الموضوع: نسايم حب ( قصة قطرية)

الجزء الرابع :








أدخلت فهده غرفة ريم لقتها قاعدة على السرير وتقرا قرآن فهده ما كلمتها بس راحت تقعد على الكرسي اللي عليه الجهاز الجديد واللي شكله من أمس ما به حد فتحه حطته في حضنها وافتحته وقعدت تشوف اللي فيه أما ريم فكانت تقرا شوي وتسكت شوي وهي تشوف خالتها اللي قاعدة على الكرسي . وكل ما حست أن فهده بترفع رأسها أرجعت تدنق وتقرا بسرعة . كانت تبي تكلم فهده . تتسامح منها بس ما هي بعارفه رد فعلها وش يكون ؟ وسكتت ريم وهي تسمع خالتها تقول : ريموه بطولين أنا أبي اللعب في جهازسس ولا اعرف له أخاف أني أخربه ريم من فرحتها قالت : صدق الله العظيم ونطت تلم فهده وكانت بتكسر الجهاز وهي تبكي وتقول : فديتس والله يا يمه سامحيني الله يخليس وفداس الجهاز وعمري وحياتي بس لا تزعلين مني ولا تخليني وكملت وهي تبوس يد فهده : يمه أحب يدس لا تخليني . يمه أنا ما لي غيرس في ذا الدنيا ولمت فهده بقوة كانت بتخنقها وهي تبكي ولا فكتها إلا يوم قالت لها فهده بصوت مخنوق : ريموه أن ما فكيتيني ذا الحين الموت بيأخذني قالت ريم اللي قعدت على الأرض قدام كرسي فهده : بسم الله عليس جعلني ما أذوق حزنس ما حيت .
فهده سكرت جهاز ريم وحطته على الطاولة الصغيرة اللي جنب الكرسي ولفت على ريم وقالت : قبل لا اقولس إذا سامحتس أو لا ابغي اعرف منس وبصدق أنتي ليه قلتي لرفعة ذا ألحكي
ريم نزلت عينها تشوف رجل فهده اللي قدامها وقالت : أنا قلت لها كذا عشاني ادري أنها تحبه وتبيه من طريقة كلامها عنه وتفديها له ما هو قدامي بس غير حتى قدام خوياتي في المدرسة . كانت كل ما شافتني أو كلمتني تسمعني حكي كله نغزات . ومره كنت رايحه غرفة المدرسات أجيب دفاتر الرياضيات وسمعتها تقول لخويتها أنها ما هي بموافقة على الرجال اللي تقدم لها لأنها محيره لولد عمتها جنيت كانت أبي اخنقها بس مسكت نفسي أقطعتها فهده وقالت : زين يمكن هي صدق محيره لعمس وبعدين وش النغزات اللي كانت تقولها لس
ريم اللي حطت يدها على رجل فهده قالت : تهبي ما هي بمحيره له أنا سألته وقال لي انه لا حيرها ولا شيء. وانه أصلاً ما يفكر يأخذها لسببين الأول انه يحس أن مخها مركب بالمقلوب . والثاني أنها طويلة واجد وهو يبي وحدة قصيرة فهده ما أقدرت تمسك نفسها لا تقول : سم الله عليه هو القصير. اللي يسمعه ما يقول برج أيفل. قالت ريم بسرعة : خالتي اذكري الله عليه افتشلت فهده من كلامها قدام ريم وقالت : آسفة لا اله الا الله عليه كملي وش النغزات اللي كانت تقولها لس ؟
ريم قالت : هي كانت دايم تقول كلام بمعنى أن حنا حمل عليه وانه إذا اعرس بيرتاح من الحمل لان أمرته ما هي براضية تربي عيال غيرها وهو عشانها بيخلينا . وان حنا يكفينا أن هو مخسر دراهمه علينا عشان كذا لازم نخليه يعيش حياته
قالت فهده بعد ما شافت ريم ساكتة : وبس ذا ألحكي اللي كانت تنغزسس به ؟ أولاً هو ما يصرف علينا من جيبه عشان تمن علينا رفوع ال***ة على قولتس . هو يصرف عليكم وعلى البيت من نصيب أبوس في الشركة والعقار اللي عندهم . وثانياً حنا ما هب حمل عليه ولا هب محتاجين له في شيء ويقدر يعرس من زمان ويخلينا . لكن هو اللي يحبكم ويبي يقعد معكم . وذا هي تقول أن حنا مضيقين على أمرته كان قلتي لها جعله سعيد وهو بعيد . يعرس ويروح الله يحفظه وهو عزيز وغالي . أقطعتها ريم وقالت والدموع بدت تتجمع في عينها مرة ثانية : ما اقدر أقول كذا أنت ما تدرين أنتي وهو وش بالنسبة لي . انتووا أمي وأبوي تعرفين وش يعني أبوي وأمي وصدقيني لوني ادري انس بياخذس واحد منا وبتخلينا أني بحس بنفس الشعور . لا أنتي يمكن أموت . ولفوا ثنتينهم على عفراء اللي كانت واقفة على طرف الباب وهي تقول : يا الله بستر من ذا الطاري ريموه من أمس وأنتي تحنين على الموت اهجعي اشوي خلي الملايكة تحوفنا . يلاً الغدا تحت في الصالة انزلوا بسرعة وطلعت . لفت ريم على فهده بسرعة وقالت : سامحتيني
لفت فهده عليها وقالت : بقولس بعد الغدا يلا قومي قبل تحتشر علينا عفاري



















فهده اللي كانت تشوف سونيا تشيل السفرة حقت الغدا قالت للبنات : انتوا تعرفون أني أحبكم ولا عمري فكرت أني أخليكم ولا ابتعد عنك ويوم شافت تعابير وجيهم كملت وهي تشوف ريم : عشان كذا يوم جاء واحد وتقدم لي أنا رفضته بس هم ما اقتنعوا وقالوا لي فكري عدل وردي علينا خبر ودنقت بعد ما شافت ريم مبحلقة فيها وقالت : بس بعد ألحكي اللي طلعته ريم علي وعلى عمها ما انتشر بين الناس ما صار لي قعده في ذا البيت أكثر . لازم اطلع منه عشان أحفظ ماء وجهي وسمعتي . عشان كذا أنا وافقت على اللي تقدم لي والعرس بيكون في اقرب وقت ورفعت رأسها شافت اللي قدامه عبارة عن أشباح . ما فيهم أي حياة . فهده عورها قلبها على عفراء. بس كان لازم تشارك ريم في العقاب اللي بعاقبها به خليها تعرف صدق أن اللي سوته غلط وغلط كبير بعد . وقامت فهده من قدامهم وراحت بسرعة لغرفتها وأقفلت الباب عليها


















ناصر : هلا .
فهده :
ناصر :
فهده : .
ناصر اللي كان يعرف رقم فهده قال بكل برود وهدوء : وش قررتي
فهده أبلعت ريقها وقالت بعد ما قررت أنها تكون صاحبة قرار وموقف : السلام عليكم .
ناصر ابتسم غصب عليه وهز رأسه وقال : وعليكم السلام . كيف حالس بنت سعد ؟
فهده وهي تحاول أن تكون على نفس درجة هدوءه وبرودته قالت : بخير زان حالك . أنت كيف حالك ؟
ناصر كان يحاول انه يكتم ضحكته عشان ما تسمعه يضحك عليها وقال : الحمد لله بخير . أمرني يا بنت سعد
فهده اللي كانت تحس أن صوتها بتدا يختفي بالتدريج قالت : ما يمر عليك ظالم .

.
ناصر حس أنها منحرجه ولا هي قادرة تتحاكا عشان كذا حب أن هو اللي يتحاكا وقال : بشري يا بنت سعد وصلتي لقرار ؟
فهده قالت برتباك اللي بيعترف بجريمة : أيه.
ناصر اللي كأنه قاعد ينطق له بزر قال : وش هو
فهده اللي لسانها ما كان مطاوعها تنطقها تمت ساكتة: .

