الموضوع: تعال هنا يا ايجابي

ايجابي, تعال

"انا مش منسجم مع اهلي وما بيسوو اللي انا ابغاه"
"انا اكره المدرسة وماني طايق اروح لها"
"الابلة دي مهي عاجبتني ياريتها ما درستني"
"صاحبي دا خاين ما يوقف معايا في كل شي"

دي الكلمات اللي غالبا نسمعها من البنات والاولاد , وهما بيتكلمو عن مشاكلهم وبيفضفضوو , الكلام دا بيعكس طريقة نظرة الشباب دولا للمحيط اللي عايشين فيلوو
المراهق او الشاب عادة بيشوف الواقع من خلال نضارة هوا لابسها , بس دي النضارة لابد ما يكون عليها غبار القلق والتوتر
بعض الناس يختار من البداية النظارة الخطأ , فـ بيشوف كل شي مو جاي على مزاجو , او ان اقرب الاشخاص منو غرضهم الاساءة لي , الشاب هنا شايف العالم مش زي هوا مايبغى
محد فينا يقدر يقول انو كل شي حوالينو عاجبو او يستحق المديح , بس اللي نقدر نقولو انها مو كلها سيئة او قبيحة , بالعكس في كتير اشياء بتسبب لنا السعادة والاحتواء ,,
المهم نظرتنها احنا لهدي الاشياء او الحياة بشكل عام

-هل انت بتنظر للحياة على انها مصدر سعادة او شقاء ؟
-هل بتتذوق الجمال حوالينك وتشعر بالمتعه اكتر ؟ ولا ما بتشوف من الحياة الا الألم والتعاسة؟
-هل بتحس بالاطمئنان والاستقرار او بتحس بالاضطراب والقلق والتوتر؟
الاجابة على دي الاسئلة تختلف من شخص لآخر ,, وكمان حسب الظروف النفسية للشخص

في كتير حيقولو انا ما اشوف الحياة الا مصدر تام للسعادة او اننا ما بنشوف الا الشي الحلو وما نحس الا بالمتعه والتعاسة دي ما نعرفها والحمد لله دايما مرتاحين وما عندنا أي اضطراب

بس الامور حوليننا بمنظور انضج فيها الطيّب والبطال فيها الحلو والبايخ فيها المتعه وفيها الألم
الطفل الجديد في العيلة فرحة ومتعه , بالمقابل , وفاة شيخ كبير في العيلة مأساة وحزن
الصحة حلوة و تنفعنا والمرض اقل شي : مؤلم :
الصديق ممكن يكون وفي وممكن يخذلني في وقت حاجتي لو
امكن اصادف مدّرس ضعيف . او ابلة اخلاقها سيئة وامكن العكس
ساعات يكون احد الابوين جاف وخشن والتاني هيّن و ليّن
كل دا بنشوفو يوميا , بس دا ما يعني انو احنا اشقياء ازا قابلنا اشياء تسئ لنا او تضرنا,
لان الحياة كلها خليط بين الخير والشر
والحقيقة انو اللي يخلينا سعداء هوا كيف نفهم دي الحياة وكيف نظرتنا ليها ؟
يعني علينا انو يا اننا نمسح غبار القلق والتوتر من على نضارتنا , او نبدلها بوحده جديده تناسب نظرتنا الجديدة !!

ايش يعني دا كلووو

انو نغيّر مبادئنا في الدنيا تخلينا نبدأ النظرة الجديدة

-هل نشوف الجانب المليان من الكاس ولاالجانب الفاضي؟
لازم نشوف الخير والجمال في الحياة وفي الاشخاص , بدل ما نركز دايما على الشر والسوء , يعني عشان اكون ايجابي اول شي لازم ما اكون سلبي,,
عشان كدا اللي فاهمين الدنيا بيعددو دايما النعم , ما بيعددو المشاكل والمآسي

-ياترى بنحط في بالنا انو اللي خلق الكون دا رب مدبّر وانو ما خلّق شر مطلق؟
, والشيطان بيكون داخلنا زي التحدي عشان ننتصر على الوساوس والمكايد , فـنحس بالسعادة لما نوقف في وشو وننتصر عليه , ونحصل على درجات اعلى عند الله .

-هل احنا بندور على المفيد في كل حاجه ؟
وعندنا يقين اننا حنلاقيه بإزن الله بمجرد ما ندقق ونلاحظ ونسعى !!
ولا تنسى انو مَن جَدَّ وَجَد ، ومَن زَرَعَ حَصَد
الاشياء المهملة ليها فايدة اكيدة اقلها نستفيد من الوقت الضايع نقرأ كتاب او نتعلم شي جديد او نسمع لأحد كلمة طفل او انسان بسيط تغير حياتن

-هل بنحط في بالنا دائما انو جواتنا كنوز مالها آخر , تستنى اننا نطلعها بس؟
ازا ما اقتنعت بكلمتي دي اقرأ سيرة الانبياء والعلماء والمفكرين ما كان حصيلتهم الا شوية علم ومعرفة , استخرجوها , وغيرو بيها الدنيا .

