أهلاً بكم في منتديات مياسه






في قسم



محبرة شاعر - شعر - قصائد - poems


وضمن منتديات





•][• منتديات الملتقيات الأدبيــــــــه •][•





التابع لـ منتديات مياسه






والذى يضم

محبرة شاعر - شعر - قصائد - poems

روايات - قصص - حكايات

خواطر - نثر - عذب الكلام




المدينه والغريب

 جـا يـشـوف الـحـال كـيـفـه بعد ما هزه حنينه
 قبـل يـسألـنـي سـألته كيف حالك يا لحبيب
قال أنـا كـنـي غـريب ضيـع دروب المـديـنه
 قلت أنـا كـنـي مـديـنـه تـنتـظر رجعة غريب
 قال أجل وش فيك تكره سيـرة الـحب وسنينه
 قلت أجـل وشلون ما أكره سيرته دامك تغيب
أنت لامن غبت حتى مرايتك صارت حزينه
كيف ما تبغاني أحزن وأنت لي مثل النصيب
الـهـدايا والـرسـايـل والـمـكـاتـيـب الـثـمـيـنـه
 الليـالـي والـقـمـر والـريـح والـكـون الرحيب
كـل مـا تـبـتـعـد تـجـيـب الشعر ليه من يدينه
 وتـقـعـد جـروحي تـودي فـ المتاهات وتجيب
يا بـعـد كـل الـقـصـايـد ونـزوة حـداه وأنـيـنه
 لا ذكـرتـك لاح بـيـت وطاح ورد وفاح طيب
 وأن نـسـيـتك ما نساني صوتك المبحوح
لين يـاخـذ لـجـروحي بـثاره من خـطاياك ويطيب
 وبـعد هـذا جـاي تـرمي ذنـبـك بـوجه المدينه
 ما دريـت أن الـمـديـنـه كـلـهـا شـمـعة غريب

زمان الدجى

 بعـد التعـب عـودّت مثـل أي أنـسـان
 بأنسى همومـي مثـل ماالنـاس ناسيـن
قعدت أقلّـب فـي الفضـاء كـوم بلـدان
 من شاشة لشاشة و لا أدري علـى ويـن !
قلت أنبـش همـوم و كواليـس الأوطـان
 و أشـوف هاللاهيـن فـي ويـش لاهيـن
أول قنـاة و فلـم عـن قصـة أخـوان
 حبّّـوا فتـاة و فرقـت بـيـن الاثنـيـن !
ثاني قناة و وجـه أو لوحـة ألـوان
 من لبسها وش لبسهـا ؟ ربـك يعيـن !
ثالث قناة و رقص واضواء وألحان
 أجسـاد معروضـة مـن يـديـن ليـديـن
رابع قنـاة وشـاب مـن بيـن نسـوان
 يشرح لهـن بإمعـان عـن موضـة ألفيـن
خامـس قنـاة و مـن صبايـا لفـنـان
 لا والله إلا زغــردي يــا فلسـطـيـن
سادس وسابع كلهـا حملـة أعـلان
 ثامن و تاسع مثـل باقـي العناويـن
عاشـر قنـاة ومنظـر يهـزّ الأبــدان
 من شوفته ضاقـت علـى دمعـي العيـن
قبلـه وأنـا تحـت الغمـا بيـن جـدران




 حول الحطب وأقسى علـى البـرد ويليـن
بعده وأنـا تحـت السمـاء فـوق طوفـان
 وأحـس فـي صـدري سـواة البراكيـن
منظـر طفـل دينـه نسـخ كـل الأديـان
 مسلـم يعـرف الله قبـل ينطـق السـيـن
منظـر طفـل مسلـم مـشـرّد ومنـهـان
 بيـن المطـر والبـرد والجـوع والطيـن
عاري وخايف لأن كـم طفـل عريـان
 فـي مثـل عمـره واندفـن قبـل يوميـن
جايـع ومـن كثـر القنـاعـة والايـمـان
 يسكـت ويقـرا الحمـد ويـقـول آمـيـن
صوته عتاب ورعشـة ايدينـه احـزان
 و نظـرة عيونـه مثـل طعـن السكاكيـن
في قلب مـن لـه قلـب مفعـم بالايمـان
 وفي عين من له في زمـان الدجـى عيـن
يـا الله ياللـي عنـدك الـنـاس سـيّـان
 تّجّار وضعوف وعبيد وسلاطيـن
حنّـا عبيـدك وأنـت ياعالـي الشـأن
 أدرى بخبـث و غطـرسـات الملاعـيـن
يـارب تدحـر كـيـد عُـبّـاد الاوثــان
 و تعـزّ نـاسٍ همّهـا نـصـرة الـديـن