ناصر اللي كان متأكد من موافقتها قال : وافقتي
فهده قالت بسرعة وبصوت عالي ما تدري من وين طلع : بس بشروطي
ناصر اللي عجبه الكلام معها خاصة وهي معصبة قال : ما شاء الله في شروط بعد
فهده بحده ردت عليه : ليه ما يحق لي أتشرط ولا ما يليق علي ؟
ناصر قال بكل برود : آفاااااااااا ليه ما يليق يليق ونص لس يا بنت سعد . تفضلي قول لي شروطس .
فهده اللي كانت تحاول تهدي نفسها وتتكلم بنفس طريقته الباردة في ألحكي قالت : أهم شيء أن زواجنا يكون على الورق بس . وأظن كلامي مفهوم .
ناصر اللي كان يسمعها وهو رافع حاجبه رد عليها بسرعة وقال : تصدقين انس وفرتي علي في ألحكي كنت بقولس نفس الكلام . غيره وش عندس من الشروط ؟
فهده اللي احترت من رده عليه بذا الطريقة وذا ألحكي قالت بعصبية : شوف أنا أهم شيء عندي في الدنيا العيال ووافقت على الزواج منك بس عشانهم ما أبيك تحرمني منهم في يوم من الأيام قطعها ناصر وقال بكل مكر وخبث : فهده أنتي ما ينعرف لس توس تقولين انس تبين زواجنا يكون على الورق كيف يعني تبين العيال يجوون على العموم إذا أنتي تبين عيال أنا ما عندي ما نع
فهده اللي حست أن الدم اللي فجسمها تجمع كله في وجها قالت بصوت عالي : أنت واحد قليل أدب .ولا تستحي على وجهك ولا تخيل . وحقير ونذل ووووووووووو.يا برج أيفــــــــــــــــل وسكرت التلفون في وجهه . ناصر تم يشوف السماعة بعد ما سكرت في وجهه فهده ولا هو بفاهم وش دخل برج أيفل في المسبة اللي قالتها له . بس بعد ما استوعب انه تقصد طوله مات من الضحك عليها روعه صوت الطق القوي اللي على الباب حق ملحقة . راح يخب عشان يفتح الباب أول ما فتح الباب نطت ريم عليه ولمته وهي تبكي وتانشق و اللي روع ناصر أكثر كان شكل ريم اللي جايته حتى جلال ما عليها . لمها وهو يقول : ريموه وش فيس ؟ وش فيكم
ريم اللي كانت تناشق قالت : الحق علينا يا عمي . مصيبة . مصيبة كبير وجاتنا
ناصر اللي راح تفكيره سيده لحمد اللي في الأمارات وقال : اخوس فيه شيء
ريم أرفعت رأسها تشوف عمها وقالت : ما هب اخوي خالتي
ناصر باستغراب قال : وش فيها خالتس ؟ توني مسكر منها ما فيها شيء .
ريم اللي ما انتبهت لكلام عمها قالت : بتعرس خالتي بتعرس بتعرس عشان ألحكي اللي قلته عنها تقول أنها ما تقدر تقعد في البيت معنا بعد اللي أنا قلته عنها ما انتشر بين الناس وأنها بتعرس في اقرب وقت عشان تطلع من هنا بسرعة عمي الله يخليك سو أي شيء لا تخليها تطلع من عندنا رده إذا جاك يخطب رده ولا تدري حير عليها بس لا تخليها تروح دخيلك يا عمي . دخيلك ناصر ما فهم اللي صاير وحس انه متلخبط .كيف بتأخذ واحد وتطلع من البيت وتوها تقول لي أنها موافقة علي . وبعدين من ذا اللي بتأخذه ؟ ومن وين أعرفتها وجاها و بشور من هي أصلا بتعرس ؟ على كيفها هو ما هب على كيفه ورفع ارس ريم اللي لمه عليه وقال لها بكل برود وثقة : ريموه . روحي لخالتس وقولي لها عمي يقول اليوم بعد المغرب الملكة ريم كانت تشوف عمها وهي فاتحه عينها على الآخر و تسمع كلامه و أول ما خلص انفجرت بالصراخ و البكي كأنها جرس إنذار وقالت : يعني حتى أنت تدري ولا علمتونا خاشين علينا ليه حرام عليكم . تبون نفترق لكن والله اذبح عمري .عشان تفتكون مني وخلي كل واحد فيكم يروح يعرس على كيفه وفكت يدها اللي كانت لمه بها عمها عشان تدفه بها وتطلع منه بس ناصر اللي كان لمها هو بعد ولا أثرت فيه دفتها قال : ريموه إذا ذبحتي نفسس بيفوتس عرسي أنا وخالتس
ردت ريم اللي تبكي وهي تحاول تفكك من يد ناصر : جعلكم ما توفقون في ذا العرس جعل رفوع ال***ة الموت . والله يأخذ رجلها أن شاء الله حتى قبل لا يملكون قال لها ناصر وهو يبتسم : آفاااااااااااااااااااا تدعين علي تبيني أموت ؟
ريم اللي أتعبت من كثر ما هي تحاول تخلص نفسها من يد ناصر قالت : أنا ما ادعي عليك ادعي على أمرتك ال***ة الـــقطعها ناصر وقال : تدعين على أمرتي يعني تدعين على خالتس بالموت
ريم اللي ما انتبهت لحكي عمها قالت : لا أنا ما ادعي علـــــــــــــــــــــــــــــــــــــ. . وثنت رأسها اللي كانت رافعته عشان تشوف عمها بعيونها اللي كلها دموع وقالت بتشكك : خالتي أمرتك . ويوم اشر لها ناصر برأسه أشارة نعم كملت عشان تتأكد وقالت : يعني أنت وخالتي بتتزوجون . انتووا بتتزوجون بعض يعني أنت رجلها وهي أمرتك



















فهده كان ودها لو عندها قنبلة وتفجر فيها الملحق واللي فيه . صدق انه نذل حقير وتفكيره قذر عمره ما هب متغير مهما كبر . بيتم إنسان تفكيره قذر والله أني قبل شيء وبعده وأنا متحسفه أني وافقت عليه وبأخذه لكن والله عليه أبركت البنات ولا قسم بالله ما قلت عليه قبول على طاري البنات أشوف ما فيهم وحده جاتني ولا قالت لي يا خالتي لا تعرسين . و الله الظاهر أن كلام ريموه طلع كله سياق ولا هميتها في شيء هاااااااااااااا أخاف إلا أتعبت مره ثانية وعفاري متوهقه فيها . خلني اطلع أشوفهم ما به فايده . ما فيهم وحده بتجي تشوفني أفتحت الباب واطلعت من غرفتها . شافت عفراء قاعدة في الصالة وهي تبكي . ويوم شافت فهده أمسحت دموعها و أرسمت على شفايفها شبه ابتسامة فهده انكسر خاطرها على عفراء اللي يوم قعدت جنبها على الكرسي قالت لها : ألف مبروك يا خالتي . والله يوفقس أن شاء الله ودنقت رأسها لأنها بدت تبكي مره ثانية وكملت : بس ما علمتينا من هو سعيد الحظ اللي الله بيوفقه فيس
قبل لا تنطق فهده بكلمه أصرخت ريم با أعلا صوتها وهي واقفة على رأس الدرج وهي متجلاله بغترت عمها : عمـــــــــــــــــــــــــــــــــــــــــي . خالتي بتاخذ عمي . وجات تخب ونطت تقعد في حضن فهده وقامت تبوس فيها . وعفراء مبحلقة فيهم وتشوف ريم كيف قاعدة في حضن فهده وتبوسها وهي تقول : مبروك . ألف مبروك يا أحلا عروس في الدنيا كلها مدت عفراء يدها على ريم وهزتها وهي تقول : ريموه وش السالفة
لفت ريم عليها وقالت : خالتي تلعب علينا . ما هي بمخليتنا هي بتاخذ عمي و بنكون كلنا مع بعض ولا بيفرقنا احد . أقطعتها عفراء وقالت : قولي قسم بالله .
ريم وهي تهز رأسها قالت : قسم بالله ما اكذب عليس ولفت على فهده اللي انحرجت من البنات وفي نفس الوقت أفرحت لفرحتهم وقالت : وعشان تصدقوني عمي يقول أن الملكة اليوم بعد المغرب فهده اللي كانت تبتسم للبنات بخجل اختفت ابتسامتها وحست أن السالفة صارت صدق قالت لريم بسرعة : وش هـــــــــــــــــــــــــــــو؟ ؟ وش هو اللي اليوم ما يصير اليوم
عفراء قالت بحزن و باستغراب : ليه ما يصير اليوم وش فيها ؟
فهده اللي تشوف ريم اللي قاعدة في حضنها وعفراء اللي واقفة على رأسها قالت : يعني عشان أمي عفراء الله يرحمها توها متوفيه .
ردت عليها ريم بسرعة وقالت : زين إلا هي ملكة ما هي بعرس يعني ما فيها لا طقطقة ولا شيء
. وان شاء الله العرس تسونه بعد فتره .
فهده اللي قالت في خاطرها . أنطري العرس . هذا وجهي ردت على ريم : أنتي صادقة بس بعد ما به حد درى ولا حتى منيرة ما يصير كذا لازم نأخذ وقتنا .
عفراء قالت وهي رايحه لتلفون : بس كذا . إذا السالفة على عمتي منيرة ذا الحين بأعلمها ولا يصير خاطرس ألا طيب
فهده ما قدرت تعترض وهي تشوف عفراء تتصل كل اللي أقدرت تسويه أنها تدف ريم اللي أرجعت تلمها بقوة وتبوس فيها وهي تقول لها : قومي عن ركبي كسرتي رجلي



















