الموضوع: غير مسجل الحب الاعمى وش يسوي في الناس(قصه)

الاعلى, الحب, الناس؟؟؟؟؟؟قصه, حسني

يومني بزر بزرت عيون العدوكنت مدلع ومرفه وغادي من الوناسه دبيب وش حليلي لو تجيب دبوس وتنغزني انفضخت من العافيه وكنت الاول من بين اقراني(حلوه اقراني مسوي افتح يا سمسم) اللي صار عنده نبيطه من غير ما يلعب في زبيريه ابوه
وكان عندي سيكل اغسله واعتني فيه مثل اخوي ( يا عيني يا العواطف ) وكان لي صديق مصري اسمه تامر ومرت الايام لا يعكر صفو حياتي غير طرفي حارتنا

ففي الطرف الشرقي تقع كتيبه عيال البدو والطرف الاخر كتيبه اخوان سعيده فا اذا بغيت اروح للبقاله حقت (هويدي ) من عند الكتيبه الاولى اروح داعس بالسيكل عشان اطلع با اقل الاصابات يعني محطه شوته تفله من فم واحد من جابته امه ما تمضض وكل هذا عشان ببس ابو نص وبسكوت مينو

والطرف الاخر هو الافضل عشان اخوان سعيده حبيبن يمديك ترقص به شوي تجيب شي اخضر ولا شوي ريحان وتسلك امورك

وبجانب كتيبه اخوان سعيده فيه بسطه ام سعود الداشر مهجد ومروض حارتنا وبعض الحواري قبل لا يجور عليه الزمن ويقضي عليه حمد الاشهب معه سلسه فيها شوي مفاتيح والطرف الاخر منها لي باعشن وكل ما شافني جاي اشتري من بسطه امه يقولي عمرك شفت قطو يرقص ؟
اقوله لا طيب عمرك شفت الحمامه اللي تتكلم اقوله لا يقولي تعال معي في السطح اوريك الغراب الاحول كنت اقول لا بس مع كثر المغريات بغيت اوافق ويضيع الشرف
قلت له يالله ما دريت الا بواحد يصفقني على علباي مجنون انت والله ان تنزل من عنده تسئل وش سوى بطل فلم العار بالنهايه

طلع اخوه زبد اكتشفت انه احول بالصدفه ولا كل الصور اللي ملزقها في بيتهم على جنب ومع ابتسامه خلابه وقدامه ورد صناعي والخلفيه ستاره خضرا (مسوي قاسم في الغربه) مع الايام كبرت وصرت اسوق سيكل 16 وسويت هدنه مع الكتيبه الاولى بعد احداث دامت سنينا (تكفى يا البسوس ) وعند توقيع الاتفاقيه تم تبادل الهدايا وقدم لي الاخ غازي عربون محبه عباره عن ضب بزر وانا قدمت له هديتي صارور ليل صايده من حوض الزريعه (مشوها ياقلك سوري) اللي عند بيتنا وبها المناسبه تم اقامه بطوله المصاقيل الاولى على مستوىمنفوحه وما جاورها اللي فزت فيها بكل جداره لاني استعنت بخيرات الاخ سعود بس عن طريق تلفون ابو خيط وكاس (ياقدمك)

بعدها بفتره عندما عمت الخيرات الحاره واستقرت الامور بعد ما وقعنا سلام الضبان (مسوي ياسر عرفات) حسيت بشي ناقصني ولا بعد لقيته او وهو الحب ( مهوب الفصفص) اللي عادل امام مزع خشت يسرا بسعه الصدروالوناسه شائت الاقدار اني احب

المهم مريت مره من عند بيت الجيران مادريت الا باثله تهبدني على راسي (يعنني عمر بليالي الصالحيه) وانا اللي اقوم واقول يا عيب الشوم يا زلمه واتلفت يمين يسار مهنا احد وارفع راسي طلعت بنت الجيران تموت بدباديبي (مهوب عاقل علا ولي الدين)انا اوول مره اشوف حرمه غير امي احسبهم كلهم يشبهونها ولا لابسه لي ثوب كله كشكش ومزخرف بلون زهري (موضه منول ) انا من الوناسه رحت شريت دسته شروخ ابو ديك وانثرها بالحاره ( مع رابع شرخ حسيت بوجع براسي ما دريت عن مصدره الا ثاني يوم كانت دحجه بكل قوه تحمل توقيع ابوي الله يطول بعمره يوم فتحت قالي مستعجل على العيد يا الاسطوانه(عيارتي ) ترى ان ما هجدت والله لا اجيب لي واشبكك بالفرن
انا من الوناسه ومشاعر العواطف وامل وجواهر ما علي من ابوي وخفه الدم اللي ما ادري متى طلعت ( الله يعين امي عليه)

