الموضوع: بتـــزوج بتـــزوج هيــــه هيـــــه

في يوم الثلاثاء الموافق 56/15/10294 هـ
جتني امي وانا جالستن في غرفتي العب اكس اوو ( x,o ) مع نفسي دخلت علي وكانت الفرحه تغمر عينيها والابتسامه تشق خشتها شق يمه وشفيتس فرحانه لهالدرجه أكيد حامل لأ لأ والله طلع أبوي رجال واثبت انه توه شباب وتوني بكمل كلامي وما ادري الا ذاك الكف اللي جايني يمشي مليون ( طرااااااخ ) بيني وبينكم الدموع تحجرت في عيوني بغيت اصيح من الوجع بس قلت لا ياساره لا زم تقهرين امتس وتسوين نفستس انه عادي قمت وقلت لها هههههههههااااااااااااااي يمه تعرفين تنكتين بس حلوه حركة الكف ذي جت بوقتها << أقولها وانا أغمز لها بعيني قامت وعفطت خشتها وقالت صدز انتس فاصختن الحيا وراه يمه وش انا قايله وش انتي قايله ! مدري عنتس وش انتي قايله المهم انا جايتس ابقول لتس انه تو حرمه كلمتني . . وقالت تبيتس لولدها صدز يمه يعني بتزوج ومن الفرحه معد ادري وش اسوي قمت التفت يمين ويسار ورحت وطبيت على السرير حقي وقمت اطامر عليه هيـــه هيـــه هيـــه بتزوج بتزوج بصير حرمه وبركب قداااام يا سلااام واخيرا بيتحقق حلمي وتحمست بالمطامر لدرجة ان راسي صقع في السقف همن جتني امي وسحبتني مع رجلي وقالت لي الله يعين رجلتس يالدبشه يمه وراتس علي دايمن تحطميني وراه يمه لازم تذكريني بالعاهات اللي فيني يعني والله مالتس داعي وخر عني بس ورحت لم التسريحه واخذت روج وحطيته على شفايفي وامي تناظرني بصمت واستغراب همن قمت رحت للباب وقفلته واخذت المفتاح وحطيته في صدري<<< حركات العجز تخبرونها همن التفت على امي وقربت منها وقلت
حبيبتي وش رايك فيني امي طارت عيونها يوم سويت ذا الحركه وقالت ساره بسم الله عليتس وش فيتس وكل شوي تبعد عني وانا اقرب منها لين حجرتها في الزاويه . . وقعدت امطخ فيها اممممموووووووااااااه اممممموووووووااااااه اممممموووووووااااااه وهي تقاومني في الاول لكن بعدين استسلمت للأمر الواقع همن رحمتها حسيتها فاقده حنانوقلت لها يا عمري يمه أثر أبوي مقصر معتس انا قايلتن لتس وش تبين بذا الشايب طلقيه وخذيلتس شاب حليوه يمتعتس وتمتعينه يمه انتي توتس شباب اما ابوي منتهي والله لو تشبكينه في الشاحن وتخلينه يشحن وتجينه بعد اسبوع بتقرين مكتب في عيونه الجهاز لم يقبل الشحن البطاريه منهية الصلاحيه وش لتس يمه بالعذاب عيشي حياتس بس وش رايتس فيني أعجبتس صح يمه يمديني اغري زوجي يعني أقدر أملكه اقدر أخليه يحبني غصب هو صح ان شكلي شين يمه بس بالله وش رايتس بحركاتي بتعوضه عن الجكر اللي فيني ( الجكر= القبح ) الله يخلف عليتس يابنيتي وراحت وتركتني . . تصدقون انا أثرت فيني ذا الكلمه وجلست طول الليل أفكر فيها ليه الله يخلف علي ليه أمي دايم تمدح بنات خالاتي ليه عيال خوالي منهبلين على كل البنات واذا اذا شافوني يصدون رحت وجلست عن المرايه وجلست أتأمل في تضاريس خشتي وبينما أنا أتأمل كرهت نفسي وقمت وتفلت على المرايه وقلت وع واثري شينه لها الدرجه وشوي الا واسمع بص بص بص زعلان ازعل ازعل نص نص ورحت وجلست اناظر بنت عجرم في التلفزيون والله ياهي قطعه صح انها تسنها قطيوه بس وش حليلها وانا جالسه اتفرج عليها حسيت بشي يقطر على رجولي يوم ناظرت اثرها سعابيلي يومني رحمت نفسي اكثر واكثر كل شي فيني شين ويحوم التسبد هاللي خطبني وشلون بيصبر علي <<< ياغبيه خليه يوافق عليتس همن تكلمي

