الموضوع: كبرياء امرأة و حب رجل ****قصه رووووووووووووووووووووووووووووووووووووووووووعه***

السلام عليكم


اسفه على التأخير

الجزء الثاني والعشرون :



الله استجاب لدعوت وضحه ما طاف على السالفة عشر دقايق الا وجوال نجله يرن . كانت أم حمد اللي دقت على جوال وضحه اللي ما ترد عليها . نوره كانت مستوجعه واجد وبيسرون بها للمستشفى . وأم حمد كانت تبي وضحه تروح معها وضحه من الفرحة ان الله استجاب لدعوتها اطلعت شبه تركض لفلة سعيد بس من الباب القدامي وأركبت معهم وراحوا بنورة المستشفى في سيارة سعد .






نورة أول ما أوصلت المستشفى أدخلت غرفة الولادة على طول . اما وضحه وأمها وأم راشد اقعدوا ينطرون الفرج في انتظار النساء . بعدها بساعة جاتهم نوف اللي كانت بكامل أناقتها جايتهم من عزيمة حماتها أقعدت معهم بس بعيد عن وضحه ما كانت تبي تتكلم معها خاصة بعد ما سكرت وضحه الجوال في وجها ذا الليل .اما وضحه كان ودها تقوم تآكلها على الموقف اللي حطتها فيه .





انتشر خبر ولادة نورة بين الكل في الشالية . بس الوحيد اللي ما عرف كان راشد اللي من اخذ جوال وضحه ركب سيارته وراح لآخر الشاليهات من صوب شاليهات العزاب وقعد يفتش في الجوال على راحت راحته فتش في الأسماء . بس ما لقى أي أسماء غريبة أو مميزة . ودخل الرسايل براحة مبدئية ما دامت أكثر من لحظات لما شاف الرسايل اللي موجودة في جوال وضحه ومن أرقام كلها كرت يا هلا والمصيبة ان الأرقام متكررة مات وحيا . في ذيك الساعة ما لعب الشيطان في راس راشد الا شياطين الدنيا كلها قامت تنطط قدام عينه . مسكهم رقم رقم واتصل من جوال وضحه أول واحد كان على طول مغلق والثاني كان يرن بس ما حد يرد عليه . اخذ الأرقام من جوال وضحه واتصل عليهم من جواله بس بدون فايدة طلع بنفس النتيجة . استمر على ذا الحالة ساعة ولا طلع بشيء . كان يحس بضو شابه في قلبه ومعدته تتقطع عليه تقطع وهو يشوف كل ذا المسجات . طرشهم لنفسه بالبلوتوث .ورجع يشوف إذا كانت هي تطرش إلى نفس الأرقام مسجات . ما لقى شيء في الرسايل المرسلة قال أشوف تقارير الاستلام . بس بعد ما كان فيها تقارير إرسال لذي الأرقام هدا شوي .بس تذكر الأستوديو ما افتحه وأخذه وفتشه بكل تركيز حتى صور البزران كان يركز فيها يمكن مصوره حد في طرف الصورة ومسويتها حركات تمويه .



