الموضوع: روايه جروحي تنزف احزاني كامله

متضايق من الكلام اللي سمعه البارح من ابوه حس الدنيا ماتسوى انه يسمع دعوه عليه من ابوه بسبب الطريق اللي ماشي فيه.حس بشوق لاهله واللي كان ابوه حارمه من دخول البيت بس بعد كل فتره يتصل فيه مره يكلمه بطيب. ومره زي مكالمته البارح يكون معصب ويعطيه كم دعوه جسمه يقشعر من بشاعتها.انتبه للي يدور حوله كان سعود ووليد يخططون تخطيطات جهنميه
وليد:"عمر فكر معنا شوي وخل عنك الزعل ماتسوى عليك"
عمر:"ماتسوى علي .انت لو سمعت كلامه البارح كان ما لمتني"
سعود:"تراه مايدعي من قلبه ويومين وبيرضى."
عمر:"ادري انه مو من قلبه بس اخاف انها تستجاب دعوته علي."
وليد:"طيب هو ليش زعلان اللحين."
عمر:"من يوم طلعت من عندهم ومشيت في هالدرب وهو زعلان مااقول الا الله يتوب علي مماانا فيه"
وليد:"ياشيخ خلك مثلي انام في الشقه واروح اطل على امي كل ثلاثه ايام ويافرحتها بي."
سعود:"وانا اهلي اروح لهم في الاسبوع مره وعادي عندهم"
عمر:"انا وضعي غيرانا اكبر العيال وانتوا ماشاء الله اخوانك كبار وسادين مكانكم.:
وليد:"ياشيخ وسع صدرك.الدنيا ماتسوى"
عمر بمراره:"في هذي صدقت الدنيا ماتسوى."
وليد:"الله ياسعود ماتتصور اشكثر فرحتي لمادريت ان ريم بنت عم فهد."
سعود:"كنت عارف انه خبر بيفرحك."
وليد:"اخيرا جاتني الفرصه انتقم من هالمغرور."
عمر:"أي مغرور واللي يرحم والديكالغرور ماهو من صفات فهد."
وليد:"اشوفك تدافع عنه.
عمر:"ماادافع عنه بس اقول الصدق."
وليد:"المهم ترى لازم خويتك تساعدنا في اقناعها ."
سعود وهو يااشر على خشمه:"على هالخشم واعتبر الموافقه في جيبك."
ناظرهم عمر وهو يهز راسه كان محتقرهمويبغض كل اللي يسونه وكارهه واحتقاره لنفسه يزيد يوم بعد يوم.

^^^^^^^^^^

كانت في انتظار رد بنت عمها بعد ماحكت لها كل شي من اول يوم زواجها لمسجات عبيرلمشاكلها مع ريم لعلاقتها مع خالد اللي في مد وجزرقالت لها سحر بتتصل في اهلها وتشوف اش كان ابوها يبي من خالد وترد عليها.ماصدقت انها سمعت صوت التلفون وردت بكل لهفه
كانت منصعقه من اللي تسمعه وتنهدت من اعماق قلبها وتحسبت في خاطرها على عمها .
بسمه:"حراااام اللي سواه ابوك فيني."
سحر :"ادري انه حرام الله يسامحه"
بسمه:"تخيلي شكلي قدامه .بعذره كان معصب"
ماردت سحر انقهرت من ابوها واللي طمعه في الدنيا قتل فيه كل شي.
بسمه:"ماادري اش قواة ابوك لمايطلبه يشتري لي ارض.ياويلي والله مالي وجه احط عيني في عينه."
سحرواللي كانت عاذره بسمه في اللي تقوله:" اكيد اللحين يحس كانك تبين تستغلينه"
بسمه:"اخر ماافكر فيهياسحر شوري علي وش اسوي"
سحر:"بسمه ابسالك سؤااال جوابك عليه بيحدد لي نوع النصيحه اللي تبينها"
بسمه:"تفضلي."
سحر:"انتي حريصه على حياتك مع خالد ويهمك تنجح هالحياه."
بسمه:"اكيد حريصه."
سحر:"مااحس انها تهمك.وشوله اجل هاللامباله والسلبيه.ليش يابسمه صايره ردة فعل لافعال غيرك سواء خالد او عبير او ابوي.هم يحركونك على كيفهم مثلا عبير وش يدريك يمكن اللي سوته بس حتى تخرب حياتك مع خالد وانتي ماشاء الله عليك ماشيه معها زي ماتبغى زوجك يقولك نبدى مع بعض بدايه جديده وانتي سوري خلني افكر .وش تفكرين فيه ياحظي.المفروض تكونين اسعد وحده بهالشي."
بسمه:"لا تلوميني لاني خايفه."
سحر بضيق:"وليش تخافين بسمه لو صار طلاق الضحيه الوحيد انتي مو خالد يوم تتغلين عليه.اللحين انتي زوجته مو عبير لاتنسين هالشي."
بسمه:"ادري ان الخسران الوحيد بيكون انا بس خساره عن خساره تفرق."
سحر:"صادقه خساره عن خساره تفرق.لما اخسر وانا حاولت بكل مااستطيع اني انجح مابلوم نفسي لاني قصرت.بسمه انتي تبين ترجعين لحياتك عند اهلي."
بسمه:"بدون زعل لا."
سحر:"مستحيل ازعل وانا ادرى بالحال.بس من اليوم ورايح غيري اسلوبك مع الكل وكفايه ضعف ومو من كل مشكله تقلبين الدنيا."
بسمه:"اشلون يعني اغير اسلوبي وانا احس انه لازال يكلم عبير."
سحر:"ياحمااااااره حتى لو يكلمها تقدرين مع الايام تنسينه كل شي."
بسمه:"حماره ماعليه. بس تتوقعين الامر سهل كذا."
سحر بعصبيه:"والله العظيم لو انا قريبه منك كان ذبحتك."
بسمه وهي تبتسم بمراره:"الحمد لله انك بعيده."
وقعدت تسمع كلام بنت عمها حست انها صادقه في كل اللي تقوله ليش تنول عبير اللي في بالها بالساهل وتخسر خالد وهو يااكد دايم لها انه مارح يتخلى عنها
بسمه:"طيب والمشكله الجديده اللي حطني عمي فيها."
سحر:"صارحيه قولي مااكنت ادري."
بسمه:"اكيد مارح يصدقني."
سحر وهي تفكر:"ماادري يابسمه حليها بمعرفتك"
بسمه:"ماادري اش كان رد خالد على عمي لما طلب منه ارض."
سحر:"ابوي معصب منه لان خالد قاله انا اعطي بكيفي ولا ااحب احد يستغلني."
كانت متوقعه هالرد من خالد حست بصعوبة موقفها اللحين ماتدري اشلون تحلها.
بسمه:"الله لا يخليني منك ياسحر تصدقين كنت كاتمه في قلبي ولما ماقدرت اصبر مالقيت غيرك."
سحر:"ولو ماقلتي لي كان زعلت انتي اكثر من اخت يابسمه المهم ان شاء الله يثمر فيك هالكلام."
دخل خالد لما كانت تكلم وقعد واخذ الريموت يقلب في القنوات حتى ماناظرها.
بسمه:"اوكيه سحر اكلمك وقت ثاني."
سحر:"شكل خالد عندك اللحين."
بسمه:"ايه."
سحر:"ياللا باي بس لا تنسين اللي وصيتك."
بسمه:"ان شاء الله .مع السلامه"

^^^^^^^^^^^^^^^^^^

يجهزون اغراضهم لانهم اليوم مسافرين للطايف عندهم زواج ولد اخت ام عبد العزيز
كان ينتظر يخلصون في الصاله وهو يفكر في خالد ومعصب منه
قعدت ام عبد العزيز حتى يخلصون بناتها.
ابو عبد العزيز:"ها.خلصتوا."
ام عبد العزيز:"ايه.بس البنات بقى عليهم شوي.اشفيك معصب."
ابو عبد العزيز:"افكر في خالد.قهرني"
ام عبد العزيز:"قلت لك لا تزوجه ماطعتني."
ابو عبد العزيز:"ظنيت انه بيجينا خير من وراه بس ما شفنا شي."
ام عبد العزيز:"انسى تشوف خير من وراه بس عسى بنت اخوك ماتملى راسه عليك."
ابو عبد العزيز:"تتوقعين كذا."
ام عبد العزيز:"ايه اتوقع."
نزلوا البنات وهم شايلين الشنط.وسرح ابو عبد العزيز في بسمه وهو حاقد عليها كانت دايم تحت شوره واللحين طلعت بس ماعليه يابسمه وين بتروحين مني.
هند:"يبه."
ابو عبد العزيزبعصبيه:"خير ليش تصارخين."
هند:"اقول ياللا مشينا ترى خلصنا كلنا."
هز راسه وقام يلحقهم اللي كانوا في السياره ينتظرونه.