فهده كانت تحس أنها في دوامه مع البنات طول فترة العصر وكانت تحاول قد ما تقدر أنها ما تفكر في السالفة واجد أكملت عليها يوم جوهم قبل المغرب منيرة وبناتها كلهم وصارت الحشرة . فهده كانت تحاول أنها تبتسم ما أقدرت . كانت خايفه لا مرعوبة وعيونها معلقه في الساعة كانت تحس وهي تشوف الساعة . أنها في ساعة رمليه وكل دقيقة تمر يدفنها الرمل تحته ولفت على منيرة يوم أمسكت يدها وقالت لها : تعالي أبيس في كلمة رأس . قامت فهده وراحت معها في المقعد .
قالت منيرة بعد ما أقعدت لفهده : بنتي وش فيس ؟
فهده قالت لها بتوتر : ما فني شيء جعلني قبلس .ليه في شيء
منيرة : ما ادري كنس ضايقه . زعلانه
فهده دنقت رأسها . وهي تفكر وش اقولس يا منيرة . اقولس أني تحسفت أني وافقت واني خايفه أيه خايفه . لا والله إلا منصب قلبي ولا ادري ليه فهده اللي كانت ما أخذتها أفكارها ما كانت تدري أنها كانت تبكي إلا يوم لمت عليها منيرة وقالت : بنتي لا تبكين جعلس تحين أنا ادري انس ودس لو حد من أهلس معاس اليوم . بس ترى أنا ما اشوفس إلا مثل ما أشوف بناتي ويشهد الله أني فرحت بعلم ملكتكم اليوم أكثر ما فرحت بملكة موضي بنت تدرين ليه لأني ادري أن ناصر جعل ربي يخليه لنا رجل ولا عليه كلام . وبيحطس في عيونه . وأسكتت منيرة وفكت فهده اللي كانت لمتها يوم دخلت عليهم موضي وقالت لمنيرة : يمه عمي يبيس في المجلس تعالي بسرعة عشان هو مستعجل بيروح يبي يلحق على صلاة المغرب وطلعت بسرعة بدون ما تنتبه لفهده اللي كانت تبكي تبي تلحق على جمعت البنات عند عمهم في المجلس الداخلي .


















مريم : عمي متى العرس بتسونه في قاعة أكيد ؟
ريم ردت على مريم : طبعاً في قاعة وفي اكبر قاعة بعد هذا عرس الشيخ ناصر والشيخة فهده أقطعتهم موضي اللي توها داخله وهي شاله بنتها وقالت : لا وش قاعة نسويه في فندق أحسن وحطت بنتها في حضن عمها ناصر اللي كان يتلفت عليهم وهو يسمعهم ويبتسم اخذ جواهر بنت موضي وقام ينقزها وسفه البنات ونقاشهم عن أي فندق يبون يسون العرس فيه. قربت مها منه وجرت ثوبه عشان يشوفها لف عليها وقال : هلا والله ببنت خالد وكمل يوم شافها مبوزمه : وش فيس يا شيخة ذا الخفس المجتمعين
ردت عليه عفراء : الله يسامحك يا عمي أنا خفسة
موضي : وليه معترضة حنا معاس في الهوى سوى . عمي تراها نغرانه من بنتي تبيك تشيلها هي بعد .
ناصر قال وهو يعطي جواهر لمريم اللي قاعدة جنبه ويشيل مها : كله ألا حبيبت قلبي مهاوي . هذي مرت أولد الغالية .
ردت موضي وهي تضحك على عمها : أنت أعرس قبل وبعدين فكر تجوز عيالك
لف عليها ناصر وقام يقلدها وهو يقول : أنت أعرس قبل تمقتين علي أن ما جبت فريق ما أني بعلى أبوي
ريم قالت : ليه عمي بتسوي بهم منتخب ؟
ردت مريم عليها وقالت : لا وأنتي الصادقة بيبع كل واحد لمنتخب
ناصر قرص عينه في مريم وريم وقال : أقول فقدت ذا الوجيه . تمقتون على عيالي وأنا ما بعد أخذت أمهم إلى ذا الحين وبعدين أنا ما أبي أسوي منتخب يا الظريفات أنا أبيهم لي عزوة أبي اللي قعدت في المجلس ذا اللي وش كبره ما اقعد فيه بالحالي أبي عيالي ستة على يمني وستة على يساري وحريمتكم أجوز عيالي وحده منكم ولا من بناتكم يا الخفس . وسكتوا كلهم يوم أدخلت أم حمد منيرة وقالت : السلام عليكم .جعله والله مبارك وسعيد ملكتك يا ناصر
ناصر اللي تم شايل مها وقف يوم شاف منيرة ورد عليها وقال : الله يبارك في حياتس . وجعلس تفرحين بحمد ومحمد أن شاء الله .
ردت منيرة : أن شاء الله خير يا أولدي تآمر على شيء
لف ناصر على موضي واشر لها برأسه عشان تلم البنات ويطلعون . موضي اللي فهمت عمها قالت بسرعة : بنات ما كنا العروس مخلينها بالحالها تعالوا خلنا نطفر فيها شوي ريم ومريم أول ناس طلعوا يركضون والكل طلع ورآهم ألا مها اللي تم ناصر شايلها لف على منيرة وقال لها : استريحي أم حمد ابغيس في كلمة رأس .
أقعدت منيرة وقالت : خير يا أولدي ؟
ناصر اللي قعد هو بعد قال : شوفي يا أم حمد أنتي تدرين أن أنا يتيم ولا لي احد . وان فهده بعد ما لها احد ويتيمة وأنتي يا أم حمد أم الجميع وشورنا كله عندس حنا أن شاء الله بنتملك اليوم بعد صلاة العشا بس العرس ما هب ألا ملكه وبس وأنا أن رحت ولا جيت رجال ولا اعرف في ذي السوالف أنا أبيس تعدينا عيالس وتشورين علي وتعلميني وش اللي لازم أجيبه وش اللي تبيه فهده أنا يا أم حمد ما ابغي اقصر في حق بنت عمي ويقولون الناس بخس حقها يومها يتيمة ولا ورآها احد . أنا ابغي ما يجيها مني ألا بياض الوجه .
ابتسمت أم حمد وقالت : الله يبيض وجهك يا أولدي بالعون ما عليك قصور ولا تجي منك المايله وذا عن تدابير العرس ولا يهمك أنا بعلمك بكل شيء وان شاء الله ما يصير ألا اللي في خاطرك .
ناصر اللي ارتاح من رد أم ناصر قال : شوفي يا أم حمد تري اليوم أنا ذابح ومسوي عشا ما به احد غريب . بس أنا عزمت خالي وأهله على الملكة وأنتي تدرين ليه عازمهم . وكل اللي أبيه من الله وثم منس أن توقفين كل واحد عند حده . إذا حد طرا له طاري ولأني ما أبي حد يقول ما أخذها إلا عشان هي رخيصة أنا شريت لها عقد عندي في السيارة بطرشه لس مع حمد بعد الملكة أبيس تلبسينها إياه قدام أهل خالي بالذات . خل يدرون أن بنت سعد ما هب هي الطوفة الهبيطه اللي كلن يتوطاها وان بنت عمي ما هب هي اللي ينتحاكا فيها وان اللي يبيها لازم يسوق لها اللي ورآه واللي قدامه



