القصايد والغلأ

 لعن ابو بعض القصايد كان مافيهـا حـلا
 ما تـروح الا و تتـرك للحنايـا جلجلـه
تبتدي مثل المزون اللـي تسولـف للكـلا
 و لا خذت قامت ترزّم مثل شهـبٌ منزلـه
فوق صدر الشاعر اللي عن طواريقه جـلا
 لين شاف اخت القصايد بالقصايـد مقبلـه
يا هلا ب اخت القصايد كثر شوقي يا هـلا
 اقلطي بين الحنايا وافهقـي جمـر الولـه
كل ضلعٍ من ضلوعي حافـظٍ درس الـولا
 مثل حفظك للعفاف و للشرف يـا مذهلـه
سولفي كذا السوالـف تنسمـع و الا فـلا
 وان بغيتيني اسولـف اسألينـي اسئلـه
اسأليني وابتديهـا بالنهـار اللـي تـلا

ليلة ان ال*** يقرا في الضلوع البسملـه
واسأليني عن زماني كم شرب فـيّ وكـلا
 انتهي من مشكله والقـى وراهـا مشكلـه
المشاكل بهذلتني فـي غيابـك . والبـلا
 ما لقيت اللي احط السـر عنـده وازهلـه
كل مااسمع (كيف حالك) ينقبض جفني على
 دمعةٍ تبغى تقول الحـال دمـع و مهزلـه
وابلع العبره واقول : بخير والهـم انجـلا
 و آخر الهرج آتلعثم فيـه وانقـض أولـه
ليه غبتي ليه غبتي وانتي اللي ما مـلا
 عيني الا همس صوتك في زمـان البلبلـه
ياه شفتي وين راح البال بالشعـر وسـلا ؟
 قمت اعااتب فيك وانتي ف الضلوع مـدلله
لنّي ماصدّقـت نرجـع للقصايـد والغـلا
 بعد ذاك اليوم يوم اجنبت وانتـي مشملـه
ايه ماصدّقـت لكـن ياعسانـي مـا خـلا
 قلطي بين الحنايـا وافهقـي جمـر الولـه
صلاة وعناقيد
 عدّى عمر ياليت الأعمـار تنعـاد
 وأرجع بـلا شيـب وبليـا تجاعيـد
أرجع وأضم أبوي وأقـول: لا عـاد
 تموت وتتركنـي مثـل ليلـة العيـد
يوم اسألوا عنـك الصبايـا والأولاد
 وقلت:أمي تقول انـه مسافـر بعيـد
بكيـت ليلتهـا وناديتمـا فــاد
 وظليت أصوت لك وأناديك وأعيد
عوّد يا بوي وجب لي ثيـاب جـداد
 يا كثر ما تنسى يـا بـوي المواعيـد
بكيتـك لحالـي وأنـا كنـت معتـاد
 تكف دمعي بـإيد وتضمنـي بـإيـد
كم كنت محتاجك تجي كنّـك رقـاد
 تمطر من كفوفـك صـلاة وعناقيـد
احتجت لك طفلٍ كسر قلب الأعيـاد
 واحتجت لك طيش وشباب وتناهيـد
واحتجت لك شاعر له أحباب وأضداد
 واحتجت لك رجال يخشـى المناقيـد
احتجت لك واحتاج لك ظل وسناد
 العمر ينقص واحتياجـي لـك يزيـد

