا والله
انوار : يبا خلاص انا عرفت نفسي اكثر من اسبوعين ما استحمل برى الكويت
ديمه : كيفج انتِ نقطج فبيت خالتي احنا نبي نستانس
بومحمد استانس يوم شاف ردت فعل ديمه من السفره تقبلتها وارتاحت منها وتغيرت فيها وهذا الاهم
بومحمد : اللي تبونه بيصير بس لاحد يعصب انا جامعكم مو عشان اقولكم هالكلام باجر جدكم مسوي غدا لنا ولازم تروحون كلكم تسلمون عليه وتسلمون على عمانكم
الكل جاه احباط من سمع هالخبر وتغيرت ملامح وجيهم مايحبون بيت عمانهم لانه ملتقى الاحقاد الدفينه بين العايله كانوا يزورون هذاك البيت من عيد لي عيد كواجب مع انهم يحبون جدهم حيل بس جدهم دايما بمزرعته نادرا ما ينوجد بالبيت واذا كان بالبيت دايما بالدوانيه مع اعياله وعمهم محسن ساكن بنفس البيت هذا اللي مكرههم بالبيت نفسه
ديمه : بس يبا
سكتت ديمه مالقت عذر لتجنبها الروحه هذي
بومحمد : هذا جدكم وتراه مشتاقلكم من زمان ماشفتوه ولازم تسلمون على عمانكم يلا انا بروح انام تصبحون على خير
راح ابوهم وضلوا كلهم مع امهم
محمد : افف الله يعيني باجر
ام محمد : ماراح تخسرون شي اذا زرتوا عمانكم تغدوا وردوا
ديمه : بس يما اذا انتِ مو معانا ماتدرين شلون يعاملونا
ام محمد : مايخالف ديوم حبيبتي استحملي هذول اهلج وبعدين كلها غدا وتردون
محمد : مشكله الوحيد اللي استصيغه منهم جراح والحين سافر اففف بس
ميشو : انا ابي البس اللي شريته من ديزني واقهر نوره الخايسه
ام محمد ماتت من الضحك : شوفي لازم تاخذين لها هديه وعطيها عروسه من جنطتج الكبيره
ميشو : لالالالالا والله ؟ اعطيها وهي دايما تطقني وتخليني ابجي لالا انا بقهرها وبوريها عروستي واقول لها انتِ ماعندج مثلها حررررره
ديمه : هههههههه حتى الجهال تعلموا المجاور !
انوار : عاد انا اللي مشتهيه هالروحه من زماااااااااااااان وابي مها مرت عمي تكون موجوده
الكل التفت عليها باستغراب
ام محمد: ليش شناويه عيه ؟
انوار : خلوها علي وبس
ام محمد : أي عشان ايقولون امكم ماعرفت اتربيكم !!
انوار : تنقص لسانه اللي بيجيب سيرتج جدامي بالشينه
ديمه قامت تعبت من سيره عمانها ومشاكلهم كل روحه لهم لازم ينولد قبلها التذمر ! راحت غرفتها وصكت عليها الباب وابتسمت غصباً عنها لازم تمنع نفسها من التفكير بأي شي بيتعسها اهي اصلا مو هامها روحه بيت عمانها من الاساس لان مشاكلهم كلها ماهمتها ابدا احقاد دفينه مستعمره قلوب سوده اهي مالها أي علاقه لكن خوفها ينفتح الجرح مره ثانيه وتتذكر عمها مبارك خصوصا انها كل ما زارتهم تقعد فتره طويله بغرفته وهي الوحيده اللي تملك مفتاح غرفته من بعد مامات واطلبت منهم ما يغيرون أي شي بغرفته وكأنه موجود فيها فالسنوات الاخيره كان بيت عمانها بالنسبه لها الملجأ الوحيد اللي تفكر فيه اذا حست بتعب او ضيقه تلجأ لاقرب الناس لها عمها لكن راح عمها وانتهى دوره بحياتها غصبٍ عنها عاشت صدمه غيابه لفتره طويله لكن اليوم كل اللي تعلمته من هالسفره ماراح يبين مفعوله ولا راح اتعرف انها تغيرت الا لين تدخل غرفه عمها . هل بتنهار مثل كل مره تدخلها ؟ وتشم فيها ريحت ملابسه وتقلب البوم الصور اللي تحمل اروع الذكريات !! هالشي الوحيد اللي معيشها بقلق لكن رغم كل هالافكار ابتسمت وحاولت تغير مجريات اهتمامها وراحت شغلت الكمبيوتر وشبكت عالنت ودخلت ايميلاتها وكانوا فوق 30 ايميل وقرتهم كلهم وحذفت اللي ماتبيه ودخلت المنتدى وردت لقسمها وتذكرت انها ابتعدت عن الخواطر حيل بهالفتره ولو انها كانت بحاجه لها وكتبت بقسم الترحيب موضوع بعودتها والكل رحب فيها وخصوصا انها عضوه الكل يحب وجودها ماكانت اتخلي موضوع صغير او كبير الا وتعطيه اهميته وبعد مرورها على اغلب الاقسام لفت انتباها قسم الرياضه والشباب وافتحته وكان المووضوع المثبت عن الدوري المقام بفرنسا واخبار الاعبين ابتسمت اول ما شافته يعني من هني بتعرف اخباااااره !! وابتسمت بفرح ورجعت بكرسيها لي ورى وكانت حاطه ايدها على وجهها مو مصدقه ! انها تقدر اتعرف اخبار الدوري على الاقل وتطمن عليه لانهم يحطون كل مباراه وتفاصيلها والالعبين اللي انصابوا واللي خذوا كروت حمراء او صفراء وكان الموضوع مدعم بالصور ادخلت على طول على الموضوع وكان محطوط نتيجه اول مباراتين بالدوري وشافت ان فريق مشعل تعادل مع الفريق الثاني . اارتاحت على الاقل ما خسر لانه اخر الايام ماكان بالتدريب وتذكرت رفيج مشعل ناصر اللي تعب بالفتره اللي كانت اهي بالفندق وشافت ان فريقه فاز بنتيجه 1/0 وفرحت له شافت انها بدايه حيل ممتازه للفريقين لفريق ناصر ومشعل وكان ودها تروح وتشوف معنوياته ودها توقف معاه بهالوقت مثل ما وقف معاها لكن اكتفت بمتابعه اخباره عن بعد وكان في عضو منتقد لعب المنتخب ويقول مو هذا مستواه وان كابتن الفريق كان من الممكن يعطي احسن من جذي وكان معصب على الاخر ويقول دام من اول مباراره تعادل ننسى الكاس ومن هالكلام الغريب ان ديمه هي اللي تكفلت انها اترد عليه واستغربت من طريقتها بالرد كأنها تدافع عن شي ملكها خصوصا وهو كان شاد حيله بالكلام على مشعل لانه اهو كابتن الفريق و لانه معروف عنه وحش الكره الكل يخاف منه بس بهالمباره سوى اداء حلو لكن مو هذا هو لعب مشعل الاصلي كأنه يمهد لشي ودها تقول للعضو الا هاللاعب لا تقول عنه شي لكن ردت عليه بمنطقيه اكثر بعد ماسكرت المنتدى وسكرت الجهاز نزلت تحت شافت انوار اتكلم مريم بنت خالتها وشافت محمد يساعد ميشو على تركيب بيت الباربي وكانت نازله مع فوفو