^^^^^^^^^^^

بعد ماسكرت ماكلمها ودخل الغرفه طلت عليه بدون يحس شافته يحط ملابسه في شنطه صغيره استغربت منه ورجعت بدون يحس فيها.
رجع الصاله وكان يكلم احد في الجوال مبين انه واحد من عيال عمه بعد ماسكر التفت عليها.
خالد:"اليوم بسافر الشرقيه.:
بسمه:"وانا."
خالد:"كيفك اذا بتقعدين عند اهلي او تبين اوصلك لعمك ماعندي مانع"
بسمه:"بس عمي مسافرين اليوم."
خالد:"خلاص كلها يومين وراجع ان شاء الله"
بسمه:"طيب خلني اروح معك."
خالد:"بروح لشغل مو لتمشيه وبعدين محتاجين يابسمه نبعد عن بعض شوي."
هزت راسها وهي حاسه انه صادق محتاجين هالوقت.
بسمه:"طيب بقول شي لا تعصب."
خالد:"اذا عن البارح فلا تفتحين الموضوع احسن."
بسمه:"لا مو عن البارح.اشرايك اروح الخرج عند خالتي.بكلم تركي اذا كان في الرياض طلعت معه."
خالد:"كيفك"
بعد مانزل كلمت تركي ومن حسن حظها كان في الرياض ووعدها يمرها لما يخلص اشغاله راحت تجهز اغراضهها وهي محتاره اشلون تكلم خالد

^^^^^^^^^

يقلب الجوال في يده كان متفق معها مايكلمها ابد هي تكلمه اذا ظروفها تسمح ارسل لها مسج وهذا الاتفاق بينهم اذا بغى يكلمهامن وقت مادرى انها بنت عم فهد وهو مزود جرعة الحب اللي كان بدى يخففها من اول حتى تلين وتوافق تقابله بس اللحين حس انه يبي لها وقت وهو ما عند استعداد يخسر ها اللحين
ابتسم لما شاف رقمها.
وليد:"هلا وغلا بالريم"
ريم:"هلا وليد."
وليد:"اشفيك تقولينها ببرود."
ريم:"لا بس كنت قاعده مع اهلي لما وصل المسج .وليد مثل هالاوقات لا تظن اني بقدر اكلمك على راحتي."
وليد:"وحشتيني ياعمري وحسيت اني مشتاق اسمع صوتك."
ريم:"حتى انا والله بس في هالوقت صعب يكونون متجمعين ."
وليد:"اوكيه حبيبتي ماابي احرجك اكثر من كذا"
ريم:"لا يكون زعلت."
وليد:"وانا اقدر ازعل من روحي"
بعد ماسكرت رمت نفسها على السرير وهي طايره في احلامها الورديه وتفكر متى يجي اليوم اللي يجمعها مع وليد.

^^^^^^^^^^^^

كانت تقريبا نازله لان تركي وصل متردده تكلم خالد اللحين ولا بعدين.كان خالد يناظرها وحاس انها بتقول شي.
خالد:"بسمه ان طولتي كذا بتأخرين ولد خالتك."
بسمه:"ايه نازله بس ودي اقولك شي قبل ماانزل."
مارد عليها ينتظرها تكمل وحست ان مهمتها صعبه:"انت مره طلبت انا ننسى كل اللي فات وانا قلت افكر اللحين اقولك ننسى كل اللي فات ياخالد انت غلطت وانا غلطت خلااااص لازم نحاول نتجاوز هالشي."
خالد وهو يبتسم بسخريه:"كلمتي عمك."
بسمه:"ماكلمته بس دريت بالموضوع ياليت ياخالد تنسى مثل ماانا نسيت."
خالد:"يعنى انتي طلبتي منه يكلمني."
بسمه واللي من غبائها حست انها مو لازم تسب عمها مهما كان:"انس الماضي خلاص ليش ننبش فيه"
خالد بضيق:"انتي تظنين كل شي على كيفك."
بسمه:"خالد انت سويت اشياء ابشع من كذا وقلت انسي."
خالد:"اوكيه مشينا لاتتاخرين على ولد خالتك واذا رجعت من السفر يصير خير."
ومد يده عطاها كيس:"هذا جوال شريته لك بس اشحنيه اول ماتوصلين"
نزلوا وهي ماتدري اقتنع ولا لازال زعلان .لقت ولد خالتها في السياره تحت ينتظرها بعد ماسلموا عليه ركبت كان هووخالد يسولفون برى وبعد ماركب.
ناظر خالد بسمه:"توصلون بسلامه ولا تنسين اشحني الجوال ."
بسمه:"ان شاء الله"
خالد:"ياللا في امان الله وعن السرعه."
تركي:"ايه ركبت حرمتك معي وبتبدى التوجيهااات"
خالد:"اكييييد."
بعد مامشوا ماتدري ليه ماقدرت تشيل نظرها من خالد اللي كان واقف في مكانه حست انه مايهون عليها فراقه حتى لو يومين.


^^^^^^^^^^^^^^

الساعه تسع في الليل كانوا مجتمعين في بيت ابو فيصل. كانوا الحريم الكبار عند ام عبد الرحمن في غرفتها والعنود وبدريه وبناتها وريم وساره في الصاله يسولفون
ريم:"انا بروح اسولف مع جدتي احد يروح معي."
العنود:"انا بروح."
وهم طالعين من الصاله كان فهد نازل من غرفته بعد ماقال لامه اللي اكدت له انهم داخل
شاف ريم ماشيه مع العنود على طول نزل راسه وهي رجعت لورى.
العنودبعد ماتاكدت من ريم انها دخلت:"فهد انزل مافيه احد اللحين."
اول مانزل:"الله يهديها امي قالت مافيه احد."
العنود:"صادقه بس كنا رايحين لجدتي."
فهد وهو متردد:"من اللي كانت معك."
العنود:"وليش تسأل"
فهد:"ريم صح."
ماردت عليه وهزت راسها.
فهد:"ياويل قلبي قمر يالعنود والله قمر"
العنود:"ههههه قصر حسك لا احد يسمعك ."
فهد:" خلي اللي يسمع يسمع بنت عمي واحبها واموت على التراب اللي تمشي عليه."
كانت ريم واقفه وسمعت كل شي رجعت على طول حتى ماتنتبه لها العنود وتدري انها سمعت كل شيماهان عليها فهد صح ماتحبه بس ماتدري كيف ترفضه لو خطبها وهي داريه انه يحبها