لما فقد الأمل ان حد يرد على اتصالاته سكر جوال وضحه وحطه في درج السيارة وقفل عليه بالمفتاح ورجع لشاليه الشباب ولقى عبدالله ينطره . عبدالله ما قدر يكلمه قدام محمد وسلمان عن اللي صار . حاول انه ينفرد به بس ما عطاه راشد مجال دخل على طول لغرفته . وهو داخل سمع محمد يكلم نجله ويقول لها : هي وين جوالها أنا عجزت أدق عليها يعطيني مغلق أبي أسالها عن عمتي نورة
نجله اللي ما كانت تبي حد يدري باللي صار : يمكن ما فيه إرسال في المستشفي دق على جدوه أو سعد
محمد: زين خلاص بشوف جدوه
وسكر محمد من عند نجله ودق لام حمد وراشد قاعد على السرير يطلع له ثياب من الشنطة عشان يبدل .
محمد : السلام عليكم
وضحه اللي كان عندها جوال أمها : هلا محمد وعليكم السلام
محمد : عمتي وضحه أنت وين عجزت وأنا أدق عليس جوالس كله مغلق
راشد خفت حركة يده في الشنطة لما عرف أنا وضحه ما هي في الشاليهات كيف تتجرا وتروح وأنا إلى ذا الحين ما حسبتها على سوته ما هب منها من ذا الثيران اللي حواليها لكن ما عليه في المستشفى أقريب وين بتروح من يدي خلني بس أطيح على راعي ذا المسجات . وقرر راشد انه ما يعلم احد بسالفة ذا المسجات خاصة انه ما شاف في الجوال رسايل مطرشتها وضحه لهم .وعشان يتأكد قبل من أصحاب ذا الأرقام من جهة . ومن جهة ثانية عشان إذا كان اللي يطرش لها المسجات هو اللي تبيه ما احد من أهلها يسوي فيها شيء قبله . ولأنه يبيها حيه عشان يدبها على راحته وبمزاج .





على الساعة أربع الفجر أولادة نورة وجابت شيخة وعلى اللي صار عند أم راشد وأم حمد البكي .والتلمم . وتوزيع الفلوس على الممرضات اما سعد الفقير من كثر ما كان طول الليل يحوس في المستشفى عشان يأخذ لنورة غرفة خاصة كان تعبان ما قدر ألانه يقعد على الكرسي وهو فاتح حلقه على الآخر بابتسامة عريضة كنه مبشر بالجنة .الكل كان فرحان الا وضحه اللي كانت تفكر في راشد والرسايل اللي في الجوال أكيد ذا الحين علم سعيد من زمان عن الرسايل؟ وسعيد بيعلم أبوي ولا لا ؟ لا بس سعيد عاقل إذا شافهم أكيد بيسألني قبل عنهم ؟ ألحكي في اللي لا يسأل ولا يشاور الله يستر أنا سكوته عن الكلام اللي اسمعه ما عجبني ما هب ذا طبع راشد ؟ وش اللي تحت راسك يا راشد الله اعلم ؟ ؟






انتشر الخبر من صبح بين الشيبان اللي من الساعة ست الصبح حركوا صوب المستشفى من الفرحة ونفس الحالة عند باقي النسوان كل وحده مشت صوب الدوحة عشان يشترون الهدايا اللي بيودونها لنورة . عبدالله اللي ما رقد عدل قام هو بعد عشان يودي الجازي الدوحة لان حمد رأسه وألف سيف ما يقوم من النوم وهو يسخن السيارة وحاط كوب الحليب في يده . جاه مسج من البلوتوث اللي ما سكره من آخر مره افتحه عشان يدور على نور عينك شاف جواله وهو يقول : يا الله صباح خير . تعلقت عينه بالاسم على شاشة الجوال . استلام رسالة من نور عينك . وقال : استلمها واستلم أبوها بعد
نور عينك ( وبعدين في سالفة الجوال الكل يسال عنه . ما تقدر تجيبه من عنده )
شيخ العرب كلهم ( أجيب لس صدام من عند أمريكا أسهل من أني أجيب لس الجوال من عند راشد )
نور عينك ( أرجوك حاول . عشان خاطري . الله يخليك )
عبدالله وهو يفكر . وأنتي ما تخطرتي على الا في ذا السالفة اللي ما اقدر أسوي فيها شيء . الله يسامحس شيخ العرب كلهم ( ان شاء الله بحاول بس ما أوعدس بشيء )
وحط عبدالله الجوال من يده وهو يشوف الجازي جايه تركب معه هي وعيالها