ديمه : شوفوا انا بحط فوفو بالصاله وبخلي الخدامه تأكله وتشربه مابي احد يرده لي غرفتي
ميشو : حمود اسمع ديوم شتقول !!؟ امش امش خلنا ناخذه ونلعب فيه بالحديقه
ديمه : لا ياماما انا قلت بالصاله يعني اذا بتلعبون العبوا هني
محمد : احمدي ربج خلتج تلعبين فيه
ديمه : يلا تصبحون على خير
ردت غرفتها من بعد ما فقدت الامل بأنوار عشان تصك التلفون وتقعد معاها راحت ديمه غرفتها ونامت وانهت هاليوم اللي مرّ عليها طـويل ابتدى بروما وانتهى بالكويت على ثاني يوم الصبح الساعه 10
انوار : انتِ ما تشبعين من النوم
ديمه : خليني اطلعي وصكي الباب
انوار : الساعه عشر قومي متى يمدينا نلبس ونروح لعماني
ديمه : اففففففف مايصير تعفوني من هالروحه ؟
انوار : قومي تراني مشتاقه حق هالروحه من زمان
ديمه وهي تشيل البطانيه عنها وتقوم : ليش بتشوفين قيس بن الملوح !؟
انوار : ليش انا اعرف عيالهم عشان اروح لقيس ! ههههههههههه
ديمه : خلاص انوار روحي خلي ريتا تجهز الريوق على ما اتسبح
انوار : انتِ هيه خلصينا شكلج بتطولين علينا مابي ابوي يعصب
ديمه : انتوا تبوني اروح خلاص بروح بس فارقي عني
انوار : ههههههههههههه اتعب على النفسيه من اولها
ديمه تبتسم بعبط : انوار روحي دام النفس طيبه
انوار : زين بس ابيج تلبيس من بدلات باريس عشان نقهر مرت عمي وبناتها
ديمه : لا بدلات باريس كلهم بالجناط وانا لالحين مافجيتهم بلبس من اللي بالكبت
انوار : مالت عليج ماتشجعين
ديمه : ترى اقصااها بيت عماني
انوار : انزين اف منج خلصي انا بروح احط مكياج
ديمه : لا وصيج زيدي الجيله

انوار : هههههههههههههه انا بطبق اللي تعلمته هناك من قناه فاشن
ديمه : طبقي وخبصي لا وصيج
طلعت انوار من الغرفه وهي متحمسه تحب حركات الجوار وتحب تقهر الناس اللي مايحبونها وهالشي كله بتشوفه اليوم وهذا اللي هي تبيه
بعد مرور نص ساعه تواجدوا كلهم بالصـاله ينطرون ابوهم
انوار : هاه شرايج ؟
ديمه : حلو لون الشدو هادي ان الا هاللون ماعرف اضبطه
انوار : يعني مرتب ؟
ديمه : أي والله توقعتج بتخبصين !
انوار : لا شدعوه ههههههههه
ديمه : وينها ريتا سنه تسوي ريوق
انوار : يما عمرها طويل كاهي وصلت
قعدت ديمه تتريق عصير برتقال وكرواسون ونزل ابوهم من غرفته لابس دشداشته وغتره وعقال وكاشخ وريحة العطر غطت المكان
محمد : وااااااو يبا واخيرا عدنا للدشداشه
بومحمد : ههههههههههه مشتاق لها اسبوعين كلا بناطيل وخرابيط
محمد : أي بعد تغيير
بومحمد قعد : هاه جاهزين ؟
ويلتفت الا يشوف انوار
بومحمد : اوووووه شهالقمر اللي قاعد عندي
انوار : يبا لا تمدح ترى اقط نفسي بالدريشه