^^^^^^^^^

في نفس الوقت كانت بسمه مع خالتها وعيالها حست انها مبسوطه معهم ورجعوها لايامها الحلوه.على انها غابت عنهم من وفاة اهلها بس حست انهم ماتغيروا .
كان الجوال يشحن قريب منها وتناظر اذا خالد اتصل عليها يتطمن عليها ومالقت رقمه
خافت لايكون حصله شي لا قدر الله اخذت الجوال وراحت غرفة الجوهره حتى تاخذ راحتها بالكلام.دقت رقمه وطول اللين رد.
خالد:"الو"
بسمه:"هلا خالد."
خالد:"اهلين."
بسمه:"وصلت الخبر"
خالد:"ايه وصلت.اقول انا مشغول اللحين اكلمك بعدين."
بعد ماسكرت انقهرت منه ومن بروده معها اللحين حتى كلمة وصلتي ماسألها ولا الحمد لله على السلامه.
قفلت الجوال ورمته في الغرفه وراحت الصاله
كانوا ماشاء الله عليهم بس ظحك وسوالف كانت منقهره من خالد حتى مااستمتعت بقعدتها.تذكرت بعدين قرارها اللحين من مكالمه زعلترجعت وفتحت الجوال واخذته معها الصاله
طلال:"اكيد تحترين مكالمه من خالد."
بسمه:"ياشين اللقافه."
طلال:"انتي أي احد يطري رجلك تحمرين كذا"
فواز:"ماعليك منه يابسمه تعرفينه مستخف اخوي شوي."
بسمه:"مستخف شوي الا مستخف وبقوه بعد"
تركي:"ياللا شباب عيال عمي يحترونا."
قاموا بيطلعون مسك طلال الجوهره وحطها على كتفه وراح يدور بها في البيت وهي تصارخ"
ام تركي:"طلااااال حسبي الله عليك من ولد نزل البنيه."
بعد ماحس انه خلى الدنيا تلف بعيونها حطها عند امه وراح يركض حتى ماتلحقه امه لما وصل عند الباب:"اشرايك يابسمه اشيلك وادوربك في البيت."
بسمه:"والله لو تحاول لموتك."
طلال:عاد انا مجنون بحاول ياشيخه روحيشوفي وزنك كم صدقيني بتتكسر ضلوعي وانا ماقدرت."
ماعطاها فرصه ترد وراح يلحق اخوانه وبسمه وخالتها يضحكون
جلسوا يسولفون بسمه وخالتها .لمست ام تركي شعر بسمه.
ام تركي:"غريبه يابسمه ماتفكرين تقصين شعرك."
بسمه:"خالد مايحب الشعر القصير بس خاطري اقصه على طوله."
ام تركي:"اشرايك نروح بكره اشوف خطيبة تركي دايم قصات شعرها تهبل بسالها وين تقص"
بسمه:"خلاص ماعندي مانعبالمره الواحد يجدد شوي بس اهم شي ماقص كثير من شعري."


^^^^^^^^^^^^^^^

بعد ماراحوا اهل عمه دخل ولقى جدته صاحيه قعد معها يسولف شوي حتى زهقت منه
ام عبد الرحمن:"فهد رح مادام النفس راضيه عليك."
فهد:"افاااا تطرديني من غرفتك."
ام عبد الرحمن:"وبطردك من البيت كله اما طلعت اللحين."
ضحكت العنود على فهد وعلى رد جدتها.
ام عبد الرحمن:"وانتي وين رجلك عنك للحين."
فهد:"هههههههههه صادقه جدتي وينه رجلك للحين"
ام عبد الرحمن:"امسك يد اختك ومع السلامه انا مانيب مثلكم الواحد لو سهر الليل كله ماهمه"
قامت العنود واخوها بيطلعون.
ام عبد الرحمن:"فهد.ولد عمك المهبول وشوله ماخذ مرته معه يوم سافر."
فهد:"ماادري عنه المتخلف.صدق مايستحي ماله شهر الا وسافر وخلاها."
ام عبد الرحمن:"خله يجي بس ويصير خير."
فهد واللي حسها فرصه حتى ينتقم من خالد :"لازم ياجدتي الظاهر خالد يحسب بنات الناس لعبه عنده."
ام عبد الرحمن:"والظاهر انت ماتنعطى وجه ياللا اقلب وجهك اشوف."
طلع وشاف العنود ميته ضحك عليه
راح لعندها وماهمه ضحكها عليه لان سعادته اليوم غير.
فهد:"الله يالعنود سعادتي اليوم غير شكل.واخير شفت ريم "
العنود:"عيب عليك تراها بنت عمك."
فهد:"ادري انها بنت عمي وان شاء الله تصير زوجتي."
ماردت العنود وهي تفكر في ريم كانت خايفه لاترفض فهد واللي مبين عليه اشكثر يحبها.


^^^^^^^^^^^^^^

كانت منسدحه في غرفة الجوهره لما سمحت الجوال في خاطرها اخير حنيت ياخالد واتصلت.
بسمه:"الو"
خالد:"سلام "
بسمه:"وعليكم السلام."
خالد:"اشفيه صوتك لا يكون نايمه."
بسمه:"لا ماكنت نايمه."
خالد:"سوررري يابسمه لمااتصلتي كنت معزوم عند واحد من الشباب وما قدرت اخذ راحتي في الكلام."
بسمه:"ايه بس قهرتني حتى مااتصلت تشوف وصلت."
خالد وهو يقاطعها:"دقيت على تركي وبلغني بوصولكم ما قال لك."
بسمه:"لا.المهم كيف الشرقيه."
خالد:"تسلم عليك وتقول كان جبت بسمه معك."
بسمه:"الله يسلمك حتى الخرج يسلم عليك.متى بتجي"
خالد:"امداك تشتاقين."
بسمه:"اسأل عادي"
خالد:"ماكان بيضرك لو قلتي ايه مشتاقهبجي ان شاء الله يوم الجمعه على خير"
بسمه:"تجي بالسلامه ياخالد."
خالد:"الله يسلمك.تصدقين قعدت افكر في كلامك حسيت انه معك حق خلاص ننسى المشاكل.ولا تحاسبيني على اللي افعال غيري وانا مارح احسبك على افعال غيرك"
بسمه:"الله يقدرنا ياخالد وننهي مشاكلنا اللي الظاهر مالها نهايه."
وقعدت تسولف معه ولا حست بالوقت لما يكونون مع بعض مايتكلمون هالوقت كله حست فعلا انهم كانوا محتاجين يبتعدون عن بعض شوي.


^^^^^^^^^^^

"ياابو خالد ه حياتهم وهم احرار فيها"
ابو خالد بضيق:"قاهرني هالخالد شهر عسل مثل الاوادم ماراح واللحين رايح الشرقيه كان خذاها معه قضوا اسبوع هناك ورجعوا"
ام خالد:"انت وش عليك منهم هذي حياتهم وهي راضيه."
ابو خالد :"اشدراك انها راضيه."
ام خالد:"وانت اش دراك انها مهي راضيه ."
حط راسه على المخده وهويفكر في خالد وبسمه .صحيح قدامهم كانوا عادي بس هالموقف حسسه ان فيه بينهم شي.
ام خالد:"اقول يابو خالد ابو فيصل ماخطب ريم لفهد"
ابو خالد:"لا .وانا مستغرب منه"
ام خالد:"اخاف بنتك ترفض بس."
ابو خالد واللي قعد:"تتوقعين تسويها ريم."
ام خالد:"ماادري عن بنتك."
ابو خالد:"لا ماظنتي ترفض فهد."
ام خالد كانت حاسه ان ريم بترفض فهد ومتخوفه من رفضها لو صار اكيد مااحد بيغصب عليها بس خايفه من ردة فعل خالد وابوه خاصة خالد اللي مارح يعديها بالساهل.