ورحت ودخلت على أمي وهي جالستن تتقهوى مع اخوي الكبير جيتهم وانااركض واطامر وانا في نص الطريق تذكرت اني بعرس وبصير مره لزمن لزمن<<( لاتفوتكم الكلمه دايم اسرقها ) اصير عاقله وقمت امشي بشويش واتمايل تسني عود الخيزران ودخلت عليهم وجلست صبت لي امي القهوه وجلست اشرب افففففففففففففففففف <<<( مولاحظه : الفاء هذي شفطه مهيب نفخه يعني الهوا يدخل جوا بطونكم ماهوب يطلع اتمنى ان المعلومه وصلت ) بعد ذا الحركه قام اخوي ونطل الفنجال والتفت علي وقام يناظرني وهو حامتن تسبده وده يطرش وقلت وش بلاك انقلب وجهك ؟ قالي حايمتن تسبدي قلت لاااه الاخ حامل على بالي بنكت شوي وما دريت الا الفنجال ناشب في عيني كلي زق اعرفي وشلون تتكلمين يا بقره << ياعمري انواع الشتايم وش فيك وراك عليها يمه حومت تسبدي ما شفتيهاوشلون تشرب قامت تزبد علينا تسنها بقره

عاد انا في هذه الاثناء ضاق صدري ونطلت الفنجال وقمت لغرفتي وجلست اصيح توهئ توهئ ليه انا كذا ليه كل شي فيني غلط تصدقون حتى يومني العب مع نفسي ( o.x ) كنت اشجع الـ X

وبعد الصياح قررت اني اعدل نفسي وأول شي سويته قصيت اظافري <<< انواع الوصاخه صح
همن أخذت التلفون ودقيت على الـسي << فهوتوها تراها الالبي سي وكلمت خبيرة تجميل وشكيت لها وضعي بعدما ارسلت لها صورتي وقالت لي شوهيدا يا ساره ما بيصير هيك انتي بنت وبدك تتجوزي لزمن لزمن << اعديتها ذا اللبنانيه تتزبطي وتصيري حلوه كتير متل هيفاء وهبي او نانسي عجرم وقامت تحتسي علي من هالحتسي يومني سبحت في بحر أحلامي وبغيت اغرق لأني سبحت بعمق وتخيلت اني ذات قوام رشيق مثل نانسي آل عجرم وفيني غنج مقطعني تسني هيفاء بنت وهبي وصرت اسحر قلوب الناظرين وطلعت لي حبة خال على خدي وصارت ركبي بيضا وجسمي صار يلمع راحت الشهابه وبراطمي صارت حمرا تسنها قطعة جحه وكل من مر وشافني فق خشته تسذا وصرت امشي وانا رافعتن خشمي واطالع الناس بطرف عيني << عرفتوا ليه اسمي غرور وصاوا يدقون علي يبوني اشرتك في ملكات الجمال وانا أقول لهم معليش ودي افتح مجال لغيري حرام لدرجة ان توم كروز يوم شافني ضيع انهبل الرجال وصار يطاردني ووده يتزوجني وانا مسوتن ثقل عليه ويوم جينا نتزوج انا واياه قاطعني صوت ذا اللي تبربر وهي تقول ساره ساره وينك عم بحكي معك ولي وين راحت هيدي ؟ قلت لها هاه معتس متعس بس كنت اشرب مويه وقالت لي خلاص بدي اياكي تجي لعنا هون بلبنان تانعمل لإلك بلاستك سيرجري قلت وشو وش ذي ؟ قالت يعني عملية تجميل قلت يعني بترمموني ؟ قلت شوووو قلت لها لا ولا شي بس انا ما بقدرش اجي لنعدكم قالت ماعليه فيه عندكن بالسعووودييه فرع لمركزنا بدي حط اسمك عندون وروحي لإلون وهني بيزبطوكي قلت وبراستس يا جاكلين خلاص يله سجلي بياناتي عندتس وخلصنا من المكالمه


ومعد نمت هذيك الليله احتري بكره يجي وكل شوي متعلقتن في الشباك اقول متى تطلع الشمس وطلعت الشمس وصاح ديكنا الملسون كوكوكوكووووو ونزلت مثل البرق لغرفة ابوي لأنه راح يصلي قلت هذي فرصتي خلني اسرق منه فلوس عشان العمليه وزرفت دراهمه مابقيت له الا خمسطعش ريال وبينما انا اسرق بوك ابوي لقيته حاطن صورة نانسي في البوك حقه وافقع ذيك الضحكه ياحليلك يا ابوي الله من المراهقه اللي براسه واخذت الفلوس وطلعت

رحت يوم جا العصر قلت لأمي يمه بروح عند صديقتي مناير ابيها تعلمني وش اسوي اذا تزوجت انتي ماش ما عرفتي تشرحين لي تستحين الله يهديتس مناير قوية وجه ما تستحي بروح لها خلها تعطيني كورس روحي بس لا تطولين ايه طيب


ورحت لذاك المركز يومنهم طارو بي اهلين وسهلين طبعا انا كنت لابستن البرقع وطالعتن اهبل ويوم دخلت على الدكتور انهبل سم الله سم الله كل هالجمال هيدا وبدك تعملي عملية تجميل ؟ يومني استحيت ولكن يوم نطلت البرقع قام وقلب وجهه عني وصد قلت في نفسي لحووووووول حتى انت بتصد عني بعد المهم جلسني على ذاك السرير وجاب معه مفكات وزراديه ومنشار ومسامير وكل ابو العده . . وبعد كذا خدرني وقام يحوس في وجهي .