بسم الله عليك

 جيـت فـي ليلـة وداعــه تـايـهٍ بـيـن البـيـوت
 وصحت : "وينك؟! جيت اوادع عمري اللي ضاع فيك"
مـا سمعـت الا صـدى صوتـه وكـان آرقّ صـوت
 ينطق اسميثم يهمس : "من متـى وانـا احتريـك؟!"
قلـت وهمومـي تغافـل زفـرة الـحـزن وتـفـوت :
 "هذا انا جيتكيا ليـت المـوت جانـي قبـل اجيـك"
بعدهـا يـا دوب عـدّت عبـرتـه حــد السـكـوت
 قـال وعيونـه تغـارق دمـع : "بـسـم الله علـيـك"
قلت : "يا ابن الناس عـادي مـاورى هالمـوت مـوت
 وش وراهـا لا فقـدت عيونـك ولمـسـة يـديـك"؟! !
كذبة كبيرة
 اتعبتنـي عيونـي قـدّ مـاهـي بصـيـره
واتعبتـهـا يديـنـي قــدّ مـاهـي جـفـول
قلت : "خيره" ولكن وينها و وين خيـره؟!
لا عيـونـي تـكـفّ ولا يديـنـي تـنـول
هيه وين انت يا للي كان ما فيـه غيـره؟
يفهـم اللـي اقولـه قبـل حـتـى لا اقــول
رحت ادوّر حبيـبٍ مثلـك ابغـى استشيـره
واثـر مــا كــل زولٍ ينتـعـوّض ب(زول)
جيـت نـاسٍ تـزوّد حيـرة القلـب حيـره
قلـت : "اطيـع الزمـان وكـل شـدّه تـزول"
قالوا : "العمر يكبر" قلـت : "كذبـه كبيـره
عمر الانسـان يصغـر كـل مـا هـو يطـول"
قالوا : "الشعر بيت" وقلت : "انا الشعر ديره
اعقـل اللـي سكنهـا فيـه طيـش مهبـول"
قالوا : "اللـي فقيـر يحـب وحـده فقيـره"
قلـت : "واللـي يحـبّ يحـب وحـده خجـول"
قالوا : "و ذيـك هـيّ الأولـه والأخيـره ؟"
قلت : "ما ادري او ادري بس ما ابغى اقول"!

الـغـربـه

 أيـوالله أن شوفتـه تستاهـل عنـادي
اللـي عشانـه تركـت الـدار والتربـه
مااقـول لـك شوفتـه نستّنـي بـلادي
لكنّـهـا يافـهـد نستّـنـي الـغـربـه
وش عاد لو قلت عني ضايع وغـادي ؟
وش أبركـه مـن ضيـاعٍ دلّنـي دربـه
تبغاني ارجع ! وأنا ياصعـب معـوادي
مـادام همّـي نسانـي وأنقلـع سـربـه
الهم هاللي تشـوف انـه علـيّ بـادي
ياليتك تشوف كيـف يصيـر فـي قربـه
الله يحـرم . عيونـي لّـذة رقـادي
أنّي معه مااعرف حزنـي ولااشعربـه
هرجك فوادي وأنـا ياخـوك فـي وادي
الله يخلّـيـك . حـالـي لاتـعّـذربـه
راضي بحالي كذا . واللي يجي عـادي
لعيون منهـو ركـز فـي قلبـي الحربـه
بصوته , شقاوته , مزحه , طبعه الهادي
يملا عليّ الفضا مـن شرقـه لغربـه
يكفيني أنـه غـدا هـو شربـي وزادي
أو تقدر تقـول أنـا اللـي زاده وشربـه
ياخي أذا الحب عيب ! فشفني آنـادي :
سجل . أنا من عرف عيبه وجاهربـه
وسجّـل هنـا كلمـةٍ تستاهـل عنـادي
بقولهـا قبـل أسافـر وأتـرك التربـه :
والله ماأقسى من الغربـه عـن بـلادي
الا شعوري وانا في بـلادي بالغربـه

مايس القد

 والله وصرت تمون يا مايس القدّ
من قلت : "احبك" والحكي ما تردّه
لالا تغرّك طولة البـال والسـدّ
القلب شكلـه قـرّب اليـوم سـدّه
أنا عزيز النفس لا جيـت للجـدّ
واللي تمادى يقضـب اليـوم حـدّه
صحيح صعبة ابني الحـب واهـدّ
لكن ترى لا ضقـت والله لا اهـدّه
مهوب انا اللي يرفع بوجهك اليـدّ
وْلا عاش من يرفع على بنت يـدّه
لكن با اروح ولو غشى دمعك الخدّ
باقول : "وينه غايبٍ فيـه مـدّه"؟!
يوم الوصل من بيننا حبـل ممّـدّ
ترخي وانا ارجي منك يـومٍ تشـدّه
بعد المذلّه جيتني اليـوم بتشـدّ؟!
خلاص انـا فكّيـت حبـل المـودّه
ما دام به ناس عن الديـن ترتـدّ
وش يضمن انه ما يجي منك ردّه؟!