^^^^^^^^^^

كانت قاعده يوم الجمعه في العصر مع عيال خالتها قاعدين في الحوش كان خالد مكلمها وقايل لها انه مهو جاي الا في الليل عرض عليه تركي ينزلها بس خالد اصر انه ياخذها هو ولا يتعب تركي بنزلة الرياضقصة شعرها وندمت سلمت الكوفيره نفسها وقالت قصي اللي يناسبني بس لاتقصرينه كثير.صار طوله نص ظهرها كانت متخوفه من ردة فعل خالد اللي حذرها اكثر مره من قص شعرها.
دخل فواز ومعه واحد بس شافت طرف ثوبه قامت بتدخل بسرعه بس سمعت فواز ينادي.
فواز:"بسمه هذا خالد."
وقفت في مكانها من غير ما تلتفت تمنت انها سوت نفسها ماسمعته ودخلت بسرعه بس اللحين ما ينفع
اللتفتت كان خلص السلام على خالتها وعيالها لان ابو تركي مهو موجود.
حست انها مستحيه منه موت.ما كنها معه لها شهر بس غاب يومين رجع حياها من اول و جديد.سلمت عليه وانتبهت لنظراته على شعرها مو مبين على وجهه أي تعابير.
خالد:"شخبارك يابسمه."
بسمه:"تمام الحمد لله .الحمد لله على السلامه"
خالد :"الله يسلمك."
طلال:"يالله شف الوجه اشلون صاير احمر ."
ام تركي حتى تغير الموضوع:"مسرع هاليومين مرة علينا ياخالد عشان بسمه معنا."
طلال واللي ماهان يترك بسمه في حالها:"خالد اشرايك في بسمه وهي في لوك جديد"
بسمه كانت منقهره من طلال بس مايمنع انها حابه تسمع رد خالد:"حلوه."
طلال:"حلوه بس."
تركي:"طلال ترى سوالفك صايره سخيفه."
فواز:"صادق والله ياطلال."
خالد:"حرام عليكم اشفيكم عليه."
طلال:"دايم كذا مظلوم معهم .تجي تتبناني انت وبسمه."
بسمه:"بسم الله علي عاد مااتبني الا انت لا ان شاء الله."
خالدوهو يكلم بسمه:"جهزي اغراضك يابسمه لانا بنمشي بعد اشوي."
ام تركي:"لا والله مايصير بعد العشاء ان شاء الله وخير."
حاول خالد فيهم بس ماقدر فيهم.وجلسوا سوالف وضحك وبسمه كل ماناظرت خالد وجات عينها في عينه استحت ونزلت نظرها.
التهت ام تركي شوي في المطبخ وبعد ماساعدتها بسمه طلعت عند الشباب كان طلال يحاول يقنعهم يلعبون معه .
خالد:"لا ياخوي مالي خلق العب بس العبوا انتوا وانا بتفرج."
طلال:"بسمه تلعبين ."
بسمه:"اذا بيلعب فواز بلعب معك"
فواز:"اوكيه عشانك بلعب."
كانت العبه يحركون القلم في الوسط بينهم واللي يجي راس القلم تجاهه يحكم باي حكم على اللي مقابله.من رداة حظ بسمه جا الحكم عليها واللي بيحكم طلال.
طلال:"هههههههههههههههه الحمد لله ربي حقق امنيتي اني احكم عليكفكر ياطلال
وش يناسب بسمهايه.انتي ياللي ماتستحين جا رجلك من السفر وسلامك له قمه في البرود قومي بوسي (لما شاف نظرات اخوانه له واللي تحمل تهديد له)بسم الله على لا تاكلوني بعيونكمقومي وحبي راسه اعتقد مافيها شي."
ظحك خالد بصوت عالي بسمه كانت منقهره من طلال.
بسمه:"حبتك القراده قول آمين."
طلال :"آمين بس ياللا نفذي الحكم."
بسمه وهي داخله:"والله لو تموت."
طلال:"الشرهه علي انا اللي العب مع ناس مايلتزمون بقوانين اللعبه."
فواز واللي حب ينتقم لبسمه منه:"انا العب معك اللحين انا وانت بس."
طلال :"ياللا."

^^^^^^^^^^^^^^

يناظر سعود وهو يتكلم ويأشر حتى يستعجل.ماصدق اخيرا انه سكر التلفون.
وليد:"مابغيت يااخي تسكر."
سعود:"وش اسوي لها تعرف سوالفها ماتنتهي."
وليد:"ماعلينا من سوالفها كلمت ريم."
سعود:"تقول ماترد على تلفون واذا دقت تحت تقولها امها نايمه ولا مشغوله يعني تصرفها."
وليد:"مستغرب منها من الاربعا وهي ماكلمت وجواله يامقفلته اوماترد."
سعود:"يمكن شافت لها شوفه ثانيه."
وليد:"مستحيييل بس اشوفها هاليومين تكثر من اخاف من ربي مثل صاحبنا عمر لا يكون الاخت تبي تتوب"
سعود:"ماعليك بخلي مشاعل وراها حتى تجيب الخبر الصحيح منها."
وليد:"تكفى وانا اخوك خل هالخبله اللي مماشيها تفر مخها مثل اول."

^^^^^^^^^^^^^^

كانوا نازلين للرياض بعد ماتعشوا ومشوا اول مره خالد يشوف بسمه على طبيعتها تمزح ونسولف.كان وجهها مشرق بالسعاده وهالشي اكد له ان خالتها وعيالها يعزون بسمه ويقدرونها.
اخذتهم السوالف وماانتبهت بسمه الا وهو موقف عند الفندق اللي ناموا فيه اول زواجهم رجعت بالذاكره لورى وحست قلبها تزيد دقاته لماتذكرت كل شي.
نزلت وهي ماهي قادره تتحكم في دموعها اللي نزلت غصب عنها.
اول ماوصلوا مسحت دموعها قبل ماتكشف عن وجهها.
من عيونها الحمر حس خالد انها كانت تصيح
بسمه:"اهلك يدرون انا مابنام عندهم."
خالد:"ايه كلمت ابوي."
بعد ماشالت عبانها.
قرب منها خالد ومسك شعرها:"ماتتركين العناد يابسمه."
ابتسمت وفكت يده وجلست:"والله ياخالد ماقصدت بس قلت قصي شوي من شعري.والحبيبه ماقصرت"
خالد:"لا تعيدينها.المره ذي بعديها"
كملت بسمه عنه:"وبكيفي."
خالد:"ماشاء الله عليك تعرفين تحفظين الكلام بس ماتنفذين."
ماردت عليه وهي حاسه بمشاعر غريبه وكل مالها تتاكد حب خالد في قلبها يزيد ومستحيييل تتنازل عنه بساهل وبتغفر كل زلاته

^^^^^^^^^^^^^^



كانت في غرفتها دموعها على خدودها كانت صدمتها كبيره لما سمعت فهد يصرح بحبها كانت تدري انه بيخطبها توقعت انه عشان اهله بس انه يحبها هذا اللي حطمها
صحيح هي ماتحبه بس مايهون عليها تجرحه من يوم رجعت من عند عمها ماكلمت وليد ولا ردت على مشاعل كانت محتاجه تفكر وتختار بين حبها الجنوني لوليد وولد عمها اللي ماتحبه بس ماتتمنى له الا كل خير.

الجزء السابع عشر,,,,,


صحت من نومها على صوت الجوال ومهي قادره تفتح عيونها .انتفضت لما تذكرت ان اليوم اول يوم بتروح الجامعه واكيد اللي متصل هي امل ناظرت الساعه اللي بجنب خالد واللي كان نايمالبارح اكد لها انه بيحط المنبه حتى يصحيها. قامت وهي تتنرح من كثر النوم وشافت الساعه لقت خالد حاط المنبه على الساعه ثمان يعني على الوقت اللي بيصحى عليه.درت انه قاصد ياخرها عن الجامعه.وبكل هدوء حتى مايحس.حطت المنبه على الساعه عشرواخذت الجوال وطلعت الصاله حتى تتصل في املدقت الرقم.
امل:"يمه وش هذا كله نوم."
بسمه:"ايه مانمت الامتاخره .وينك اللحين."
امل:"حول بيتكم."
بسمه:"يووووه توني صاحيه تدرين شكلي مارح يمديني اروح معك."
امل:"مو على كيفك .انا بدخل عند جدتي اللين تخلصين بس عجلي."
بعد ماسكرت منها راحت تتسبح بسرعه عسى يمديها تخلص وكل هذا بهدوء حتى مايصحى خالد حتى ترد له مقلبه اللي سواه فيها.

مر على زواجها من خالد شهرين الشهر الاخير احسن بكثير كانت علاقتها مع خالد ماشيه للاحسن فيه اختلافات بسيطه بس كان حلها سهل كان خالد محترمها صحيح بس ماحست بحبه لها مثل ماتسمع من اللي توهم متزوجات بس متامله خير في المستقبل .ارتاحت من عبير واللي توها وصلت هلاسبوع واليوم معزومه هي وامها في بيت اهل خالد لوما تخاف بسمه من زعل ام خالد كان ماقعدت في البيت بس لازم من قعدتها.
.
.
.
.
اول مانزلت كان ابو خالد وام خالد وامل قاعدين تحت بعد ماسلمت عليهم كانت بتقعد
.لما شافتها امل بتقعد:"هيه يتقعدين انتي ووجهك ياللا مافيه وقت."
ابو خالد:"كان وداك خالد بدل ماتروحين مع امل."
امل:"لا ياجدي انا اللي طلبت تروح معي وبعدين لا تنسى طريق الجامعه لازم امر قريب من بيتكم"
ام خالد:"اصلا من بكره بتروح مع ريم ."
امل:"ذكرتيني بريم ياليت عندي وقت اطلع انكد عليها نومتها بس ماعليه اذا رجعت."
ام خالد:"خلاص تعالي مع بسمه.خصوصا ان امك بتجي في الليل."
امل وهي قايمه بتطلع:"ايه ماعليه بكلمها وبقولها."