بومحمد : ماشاء الله مدري احس انج متغيره والا يتراولي
ديمه : أي يبا حاطه مكياج
بومحمد : وانا اقول بنتي محلوه
انوار : الله يجبر بخاطرك
بومحمد : ديمه وانتِ ليش ماسويتي مثلها بتروحين زياره لعمانج لازم تكشخين
ديمه : ماحب هالخرابيط احب كل شي على طبيعته
بومحمد : كيفج لا تنقهرين لي قالوا بنات عمج ان انوار احلى منج
ديمه : لا تكفى اذا قالوها بموت
انوار : ههههههههههههههههه حمستوني بروح قبل لا تخرب الكشخه
بومحمد : قوموا لا يسيح الصبغ على وجهها
انوار عصبت : يبااااااااااااا
وقعد يضحك عليها ابوها يحب يقهرها ويستفزها بس الصحيح ان مكياجها حيل ناعم حق زياره عاديه
وقبل لايطلعون نادت ديمه ريتا خدامتهم وقالت لها تطلع كل الملابس الجديده من الجنطه البيضاء الصغيره والجنطه الكبيره وتصففهم بالكبت وترتبهم
بعد ما وصلوا بيت جدهم
دخل ابوهم الدوانيه مع محمد وانوار وديمه وميشو راحوا صوب باب الحريم وشوي الا فتحت الباب الخدامه ودخلتهم صاله الضيوف وشافوا مها مرت عمهم مع شيخه مرت عمهم يوسف (اللي اصغر من ابوهم) وبناتهم وقاموا وسلموا على البنات وبعد حوالي نص ساعه دخل جدهم بو محسن وسلموا عليه وقعدوا معاه وراحت شيخه ومها الصاله الثانيه يسولفون وخلوا البنات مع جدهم وابوهم لحالهم
بومحسن قعد يسولف مع ولده منصور براحه لان الدوانيه كانت عامره وماقدروا ياخذون راحتهم
بومحسن : ماقلت لي شلون سفرتكم ؟
بومحمد : والله ابشرك زينه ( وطالع ديمه) ومشت الامور تمام
بومحسن : ها يابنات ان شاء الله مستانسين ؟
ديمه : أي والله يبا السفره اتهبل لولا اني خربت على اهلي وضعت
بومحسن : افا شلون ضعتي ؟
ديمه : ههههههه تخيل يبا ولدك سافر روما وخلاني !
بومحسن لف على ولده : صحيح هالكلام ؟
بومحمد : هههههههه أي بس ماتصدق من اللي وصلها لنا !
بومحسن : منو ؟
بومحمد : مشعل ولد بو عبدالرحمن
بومحسن : بوعبدالرحمن جارنا !!
التفت ديمه عليهم وقلبها يدق بقوه
بومحمد : ايه
بعدين سكت جدهم وشكله سرح شوي وعيونه تسترجع قصص شكلها ذكريات الجيره اللي بينهم وابتسم
بومحسن : اممم مشعل !! هو رفيج مبارك !؟
بومحمد : أي عليك نور
بومحسن : شفته مع اهله ؟
بومحمد : لا لحاله رايح عنده دوري كره قدم
بومحسن : ماشاء الله والله كبرت يا مشعل خبري فيه هو مبارك يلعبون بالفريج أي صح كان يحب الكره من صغره . الله يخليه لاهله
وسكت بومحسن بعد ما مرّ طيف ولده مبـارك جدام عينه
بومحسن غير ّ الموضوع عشان يبعد طيف ضناه من عيونه مايبي يحرق قلبه لي تذكر ولده اللي راح بعز شبابه بحادث لنج نتيجه سرعه ورعونه الشباب الطايش اللي ادعموه
بومحسن : منو استقبلكم بالمطـارّ ؟
بومحمد : راجوا بعد منو غيره !