وفي ليلة ويوم تفركشت رحلة الشاليهات كلها والكل رجع البيت . وكل شيء طاح على راس حمدة والجازي وجواهر أنهم يلمون الأغراض كلها من الشاليهات وصارت الجمعه عند نورة في المستشفى اللي تقرر أنها تقعد في المستشفى كم يوم اللي ان يهبط ضغطها المرتفع . أول ليلة باتت أم حمد عند نورة بس في الليلة الثانية كانت أم حمد تعبانه فقررت أنها ترجع البيت ووضحه هي اللي تقعد عندهم . أم حمد أرجعت البيت من بعد صلاة المغرب على طول بعد ما اطلعت جات جواهر ومعها عبير اللي كان باين عليها أنها ما أخذت على خاطرها من كلام محمد لما حاولوا نجله ووضحه يتسامحون منها وعشانها كانت حابه لمتهم والقعدة معهم جات مع جواهر كدليل أنها ما هي بزعلانه بعكس شذى اللي ما كان لها نية أنها تجامل مرت ولد خالتها وتروح لها . وصارت الحشرة عند نورة اللي رايح واللي جاي ومن كثر الورد والهداية صاروا يطلعون الباقات برى الغرفة .

نورة كانت تعبانه شوي نادت نجلة وقالت لها تروح عند الممرضات وتسألهم عن دكتورتها أو تخليهم ينادونها لها . نجله وهي طالعة أشرت على عبير حستها متملله لان الغرفة انترست نسوان كبار . طلعوا وراحوا عند الاستقبال حق الممرضات اللي في نفس الدور محمد اللي كان توه جايب أمه بس ما ركب معها راح يوقف السيارة قبل شاف نجلة وهي واقفة عند الممرضات مع وحده محمد عرف عبير على طول يمكن بسبب الموقف اللي صار له معها

محمد حب يكون جنتل ويعتذر عن الكلام اللي قاله خصوصاً انه ما كان يقصدها بذا الكلام لأنه ما قد شاف عليها شيء يعيبها من يوم ما جوهم إلى ذا الحين . وبالعكس كان يقارن تصرفات شذى اللي تسويها قدامهم بعبير في باله ويستغرب كيف أنهم خوات بس الفرق بينهم فرق السماء عن الأرض

وقف محمد ورآهم وقال بكل أدب ورزانة : السلام عليكم
نجله وعبير ما لفوا عليه بس ردوا السلام بصوت واطي احسبوه واحد يبي يكلم الممرضات فأخذا جنب بالحالهم بعيد عنه ابتسم محمد وقال : نجول وش تسون هنا
لفوا البنات عليه يشوفونه وقالت نجله اللي أعرفت صوت أخوها : ما لك شغل عمتي مطرشتنا
عبير أول ما شافت محمد قالت لنجله : أنا بروح داخل .ومشت عنهم
محمد ما عطاها فرصة قبل لا تبعد خطوتين عنهم قال : أقول يا بنت خالد .
عبير وقفت مكانها تسمع وش يبي بس ما لفت عليه محمد قدم ووقف قدامها ونجله ألصقت فيهم تشوف التطورات الغريبة عند أخوها اللي قال : أنا أبي أتعذر منس عن الكلام اللي قلته في الشاليهات ذاك اليوم . أنا آسف صدق اسمحيلي والله يشهد أني ما كنت اقصد شيء فيه بس أنا إذا تحاكيت اعفس الدنيا شوي نجله كانت تسوي حركة نعم برأسها لعبير وقالت : واجد ما هب شوي وأسكتت لما عطاها محمد نظرة غضب وكمل كلامه لعبير اللي ما ردت عليه بحرف : . تدرين الواحد إذا شاف شيء يضايقه يخلط الأولي بالتالي .و أنا كنت معصب على اخـــــــــــــــ . وسكت محمد لما أرفعت عبير حاجبها وهي تنطرها يكمل كلمة اختس





