احباب, غرام

لعن أبو قصة غرام كل ابوها كلمتين
ابتدينا عند احبك وانتهينا عند باي

تونا مامشينا في الهوى لو خطوتين
وانتهى الموضوع كله حتى مااعرف وش خطاي

وانتهت قصة حياتي وانتي بكل سهوله تحكمين
وين احبك ؟ وين اريدك ؟ وين ساكن في حشاي ؟

يمكن انك ماوفيتي يوم جيتي تعشقين !!
ويمكن انك تحسبيني بتبعك من دون راي

ويمكن انك ماعشقتي بس كنتي تلعبين
ويمكن انك ماوصلتي في هواك لمستواي

ويمكن انك في الحقيقه ماعرفتي وش تبين
ويمكن اني خنت نفسي يوم اعطيتك وفاي

علميني في الهوى ياجاهله وش تعرفين
تعرفين انك غديتي شي يجري في دماي

علميني في العطا والتضحيه وش تفهمين
لعنبو حبك بعت اقرب اقرباي

كنت احطك في عيوني تسرحين وتمرحين
كنت اشيل هموم قلبك وارمي همومي وراي

كنت اطير من السعاده يوم اشوفك تضحكين
كنت ذايب في هواكي مثل سكر وسط ماي

كنت نايم في العسل وارسم من الفرحه سنين
كنت اظنك قلب عاشق ماسكن وسطه سواي

ماوعيت الا وانتي في خفوقي تطعنين
ماوعيت الا وسيفك بالحشا رايح وجاي

ورده أي والله ورده بس عرفتي تجرحين
كل شي فيني جريح الا فخامة كبرياي

ماتأثرت بغيابك ويش يعني دمعتين
بكره انسى صدقيني وارجع بكامل قواي

ادري ان حنا اقتربنا بس ابفهم حاجتين
علميني وش كسبتي ؟ وعلميني وش خطاي ؟

yvhl hpfhf 2