فهده وهي ضايقه : والله لو تموتون ما لبست فستان انتووا ما تستحون على وجيهكم . أمي عفراء ما صار لها أسبوع وانتووا تبوني ألبس فستان واتمكيج
ريم قالت لخالتها بترجي : الله يخليس خالتي رفوع وأمها بيجون . بطي كبودهم ما هب لازم تحطين مكياج كامل حطي روج وكحل والبس فستان ناعم .
فهده وهي تهز رأسها قالت : لا يعني لا ارتاحي .
عفراء وهي تقعد جنب فهده على السرير قالت : خالتي جعلني قبلس أنتي اليوم عروس والوحدة ما هي بكل يوم تعرس وأمي عفراء الله يرحمه لوهي حيه كان هي أول وحده بتفرح لس ما يصير تطلعين قدام الناس بقلابية البيت . أقطعتها فهده وقالت لها : ومن قال لس أني بطلع لهم أصلاً أنا ما هب بطالعة لحد . وإذا طلعت بطلع بثيابي العادية ما هب زابره .
موضي اللي قامت وافتحت كبت فهده ووقفت تشوفه قالت : أنا عندي حل وسط . وش رايس تلبسين قلابية كاشخة وإذا ما تبين تحطين مكياج لا تحطين ما هب لازم وطلعت قلابية مغربية حمره ولها ذيل صغير وكلها ورود بالذهبي وكملت : وشرايس في ذي ؟
قالت لها فهده وهي تسوي حركة بيدها : انسي .
رجعت موضي القلابية وطلعت وحده ثانية لونها وردي وخيوط الرنده اللي فيها وردي وسكري ومخصره شوي وقالت : شوفي عاد ذي ما فيها شيء عادية واجد . وبتلبسينها غصب عليس لان ما عندس وحده عادية غيرها . مريم اللي تليقفت قالت : حرام عليس ذي عادي
بالعكس هذي تجنن على خالتي أن شايفتها عليها . لفت موضي على مريم وقالت وهي تغمز على مريم : لأنس ما عندس ذوق ولا تعرفين الزين من الشين . ريم اللي كانت قاعدة جنب مريم قالت بعد ما شافت موضي تغمز لمريم : موضى صادق ما شافت من الحلا شيء كنها حقت بزر خالتي لا تلبسينها تفشل وش بيقولون ما عندس ذوق ولا تعرفين تلبسين ؟
فهده اللي قامت وجرت القلابية من يد موضي قالت : أيه أنا ما عندي ذوق عشان كذا أنا بلبسها ويلا انقلعوا ابغي أصلي وأبدل ثيابي وافتحت باب الغرفة وقالت : يلا من غير مطرود
اطلعوا البنات من الغرفة بس ريم اللي كانت آخر وحده بتطلع قالت وهي بتطلع : ارجوس . لا تفشلينا وتلبسينها . ردت عليها فهده وقالت : بالعند فيس بلبسها بس عشان افشلس
اطلعت ريم وهي راسمه على وجها مسحه من الحزن وراحت للبنات في الصالة اللي فوق بعد ما سكرت فهده بابها عليها. أول ما قربت من البنات ماتت من الضحك وقالت : مسكينة خالتي بسرعة ينقص عليها
موضي ردت على مريم وهي تبتسم : خالتس ذي ما به حد يعرف لها ألا أنا ولفت تشوف مريم وقالت : لكن ذا البقرة بغت تخرب علينا كل شيء .
مريم : وأنا وش دراني بكم ما ادري أنكم تبون تكرهونها في عينها عشان تلبسها ؟
عفراء قالت باستغراب : أعوذ بالله منكم أجرام والله أني ما فهمت وش السالفة ألا ذا الحين .
موضي قالت وهي تقعد : أنا ابغي اعرف اقتراح من فيكم أنها تحط مكياج ؟
ريم قالت بتردد : اقتراحي أنا ليه وش فيها
ردت موضي وهي تحط رجل على رجل وقالت : فيها أن خالتس صادقة جدوه ما بعد طاف عليها غير أسبوع ولا هي بعدله والثانية أنتي تعرفين أن خالتس بيبي فيس يعني المكياج الواجد يشينها ما يزينها ويبي لها وحده تعرف تبرز براءة ملامحها ما هب أنتي وأنا عرفتي وش فيها ؟
ريم اللي ما همها تعليق موضي قالت بسرعة وبحماس : زين أنا عندي اقتراح ثاني . ما دري إذا بتوافقون عليه ولا لا ؟
موضي لفت تشوف البنات وبعدين قالت : قولي وبعدين بنقرر .
ريم اللي قربت من موضي وهي تفرك أيدها في بعض قالت : الله يسلمكم أنا عندي خويه لي احضريه .وقالت لي عن ملكة أختها تدرون الحضر وش يسوون في يوم الملكة


الجزء الخامس :









فهده بعد ما صلت العشاء أقعدت على السجادة وهي تشوف القلابية اللي محطوطة على السرير أبلعت ريقها وهي تحس بغصة في حلقها . كانت تحس أن مخها فيه أشياء وأفكار واجد وفي نفس الوقت ما هي قادرة تحدد كلمة وحده منهم ما تدري هي كم من الوقت تمت قاعدة وهي على ذا الحال إلى أن أفتحت الباب موضي وقالت لها : ها العروس إلى ذا الحين ما لبستي . فهده بكل هدوء قالت : كنت أصلي توني مخلصة
راحت موضي وأقعدت على السرير جنب القلابية وقالت وهي تمسح على الرنده اللي في القلابية : تدرين كنت دايم قول في خاطري وأنا صغيرة انس أنتي بيكون عرسس غير عن كل الأعراس
فهده اللي كانت تفصخ جلالها انتبهت لكلام موضي ووقفت وهي فيدها جلالها وأسالتها : ليه بيكون غير ؟
موضي وهي تبتسم لها قالت : ما ادري يمكن عشان أن الكل كان مهتم فيس ويدور خاطرس وبعدين قلت لا هذي وحده قوية وشيطانه عشان كذا هي اللي بتكون الرجال وبتسيطر على رجلها وبيصير عرسها غير وذا الحين أقول أن عرسس بالفعل غير لأنه صار في ظروف صعبة أول مره أشوف فرح يطلع من وسط الحزن . صدق غريب
فهده من أسمعت كلام موضي أبركت في مكانها على السجادة ودنقت رأسها ما تدري له بس حست بنفسها في قعدتها ذي كأنها قاعدة فوق أعلى قمة جبل في العالم بالحالها والهوى يدفها يمين ويسار جاتها موضي وقالت لها : فهوده قومي يلا أهل رجلس جو تحت والشيخ بعد جاء .وأمسكتها موضي من يدها وقومتها عشان تساعدها تبدل بسرعة . فهده كانت تسوي اللي تقول لها موضي وهي ساكتة كانت محتاجه أنها يكون معها حد يوجها لأنها بالفعل ما هي بقادرة تتصرف بنفسها ألبست القلابية وقعدتها موضي قدام التواليت وفتحت شعرها وقامت تمشطها وفهده معطتها الخيط والمخيط وكل اللي سوته أنها ركزت عينها على غرشة دهن العود الصغيرة إلي على التواليت قدامها . موضي لمت شعر فهده من أجنابه بعضاضة صغيرة على شكل ورده لونه وردي . وأخذت غرشة العطر عشان تعطرها بس فهده أمسكت يدها وقالت : لا ما أبي عطر . وعطتها غرشة دهن العود . وهي تقول : هذي أمس جابتها لامي عفراء الله يرحمها من العمرة يوم راحت في رمضان وهي عطتني إياها وبعد ما حطت لها موضي من غرشة دهن العود أمسكتها توقفها وقالت لها وهي تشوفها في المنظرة : قمر ما شاء الله عليس . ورن جوال موضي اللي قالت بفرح وهي ترد عليه : هلا والله المعرس .
ناصر : خلصتوا ؟
موضي : من زمان بس أنا انطر تتصل لي مثل ما قلت لي
ناصر : زين قولي لفهده إذا سألها الشيخ من وكيلها خلها تقول أبو مبارك وكيلي .فهمتي
موضي : أيه فهمت ليه بقرة ؟ إذا سألها الشيخ من وكيلس تقول وكيلي أبو مبارك .
فهده من أسمعت طاري وكيل وما وكيل . تذكرت فجأة أنها ما أخذت رأي حمد ولد أختها ولا شاورته وقالت بصوت عالي وهي تمسك يد موضي : حمد أنا ما شاورت حمد . ما اقدر أوافق وأنا ما شاورته ولا وافق . خله يكنس قولي لعمس يكنسل كل شيء .
موضي قالت وهي فاتحه عينها : هااااااااااااااااااااااااااااااااااااااااا
أما ناصر اللي كان واقف في طرف المجلس وهو يكلمهم من سمع صوت فهده تقول خله يكنسل . طلع من المجلس : وصرخ في أذن موضي اللي كانت سرحانة وهي تشوف فهده وقال : وش هو اللي كنسل ؟ على كيفها هو ؟
موضي اللي أرفعت كتوفها بعد ما أفزعتها صرخت عمها في أذنها قالت : عمي هي تقول أنها ما شاورت ولد أختها ولا تقدر تعقد بلا شوره .
ناصر بعد ما سمع حكي موضي اللي قالته . انزل الجوال وتم يشوفه وهو يقرص عينه فيه اخذ نفس طويل ورجع حط الجوال على أذنه وهو يقول لموضي بصوت هادي : طمنيها أني اتصلت له وقلت له وهو يدري . وفرح واجد. ويبارك لها ويسلم عليها. بس ما يقدر يتصل لها لأنهم اخذوا جواله وأنا مكلمه على جوال مسئولهم .


