^^^^^^^^^

كانت علىالساعه تسع مجتمعه مع جيرانها في بيت ام عبد العزيز على قهوة الضحى.بعد ماراحوا عيالهم المدارس والشغالات ماشاء الله يسدون في البيوت مالهم اذا استعصى النوم الصبح الا مجلس الحش والنميمه اللي يعقد كل صباح.
ام عبد العزيز:"ماحددتوا ملكة امل"
بدريه:"اول ماخطبها قالنا الزواج عقب سنتين قال مايخالف واللحين كل شوي يتصل على عمه يبي يعرس هالسنه"
ام عبد العزيز:"ايه حتى خطيب هدى.هذا شباب هالايام عجلين"
ام علي:"اذا الرجال مكون نفسه وما عليه قصور وشوله التاجيل وبناتكم ماشاء الله حريم"
بدريه:"صادقه والله ياام علي بس تدرين امل هي الكبيره ماادري اشلون بتحمل البيت من عقبها."
ام علي:"ايه تتحملين مثل ماتحملوا اهلنا.الا اشلون بسمه مع خالد اخوك"
بدريه وهي تبتسم:"ماعليها طيبه."
ام علي :"سبقتينا يابدريه كان خاطري اخطبها لعلي ولدي"
بدريه:"ههههههه ادعي لها الله يوفقها وولدك الله يرزقه."
ام علي:"تستاهل بسمه كل خير"
كانت ام عبد العزيز تسمع وهي حاقده على بسمه اللي الكل يحبها ودوم يمدح فيها. اخ يالقهر من اول حاكمتها ومخليتها على كيفي واللحين استقوت وصارت زياراتها نادره وحتى لو جات صار فيها قوه والضعف تركته من تزوجت خالد.
ام عبد العزيز حتى تغير السالفه:"مابغى عبد العزيز يصحى اليوم للمدرسه."
ام علي:"حتى عيالي بس ماينلامون من السهر الي كانوا فيه بس تعدلهم اللحين المدارس."
بدريه:"صااااادقه ماكانوا يهنونا في النوم من سهرهم الله يصلحهم."


^^^^^^^^^

سمع رنة الساعه ضربها بيده توقع بسمه تكون نايمه لما التفت ماشافها ناظر الوقت كانت الساعه عشر.ابتسم لانه عرف ان بسمه على طول ردت له المقلب اللي كان ناوي يسويه فيها رفع الجوال حتى يكلمها سمع صوتها وهي تضحك.
بسمه:"صح النوم."
خالد:"قلبتيها علي كان خاطري انا اللي اقولك صح النوم لما تصحين متاخره."
بسمه:"الحمد لله طلعت اشطر منك."
خالد:"افرضي ان كان عندي موعد مهم."
بسمه:"احسن حتى ما تلعب علي.انا اقول غريبه خالد مهتم في الساعه لا وتقول انا بصحيك وخلي الساعه قريبه مني "
خالد:"هههههههههه جزاتي اللي بغيت اريحك من تعب اول يوم"
بسمه:"مشكور عمري ادري ان مصلحتي تهمك."
خالد:"الحمد لله فوق انك مضيعه من وقتي ساعتين معطيك وجه واسولف معك."
بسمه:"ياللا باي حتى انا مشغوله بس ماودي اكسر بخاطرك ادري انك حريص تسمع صوتي من الصبح."
خالد:"مشكله الثقه الزايده اقول انا اللي بمركم اوكيه."
بسمه:"ماودي اتعبك بس ماعليه."
خالد:"تعبك راحه وبعدين يمدحون بنات الجامعه مره. خل الواحد يوسع صدره حتى لو بالنظر."
بسمه:"صدق ماتنعطى وجه وبعدين حتى النظر يحاسب عليه ربك."
خالد:"صح بس النظره الاولى حلال."
بسمه:"وماشاء الله تفتي بعد بس النظره الاولى عندك طويييييله حيل."
خالد:"اقول ياللا مع السلامه اشوفني قمت افتي بغير علم"
بسمه:"مع السلامه واستغفر ربك"

بعد ماسكر ابتسم فضيعه هالبسمهفرضت نفسها في حياتي غصب عني.
ناظر الساعه حس انه فعلا تاخر واكيد بيحصل محاظره من ابوه تمنى يكون ابوه راح الشركه.بس لما نزل سمع صوته تحت توكل على الله ودخل.
خالد:"السلام على احلى اثنين."
ابو خالد:"وعليكم السلام بدري وانا ابوك وش مصحيك اللحين."
راح حب راس ابوه وامه:"تدري ياابو خالد مانمت البارح بدري."
ابو خالد وهو يقاطعه:"وش حادك على السهر."
خالد:"من الزهق يابوي."
ابو خالد:"مااقول الا الله يعين مرتك عليك"
خالد:"غريبه للحين مارحت الشركه"
ابو خالد:"ياللا مشينا بروح معك"
ام خالد:"خله يفطر اول."
ابوخالد:"مهو لازم يفطربعدين لا تخافين عليه هو وفهد يعرفون يدبرون انفسهم."
خالد:"كاشفنا والله يابو خالد."
ابو خالد:"ايه كاشفكم .ياللا بس قم."
.
.

.بعد ماطلعوا اخذت ام خالد التلفون حتى تكلم ام محمد اللي من رجعت من السفر وما شبعت من سوالفها.
ام محمد:"الو"
ام خالد:"صباح الخير."
ام محمد:"ياهلا والله صباااح النور.اشلونك ياوخيتي"
ام خالد:"بخير الله يسلمك اشلونك واشلون عبير"
ام محمد"الحمد لله بخير وعبير نايمه تقول مهي رايحه الجامعه اليوم"
ام خالد:"اكيد متفقه مع ريم .اما بسمه راحت مع امل."
ام محمد:"اشلونها مرة ولدك."
ام خالد:"ماعليها بخير."
ام محمد:"تسلم عليك مرة عمها وتراها تقول لا تغركم البنت تراه مهي بهينه"
ام خالد واللي بدت تتضايق من هالموضوع اللي ماتكلم اختها الا وفتحته معها:"المهم اليوم تجين ان شاء الله"
ام محمد:"ان شاء الله بس ماادري عن خالتك بتجي."
ام خالد:"ههههههه لا مهي بجايه."



^^^^^^^^^

كانت ميته ضحك هي وامل وهم يسمعون كلام دلال واللي تشكي لهم الحال بعد الزواج
دلال:"احاول اطلببس لما اشوف عليه اقساط السياره وايجار البيت اضطر اسكت عن اشياء ضروريه"
بسمه:"يالظالمه لك اقل من شهرين متزوجه واكيد كل اغراضك جديده لا تصيرين طماعه"
دلال:"أي طماااعه واللي يرحم والديك.حتى شهر عسل زي الناس مارحت."
بسمه:"مو اانتي اللي مارحتي شهر عسل حتى انا مارحت والحمد لله مانقصنا شي."
دلال:"انتي اللي مابغيتي تروحين.انا منقطع قلبي واسافر بس الظروف صعبه"
بسمه بجديه:"انتي لا يكون تقولين هالكلام لزوجك وتحطمينه."
دلال:"لا ياحبيبتي عنده امثل دور القنوعه لاني عارفه لو عنده مابقصر بس الواحد اذا ضاقت نفسه يحب يفضفض شوي عند احبابه"
بسمه:"احمدي ربك بينك وبين زوجك الحب اللي غيرك يدوره "
دلال وهي تبتسم:"صادقه اما الحب والله اني اموت فيه وحتى هو بس مثل ماقلت لك فشة خلق على قولتهم ومالي الا انتوا."
امل:"تدرون انا الظاهر مابعرس. يااختي الزواج كله مشاكل"
بسمه:"ياشيخه .وان قال طلال امولتي ابقدم العرس."
امل وهي تضحك:"اقوله على رااااحتك حبيبي."
بسمه:"ياعيني على الحب."
امل وهي تحط يدها على خدها:"أي حب يابسمه.يمه مادريت ان الحب كذا يالله بس اسمع صوته اروح في عالم ثاني.العالم اللي تروحينه لما تشوفين خالي."