ولما سكت محمد حبت عبير ترد عليه وتبرد خاطرها فيه يعني جاي بيعتذر ودمر الدنيا هي تدري ان أختها سبب اللي هي في ذا الحين بس ما هو من حقه انه يرجع يعيد نفس الكلام بصيغة ثانية عليها أرفعت رأسها وحطت عينها في عينه وقالت : ما ادري كل الرجاجيل في قطر متعودين يهينون ضيوفهم مره وراء الثانية مثلك ؟ أنا ما راح احكم على كل رجاجيل قطر أنهم ما عندهم ذوق مثل غيري ما قام يحكم على السعوديات أنهم قليلة أدب بكل وقاحة .لأني اعرف ان أصابع اليد الوحدة ما تتشابه بس بقول للسعوديات أني شفت في قطر رجال في منتهى قلة الذوق . ومشت وخلته واقف مكانه منصدم من ردها عليهوهو يتبعها بنظرته إلى ان أدخلت غرفة نورة .
نجله اللي ماتت من الضحك على محمد عقب ما فشلته عبير قالت له : كبســــــــــــــــــــــــــــــــــة . آخ يا الإحراج أنا منك ما راويها وجهي ابد بس من قدك بتصير مشهور عند السعوديات . وكل ما جو قطر بينشدون عن قليل الذوق وين بيته .






وضحه كانت قاعدة مع نورة وسعد وهي سرحانه في أفكارها بعد ما رجع لها سعيد جوالها من راشد وقال لها أن راشد ما لقى فيه شيء. وانه كان مفتشل وجهه استوى حمر وهو ساكت يسمعني أعاتبه على اللي سواه.وكانت مرتاحة واجد من موقف سعيد منها يوم تكلمت معه وقالت له عن الاتصال اللي اسمعوه . وعن المعرس اللي جايبته نوف لها غير مبارك حماها . ولما سألها عن الرجال اللي تكلمت عنه ترددت أنها تتكلم بس بعدين قررت أنها ما تكذب وقالت : . أنا بقولك الصدق لأني عمري ما سويت شيء أخاف منه ولا احسب حساب ربي فيه قبل لا احسب حسابكم أنا كنت اقصد بكلامي وسكتت شوي قبل لا تقول: . راشد واللي خلا سعيد يصدقها كان ألحمره والخجل اللي كست وجه وضحه وهي تتكلم وكملت : حتى وان كنت رديته بس هو في نظري ونظر كل الناس الرجال اللي تتمناه أي بنت .وما يسواه احد بين العرب كلهم. على الأقل في نظري أنا .وسكتت وضحه لما حست أنها قامت تخوره في ألحكي قدام سعيد
سعيد وهو يشوف وضحه بنظره حنان قال : شوفي وضحه أنا كلي ثقة في انس قلتي لي الصدق . بس ليه ما تكلمتي في نفس الوقت وبريتي نفسس من أي كلام بينقال عليس ؟
وضحه : سعيد أنا ما كنت اقدر أقول أي كلمة من بعد ما شفت راشد وهو معصب حسيت ان أطرافي أنشلت واللي زاد وغطا أني شفتك أنت بعد معصب والشيء الأهم أني ما اقدر أقول لكم أني كنت اقصد راشد قدامه وأنا رادته يعني عيبه في حقي وحقه . فاهمني يعني عيب أقول كذا عيني عينك وقامت وضحه تشر بيدها وهي تشرح لسعيد وتقول : يعني ما يصير أقوله انك كذا في نظري كيف أقولك قويه شوي أني أقول كذا قدامه استحي أقول كذا .
وضحه أسكتت لما شافت سعيد يضحك عليها . سعيد بعد ما ضحك عليها وطريقة شرحها للموقف رجع يسألها : وضحه قولي لي الصدق أنتي ليه رديتي راشد يوم انس تقولين انه ما يسواه احد عندس
وضحه على طول أرجعت تناقض نفسها وقالت بسرعة : ومن قال أني أبيه أو أني أبي أعرس من الأصل