بومحسن : والله اني قلت لاَخوانك بس محد منهم فاضي الكل وراه بيت وعيال ومسؤليات
بومحسن كان يبرر تصرف عياله وهو عارف انهم على غلط بس ما يبي يشوه صورتهم جدام احفاده
ديـمه : بس لو كان عمي مبـارك عايش جان استقبلنـا احلى استقـبال
الكل طالعها وسكت ! استغربوا من ردها
بومحمد : اصلا ما له داعي احد يستقبلنا كنا بحاجه السياره وجابها راجوا
بومحسن : يلا الحمدلله المهم استانستوا بهالسفره
شوي وراح بومحسن مع ولده الدوانيه واصعدت ديمه الطابق العلوي وراحت لغرفه كانت دايما تدخلها وتبث فيها همومها وعمرها مادخلت البيت هذا الا وهي قاصده تدخل هالغرفه واليوم طبعا ماراح تطوف هالفرصه وتحس انها مشتاقتلها حيل فتره طويله ماشافتها من قبل السفر بمده طويله فوق الشهر
طلعت من جنطتها مفتاح الغرفه ودخلتها وكانت ظلماء وشعاع نور بسيط مبين من تحت الدريشه فتحت الستاير وقفلت الباب وراها وخذت نظره على الغرفه من غياب دام عنها اكثر من شهر مسكت نفسها واقعدت على سريره واتحس انها قاعده على شوك من كثر ماتحس بإن الجرح مازال ينزف بتكون اكبر جذابه بالكره الارضيه اذا نست عمها بس الفتره اللي طافت كانت مرحله تغيير تخللتها تناسي للذكريات الحزينه لكن هو لا يمكن تنساه وخانتها ايدها وفتحت درج الكومندينه وطلعت البوم الصور وشافت صورته بالثانويه مع ربعه وصوره بكليه الضباط وصوره مع ابوه بالمزرعه وبالاخير وقفت عند صوره وطولت وهي تتأملها كانت صورته وهو يسوق وكانت ملامحه تدل على انه متفاجأ ! ومومتوقع الصوره وردت فيها ذاكرتها لهذا اليوم كانت ماسكه الكاميرا وخاشتها بجنطتها ومرّ عليهم البيت وسلم على اخوه وقعد وسولف معاهم وقالهم انه بياخذها الجمعيه عشان اخوانها مايقلبونها مناحه وخذا ديمه يمشيها وكانت مو راضيه تطلع مكان وكان هو مصر على انه يسوي اللي فباله وطلع وداها السينما و شرالها هديه التخرج من الثانويه وقبل لا ينزلها البيت قالت له عمي بوريك شي بس لاتتخرع وطلعت الكاميرا بسرعه وصورته وهو منصدم وكانت احلى صوره كان رافع حواجبه ووجهه مندهش صكت الالبوم وتحس في شي قاعد ينغرس بصدرها ماتبي تتذكر اكثر ورجعت الالبوم مكانه وهي مازالت متماسكه بس يوم راحت لعلاق الملابس شافت جم دشداشه معلقه وشافت الكاب حق بدله الضباط ماقدرت تستحمل اكثر جرت الدشداشه وحطتها على السرير ودفنت فيها وجهها وقعدت تصيح خلاص لازم تفرغ كل اللي بقلبها اليوم عشان ترتاح عشان تدخل مره ثانيه هالغرفه وتطلع بدون دموع لازم تصفي حسابها مع ذكرياتها لازم تقضي على شعور الضعف عشان تجابه جيوش الذكريات بقوه شمت ريحت عطره وتلتفت يمين ويسار وكأنها تدور على شي اتحس انه بيطلع لها من الحمام والا من غرفه التبديل مو معقوله يكون مات ريحه عطره غرفته ملابسه اغراضه سريره صوره كلها حاضره وين صاحبها !! صعبه تتعلق بإنسان لمده 6 سنين بالاخير يروح منك بلمح البصر بفاجعه وتقعد انت تقلب ذكرياتك معاه وانت فمكانه وتذكرت هالسفره اللي كانت المفروض تنسياها اياه طلعت صدمه لها لانها حبت انسان كان الاقرب لعمها وكان يتشابه معاه بالصفات بعد ماطلعت ديمه كل اللي فقلبها وحست انها بدت ترتاح طق الباب كذا مره لكن ماكانت تجاوب خافت تكون مرت عمها ماتبيها تشوفها بهالحاله بس بالاخير كانت انوار
ديمه : شتبين ؟
انوار :عفيه فجي الباب بسرررعه
ديمه : تعالي بعدين الحين ماقدر
انوار : بسررررررعه مو قته انتِ فجي
ديمه : افف زين
دشت انوار الغرفه وتفاجأت بشكل ديمه شكلها باجيه ومطلعه كل اللي بقلبها
انوار : رحتي وخليتيني مع رهف وابتسام !!
ديمه : مو انتِ مشتاقتلهم ؟
انوار : يخسون اشتاقلهم ماتشوفين كل وحده منهم ماده بوزها جني بايقه حلالهم !!