فهده بعد ما أعرفت أن حمد ولد أختها يدري ارتاحت شوي . ابتسمت لموضي وأنزلت معها ودخلت على طول للمقعد لان النسوان قاعدين في المجلس الداخلي . أدخلت على البنات اللي كانوا مجتمعين في المقعد لان منيرة مسوية عليهم حضر تجول ما يطلعون قدام النسوان ما أسمحت ألا لموضي لأنها متزوجة أنها تدخل عند النسوان وعفراء بعد حب خشوم بس ما يدخلون ألا بعبايتهم عشان ما يقولون جدتهم توها متوفيه وهم متعدلين. عفراء أجلت دخولها إلى أن تدخل خالتها . كل البنات بدوا يمدحون في فهده ألا ريم اللي تمت تقول لها أن قلابيتها تفشل . موضي قالت لهم أن رفعة ما جات وان اللي جو هم أم مبارك ونسوان عيالها الثنتين سادت البنات حاله من الإحباط أن رفعة ما جات . وفهده كانت تشوفهم وهي تبتسم هي صدق كان عندها شعور مثل البنات أنها تبي تغايض رفعة خاصة بعد ألحكي اللي قالته لها هي وأمها بس بعد ارتاحت أنها ما جات عشان ما لها خاطر تشوف وجها موضي وهي تعدل شيلتها عشان تطلع اتصل عليها ناصر وقال بصوت واطي وبسرعة : فهده وين
ردت عليه موضي وهي تضحك بعد ما حطته على الاسبيكر عشان البنات يسمعونه : في الحفظ والصون .
رد ناصر عليها : ما هب فاضي لس وين هي قاعدة عشان حمد بيدخل الشيخ مع الشهود
ردت عليه موضي وهي تلف على فهده اللي تغير لونها من أسمعت طاري الشيخ . : قاعدين في المقعد خله يجي ويطق الباب
موضي بعد ما سكر عمها في وجها لفت على عفراء وقالت : عفاري أنتي ما رحتي تسلمين على النسوان
عفراء قالت : لا. بدخل مع خالتي
موضي كشرت بوجها وقالت : لا عفاري ما هب عدله تدخلين معها ادخلي أنتي قبلها وسلمي عشان إذا أدخلت هي تكون اللي يسلمون عليها بالحالها .
عفراء قالت بتردد : زين هي متى بتدخل عليهم ؟
موضي : بعد ما يروح الشيخ ذا الحين تدرين روحي ذا الحين سلمي عليهم وافتكي من اوجيهم .
عفراء : بس عبايتي فوق . وأخاف اطلع أجيبها . يدخل الشيخ ؟
موضي قالت بسرعة : زين اخذي عبأتي وروحي بسرعة جيبي عباتس وعقب ردي علي عباتي بسرعة . وفصخت موضي عبأتها عشان تلبسها عفراء .


















حمد أول ما دخل الصالة مع الشيخ والشهود . مبارك ولد خال ناصر وسعود رجل موضي .حار بعمره ما عرف أي باب من ألبيبان اللي في الصالة هو باب المقعد . خاصة أن كل ألبيبان كانت مسكره فجأة انفتح باب وطلعت منه وحده بعبايتها ومتغشيه بالشيله . حمد حس انه ياه الفرج . قل أكيد أنها من أهل البيت لأنها ارتزت في مكانها ولا تحركت . والعلم عند الله انه موضي هي اللي تحط ذا الخرويش في عبأتها راح لها مستن . وقرب منها وهو يقول بصوت واطي عشان ما يسمعونه الرجاجيل اللي وقفوا في وسط الصالة ويوم شافوا المرة عطوها ظهرهم : العروس داخل ؟
عفراء اللي من شافت حمد وهو جايها مستن انصب قلبها ما أقدرت تتكلم بس هزت رأسها أشارة نعم . حمد اللي كان يشوفها وهي تهز رأسها قال : وأنتي وش اللي موقفس عند الرجاجيل إلى ذا الحين تدرين وش قومس ؟ قومس ذا الثور اللي معطيس على الكيف . انقلعي اقلعس ربي قبل والله اتوطاس بذا اللي على راسي واشر على أعقاله
عفراء من أسمعت حكي حمد طارت من قدامه طيران رايحه لدرج أما حمد فطق الباب اللي اطلعت منه . فهده صدق كانت خايفة بس قالت في خاطرها . أنتي ليه خايفه السالفة وما فيها حبر على ورق . يعني ما هب زواج صدقي عشان تقعدين شاله همه كذا يلا . يلا خلس شجاعة وواجهي ذا الموقف السخيف سأل الشيخ فهده و اخذ موافقتها بعد ما وكلت أبو مبارك
أول ما راحوا أنزلت عفراء اللي كانت واقفة على رأس الدرج تنطرهم متى يرحون وراحت تسلم على النسوان .




















فهده قالت بعد ما شافت عفراء وموضي لابسين العبايات : زين دامكم كلكم بتلبسون عبايات أنا بعد بلبس عباتي أقطعتها ريم وقالت : لالالالا أنتي عروس . كفاية انس ما هب متعدله بعد تلبسين عباية سلامة عمرس .
موضي اللي كانت تقرا مسج جاها أرفعت رأسها وقالت : أنا أوافق ريموه يلا بسرعة عشان رجلي ينطرني عند الباب حق الصالة
طلعوا ثلاثهم من المقعد فهده وعفراء راحوا المجلس وموضي راحت للباب حق الصالة .
موضي اللي أول ما بطلت الباب شافت رجلها واقف عند الباب سعود : على البركة ملكة عمس .
موضي ردت على سعود بصوت كله دلع قالت : الله يبارك فيك وش اللي جايبك هنا ؟ ما تدري أن أنا أغار عليك ؟
سعود اللي يموت على موضي ولا يردها في شيء قال : صدق تغارين علي ؟
موضي وهي تبتسم له قالت : ليه أنت تشك في ذا الشيء ؟ بنتفاهم على ذا ألحكي بعدين ذا الحين وش اللي جايبك ؟
رفع سعود كيسة لموضي وعطاها أيها وهو يقول : من عند عمس يقول عطيها أمس وهي تعرف وش تسوي بها
موضي يوم قرت مكتوب على الكيس مجوهرات علي بن علي أرفعت حاجبها وقالت بعد ما طلت فيها وشافت فيها علبة طقم : علي بن علي مره وحده عادي اخذ اللي فيها لي ؟
سعود وهو يضحك قال : من صوبي . أبو العادي. غير عمس . ما ظن عنده عادي ؟ شكله مصفوط من قلب ؟
موضي قالت : هااااااااااااااااا يعني أنا ما يصير ينصفط لي شيء مثل كذا؟
سعود اللي ابتسم بخجل قال : والله لو تبين عيون حاضر بس مثل كذا ما اقدر عمس وين وأنا وين هو الله فاتحه عليه من أوسع أبوابه وأنا رجال على باب الله .




















ادخلوا عفراء وفهده المجلس على النسوان بدت فهده من اليمين وسلمت على نسوان عيال أم مبارك . اللي باركوا لها . وراحت تسلم على أم مبارك وهي تحاول تسوي نفسها عادي خاصة بعد ألحكي اللي قالته لها من يومين أول ما دنقت على رأسها وهي تقول كيف حالس يا يمه ردت عليها أم مبارك بصوت عالي تسمع كل اللي في المجلس : بخير والله أني فرحت لس يا بنتي يوم أن الله يسر لس وأنتي قدس وش كبرس
فهد أرجعت على ورآها على طول كانت تبي الأرض تنشق وتبلعها يوم لفت على نسوان عيالها وشافت وحده فيهم تضحك وهي تشوفها دنقت في الأرض ولا عرفت وش تسوي غير أنها تبحلق في الأرض وهي تسمع أم مبارك تقول : بس ما كنكم تملكتوا بسرعة حتى الناس بيتفكرون فيكم
فجأة وقفت منيرة بين فهده وأم مبارك وهي تقول : ما به احد له عندنا شيء ولا حنا يهمنا شيء ولا نخاف من شيء واللي يسمع حكي الناس يا أم مبارك يتعب . ولفت على فهده وجرتها من يدها إلى أن قعدتها على الكرسي . فهده أقعدت غصب عليها وهي تشاور عمرها على الباب حق المجلس كانت تبي تفتحه وتطق خافت أن ما تقدر تسيطر على نفسها وتبكي قدامهم .أو أنها تقوم تكوفن أم مبارك أنا ممكن استحمل تلميحها أني اكبر منه بس أنها تقول أن حنا أعرسنا عشان .
قعدت عفراء جنبها وهي تقول لها بصوت واطي : ارفعي راسس فوق ولا تخلينهم يتشمتون فيس .
ما فيهم وحده تسوى ثراس . وعليهم حشيمت عمي والله






