سعد : وضحه وش فيس صار لي ساعة اكلمس ولا أنتي معي ؟ وين وصلتي ؟
وضحه : معكم بس راسي يعورني شوي من كثر الزوار اليوم قالت اسكت شوي ارحم عمري بس أنت ما تخلي حد يرتاح
سعد : اللــــــــه ذا الحين أنا الملسون ؟ زين الله لا يحرمس من البطل الصامت .وكان يقصد راشد بكلامه ما علينا وش رايس في بنتي؟ من تشبه ؟ تشبهني أنا يوم أني صغير صح ؟
وضحه : سبحان الله كوبي منك بس في فرق بسيط ما يبين . لا تخاف ما احد بيلاحظه
سعد وهو يشوف بنته بعد ما صدق وضحه قال : وش هو؟
وضحه : ان ما في بينكم أي شبه .
سعد عصب على وضحه وقال : عدال عد أنتي اللي بيطلعون عيالس فريقين الأسود والأبيض لا بس تدرين أنا وثق في جينات اخوي . كلهم سود سعد بعد ما كمل كلامه عرف انه غلط في الكلام مع وضحه وخاصة بعد القرصة القوية من نورة ووجه وضحه اللي استوا احمر رجع يقول اسمحيلي وضحه والله كنت امزح بس سعد ما كان يدري أنا وضحه استوا وجهه احمر لما تخيلت لأول مرة في حياتها عيالها من راشد كيف بيكون شكلهم عمرها ما فكرت في الأشكال اختارت الأسماء والعدد بس شكل أبدا ما طرا عليها التفكير فيه .

سعد اللي حب يغير السالفة وفي نفس الوقت يوصل سلام راشد لنورة قال : على طاري راشد . نورة ترى راشد يسلم عليس ويتسامح منس عشان ما جاس اللي ذا الحين ويقول انه إذا قدر وخلص المشكلة اللي عنده بيمر عليس الليلة . سعد بعد ما قال كلمة مشكلة وبحلقوا نورة ووضحه فيه ابتسم وقال : ما شاء الله عليكم صدق نسوان الفضول بيذبحكم أكيد تبون تعرفون وش السالفة ؟
نورة : سعد .
سعد : عيونه .
نورة : جيب من الآخر
سعد : حبي أنتي ليه من عقب ما ولادتي وأنت مستقويتن علي
نورة : من اللي شفته يا حبي في الولادة اخلص قول السالفة ؟
سعد : الله يسلمكم راشد دخل مع واحد بروفسور والله ما ادري وش أصله المهم . ادخلوا يسون عمليه لبزر داعمته سيارة وجابه الإسعاف وكانت حالته خطيرة العملية كانت أصلاً ما هب لراشد هو داخله جراح مساعد ويوم شاف ان الصبي متكلف وان تأخير العملية له ممكن يذبح تهاد مع البروفسور الحبيب ما يبي يمسكه قبل لا يوقعون أهلة على بتر رجله . وضحه ونورة كرمشت وجوهم وهم يسمعون سعد . وكمل سعد : وعلي بال ما أوصلوا أهله كان الصبي قد مات الاخو حط راشد في الواجهة وقال روح أنت علم أهله انه مات أنا ما اعرف أتكلم عربي وطق وخلا راشد في وجه المدفع أم الصبي يوم درت ان ولدها مات سوت لهم فضيحة في المستشفى وأمسكت راشد وتمت تدعي عليه وعلى عياله . ما درت انه ما بعد أعرس عشان تجيه عيال ؟. المهم ما أطول عليكم أم الصبي اشتكت على راشد في الشرطة على أساس انه ذبح ولدها . عاد هو انشغل طول ذا اليومين في ذا السالفة رايح جاي على الشرطة والمحامي والمستشفى تحقيقات هنا وهناك بس الحمدلله اللي كانوا معهم في غرفة العمليات اشهدوا مع راشد






وضحه بعد ما راح سعد عنهم. ونورة أدخلت تأخذ لها دش سريع قبل لا تنام أخذتاها أفكارها عند راشد أنا أقول هو ليه ما بين ذا اليومين الله يكون فيعونه يا رب يحفظه من كل شر . هالا يكون الله استجاب لدعوتي في الشاليه لا بس أنا دعيت على الجوال ما هب على راشد . رن جوال نورة فزع وضحه وراحت له تركض عشان ما يزعج البنت وهي نايمة . كان راشد اللي متصل . ترددت وضحه قبل لا ترد عليه بس ما أقدرت تقاوم أنها تضغط على الزر