ديمه بضعف : انوار انا تعبانه أجلي كل مناقشاتج الحين انتِ شتبين !
انوار شافت شكل اختها وكسرت خاطرها ماتبي ديمه تخرب كل الي سوته بالفتره الاخيره
انوار : انتِ ليش بتخربين كل اللي سويتيه ؟
ديمه : آه يا انوار خليني اطلع اللي بقلبي يمكن هذي اخر مره
انوار : ليش تبجين !
ديمه : انوار لو تحسين بالعذاب اللي انا فيه ماتكلمتي
انوار : شنو بليز تكلمي
ديمه : يوم جيت بنساه تعلقت فيه لكن بصوره ثانيه
انوار : يعني !! وضحي !!
وبجت ديمه بصوت اعلى
انوار : مشعل !؟
ديمه : محتاجته يا انوار ابي وقفته معاي . انوار مابي اقص عليج واقولج نسييته ماقدر مشتاقتله والله . هو الوحيد الي حاس فيني لانه هو اللي عاش معاه وحاس بمعاناتي انوار انا احبه (وتبجي ) مو بيدي والله مو بيدي .
انوار : اوكي مومشكله اذا انتِ موقادره تنسينه خليه هو على صوب الاهم انج تصلحين وضعج الحين مو معقوله بتمين متعلقه بطيف انسان مات
ديمه : اهو مو أي انسان
انوار : حتى لو منو ماكان لازم تتخطين هالمرحله
ديمه تلتفت : انوار روحي شوفي غرفه التبديل يمكن قاعد فيها ومنخش عنا طول هالفتره !
انوار : صلي على النبي لالالا ياديمه مابيج ترجعين لذيج الايام
ديمه : ولا انا ابي ارجعلها . بس قلبي يعورني كل اللي احبهم راحوا راحوا عني
انوار : انتِ قويه وبتتخطين هالمرحله صح! (وتهز اختها ) صح ؟ اوعديني !
ديمه تبتسم والدموع تصب من عيونها : بتخطاها اوعدج
انوار : ايييي هذي اختي ديوم
ديمه غمضت لين حست براحه خلاص من هني لازم تبدي تخطي اول خطوه للتغير لازم من هالمكان تنهي الصراع اللي عاشته مده طويله
انوار : خلاص ديمه روحي غسلي وجهج
قامت ديمه ودخلت الحمام . وكانت انوار قاعده على السرير وشوي سمعت الباب ينطق مع انه مفتوح ودخل واحد طويل شوي واسمر وملامحه حاده وكلشي فيه ينطق بالغرور !
مشاري : السلام عليكم
لفت عليه انوار وردت السلام وشافته باستغراب يعني ليش داخل الغرفه ! مع انه كان على الباب
مشاري : انا استغربت شفت غرفة عمي مبارك مفتوحه ! فا جيت اشوف منو داخل
انوار : ااها
مشاري : انتِ من بنات عمي منصور ؟
انوار : أي
مشاري : ماشاء الله مادري ان عنده بنات كبار
انوار : أي من الوصل
مشاري استغرب من عفويتها لانها قطت هالكلمه لاارادياً
مشاري بنظره فوق تحت : انتِ ديمه !؟
انوار : لا اختها
مشاري : أي صح انتوا توكم جايين من باريس وروما ها شلون سفرتكم ؟
انوار : ليش ماتدري ان اليوم فبيتكم في غدا لنا !!؟
مشاري : مادري انا توني قايم من النوم بعد شوي بطلع
انوار : خوش وعمك اللي ماشفته من اسبوعين ؟
مشاري : عادي امر عليه اسلم بس شغلي ما يتأجل
انوار : امممم
دخلت عليهم ديمه وشافت مشاري وسلمت عليه
مشاري : ها ديمه شلون السفره ؟
انوار : ديمه تعبانه شوي تقدر تروح لشغلك اللي ما يتأجل !