ابتسمت بسمه بمراره فخاطرها ماعرفت هالعالم ياامل لان خوفي معكر علي حياتي واحساسي ان خالك لازل يحب عبير محسسني بعدم الامان الامان اللي لازم منه حتى ادخل هالعالم اللي تقولين

^^^^^^^

وهم قاعدين على الغدا بعد مارجعوا من اعمالهم وليد من شركة اخوانه اللي يداوم فيها ولو ماهم اخوانه دوم يتصلون فيه ويهاوشونه ماكان دوام من الاساسوسعود وعمر من اعمالهم.
وليد:"يااخي تغيرت علي مهي بريم اللي اعرفها."
سعود وهي ياكل:"تراك صدعت راسي من هالريم."
وليد:"جاتني فرصه انتقم من هالحيوااان تبيني اضيعها"
عمر:"فهد ماقال الا اللي شافه واي واحد غيره بيسوي كذا."
وليد:"يااخي اسكت واللي يرحم والديك.وبعدين هو اللي تبرع من حاله وسوى نفسه شهم."
سعود:"بس هو اشلون شافك."
وليد:"ماادري.انا حطيت الكيس اللي انت خابر في سيارة سلمان وبلغت عنه وقبضوا عليه بعد يومين قبضوا علي وطلع فهد شهد هو اثنين كانوا معه اني انا اللي حطت الكيس في السياره."
عمر:"انت بعد على طول اعترفت يمكن لو انكرت كان كلمتك ضد كلمتهم."
وليد:"ايه بلاك ماشفت اللي شفته وبعدين واااااثق اني بطلع منها."
سعود:"وش عليك اهلك لهم اسمهم. لو انا كان للحين في السجن "
وليد:"المهم خل هالخايسه اللي معك تكلمها."
عمر:"ليش ماعاد تكلمك."
وليد:"تكلمني بس ماعندها وين ابوك؟ متى بتخطبني"
سعود:"بكلم مشاعل ونشوف"
وليد:"يااخي اللحين مااتجرى اقولها تطلع معي .لو اقول كذا شكت فيني على طول."
عمر واللي كان يتمنى يتركون هالبنت في حالها:"ياشيخ خلك منها وترى اهلها مهم هينين."
وليد:"ماهموني اهلهااقول سعود مشاعل ماتقدر تجيب لي صورتها"
سعود:"وش تبي بصورتها
وليد:"ماعليك اهم شي شف تقدر ."
عمر يناظرهم نظرات كلها احتقار بس اللي مثله مدمن يكون ساعه بعقله وساعات بلا عقل

^^^^^^^^^

في نفس الوقت كان اهل خالد متجمعين على الغدا ومعهم امل واللي جات مع بسمه
ريم جالسه بعيد عنهم لانها مالها نفس تاكل .
خالد وهويناظر بسمه:"الله ياريم السنه هذي جوكم بنات شكلهم بيغطون على القديمات مثلك."
ريم:"ايه اكيد كلهم قراوه وحالتهم حاله."
خالد:"بتشوفينهم بكره وبتعرفين."
بسمه:"اصلا انت حرام عليك تناظرهم وتاكد اللي تسويه في محارم المسلمين بيصير في محارمك."
خالد حتى يستفزها:"نظره الله يهديك ماتضر."
بسمه:"ترضى احد يناظر احد من هلك."
خالد:"يخسى اللي هم احد يناظر."
ابو خالد:"اجل غض النظر وخاف ربك عندك خوااات."
كلامهم هز ريم من الاعماق.وحست كانه موجه لها مولخالد.
خالد:"يبه وشفيك قلبت علينا الله يهديك."
ابو خالد:"ماقلت الا الحق."
خالد:"حسبي الله على فهد جاتك عين قويه منه .ابوك حبيب ابوك متفهم .اليوم اجيبه واخليه يذكر ربه"
امل:"ههههههه اخاف جدي ماقلب عليك الا من بسمه بس"
بسمه وهي تناظرها:"ترى يسمون اللي تسوينه فتنه."
خالد حتى يحرج بسمه:"اذا ابوي ماقلب الا مع بسمه بيكون زي العسل على قلبي."
امل:"ياعيني على الحب."
ناظرتها بسمه نظرة تهديد لما شافت امل نظراتها ضحكت.
خالد:"اقول اموله شخبار طلول."
امل:"وش طلوله .اسمه طلال."
خالد:"طيب شخباره"
امل:"ماعليه يسلم عليك."
خالد:"ياقواتك تتكلمين عنه عادي."
امل:"ايه اتكلم عادي مش خطيبي."
خالد وهو يناظر بسمه:"فيه ناس متزوجين وللحين يستحون."
امل:"هالناس متخلفين ندعي لهم بشفاء العاجل."
ريم واللي زهقت من سوالفها كعادتها ماتحب تكون مهمشه في القعده:"اقول يمه بيجي احد غير خالتي (وهي تناظر بسمه)وعبييير"
ام خالد وهي قايمه:"بتجي العنود وخواتك."
ماتدري ليش ماارتحت من سمعت اسم عبيراخر مره شافتها كان في المزرعه
تكره عبير بشكل فضيع وتحسها تهديد لحياتها مع خالد بس مستحيل تنولها اللي في بالها بساهل.

بعد المغرب في بيت ابو عبد العزيز.كان قاعد مع مرته وبناته.
ابو عبد العزيز:"ترى يوسف كلمني ويبي يملك."
هدى:"توه بدري وشوله ملكه اللحين."
ابو عبد العزيز:"اكلم امك ماكلمتك انتي."
ام عبد العزيز:"اجلها شوي"
ابو عبد العزيز:"بقولهم وماادري عنهم يطيعون.شفتي اليوم بسمه."
هدى واللي كانت تتفرج على التلفزيون التفتت على ابوها:"ايه شفتها.الله يالكشخه."
هند :"صدق."
هدى:"أي .والله كل شي حتى الجزمه والشنطه واللي مبين عليها ماركه"
هند:"وش عليها ماخذه مليونير."
ابو عبد العزيز:"مليونير لها بالحالها ماقالت عمي رباني."
هند وهي تضحك:"يبه ماشافت خير عندنا حتى ترده لنا."
ام عبد العزيز واللي ماعجبها تبرير بنتها:"حتىلا ولو.وبعدين احنا كنا ندور مصلحتها"
ماردت على امها لانها عارفه ان أي شي يخص بسمه لازم امها تكون على حق فيه وبعدين هي ماتحب بسمه حتى تدافع عنها.

^^^^^^^^


"العنود لا تنسين اليوم تكلمينها مهو زي كل مره."
العنود وهي ملتهيه في نواف تعدل بجامته:"ها طيب."
فهد واللي بدى يفقد صبره:"اشفيك من اول ماكلمتك ماانتي بطبيعيه."
العنود وهي تضحك:"انت الله يهديك اتصلت في وقت مشغوله فيه تدري اللحين طالعه بيت عمي."
فهد:"بتاخذين عيالك."
العنود:"لا.تدري عندهم مدارس .بس نواف رافض الشغاله تساعده في لبسه.وش كنت تقول تو."
فهد:"اقوووول لا تنسين تكلمين ريم."
العنود بعد ماخلصت من نواف رجعت سندت ظهرها:"لا ان شاء الله ماانسى."
فهدبضيق:"من متى مكلمك تاجلين كل شوي."
العنود:"تدري بعد ماكنت القى فرصه بس اليوم بحاول وان شاء الله خير."
فهد:"تهقين توافق."
العنود ماكانت متاكده من ريم بس ماحبت تحطمه:"تطول هي فهد."
فهد:"اما لك البشاره يالعنود لو وافقت."
العنود:"ان شاء الله توافق."
فهد:"تصدقين من اول لو رفضت بزعل بس من بعد ماشفتها زعلي بيكون اكبر."
العنود:"اقول تراك عطلتني.اذا جيت كلمتك ولو اني متاكده انها رح تقول بفكر"
فهد:"تفكر براحتها بس توااافق."