وضحه : .
راشد : نورة ؟
وضحه : كان خاطرها تقول وضحه ما تنفع بس . قالت : ولا لك لوا معاك وضحه .
راشد اللي شدت أصابعه على الجوال قال بطريقة يحاول يتجاهل فيها وضحه ولا يعطيها وجه : ممكن اشف نورة أنا برى عند الباب إذا هي نايمة بطرش مع السستر إغراض عطيها نورة
وضحه اللي أعرفت انه أكيد قرأ المسجات بعد ذا الأسلوب في الكلام معها واللي يختلف كلياً عن آخر مكالمة بينهم .بس أرجعت قالت يمكن من الظروف اللي كان فيها ذا اليومين ردت عليه : نورة قاعدة يا حياك تفضل ذا الحين بفتح لك الباب . وسكرت الجوال وألبست نقابها بسرعة لان العباية كانت إلى ذا الحين عليها وشدت الستارة على سرير نورة عشان إذا اطلعت تسد عليها شوي بعد ما دقت عليها الباب تبلغها بوصول راشد . راحت وضحه تفتح الباب لراشد . كانت تحس ان الباب فجأة صار كبير بصورة مخيفة حطت يدها على مفتاح الباب وافتحت الباب لراشد وهي واقفة وراء الباب



راشد اللي كان واقف قدام الباب ينطر وضحه تفتح له الباب كيف لازم أعاملها ؟ أخاف من اشوفها اخنقها على طول ؟ لا لا يا راشد لازم تمسك أعصابك لازم ما تخليها تعرف وش اللي ورآك . وبعدين لا تنسى انك تبيها تطمن من طرفك انك ما تبيها عشان اطلع الكلب اللي ما يسواه احد إيه هي إذا درت أنها ما عادت تهمني في شيء أكيد بتخليه يجي يخطبها وذيك الساعة أنا اللي براويها . والله لا أذلها ذل ما عقبه ذل . انتبه راشد لصوت المفتاح في الباب
انفتح الباب بس ما كان في حد واقف . نقز راشد لما سمع صوت وضحه من وراء الباب تقول : حياك يا ابو زايد
دخل راشد ودخل ورآه واحد حط باقة ورد كبيرة . عطاه راشد المقسوم وطلع الرجال وضحه اللي كانت واقفة وراء الباب ردت الباب بس ما سكرته وأشرت لراشد بيدها على كرسي ما يكشف نورة وهي طالعه من الحمام . وهي تقول : تفضل حياك