جلست افكر بحبيبتي عاشقه المثعاب ( حشى ام عشيش مهيب حبيبه) المشكله اني افكر شلون اقدر اقابلها وابث لها عن ما يحتويه مكنوني (ملف علاقي مهوب قلب ) وصرت امر كل يوم من امام منزلهم العامر واحول اني اقولها شي ولا اقدر مره قلت للعيال الحاره تمرين المصاقيل تحت المثعاب بالضبط سوينا التمرين مع الشباب وانا اهوجس احتري شي رساله شريط كاترج ( مهوب عاقل الشغاله) ما وصلني شي حتى المدرب حقنا صقر الدجاجه جاني وقالي وش فيك يا جنط ( بدلوها الحين بيا كابتن ) قلت مدري وش فيني ودي اجيب ببس اخضه وافكه بخشتك

فيني شي لعب فيني مسكني صقر الدجاجه وقالي يا جنط صارحني وقلي وش فيك مستواك منحدر ولا تنسى ورانا نهائي بطوله المصاقيل منفوحه مع دوار ام سليم ونبغى نقدم مستوى مشرف قدام اللي بيسلم كاس البطوله الاخ فهيد عاشق الباتكس ويا روحي يا القاز قلت مقدر ابطله (دخان مهوب حب) يا انا يا هي لو اعرف وش اسمها بس مستعد العب لو ما فطرت ( منول كانت تقام االمباريات تسع ونص الصبح ( بنبني جدار مهيب بطوله. ولازم تصير لابس الشماله وفنيله علاق ولا زم يكون سرك طالع عشان ما يكون موزي شي منا ولا منا ) قررت في ليله النهائي اني اخربها واطمر على بيتهم واشوف من اسرت قلبي وفؤادي وخلتني اردد اغنيه يا مركب الهند يا ابو دقلين ( حاب لي نوخذه مهوب بنت)

رتبت كل شي وكلمت صديق الطفوله تامر وصقر الدجاجه انا قبل اقرر عرفت وين تنام من مصادري ووين تجلس هي فراشها في بطن الحوي وابوها وامها متشطرين خذت العده والحبال وربطت وسطي ( مهوب عاقل دينا ) وربطت الحبل الثاني ونزلت مع بطن الحوي الهوينا الهوينا ( لا تعليق ) الين وصلت عند من اسرت فؤادي ولا بغى يفضحني ويصحي امها وابوها الا يوم بغت تطيح قطره عرق على ارض بطن الحوي (توم كروز منفوحه)) بس اشوى انها جت بيدي ولا وش دور الدسوس

واسحب كنبل الكاروهات شوي شوي هنا حدثت المفاجاءه وتلخبطت اوراقي حتى من زود الحرص جايب معي كامره فوريه يعني بصورها وبقولها بتطلعين معي ولا اعلم ( خخخخخخخخخخخخخ ) اقولكم حتى الصوره اللي كنت راسمها لها شققتها من مخي أي احلام تخصها سحبت عليها السيفون بسم الله وش انا شايف جن ولا انس ما ادري منين يبدى وجهها ووين ينتهي خشمها هو بزر متعلق ولا فار يتنفس هاذي وهي نايمه اجل اذا قامت وش تصير قريت المعوذات على نفسي وكنت جايب معي عزايم ربصتها في المويه وشربتها

طلعت الدنيا لا لها طعم ولا ريحه عقب ذاك الموقف قلت ليتني بسطح سعود ( ايه هين عند سعود )مرضت وطحت بالدخان ابو بس

امي لاحظت انحدار في صحتي قالت ولدي فلذي كبدي ما يسدنا خفه دم ابوك تمرض قلت يمه من هي بنت الجيران اللي لابسه ثوب كشكش ومزخرف بالزهري قالت يا خزياه يا عصاره جهدي (دراسه منيب ولد) قلت اخلصي قالت هاذي ميري خدامتهم الجديده
( يا حليلي فاك مع خدامه خخخخخخخخخخخخ)جا يبينها عشان بنتهم شاهه ام ضرس توسع صدرها وتشيل اللي يطيح تحتها (عنز مهيب بنت ) عقبها نقضت سلام الضبان ورجعت لسيكلي كما كنت ديدا سعيدا مستانسا



اللى ابى اوصله لكم يا اخوانى الاعضاء هو

مو كل شي تشوفه تحبه صـــــح


تحياتي للجميع

---

FyouD hgpf hghuln ,a ds,d td hgkhs(rwi)