^^^^^^^

في غرفتها وتحاول تتكلم بصوت محد بسمعه من اللي برى على انه مستحيل احد يسمعها وهي مقفله لباب لكن صحيح كاد المريب ان يقول خذوني.
ريم:"وليد مااقدر اطول ."
وليد بلهجة استعطاف:"ليش حياتي."
ريم بضيق:"ولييييد اخاف احد يدخل علي ."
وليد:"ريم ماادري ليه احسك متغيره"
تنهدت وهي فخاطرها حتى انا ماادري ليش صرت متضايقه من مكالماتك"مانيب متغيره بس يتهيأ لك"
وليد:"لا يكون متغيره عشان ماخطبتك."
ريم:"اكيدهالشي مضايقني."
وليد:"لا تزعلين حبيبتي ان شاء الله عن قريب بتسمعين تسعدك."
ريم وهي خايفه احد من خواتها يجي:"ان شاء الله ياللا وليد اسمعهم ينادوني"
وليد:"مع السلامه حبيبتي."
ريم:"مع السلامه"
اول ماسكرت رمت التلفون على السرير صارت مكالماته تضايقها بس خايفه منه لو بينت له هالشي حاسه انه يكذب عليها من كثر مايأجل في موضوع الخطبه.صارت تعض اصابع الندم على هالغلطه اللي ماتدري اشلون تتخلص منها صحيح تحبه بس خايفه انه يلعب عليهانزلت تحت وكانت بدريه وساره موجودات وخالتها للحين ماجات.امها كانت عند ابوها يعني ماكان في الصاله الا بدريه وبناتها وساره وبسمه.جلست واخذت الريموت وحطت على فيلم شدها من اول ماشافته.بدريه ماعجبها الفيلم خصوصا ان رهف قاعده واللي حستها صغيره على الفيلم
بدريه وهي تغمز لريم:"ريم حطي على الاخبار."
ريم واللي انتبهت لها بس مااهتمت:"سوووري الفيلم شكله حلو."
بدريه:"لا شكل الفيلم سخيف ولا تنسين ان فيه اطفال معنا."
التفتوا في بعض لان ماكان فيه احد من عيالهم واصغرهم رهف.عرفت رهف انها المقصوده.
ريم:"بدريه اشفيك الله يهديك الفيلم نظيف مافيه شي."
بدريه وهي تاشر على رهف :"حتى ولو فيه صغار قاعدين"

كانت رهف ورى امها واللي يشوفها بوضوح ساره وبسمه واامل.اشرت رهف باصبعها على راسها ولفتت يدها ورجعت اشرت على امها يعني امي خفيفة عقل
انفجروا بالضحك لما شافوا حركة رهف.درت بدريه منهم عن سبب ضحكهم.
بدريه:"هذا جزاي اللي مااحب تشوفين هالاشياء."
رهف:"يمه الله يهديك انتي اعرستي وانتي في سني .يعني ماعادني بصغيره"
شهقت بدريه والبقيه ماتوا ضحك على دخلت خالد:"ضحكونا معكم ياجماعه."
بدريه:"الحق على ياخالد رهف تبي العرس."
امل:"وعريسها جاهز ابو صالح."
خالد من سمع اسمه ناظر بسمه اللي اختفت الابتسامه من وجهها من سمعت اسمهماكان متخيل هالملاك زوجه لابو صالح.
رهف:"بسم الله علي من ابو صالح.وبعدين يمه انا ماقلت ابي العرس بس اقولك ماعادني بصغيره."
بدريه:"يعني اخليك على كيفك وتشوفين افلام خايسه زي كذا."
رهف وهي طالعه:"لا مااقصد كذا بس لا تحاولين تغيرين الواقع.انا ماعادني بصغيره"
الكل ضحك على رهف.وطلعت قبل ماتسمع الرد وبدريه منصدمه من كلامها.
ساره:"ترى يابدريه معها حق مهي بصغيره.عمرها15سنه."
بدريه:"رهف بتظل طول عمرها في نظري صغيره."
خالد وهو يضحك:"انصدمتي في رهوفه اللي."
سكت لما شاف من دخل عليهم كانت عبير وامها وبقمة الوقاحه دخلت تسابق امها وهي تتمنى تشوف خالد وتحقق مناها .قام خالد على طول وطلع من الجهه الثانيه.
بسمه حست بالغيره ماكله قلبها وهي شايفه عبير داخله بكامل زينتها وكاشفه شعرها
وحست ان نظرات خالد لعبير حتى لو ماطولت نظرات غير.
سلمت ام محمد عليهم وعبير تعدت بسمه كالعاده وسلمت على البقيه.
.
.
.
.
اول ماطلع خالد من عندهم رن جواله كان المتصل فهد اللي نسى انه كان مواعده .
خالد:"هلا والله بولد عمي"
فهد:"اطلع لا بارك الله فيك."
ضحك خالد :"مادام هذا كلامك ماني بطالع."
فهد:"ساعه لاطعني برى وانت موسع صدرك داخل."
خالد:"اعوذ بالله من الحسد ابوي وغيرته علي اللحين بتحسدني على قعدتي مع اهلي."
فهد:"خل عنك كثر الهرج انا احتريك برى"

قبل مايطلع مايدري ليش كان يفكر في بسمه وردة فعلها لما دخلت عبير عليهم.لهم فتره ماصار بينهم الامشاكل بسيطه تصير بين أي متزوجين حس انها اليوم اكيد بتزعل
شاف رهف وطلب منها تنادي بسمه.استغرب من نفسه اللي مافكر الافي بسمه.صحيح اول ماشاف عبير حس بحنين للماضي بس بدرجه اقل من السابق.
انتبه على بسمه جايه ملامحها عاديه.
بسمه:"قلت لي رهف انك تبيني."
خالد:"انا.لا غلطانه رهف انا قلت لها تنادي امي."
بسمه وهي راجعه:"اوكيه انادي لك امك."
مسك يدها قبل ماتروح وهويضحك:"ماصدقتي انتي عاد بتروحين."
بسمه:"ماادري وش يرضيك اللحين مهو انت تقول غلطانه رهف."
خالد:"امزح بسومه."
بسمه وهي تضحك:"لا تقول بسومه مولايق عليك تدلعني"
خالد:"ههههه ابو التحطيم ليه مولايق علي."
بسمه:"خاااالد تبي شي"
خالد:"ايه بقولك بطلع ياعمري تامرين شي."
بسمه:"ياي.ومن متى هالاخلاق الحميده"
خالد:"من يومي عندي اخلاق حميد بس مدفونه .انتي دافنتها."
سمع صوت الجوال عرف ان فهد اكيد اللحين معصب عليه.
خالد:"ياللا بسمه بطلع ولا بيدخل فهد يرتكب فيني جريمه وتصيرين ارمله من عقبي"
بسمه:"مع السلامه."
خالد وهو طالع التفت عليها:"كانه جاز لك لقب ارمله."
بسمه:"بسم الله علي .الله يحفظك ان شاء الله ويخليك لاهلك."
خالد:"لاهلي بس."
بسمه وهي تبتسم:"ولي انا بعد"
.
.
.
.
رجعت بسمه داخل عند الحريم وتعمدت ترسم على وجهها ابتسامه تحمل الف معنى ومعنى.كانت سعيده ان خالد عبرها هي عارفه انه ناداها حتى يجس نبضها ويشوف لا يكون زعلت.بس من اليوم ورايح مارح تزعل من الساهل او تبني بينها وبين زوجها حواجز وبكذا تخرب على كل من يبي يخرب بيتها اولهم عبير.
.
.
.

في الطرف الثاني كانت عبير تناظرها بحقد وكره لان بسمه صار لها اهميه عند خالد واكيد ماناداها الا حتى يراضيها وماتزعل على دخلتها ومن ملامح وجهها وهي راجعه واضح ان الحياه بينهم ماشيه للاحسن بس وين بتروحين مني يابسمه.