وبعد اربع ساعات صحيت من البنج يوم صحيت حسيت ان وجهي صار خفيف
ياهوووه وش القصه وش صاير يوم دخل علي الدكتور وهو مبتسم ويقول أمر والله أمر ايه ياهيك الشغل يا بلا قلت وشو يادكتور عساني صرت حلوه شو حلوه عم بتعأدي الله يسلمك يا دكتور وجاب لي المرايه يوم ناظرت نفسي لأ لأ لأ مستحييييييييييييييييييل والتفت
واقول له دكتور أحبك اممممممموووووووااااااااااه خربتها ذيك الساعه . . ياحليله ذا اللبناني تصدقون انه ما استحى يوم مطخته متعودين على البوسات عيال الايه ذا اللبنانيين مهوب مثلكم

واخذت قشي ورحت لمناير يوم دخلت وشافتني قالت لي اطلعي برى من انتي ما اعرفتس قمت وصمختها مع مقفاها يوم طارت عيونها خييييييييير تمونين والله مناير ماعرفتيني ؟ اناساره وشو سويتيها يابنت الايه

والله انتس طلعتي قطعه صاروووووخ يله مشينا وين هو له للمملكه ليش ابي اكشخ بتس وش شايفتني قطوه تكشخين بي اقول اها بس اعقلي مابه روحه تعالي ابيتس بسالفه وشو وش تبين ابيتس تعلميني هذيك السوالف
غرور وش عندتس وش تبين بها ابد بس انا بعرس وابي اتعلم امي ماش مافهمتني بس تعطيني رؤوس أقلام اما انتي بالتفصيل الممل ظنتس ياغرور التفصيل في ذا السوالف ممل هههههههههاااااااااااااااااااااااااااي

وجلست عند مناير لين الساعه 12
ورجعت للبيت وكانت رجعتي غير رحت وانا لابستن زنوبه وقميص ورجعت لهم وانالابستن كعب وجينز
دخلت البيت وكانوا كلهم نايمين الا امي لقيتها مرتكزة في الصاله تحتريني يوم دخلت من انتي يمه انا بنتس غرور تسذبين وين بتني بس طلعيها حلوه ذي طلعيها ليه شلفيها حبة علك بوزيها في مخباتي يمه وجع انا غرور حتى شوفي هذي عضة أخوي نويصر الكلب مابعد راحت اي والله ذي بنيتي غرور وانا امتس كل ذا سوته بتس مناير هاااه ايه والله يابنيتي صرتي طخمااا تهبيلن ووووه يازين براطمتس يمه وشفيتس كنتس قلبتي علي هاه لايا بنيتي بس أقول يعني هما صديقتس مناير تعرف تسوي تسذا أنا أقول يعني وراه ما تسوي فيني مثلتس كود ابوتس يلتفت لي شوي يمه وش ذا الحتسي يا خزياه بس انتي كبرتي على هالاشياء مايصير اعقلي بس وبلاش مراهقه غرور وين حكيتس اللي اول .؟ هماتس تقولين لي اني توني وخل اتمتع بشبابي يمه صدقتي انا كنت ارفع من معنوياتس بس والا احمدي ربتس ان ابوي صابر عليس كل هالعمر مسكين ما الومه يومه يحط صورة نانسي في بوكه يبي يكحل عيونه . وش هو وش نانسيه بعد هاه . لا يمه ولا شي هذي بطاقه مثل الفيزا يسحبون بها فلوس ايه اشوا لا يمه لا تخافين ابوي وين وهذيك السوالف وين خلاص يمه زمانكم فااات وخري عني الحين خليني انوم عشان بكره بيجي المعرس يشوفني يمه تهقين بيخق لي شافني بس أقول انتي يمه نظول شكلتس بتصكيني عين مدري ليه احس اني اذا قمت بكره بلاقي براطمي منفشه تعالي اشوف اتفلي علي وقولي ماشاء الله اووووووخخخخخخخخخخ تفوووووووو عليتس يمه وجع وش ذا كنتس ما صدقتي على الله أقولتس اتفلي <<< هذي امي اللي تضحك شوفو ما بعد طاحت ظروسها أهب عليها

ورحت لغرفتي وصكيت امها نومه خخخخخخخخخخخ

والى هنا وكفايه مانيب قالتن لكم وش صار لي مع المعرس اليوم خلوها مره ثانيه


احتروني