الموضوع: هموم اليلة

اليلة

يقول اسير الشوق بليلة كلها همـــوم

وساعاتها كثرت عليه هواجسها

مضى الوقت عشر ادقايق اجلس وعشر أقوم

غداالقلب حبة بنتن وسط محمسها

وهيضتها من واهجا في الحشا مكضوم

اعبر همومي في قصيدة وانفسها

واشهدعليها البدر وسهيل والنجوم

وليلي وأنا انقاهامن العيب وادرسها

وحافظ عليها من النقد والخطا واللوم

واعيد النظر في حبكها قبل افهرسها

كما اللي معه ذودا من البل وبين القوم

عليها يخاف وكل ساعة يعسسها

عسى ليلتي يارب ماهي بليلة شوم

هموما تواردني تلاهب مقابسها

افكر بوقت عاد فيه الوفي مظلوم

يصارع حياته والمشاكل يداوسها

وحنا اوفيا ولنا مذاهب عرب وسلوم

نحافظ على توفيرها ونتلمسها

نغار ونهيب وننتخي للعلا وعزوم

شيمنا قيمنا والعروبة نحمسها

ولولا سلوم الطيب سرنا قطا ورخوم

رجال الشرف تدرا الدنس ما يدنسها

يحيا النشاما اللي يسدون في اللزوم

كبارا روابعهاوساعا مجالسها

عسى من تقيد بالشروط يحيا ويدوم

من العيب يدراها ونفسه يحسسها

وعسى يمينا مالهافي الجميل اقسوم

بعد كل شهرين طبيبا يجبسها

ومن ينكر المعروف قلبي منه مضيوم

ما ينسى الجميل إلا أرذل القوم وانجسها

وحتى طيور الله هل الصقر مثل البوم

خلقه وصنفها فديته وجنسها

صحيح ان محدا من البشر من الخطا معصوم

ومن تاب نفسه للردا لا ينكسها

ومن الناس لو فاجاك حبل الرجا معدوم

يهد الثقه في النفس ماهو بيغرسها

ولولا الرجا ماقابلوا المؤمنين الروم

مئة ألف فارس و العرب كم فوارسها

ولولا الرجا محدا يصلي ولحدا يصوم

لكن الرجا في جنة طاب فردسها

رجا في عضيما خالق واليا رحوم

عبادة رجا ما هيب عادة نمارسها

فلا تستشر قطاع ساقة ولا ماشوم

وسر وستشر لمور دايم تسيسها

وكن باختيارك لامغرر ولا مرغوم

ثيابا ماهيب مقاس لك لا تقاوسها

ولا تامن الدنيا فلا خيرها يدوم

الى كشرت ودنت خباثا مضارسها

ومن الليل باقي جزو وبخاطري علوم

قصيدة منضمها خبيرا مهندسها

فترى من سلك فج البخل دائما مذموم

فرص للجمايل خاسرا من تفلسها

لكن الردي واللاش من فضلها محروم

ماتناسبه العليا وهو ما يوانسها

ولو يجتهد في غير باب الكرم مهزوم

ابواب الفضايل كم رجالا تنومسها

ورجل بدون اخلاق يشبه لقرن الثوم

قصور المعرفه حسن الأخلاق مؤوسسها

ونهار السعه ياكثر الاصحاب عد الكوم

وسود الليالي ذي تراكم غوابسها

تعرفك بالخادم من الناس والمخدوم

الي منها على الباب دقت جوارسها

ياليت الوفي معروف وان الردي ماسوم

لكن البشر متشابهة في ملابسها

ومضى الليل لا جا فيه راحة ولاجا نوم

اوادي الغمايم وتجرع كوايسها

وفي الخاتمة يارب ياحي ياقيوم

تثبت نفوسا مشغلتها وساوسها

وتغفر وترحمنا اذا بلغت الحلقوم

وصفت لحود القبر والطين كابسها

---

il,l hgdgm