-هل دايما تفكر بالبناء مش الهدم؟
, ازا فكرت انك تبني شي , حتفكر انك تبني شي يكمل اللي بنيتو , وعلى كدا في يوم من الايام حتكون ليك انجازات مهما كانت بسيطة , حترتاح وحتحس بالسعاده لانك منتج ودي فطرة فطرنا الله عليها , انو الانسان يحب انو يشوف نفسو بيحقق اشياء لو وللآخرين عشان تكون حياتو ليها قيمة وعطاء

اما فكرة الهدم دي يعني اننا بنخرب اشيائنا او اشياء سواها غيرنا , بس لأننا ما نحبهم او نحسدهم , طب كيف تجي السعادة لدا الانسان؟
-يا ترى انت تحب نفسك بدون تكبّر او اعجاب بالنفس وتحب غيرك بدون تبعية او امتهان لنفسك؟
حبك لنفسك يخليك توجهها للخير وتبعد عنها بإزن الله الشر , وتوفر اللي ينفعها من علم وثقافة واخلاق وصحة
حبك للناس يخليك تتمنى لهم الخير , وازا اخطأوا تسامحهم , وازا كررو الاساءة ساعتها تدافع عن نفسك , وما تكره الا عملهم السئ , لانو ازا كان الحب جواتك حيطرد كل مشاعر الكراهية والحقد والحسد

-هل بتتفائل دائما وبتعتقد انو التفاؤل بداية كل عمل جبّار . او انجاز مهم؟
( تفائلوا بالخير تجدوه )
نتفائل لانو الحياة بتعطينا فرص عظيمة للنجاح والعمل , لانو الله سبحانه وتعالى بياخد بيدنا للخير والعطاء, بنعمو التي لا تعد ولا تحصى.
نتفائل لانو كتير ناس فشلو ومع ذلك واصلو ووصلو في الآخر لطموحهم

-عندك يقين انو واقعك المرّ حيتغير بالتدريج مهما كان عنيد؟
الحجره الصلبة , قطرات الموية اللي بتنزل عليها بتسوي فيها خرم , وبعدين يسير حفرة , وبعدين تبدأ الصخرة دي تتفتت الى احجار صغيره , دا اعتقد شي مألوف في الطبيعة
كمان من نعم الله علينا اننا نقدر نتكيّف مع مختلف الظروف مهما كانت قاسية او صعبة , لانسان بيعيش في القطب الشمالي مع البحور المتجمده , وبيعيش في خط الاستواء والدنيا حولينو دايبه من الحرّ

-هل بتحس انو كل مصيبة بتواجهك ليها حكمة .؟
تعال اقرأ مذكرات اعظم قادة وملوك او مشاهير بتلاقيها مليانة مصايب وموت وفراق وازمات مالية , وازمات امنيه , بس المصايب دي هيا اللي خلتهم اقوياء لمواجهة الحياة
وخلت الناس يوقفوا جمبهم ويحترموهم اشد احترام

- تدري انو اخطائك وذنوبك تقدر تصححها بالعمل الصالح .
معظم اخطائنا في الحياة بنرتكبها لقلة الخبرة والتجربة , او عدم اتقان العمل نفسو , او اننا ما فكرنا كويس فيه , او ما بذلنا الجهد اللي يحتاجو مننا ,
حتى الذنوب اللي بنقترفها بتكون قابلة للتعويض ازا ندمنا وتبنا ومحيناها بالعمل الصالح
وافضل طريقة نمسح بيها الشر هي اشاعة الخير على قد ما نقدر وفي كل مكان وزمان

-عارف انك انت مسئول عن نفسك اكتر من غيرك؟
الكل بيساعدك , بيشيل همك , بس في الآخر انت وحدك المسئول عن تسيير امورك , ونجاحك في حياتك , في دراستك , وفي اختيار اصحابك , وفي اكتساب احترام الاخرين ليك , والمثل يقول " اقلع شوكتك بيدك "

- موقن انو ما في نجاح بدون عمل وصبر؟
الانجليزيين بيقولو " الاعمال اعلى صوتا من الاقوال " , مهما كان عملك حلو ومرتب , ما حيبني شي الا ازا اتحول الى فعل , ازا واحد قال انا راح انجح واجيب ممتاز, هل دا الكلام هوا اللي حينجحو !! ولا المزاكره والجد والاجتهاد هيا اللي بعد مشيئة الله بتنجحنا.
النجاح مو بالتمني , النجاح يجي بالعمل والمداومة والصبر

-هل ترضى بنتايج عملك وسعيك مهما كانت قليلة الين تجي الفرصه الاكبر؟
, دا الشعور بيريحنا ويحسسنا اننا تعبنا وبذلنا جهدنا , وازا ما كان الناتج على قد التعب , دا بيعطينا دافع اكبر واقوى انو نتعب اكتر , لحد ما ننجح ونوصل للنجاح اللي احنا نبغاه
اللي ابغى اوصلو هنا هل احنا بنشوف نفسنا ايجابيين بعد دا الكلام؟
وهل وصلّنا انو معنى الايجابية هي حسن الظن بالله سبحانه وتعالى؟
وانو الايمان الكامل بالله راح يبعد عننا السلبيه والاتكاليه والاحساس بالهزيمة وسطوة المؤامرة

منقوووووووووووووووووول

---

juhg ikh dh hd[hfd