ليل ياليل

 ليل ياليل يوم النـاس سمّـوك ليـل
هو عشان السهر وإلا عشان المنـام ؟
شف عيوني وشف وشلون جسمي نحيل
لعنبو هالغرام إن كـان هـذا الغـرام !
آه ياقلبـي اللـي مابقـى فيـك حيـل
من كثر ماطواك الشـوق ولـد الحـرام
قلت لـك لاتميـل إن طعتنـي لاتميـل
بس هذا أنت ملـت وماسمعـت الكـلام
يـوم ذيـك الصبيـة أم ذاك الجـديـل
جت تهادى وتمشي مثل مشـي الحمـام
إنكسرت وقعـدت تحـط فـيّ وتشيـل
لين رحت وخذتني فـي طريـق الهيـام
قبل أسلم عليهـا كنـت عابـر سبيـل
وصرت ديرة غرام وعشق بعـد السـلام
كنت اقول : أي حب وأي خل ٍ وخليـل
الهـوى مـاوراه إلا التعـب والـمـلام
لكن اليوم شفني ضعـت وأكبـر دليـل
اني امشي واهذري( إبتسام إبتسـام )



الأسرار


 يا رفيف الماء وفجر العيد وأحزان المواني
 يا أكثر أهل الأرض طيبة قلب وأسرار دفينه
 المكان اللي هنا مليان ضحكات ، وأغاني !
 والكلام اللي بغيت أقول يحتاج لـ سكينه !
 شوفي الركن البعيد هناك كنه صدر حاني
 هذا هو اللي يليق بـ شاعر وبنت حزينه !
 أنسي الشارع ، وعتمات الزوايا، والمباني
 هاتي يدينك نلف الغيم ونشكل مدينه !!
 عندي الليلة كلام وصمت وأخاف الثواني
تظلمه أو تظلم اللي فيه كم ضاعت سنينه
 بس لازم تسمعين اللي أبي ولا تراني
 لو بـ أعيده لك نسيت ورحت أقول اللي تبينه
 شي واحد قبل ما أبدأ ما أبي أي شي ثاني
 يخطر فـ بالك وأنا أكشف لك شعور تجهلينه !
 إن أنا وبكل ما تحمله "أحبك" من معاني
 كنت،وراح أبقى أحبك لين مدري وش هو لينه !!
 بس والله ماقدرت أنسى ولا همي نساني
لا ذكرت إنسان فيه أسرار مابينك وبينه
 كل ما تطري علي فكرة هواك الأولاني
 أشعر إني أنطعن مليون مره من يدينه!
 أشعر إن عيونك الله ما خلقها إلا عشاني !
 كيف كانت تبتسم له؟! قولي إنك تخدعينه !!
 صورة إنه كان يمسح دمعك تزلزل كياني
 وكيف كان يلم شعرك ويتبعثر في يمينه
 حتى اسمك يوم رحت أدللـه حظي رماني
 بنفس الاسم اللي يقول بذمتك ماهي غبينه !؟
 وكني اللي كل ما أناديك بالاسم الفلاني
 أطلب النسيان يترك منه شي تذكرينه !!
 لا تظنيني أناني لا أنا مانيب أناني
 لو سلمت من الغرق . بـ أموت في ظهر السفينه!
 يا إني ما أكمل،وأعاني أو أكمل ثم أعاني
 كل ما اسمع طاري اسمه أو تجي عيني فـ عينه!
 أيــنا كان الضحيه ؟ وأينـــا اللي كان جاني ؟
 مدري ! ولكن قراري لازم إنك تقبلينه:
 مثل ما أكره فكرة إنه واحد ياخذ مكاني

ما أقدر أجلس في مكان إنسان كنتي تعشقينه!

Hauhv ti] hglshu]