^^^^^^^^

"شعولتي حبيبتي وحشتيني موووت"
مشاعل بدلع:"حتى انت وحشتني."
سعود:"اشرايك نتواعد اليوم كالعاده في أي مكان تحبين."
مشاعل:"لا مااقدر اليوم اطلع.خلها مره ثانيه"
سعود:"اوكيه حبيبتي.اقول مشاعل شوفي لك حل مع ريم علقت وليد في حبها واللحين ماتعطيه وجه."
مشاعل:"يااخي اذا يحبها يخطبها لانها معنده في الطلعه معه.وبعدين ترى ولد عمها بيخطبها وشكلها بتلين"
لما بدوا يتكلمون عن ريم حط وليد اذنه قريب من سعود حتى يسمع.لما سمع طاري فهد انتفض وحس بحقد داخل قلبه يثور.
سعود:"اللحين بدت الجامعه وقعداتكم مع بعض بتطول حاولي تقنعينها."
مشاعل:"احاول حبيبي .اقول ياللا باي اسمع صوت اختي تنادي."
بعد ماسكر منها كان وليد وجهه مقلوب وسرحان ويفكر.
سعود:"وليييييييد وين سرحت."
وليد وهو يعدل جلسته ويتكلم بكل جديه:"افكر في فهد.شف اذا مانجحت خطتي الاولى فيه خطه ثانيه تدمر فهد وخالد وعايلتهم كلهم وجيب اسمهم في الارض"
سعود وهو يضحك:"الخطه الاولى ان ريم تطلع معك وعارفينها. لكن الخطه الثانيه وشي."
وليد وهو يفكر:"بتعرفهها في وقتها"


^^^^^^^^^


في الجامعه كانت امل وبسمه قاعدين يتكلمون عن امس وعبير وامها واللي ثنتينهم مايحبونهم
امل:"يابسمه هالعبير فيها غرور يكفي بلد."
بسمه:"صادقهبس تراها عندها مقومات جمال فضيعه"
امل :"حتى ولو مهو بعذرلاحظت انكم ماتسلمون على بعض."
بسمه:"ولا بنسلم على بعض."
امل :"حقوده يابسمه عشانها كانت خطيبة خالي."
بسمه:"تشوفينه سبب بسيط."
جاتهم وهي تلهث من كثر المشي ومعها وحده ماعرفوها.رمت نفسها على الكرسي
دلال:"ياربي وش حادني على التعب.كان اقعد في بيتنا اريح"
ضحكوا عليها واشروا لها من اللي معك ماعرفتينا.
دلال:"اسفه يانوف من التعب نسيت انك معي."
نوف:"لا عادي عاذرتك."
بعد ماتعرفوا عليها حسوا ان هالبنت حبوبه بس استغربوا لما عرفتهم بنفسها اكثر.
نوف:"ترى انا اخت مشاعل اللي تكون صديقة ريم وعبير"
التفتوا امل وبسمه في بعض وهم مستغربات تكون ريم واللي واضح من هيئتها شي مختلف عن مشاعل.فهمت نوف نظرتهم بس ماحبت تعلق.

^^^^^^^^

في نفس الجامعه كانت ريم ومشاعل يسولفون ومشاعل تحاول تقنع ريم باللي قالها عليه سعود.
ريم:"مشااااعل شكلك انتي استخفيتي."
مشاعل:"زين انتي فكري."
ريم بضيق:"مانيب مفكره ومن اللحين بقولك لا يعني لا."
مشاعل:"ليش انتي متشدده واعديه في السوق شوفيه وهو بعد يشوفك وخلاص."
ريم:"خلاااص في عينك تبين من اكشف وجههي."
مشاعل واللي حست مهمتها صعبه:"طيب مو لازم هو يشوف وجههك انتي ما خاطرك تشوفينه."
رجعت ريم وتسندت على ورى:"والله ماادري وش خاطري فيه. وليد صرت اخاااف منه ."
مشاعل:"وليش تخافين مادامه واعدك بالزواج."
ريم:"ماشفت الا كلام اخاف انه زي ربعه بسبعدين انا قلت لك ان بنت عمي كلمتني امس عن فهد."
مشاعل واللي بان الاهتمام في عيونها:"اش كان ردك."
ريم:"قلت لها خليني افكر."

وسرحت في عالمها يمكن لو فهد خطبها قبل ماتتعرف على وليد اكيد كان وافقت على انها ماتحبه بس مافي قلبها حب لاحد اما اللحين صار في قلبها حب لوليد وخوف منه
وماتدري وش الاياااام مخبيه لها
الجزء الثامن عشر.


ناظرت الساعه كانت 12في الليل وخالد للحين ماجا.مثل عادته كل يوم دايم يسهر.
كانت حاسه بملل لو علاقتها مع ريم احسن كان راحت تسولف معها وتضيع الوقت شوي.لان ريم اكيد صاحيه اللحينبس للاسف علاقتهم من سيئ لاسوء
في الاخير ركزت على فيلم في التلفزيون وشدها حتى نست الوقت وما حست في خالد اللي دخل كان شايفها منسجمه في الفيلم ابتسم ومشى بهدوء حتى ماتحس فيه.
حتىقرب من وراهاوحط راسه عند اذنها:"بوووووو"
فزت بسمه وصرخت بصوت عالي.
حط خالد يده على فمها حتى تسكت:"فضحتينا .اهلي نايمين."
من كثر الروعه اللي هي فيها والفزع ماردت عليه قعدت وحست يدينها ترتجف.حقدت عليه من قلب.
قعد بجنبها وهو ميت ضحك.
بسمه وهي معصبه:"ولك وجه تضحك.طيحت قلبي."
خالد وهويحاول يسكت من الضحك:"مادريت انك خفيفه."
بسمه:"خفيفه في عينك بس لا تخااااف مردوده لك."
خالد:"تظنين اني بصرخ صرختك لا ياعيوني بناااظرك ببرود وقولك سوري حبيبتي ماتخوفين."
بسمه:"ايه نشوف."
مسك يدها ولانه عصبها فكت يدها
خالد:"لا تقولين زعلتي."
بسمه:"ايه زعلت."
خالد:"لا بسومه ماتهونين علي اسافر بكره وانتي زعلانه."
تفاجأة لما قالها بيسافر وحست بضيق.
بسمه وهي متعجبه:"تسااافر .وين
خالد:"امي تبي تزور خالتها اللي في القويعيه وتبيني اوديهم."
بسمه:"توديهم.ليش فيه احد بيروح معها."
خالد:"ايه خالتي بتروح."
سكتت وماردت وتضايقت ليش خالتها ماقالت لخالد السفر الا بعد ماراحت.واللي ضايقها اكثر ان ام محمد بتسافر معهم.
بسمه:"متى قالت لك امك ."
خالد:"بعد ماطلعت اتصلت فيني ."
بسمه:"طيب بتطولون."
خالد:"لا بنرجع الخميس عشان ملكة امل."
بسمه:" وانا وين اروح"
خالد:"ابوي وعبيرفي البيت قعدي معاهم واذا تحبين تروحين لعمك بكيفك."
انتبهت لما غلط في اسم ريم وقال عبير بدون مايقصد بس ماحبت تظهر له.
بسمه:"تدري بروح لعمي.سحر بنت عمي جات اليوم بروح انبسط معهم شوي."
قالت معهم وهي عارفه ان مارح تنبسط الا مع سحر بس.
خالد:"سوي اللي يريحك."
بسمه:"طيب ليه ماروح معكم."
خالد:"وين تروحين يابسمه.ناس ماتعرفينهم "
بسمه وهي تتنهد:"وانت صادق وش يوديني."
كان يناظرها وهو يبتسم ويتاملها كل يوم يحسها احلى من اليوم اللي قبله مايدري ليه يمكن لان مكانتها تزيد عنده يحسها تحلو في نظره.
بسمه واللي استحت من نظراته:"ها.يالحبيب لا يكون معجب وانا ماادري."
خالد وهو يضحك:"اكيد معجباحد يشوف هالجمال وما يعجب فيه."

^^^^^