انقهر من حركتها وطالعها فوق تحت
مشاري : لا افا عليج كل شي لعيون بنات عمي يتأجل
ديمه : انزل تحت عندكم ناس بالدوانيه
مشاري : انا انزل متى ما ابي عادي اليبت بيتي
انوار : عشتوووا
مشاري انقهر: الا ماقلتيلي انتِ شسمج ؟
ديمه : اسمها انوار
مشاري باستفزاز: عاشت الاسامي ! الاماقلتوا لي شخبار امكم ماجات معاكم !!
سأل هالسؤال وكانت نظرته خبيثه وكأنه يتطنز انه هو وامه قدروا ينبذون امهم من البيت
انوار : اتعرف امي توها جايه من السفر ومغيره جوو ونصحها الدكتور ما تطلع لان الميكروبات منتشره بالجوو اتعرف اهم ماعلى الانسان صحته فا نصحناها تقعد بالبيت عشان ما تتأزم حالتها
مشاري طالعها والشرار يطير من عيونه
مشاري : ميكروبات هاه !!!
ديمه كانت تنظف الغرفه وهم يتكلمون وبعد ماخلصت
ديمه : لو سمحتوا ممكن تطلعون لاني بقفل الغرفه وانزل تحت
مشاري : وبعدين انتِ تعالي من عطاج الحق تاخذين مفتاح الغرفه
ديمه : نعم !!
مشاري : انا هالغرفه ابيها بهدمها على غرفتي عشان تتوسع
انوار : ههههههههههه
طلعتهم ديمه بسرعه وقفلت الباب وهي متنرفزه من هالمشاري اللي على باله انه الكل بالكل بالبيت !
ديمه : يصير خير . يصير خير
نزل مشاري تحت وسيدا ركب سيارته وطلع اما البنات نزلوا تحت وتغدوا وبعد الغدا قعدوا كلهم بالصاله
مها تكلم ديمه وانوار : بنات ماشفتوا مشاري ؟ فوق ؟
ديمه : أي خالتي فوق سلم علينا ونزل
مها : وين راح ماشفته اليوم ولا سلم علي
انوار : يقول عنده شغل ضروري ما يتأجل حتى ابوي ماسلم عليه !
مها : بعد عمري ولدي ماعنده عزايم وخرابيط مواضب بشغله
انوار : بس الاصول اصول
مها : شقصدج ان ولدي مايعرف الاصول ؟!
انوار : والله اللي شاف حركته اليوم بيجاوبج على السؤال
مها : حبيبتي محد بيرز هالعايله الا ولدي وبيجي اليوم اللي انتوا بتتعلمون منه الاصول
انوار : هههههههههه كُـلي شوق لهاليوم
ديمه : خالتي صج مشاري بياخذ غرفه عمي مبارك ؟
مها : ليش اهو قال هالكلام ؟
ديمه : أي
مها : اجل خلاص دام خاطره فيها خله ياخذها
ديمه : لا ماياخذها . هالغرفه مو من حقه
مها : الحي ابقى من الميت
ديمه : عمي مات والا حيا هالغرفه بتضل مكانها وما يتحرك منها شي
مها : اهو بيتج عشان تتحكمين فيه ؟
ديمه : أي بيت جدي
مها : انا ماشرهه عليج أنتِ انسانه معقـده نفسيــا ً !
ديمه : لي الشرف
مها : اعوذ بالله كل وحده لسانها اطول منها بعد شقول تربيه حصه !