ناصر : هلا .
ريم ومريم بصوت واحد قالوا وهم يكلمونه على الاسبيكر : ألف ألف مبروك .
ناصر وهو يبتسم رد عليها بصوت واطي عشانه قاعد مع الرجاجيل في المجلس يتعشون : الله يبارك فيكم
مريم : طلبتك تقول تم
ناصر : تم أمر
مريم إلي ما تدري عن الطقم إلي جابه عمها شيء : نبيك تجي داخل عشان نصورك أنت والعروس ونصور معكم .
ناصر اللي استغرب الفكرة والطلب قال : ما كأنه قوي شوي ذا الطلب
ريم : لا ما هب قوي . حنا ما عندنا اعز منك ولا من خالتي . وأنت مستخسر فينا كم صورة
ناصر اللي أعجبته الفكرة وأدخلت مزاجه خاصة أنها ذا الحين صارت أمرته على سنة الله ورسوله قال : زين الرجال اللي تبوني اجيكم معه يدري بالموعد ؟
مريم : أي رجل
ريم : يعني خالتي يا الغبية الصراحة هي ما تدري أنت تعرف خالتي كيف تستحي يعني إذا علمنها بتعيي
ناصر اللي كان يتخيل شكل فهده لو شافته قدامها وش بتسوي … أكيد بتنقهر . قال بصوت واطي أكثر : زين بس ما أبي حد دري . ولا هب ذا الحين . بعد ما يروحون العرب بدق عليكم أعلمكم






















موضي اللي أدخلت المجلس وهي شاقه الحلق بابتسامة عريضة ما لاحظت التوتر اللي مسيطر على القعدة في المجلس لأنها كانت تشر على عفراء أن الكيس لفهده . بس لاحظت عيون أهل عمها اللي على الكيس خاص نسوان العيال اللي يعرفون يقرون وهي كانت تبرزها بالعاني عشان يقرون اللي عليها وهي تعطيها لامها وتقول : عمي مطرشها لس ابتسمت منيرة . وحطت الكيسة على الطاولة اللي قدام فهده اللي إلى ذا الحين ما هب قادرة ترفع رأسها أفتحت منيرة العلبة و أعجبها الطقم كان طقم مرصع بالألماس والزفير الرمادي و التورمالين ولآلئ . وهو على شكل فراشات صغار متلاصقة ببعض ونازل منهم حبات لولو موضي ما قدرت تمسك نفسها وقالت : واووووووووووووووووووووووووووو.
فهده أرفعت رأسها تشوف موضي بعد الحركة اللي سوتها وانتبهت للعلبة اللي في يد منيرة . ولفت على عفراء اللي كانت تبتسم وقالت لها وهي تهمس : لس موضي تقول عمي شاريه لس
ولفت على موضي اللي قالت لامها اللي كانت تبي تمر بالعقد على أهل ناصر قبل لا تلبسه فهد : اصبري يمه في كرت . وأخذت الكرت وحطته على رأس العلبة من داخل وهي تقول في خاطرها خل يقرونه نسوان عيالها ويعلمونها أم مبارك ما قالت أي شيء يوم شافت الطقم بس كان باين عليها أنها شوي وتنبط من الحرة أما نسون عيالها فقالوا يوم شافوه مبروك أن شاء الله لفت منيرة ورجعت توقف قدام فهده عشان ترويها العقد أرفعت فهده عينها تشوف العقد وهي ما هب مقتنعه أو مصدقه ن ناصر يشتري لها عقد . بس للي صدمها ولفت نظرها قبل العقد هو البطاقة اللي مكتوب عليها بخط اليد .


(( أحلى من العقد لباسه
يزها بها العقد في جيده
الماسة تلبس الماسة
ما زادها الجوهر تزيده

ناصر ))


وقفت فهده عشان تلبسها منيرة العقد …. وبعد ما لبستها باستها وباركت لها …. بس فهده اللي كانت تشوف أم مبارك كيف تشوفها ….ومنيره تلبسها الطقم …. تخربطت مشاعرها ما بين الفرح … الفخر والاعتزاز …. حست كأنها لها حق ضايع وفجأة رجع لها …. بس هذا الشعور ما دام أكثر من دقيقة لان أم مبارك قالت بكل جراءه و استهزاء : مبروك يا فهده …. مبين عليه غالي … بس الرجال ما يجيب الغالي ألا بعد ما يأخذ الغالي ……… كل اللي في المجلس لفوا على أم مبارك حتى نسوان عيالها ……. فهده اللي حست بعد حكي أم مبارك أنها فجأة اختفى كل اللي حوليها وصارت بالحالها واقفة في خط النار… وتتلقى كل الرصاص في صدرها …. ما استحملت أكثر …. اطلعت من المجلس بسرعة وهي تخب لدرج … ما كانت تبي حد يشوفها وهي تبكي …. كانت تردد بصوت مخنوق وهي تركب الدرج …. حسبي الله ونعم الوكيل …. حسبي الله عليس وهو نعم الوكيل … إلى أن أدخلت غرفتها و رمت نفسها على السرير وهي تحضن مخدتها وتبكي بحرقت المظلوم …….



















طلعت عفراء تركض وراء خالته وهي بعد تبكي … وموضي ورآها بس بعد ما عطت أم مبارك نظرة احتقار وغضب … أما منيرة فوقفت في مكانها وهي تهز رأسها وقالت بصوت عالي : استغفر الله العظيم …. ما قصرتي يا أم مبارك …. يجي منس أكثر …. ما هب زين عليس تبلين على البنت اليتيمة … خافي الله … الدنيا فيها حساب وعقاب … وأنتي عدنس بنت …. أقطعتها أم مبارك وهي تقول بصراخ : تهبي ما أوصلت بنتي … بنتي ما هب مثلها …. بنتي اطهر من حمام مكة …. وأنا ما هب ظالمتها …. بنت أختها اللي متحاكيه فيها …. يعني حتى البزر شافت سواد وجها ….ولفت على نسوان عيالها وهي تقول …. يلا … وش تنطرون …. ما لنا قعده عندهم… وطلعوا كلهم ….
























ناصر اللي كانت مسيطرة عليه فكرة انه يقهر فهده ويدخل عشان يصور معها…. ما صدق على الله أول ما طلع خاله وعياله …. لف على حمد وسعود وثلاثة من أخويها وقال : اسمحوا لي شوي وبرجع …. طلع من عندهم وراح سيده للبيت اتصل على تلفون البيت … بس ما به حد شله …. رجع يتصل وهو مستغرب …. ولا حد رد عليه … قال يمكن مجتمعين في مكان ولا يسمعوا التلفون … طق الباب حق الصالة …. بعد ما به احد فتح له …. ناصر ما أعجبه الوضع …. لف من وراء البيت وراح المطبخ لقى سونيا في المطبخ الخارجي وهي تسولف مع الطباخ والدريول …. ناداها تطلع له وقال : وين ماما منيرة ؟ وماما فهده وين كل البنات ؟
سونيا قالت : بابا … كلش في فوق …. عشان ماما فهده في كراي … كراي …. ما في اسكت … مسكين ….
ناصر بخوف قال : ليه كراي
سونيا : ما في شوور … بس هادا هرمه إيجي سوي سوت كبير …. بعدين ماما فهده … افري كراي … كراي …























