الموضوع: الخصر والسبابه ــ للشاعر ناصر الفراعنه

يـا مـلّ قلـبٍ هـوى الغربـي كشـف مابـه . داخـل حنايـاه عبـدٍ فـي يـدِهْ طبْـلـة

ما جابت الورق مـن زيـن اللحـن جابـه . واكبـر عذابـه ليـا طـق الحيـا وبلـه

من أزرق الريش عاف الصيد مخلابه . كبـده لهـا حـول سبـع سنيـن مندبلـه

علـى وليـفٍ شربـت السـمّ بعْذابـه . وكنّـه علـى القلـب دَرّ اللـي رعـت ربلـة

كنّ الولي بدّ عن خلقه توصّى به . من عـودٍ أزرق وغيـره مـن حصـا عِبْلـة

مـا قـد رفعـت اليديـن ألا علـى بابـه . طفـلٍ يحـرّم علـى روحـي واوجّـبْ لـه

لو شافـه اللـي تهجّـد وسـط محرابـه . صلّـى أمّ الاربـع ثـلاث وضيّـع القِبلـة

ولو شافه اللي بني عبسٍ تعزوى به . والله فلا عـاد يسـأل عـن هـوى عَبلـه

عليـه راعـي المعـمّ يشقّـق ثيابـه . خـلْ عـاد رَجْـلٍ عمـر عشريـن يلعـبْ لـه

مجدّلٍ يـا حيـاة الشـر يـا خضابـه . ينقـض قرونـه علـى زنـدي واطبطـبْ لـه

وعيـنٍ لسلهـم بهـا عـن ألـف دبّابـه . تلعـب بـالارواح لعـب الظبـي والشَبلـة

والجفن يـا لعنبوكـم كيـف مـا آهابـه . مـن ذلّ سَلْـم وحيـاة الـروح تكتـبْ لـه

والرمش لأغضى تشوف الموت بأهدابه . مدري لو الموت ابن عمٍّ يقاربْ له

رمـشٍ علـى طغـوة السلطـان يدعـى بـه . عليـه قلـب المعـنّـى طـايـرٍ شَبـلـه

لو في شجاعة هدب رمشه معي لابه . الموت فـي ذمّتـي ذمّـة مـا احسّـبْ لـه

وانّ احكم الأرض من صيدا إلى طابة . واطهّر القدس مـن نـذلٍ قضـب حبلـه

والخشـم سيـفٍ يلـوح الغـيّ بنْصابـه . لا سلّـه اللـي طعامـه مـا يـجـي هَبـلـه

وثغـرٍ ولا طاولـه ثـغـرٍ ولا شـابـه . يــا قَبـلـة الله يــا مــا احــلاه مــن قَبـلـة

مدري من الخمر والا الخمـر بلْعابـه . والا مـن الكوثـر المعسـول يِِسكـبْ لـه

من ذاق معسوله الخمري ودلّى بـه . مـن سكرتـه مـا نلومـه لـو يمـوت اَبلـه

كـنْ حـدري الشفّـه اليـا عـضّ بـه نابـه . شفّـة صغيـرٍ بمـاي التـوت منعبلـه

ولسان إلـى مـن حكـى والجابـه الجابـه . يرتّـب الهـرج مابـه مـن يرتّـب لـه

صوتـه ولا صـوت عُـودٍ عنـد لعّابـه . لا دقّّـه اللـي علـوم الـفـنّ تُنـسـبْ لــه

والخـدّ مـا غـطّ نـوره لــون جلبـابـه . والله مــا شـفـت انــا بـعـده ولا قبـلـه

ودّه بذبحـة حضـر نجـدٍ مـع اعرابـه . واشـوى بريقعْـه عـيّـا لا يـوجّـبْ لــه

والكفّ حالـه وحـال سهّيـل متشابـه . مـدري نسابـة أو انّ سهيـل ناسـبْ لـه

بإيـده مـلـك مــوت هـلاّبـه وحيّـابـه . قــوسٍ تمـتـزّع معالـيـق الحـشـا نِبـلـه

وفوق النهد شفت أخو بدوى بمشعابه . وحدر النهد شفت انـا خيّالـة السَبلـة

نهدٍ من الثوب الاحمر يفقد اعصابه . يبغى يتنفّس شوي والثـوب ناشـبْ لـه

يـا ليـت مـن خـذْه صبّـح بـه ومسّـى بـه . نـاسٍ علـى خـزّة العـشـاّق منَبْـلـه

وخصره مسافة مابيـن اصبـعْ وسبّابـه . أحيـان يخطـون فيـه ويلبـس الدِبْلـة

وردفٍ ليا اقبل تقل مقْفي والى اقفى به . تقول مقبل عسـى الله لا يسبّـبْ لـه

لا سار واهتـزّت الشطـوه حـدر كابـه . تشبـه شجـاعٍ سمـع غاليـه ينـدبْ لـه

والسـاق كنّـه لسـان الـداب لاومـى بـه . أو كـفّ طِفلـة تـردّ الـفـرْد وتْحبْـلـه

واقدام لو فوق قبر الميْت تاطى به . شفته يصوّت قبل يِضحي الضحـى لإبلـه

بعض الأوادم هبـال الحسـن مـا عابـه . واليـا انهبلـت اكثـر العربـان منهبْلـة

زينٍ بزينـه نمـوت ونـوب نحيـى بـه . مـا بإيـده الا الشقـا ونْحـبّ نتعـبْ لـه

غلطـان عمّـه يخالـد يـوم وصّـى بـه . سـوات هـذا جميـع النـاس تقـربْ لــه

يا زين انا وانت سِلْك عْقال وعْصابه . تُومٍ عسى من عقَـب للتـوم يِعْقـبْ لـه

يا زين كانك وحَشْ ريمٍ فأنـا غبـه . غـدَت ضلوعـي علـى شانـك زهَـر رِبلـة

بينـي وبينـك مـاْ بيـن الكُـمّ واجيابـه . وعليّـه ابعـدى مـدى ممـن ورا القِبلـة

يا زين قلبـي عليكـم يـدّرج دابـه . بيـن الحصاتيـن حـذف النـاس عرقـبْ لـه

مانيـب مـن قـال يابـه آه يــا يـابـه . وهتـمّـه بقلـبـه كـبـر راس القـلـم ذِبـلـة

يا زين موْدعْك قلبي وانتـه ادرى بـه . يـا طلبتـه ليـه بيـن النـاس تطلـبْ لـه

أمّا اسعف القلب يا زيـن وتَهنّـى بـه . والا فأنـا الخبْـل يـوم اطـرد ورا خِبلـه



وسلامتكم

وصح السان شاعرها

الشاعر

ناصر الفراعنه السبيعي


تحياتي وتقديري


اخووووكم


Akon