انوار : شوفي لا تغلطين لولا احترامنا لهالمجلس اللي احنا فيه جان ردينا عليج فا احسن لج احترمي على الاقل هالمكان اللي انتِ فيه
مها : اففف امشي شيخه خلينا نصعد فوق احس بكتمه على صدري
راحت شيخه معاها وقعدوا البنات وهم خلاص واصله معاهم ودهم يروحون البيت بس شوي الا دخلوا عليهم عمانهم يوسف ومحسن وجدهم مع ابوهم سلموا عليهم البنات وقعدوا
يوسف : ماشاء الله اشوف بناتك يامنصور محلوين بعد السفره
ديمه تقرص انوار وتهمس لها : بين مفعول التخبيص اللي بوجهج
انوار ترد عليها: هههههههههه زين الحمدلله طلعت منهم كلمه حلوه تجبر خواطرنا
ديمه : تسلم عمي كلك نظر
محسن كان قاعد وله هيبه غريبه واللي يقعد بالمكان اللي هو فيه غصبن عنه يقعد عدل ويحاسب على اللي يقوله وتقاطيب وجهه كانت مثل مشاري ولده بالضبط فيه نوع من الغرور او خلنا نقول الثقه الزايده
منصور يكلم محسن : وين عيالك ؟
محسن : الصغير مسافر والكبير مادري وين ذالف
انوار : سلم علينا وطلع قال وراه شغل ضروري
محسن : آيا الهيس يعني جنه مايدري ان في غدا !!
انوار : لاعمي يدري بس يقول بسلم على عمي بأي وقت لكن شغلي ما يتأجل
محسن : انا شايل ايدي منه تصرفاته تنرفزني امه هي اللي متكفله فيه
منصور يهدي الوضع : معذور يمكن الولد صاج وراه شغل وبعدين ماني غريب انا عمه وكل يوم انا عندكم بالدوانيه . بيشوفني
محسن : ماعلينا . منصور لا تنسى باجر تمرني بالشركه ترى عندي مناقصتين خاشهم لشركتك لاني عارف انها بتطير منك وانت مسافر فا تكفلت انا فيها باجر مّر اخذهم
منصور : لا زين اشوى . وانا قلت شكل السوق راكد
محسن: هو راكد مافي كلام لكن اخوك ماسك السوق من اوله لي اخره
منصور : مايبيلها كلام
محسن راعي شركات تجاريه وكان له اسم كبيرر بالسوق . وكلمته لها هيبه . وكان من كبار التجار . والمناقصات اول ماترسي ترسي على شركته . وكان مضبط شغله مع الكل وبما ان اخوه منصور مستغل بشركه بروحه ومكون نفسه بنفسه كانت له شركه متوسطه لكن فيها شغل وبادي بالسوق من جم سنه لكن كان محسن له دور كبير بنجاحه . واستند على اسمه بالسوق
بومحسن : يا منصور بناتك ابيهم كل خميس عندي
ديمه : يبا اصلا انا ماراح اجيكم بعد اليوم
بومحسن : افااااااا ليش ؟
ديمه : مشاري ناوي يهدم غرفه عمي مبارك ويفتحها على غرفته
بومحسن : يخسي الا هو محد يمد ايده على غرفة ولدي وانا حي
ديمه : صج يبا؟
بومحسن : أي يابنتي و مشاري هذا ماعليج منه . بس يحب يرز عمره بكل مكان (وطالع محسن) ويبيله من يكسر خشمه
انوار : ههههههههه أي والله
منصور طالع انوار معصب وهي سكتت
بعد فتره طلعوا من بيت جدهم بعد ماوعدوه ان الخميس الجاي بيكونون عنده ولو ان ديمه وانوار ماودهم بهالشي لكن بالاخير ابوهم اقنعهم لان بهاليوم ماراح يكون في احد بالبيت مها وبناتها بتكون عند اهلها وشيخه مرت يوسف وبناتها ماتجي الخميس لان الخميس زوارت اهلها فا ارتاحوا البنات من هالناحيه ووافقوا اهم شي جدهم بيجون يسلمون عليه

بعد ثلاث ايام
كانت ديمه قاعده على النت . وكالعاده اول شي تدخل قسمها قسم الشعر والخواطر الادبيه ولفت انتباها موضوع جديد كان مرثيه بنت اخت طلال الرشيد بخالها
لا اعلم من ارثي00

أرثي طلال الشاعر

أرثي طلال الانسان

أرثي طلال الامير

أرثي طلال الخال

أم ارثي الدنيا ومن عليها00

وهل للدنيا طعم عقب فراقك؟

رحلت صائما معتمرا معتكفا في ارض الله الطاهره0

رحلت وتركت الناس يبكون ويجزعون00