فهده كانت منسدح على السرير وهي ثانيه رجلها وحاضنه المخدة وتبكي بس بهدوء كل البنات كانوا قاعدين معها في الغرفة . منيرة كانت قاعدة عند رأسها وتقرا عليها قرآن شوي وشوي تدعي لها . أما عفراء فكانت قاعدة على الأرض جنب سرير فهده وهي حاطه يدها على كتف فهده وتبكي على خالتها ومريم قاعدة جنب عفراء على الأرض أما ريم فما كانت تتجرءا أنها تقرب من خالتها عشان كذا وقفت في طرف الغرفة عند الباب وهي بعد تبكي وموضي كانت قاعدة على كرسي التواليت وهي تراقب الموقف بحزن بس اللي كان مزعجها هو صوت المسجات اللي تجي على جوال فهده اللي جنبها على التواليت بكثرة فجأة قالت فهده بصوت مبحوح من البكي : راسي يوجعني ابغي حبوب
قامت عفراء عشان تجيب لها حبوب أمسكت يدها موضي وقالت لها بصوت واطي روحي شنطتي فيها بندول نايت خليها تأخذه وترقد شوي جابت عفراء الحبوب من شنطة موضي وعطوها فهده
شوي ورن جوال فهده كل البنات ومنير لفوا على موضي واشروا لها عشان تسكر الرنة . أخذت موضي جوال فهده بسرعة عشان تسكر الرنة . بس يوم شافت أن اللي متصل كان رقم عمها ناصر . أخذت الجوال واطلعت من الغرفة بسرعة عشان ترد عليه وردت عليه : السلام عليكم .
ناصر قال بخوف : فهده وش فيها
موضي اللي استغربت كيف درا عمها قالت : أنت دريت ؟
ناصر اللي رجع يسيطر على صوته وأعصابه قال : دريت بس أبيس تعلميني التفاصيل انزلي لي تحت أنا واقف في الصالة صوت عليكم إلى أن عجزت . واتصلت على جوالاتكم ولا وحده فيكم ردت على. قلت اتصل على جوالها هي يمكن حد يرد يلا لا تتأخرين علي هذا ني واقف انطرس
موضي قالت : أن شاء الله مع السلامة . بس أول ما سكرت عن عمها جاء مسج جديد على جوال فهد أفتحته موضي عشان هي صدق انزعجت من ذا المسجات . وأول ما قرأته أشهقت بصوت عالي وحطت يدها على ثمها






















موضي أول مره في حياتها تشوف عمها بذا الشكل كان وجهه عبارة عن قطعه حمره حتى عيونه كانت حمره . وأطراف أصابع يده ترتجف . أنا قلت له عن اللي سوته مرت خاله صار فيه كذا اجل لو قلت له عن المسجات وش بيسوي وكأن ناصر سمع هي وش تفكر فيه وقال : ذا كل اللي صار ما في شيء ثاني
قالت له موضي بعد تردد : فيه .
رفع ناصر رأسه وهو يقول بحده : وش هـــــــــــــــــو
أبلعت موضي ريقها وقالت وهي تمد عليه جوال فهده : طول الوقت وحنا فوق نسمع صوت المسجات بس ما انتبهنا وبعد ما رديت عليك جاني مسج قلت افتحه ووو .
ناصر اللي اخذ جوال فهده قال وهو يقرص عينه في موضي : و ويش
موضي أرفعت يدها أشارة ما لي خص وقالت : عند كذا واسمحلي ما في وحده محترمه تقدر تقرا ذا ألحكي أقراه أنت إذا قدرت . بس أرجوك بعد ما تقراه امسح كل المسجات. المسكينة ما هب ناقصة تقرا كل قلة الأدب والمسبة ذي وطلعت وخلت عمها بالحالة مع جوال فهده .




















أول ما دخلت الكيك في الفرن وهي كاشفه نقابه حست أن في حد عند الباب نزلت نقابها وسكرت باب الفرن ولفت عشان تشوف من اللي عند الباب . كان نويصر واقف وهو يشوفها ويبتسم بمكر وفجأة قال بصوت عالي وهو يحرك يده كأنه حيوان بيهجم على فريسته : وخووووووووووووووووووو
فهده كشت وهي تشوفه يسوي كذا ورجعت خطوه على وراء دخل المطبخ وقال وهو يقرب منها : أنتي وش عندس وين ما رحتي بذا النقاب وقام يشر بيده يمين ويسار وهو يقلد صوت فهده ويقول : يعني ادرو أني مزيونه . أقص أيدي أن ما كنتي خفسة
ردت عليه فهده بصوت مهزوز وقالت : وخفسة الخفس بعد . وش تبي
نويصر قام يبوزم وقال : لالالا ما يصير كذا نظلمس بدون دليل لازم أتأكد بنفسي من كل شيء اخف تطلعين ملكة جمال شبة الجزيرة وحنا ما ندري ولفوا ثنينهم على عفراء اللي كانت واقفة على باب المطبخ وهي تقول : ما شفتوا ريم ؟ نويصر لف بسرعة وقال لعفراء : أيه شفتها . اختس في الفرن تهادت مع خالتس و خالتس حطتها في الفرن عشان تحرقها وإذا ما تصدقيني شوفي . وفتح باب الفرن وهو يشر على ريم اللي كانت مفحمه فيه . فهده كانت تهز رأسها وهي تصارخ رايحه للفرن وتقول : لا لا لا لااااااااااااااااااااااااااااااااااااااااااااااااا اااااااااااااااااااااااااااااااااااااااا
وقامت تصارخ وتبكي وهي مبحلقة عيونها في كل اللي واقفين حواليها ويسمون عليها كانت تتلفت وتشوف وجوهم ويوم أوصلت لوجه عفراء أنزلت دموعها بغزاره . أرجعت تتلفت في كل اتجاه إلى أن ألمحت ريم في طرف الغرفة كانت وقفه تبكي وهي لمه نفسها بيد وحاطه اليد الثانية على ثمها بعد ما شافت حالة خالتها . وأول ما شافت ريم خالتها ترفع لها يدها وهي فاتحتها لها أركضت لها عشان تلمها احضنوا بعض وقاموا يبكون بحرقه حرقت ريم وندمها على ألحكي اللي قالته عن خالتها وحرقت فهده و ألحكي اللي أنقال عنها . لمت عفراء على كتف خالتها وهي تبكي بعد وألحقتها مريم اللي لمت كتف ريم أما منير فكانت تبكي في صمت وهي تشوف البنات فجأة أفتحت موضي الباب وشافت الكل يبكي وهم لامين بعض حبة تغير الجو الحزين وقالت : وش ذا فيلم هندي .ليه ما علمتوني ؟ . وكملت وهي تركض رايحه لهم ونطت عليهم : ماموجيييييييييييييييييييييييييييييييييييييييييي.

















فهده اللي كانت قاعدة طول الليل ولا أقدرت تنام حتى مع الحبوب اللي عطوها إياها بس سوت نفسها راقدة عشان يرقدون البنات اللي أصروا أنهم يرقدون كلهم عندها . كل وحده فيهم راحت تجيب وسادة ولحاف ونامت على الأرض وبسبب ضيق غرفة فهده ما صار في مكان حتى للمشي . أما منيرة كانت نايمة جنب فهده على السرير ومها في النص بينهم . بس موضي هي اللي ما أقدرت تقعد لان بنتها ما جابت لها تبديل ابتسمت فهده في الظلام يوم تذكرت كيف نطت عليهم موضي وهي تتحاكا بالهندي وكيف تمت تضرب البنات عشان يبعدون عن فهده على أساس هي البطل الهندي اللي بينقذ أمه . من العصابة أسمعت أذان الفجر . وشافت منيرة قامت ودخلت الحمام عشان تتوضى وتصلي الفجر . انطرت منيرة إلى أن اطلعت من الحمام وراحت تصلي في الصالة لان الغرفة ما فيها مكان أدخلت فهده اللي إلى ذا الحين وهي بقلابيتها ما بدلتها الحمام تتوضى أول ما وقفت قدام الحنفية اكتشفت أنها إلى ذا الحين لابس الطقم ولا افصخته .
وتذكرت أن علبة الطقم في المجلس تحت أخذت جلالها وأنزلت تحت عشان تصلي وتحط العقد في علبته راحت المجلس وهي ما ودها تدخله لأنها كانت تسمع كلام أم مبارك يتردد في رأسها بس أخذت الكيس وطلعت بسرعة وراحت غرفة أم جابر وقعدت تصلي فيها ودعت ربها انه ينصفها ويأخذ حقها .بعد ما صلت أقعدت تدور بنظرها في كل زوايا الغرفة كانت تحس براحه وهدوء في ذا الغرفة عجيبة بعد ما طوت سجادتها قربت الكيس اللي فيه العلبة وافتحتها عشان تحط الطقم فيها . بعد ما افصخت العقد وجات بتحطه في مكانه أرفعت البطاقة اللي كانت في وسط العلبة ورجعت تقراها وهي تفكر في موضوع ما كان عندها مجال الليلة اللي طافت أنها تفكر فيه . ناصر ليه جاب ذا الطقم لي ؟ ليه ؟ هو يدري وأنا ادري أن حنا زواجنا زواج مصلحه يعني ما في داعي لكل ذا الشكليات وبعدين ما في شيء يلزمه بذا كله . صوت التلفون حق البيت اللي كانوا ريم ومريم جايبنه أمس غرفة أم جابر عشان يكلمون عمهم منه . وهو يرن افزع فهده . من ذا اللي بيتصل ذا الوقت يا لله صباح خير ترددت فهده تشيل التلفون ولا ما تشيله . بس بعدين قررت أنها تشيله . وقالت : السلام عليكم
ناصر قال بصوت اللي ما بات طول ليله وهو يفكر ويحاتي وارتاح بعد ما سمع صوت فهده : وعليكم السلام ورحمة الله وبركاته .
فهده اللي ما أعرفت صوت ناصر اللي متغير عليها قالت : من بغيت اخوي
ناصر قال وهو يبتسم بتعب : أمرتي فهده
فهده بعد ما أعرفت انه ناصر ما تدري ليه أنزلت دموعها خاصة بعد ما أسمعته يقول أمرتي فهده ما أقدرت ترد عليه وتمت ساكتة
بس ناصر قال بسرعة وبصوت كله قوة وحزم : فهده لا تسكرين . ارجوس اسمعيني . أنا عرفت كل اللي صار وبيس تعرفين انه ما هب راضين لي شيء من اللي صار ونس ما هب أنتي اللي ينقال عنس ذا ألحكي أكرم عليس ومحشومه يا بنت سعد ولا تفكرين أني ما اقدر اخذ حقس وبنفس الطريقة اللي أنهنتي فيها وفي بيتهم مثل ما اهنوس في بيتس وأنا اقولس ذا الحين أني مستعد أروح إذا الحين لهم بس ابغي اعرف شيء واحد قبل ذا كلها أنتي أنتي لو حصلس انس تروحين لهم وتقولين لهم نفس الكلام اللي قالوه لس وهم ظالمينس وأنتي ما أنتي بظالمتهم به . بتروحين
فهده اللي تمت ساكت و هي تفكر في سؤال ناصر . أسمعت ناصر رجع يسألها : بتروحين
قالت فهده بصوت هادي : طبعاً لا
ناصر قال براحه وسكينه : هذا هو اللي انا أبي اسمعه منس إذا أنتي الغريبة عنهم واللي ضروس وتحاكوا فيس تقولين . طبعاً لا اجل أنا اللي في حسبت ولدهم وش أقول شوفي فهده انتي عندي مثلس مثل عفاري وريموه . ولا أرضى أن أي حد يمسكم بشيء أو يكدر خاطركم وأنا حي . وادري أن ألحكي اللي جاس شيء ما هب هين بس والله ما رقت طول الليل وأنا أفكر كيف لازم اخذ حقس وفي نفس الوقت ما اغث خاطر خالي الوحيد واللي يعدني مثل عياله انتي ما تتخيل هو كف فرح يوم انس قلتي لشيخ انه وكيلس في الملكة . فهده هو رجال فيه خير وطيب بس الله باليه بذا المرة وبنتها ولا يستأهل مني أني أسوي فيه كذا . وفي نفس الوقت انتي لس حق ولا زم تأخذينه مهما كان الثمن . عشان كذا أنا قررت أن انتي اللي تتاخذين القرار وتقولين لي وش اللي تبينه وويش اللي يرضيس واقسم بربي أني ما اخالفس فيه وأنفذه لو على قص رقبتي . فهده اللي تدري أن كلام ناصر عن خاله صحيح وتدري أن هو اللي متوهق في السالفة كلها قالت : أنا أقول لك حقي عند رب العالمين بياخذه في يوم غير ذا اليوم . وكثر الحكي ما فيه فايدة وش بنستفيد من كثر القيل والقال غير أن الكل بيدري بذا ألحكي و بينتشر بين الناس وأنت تعرف مرت خالك ما هي بمظهره نفسها غلطانة قدام الناس غير بطلع علوم وسولف علينا . بس أنا ابغي اطلب منك طلب إذا تسمح
ناصر قال : آمري
فهده : شوف أنا ادري أنهم اهلك وطال الزمان أو قصر بترجعون تتصالحون وترجعون تتزاورون طبعاً أنا ما قد رحت لهم وان شاء الله ما أروح . بس إذا هم جو هنا أنا ما اقدر استقبلهم أنا ما اقصد أني بطرهم . لا حشا . هذا مثل ما هو بيتنا هو بيتك ويحق لك تستقبل اهلك فيه . بس هم ما هب أهلي . تبي بنات أخوك يسلمون عليهم ويستقبلونهم أنت حر معهم بس أنا ما به حد له علي كلمة أو شور
فهده استغربت من سكوت ناصر اللي ما رد عليها وقالت : أنت معي
رد عليها ناصر وقال بصوت هادي وبارد : ذاك أمس .
فهده قالت باستغراب : وش اللي أمس ؟
ناصر قال بكل هدوء : أمس ما كان لحد عليس كلمة أو شور . لكن اليوم كل شيء عندي أنا . امرس و شورس . ما ابغيس تنسين ذا الشيء.مع السلامة وسكر الخط في وجها قبل حتى لا تفكر وش ترد عليه




















فهده تمت مبحلقة في التلفون والسمعة على أذنها وهي تفكر سكر في وجهي ؟ وجهي أنا كيف يسمح لنفسه يسكر في وجهي الحقير النذل ؟ وش فاكر نفسه ؟ أقصاه نويصر البرج . أبدن لاحي ولا حشيمه ؟ ما كأني اكبر منه مغتر بطوله ؟ و أرفعت فهده رأسها تشوف عفراء اللي تهز كتفها وهي تقول لها : خالتي كيف حالس ذا الحين
ردت عليها فهده وهي ما هب مركزه : الحمد لله بخير انتي كيف حالس
عفراء ردت عليها وهي مستغربه وقالت : الحمد لله . وكملت وهي تلف على التلفون اللي قدام فهده
واللي سمعته إلى ذا الحين على أذنها : خالتي من تكلمي
فهده اللي كانت تفكر نويصر وش يقصد بحكيه اللي قاله ردت بدون ما تنتبه قالت : عمس .
أقعدت عفراء قدام فهده وهي تبتسم وتقول : يا سلام على الرومانسية . من فجر الله اتصالات زين ارجوس وش هو قايل لس مخليس كذا ما انتي طبيعية فديتس قولي لي أنا أحب الرومانسية واجد .
فهده اللي انتبهت لنفسها ولحكي عفراء قالت لها بسرعة وهي ترجع السماعة مكانها : سود الله وجهس . وش قال لي يعني ؟ وبعدين من اللي قالس انس ما هب طبيعية ؟
عفراء اللي قالت وهي تبتسم : خالتي أنتي ما تشوفين خدودس كيف مورده ؟ وبعدين ليه معصبه إذا قلت انه قال لس شيء هذا رجلس ما هب غريب ؟
ردت عليها فهده وهي تجر الواير حق التلفون وتقول : رجلي هاااااااااااااا والله لوما تقومين من قدامي أني اكوفنس بذا الواير ذا الحين . وتمت ماسكه الواير وهي تشوف عفراء اللي قامت تركض وطلعت من الغرفة وهي تضحك وتقول : رجلس رجلس . رجلس






















فهده أركبت فوق وتمنت أنها ما أركبت لقت عفراء ناشره الخبر عند كل اللي في الغرفة واللي ما ارجعوا يرقدون بعد ما صلوا حتى منيرة اللي كانت ساكتة ولا تعلق على شيء بس كانت تحاول تكمت ابتسامتها على تعليقات البنات مع فهده . فهده حاولت أنها تفهمهم سبب اتصاله . بس ما به حد صدقها لان عفراء نقلت لهم الموقف بروما نسيتها الجياشة . ولا اسكتوا عن فهده ألا يوم قالت أنها بتطرد اللي بتتحاكا من الغرفة . وقبل لا تكمل حكيها لفت بسرعة تشوف منيرة اللي منسدحه على سرير جنبها وهي ميتة من الضحك وقالت لها : أم حمد حتى أنتي ؟
ردت عليها منير : بنتي اسمحيلي والله أن مصدقتس بس أنتي ليه يوم تعصبين كذا على البنات . ذولي مرجوجات خلهم يتحاكون . بس أنتي لا تسوين كذا بنفسس . وجرتها من يدها عشان تنسدح وهي تقول بصوت واطي : الحمد لله رب العلمين شفتي كيف تبات ضو وتصبح رماد ارقدي يا بنتي ولا يهمس شيء . دام الله عالم بكل شيء هو اللي بيفرجها و بيأخذ حقس لأنه يمهل ولا يهمل وهي لو تقول وش تقول ما يضركم في شيء ذا الحين . خلاص قده رجلس وأنتي أمرته وأكثر ما بيقولون الناس أنها محتره انه ما اخذ بنتها . ارقدي الله يوفقس . دنيا وآخره . ارقدي عاد باكر وراس موضي اللي إلى درت بسالفة التلفون بترجس عدل
ابتسمت لها فهده وقالت : أن شاء الله تصبحين على خير . ولفت عشان تضبط ساعة الجوال مثل ما هي متعودة كل يوم بس ما لقته في مكانه وقالت : ما شفتوا جوالي ؟