قعد راشد في المكان اللي أشرت له وضحه عليه وهو ساكت ومنزل رأسه في الأرض حاولت وضحه تفتح معه حوار كجس نبض لان فكرة ان راشد ما شاف شيء في الجوال ما أقنعتها أبداً وفي نفس الوقت إذا هو قراهم ليه ما تكلم؟ ليه ما علم قامت وضحه تتحفاه كان يرد عليها بكلمات بسيطة وفي حدود المجاملة بس بدون ما يرفع عينه فيها كأنه يقول لها تلايطي حست وضحه بالارتباك من الموقف . واللي أسعفها ان نورة اللي اطلعت من الحمام وألبست نقابها أفتحت الستارة وهي ترحب براشد قامت وضحه تقدم له سلة الكافي وتصب قهوة ما اخذ الفنجال من يدها بس شل حبة كافي من السلة وهو يسولف مع نورة عن سوالف سعد مع بنته مشتها له وضحه لأنها وهي تقدم له السلة لاحظت وجه راشد من قريب كانت عيونه تعبانه والهالات السود حواليها لحيته باين عليها أنها من كم يوم ما خففها الوجه الأصفر . زرا ر ياقة الثوب اللي مفتوح بإهمال قعدته على الكرسي اللي تختلف أميه وثمانين درجه عن قعدت كرسي الشاليه كأنه كبر عشرين سنه فجأة . وضحه عورها قلبها على راشد وكسر خاطرها وقالت أكيد ذا كله من اللي صار معه ذا اليومين . كانت قاعد على الكرسي البعيد وهي ساكتة تسمع صوت راشد أتعبان وهي تلعب بطرف شيلتها وتفكر فيه وتتمنا انه يلف عليها فجأة ويهادها وحتى إذا ضربها عادي بس ما يحقرها بذي الطريقة . ليه هو ساكت ليه ؟ ما هب ذا راشد اللي اعرفه ؟ تحاكا ؟ قول أي شيء وضحه كانت مأخذتها أفكارها إلى ان قالت لها نورة : وضحه فديتس جيبي شواخ لعمها خله يشوفها قامت وضحه وشالت البنت وقربت من راشد عشان تعطيه إياها
راشد اللي كان يعاني اكبر معانة عشان ما يرفع عينه يشوف عيون وضحه اللي كان مشتاق لهم بصورة ما عاد يقدر يخفيها . اخذ البنت من يد وضحه وتكرر معه نفس الشعور اللي يجيه من لمست وضحه له . كان يضحك مع نورة لما قالت له ان سعد يقول أنها تشبهه وهو صغير راشد كان وده يقول أنها نسخه من خالتها وضحه بس سكت . طلع راشد من جيبه ألفين ريال وحطهم في مهاد شيخه وبعد ما حبها على رأسها قام عشان يحطها عند أمها قربت منه وضحه عشان تشيلها عنه وهي تقول : خلك قاعد أنا اللي بوديها

راشد اللي خانته عينه وتعلقت بعين وضحه حب يعقب عينه ونفسه ووضحه معهم قال بنزره : لا البنت ما تحفظها الا أمها .
وضحه ونورة صدمتهم جملة راشد والطريقة اللي انقالت أبها . لف راشد على نورة يعطيها البنت وأطرت أنها تتجاهل اللي أنقال عن أختها . اما وضحه فما استحملت كشت على طول وراحت تنخش عنهم وقفت جنب الدريشة تشوف الشارع منها وهي تغسل الشارع بدموعها في الدريشة .أسمعت راشد وهو يسلم على نورة بيطلع .وطلع وسكر الباب

راشد اللي شاف وضحه تروح بسرعة وتختفي وراء حد الطوفه بطرف عينه حس بنغزه في قلبه بعد ما سلم على نورة وهو بيطلع وماسك الباب لف يشوف وضحه اللي معطته ظهرها بدون ما تدري ان الدريشه عاكستها . صدق أنها كانت نظره سريعة لوضحه بس كانت بمثابة الجرعة الا خيره لراشد لأنه يدري انه ذا الحين ما راح يشوفها لفترة طويلة رمش بعينه رمشة طويلة كأنه يسكر على وضحه فيها . ولف وطلع من الباب وهو مغمض عينه .





اطلعت نورة من المستشفى وراحت بيت أهلها تقعد عندهم فترة النفاس بس بعد حب اخشوم مع سعد
أم راشد كانت كل يوم تجي تشوف سميتها وبعد ما اطلعت نورة بأسبوع . أم راشد كانت تبي تروح لبيت ابوسعيد هي مع أختها وعبير اللي متواعده مع نجله يشوفون بعض هناك . ما لقت حد يوديها الا راشد اللي كان توه جاي من الشغل وما له مزاج لشيء بس ما حب يكسر خاطر أمه وافق انه يوديهم شذى اللي ما كنت تبي تروح معهم. تبي تنطر راشد إلى ان يجي من الشغل يمكن تلقا فرصة وتكلمه فيها لما أعرفت ان راشد هو اللي بيوديهم . أصرت أنهم ينطرونها إلى ان تلبس عشان تروح معهم راشد اللي كان واصل حده من كل شيء قال ما فيه نطره اما يركبون ذا الحين ولا يقعدوا مكانهم . أم سلطان قالت نروح وخلها تقعد لأنها يوم قلنا له قومي ما قامت شذى من حرتها على أمها أدخلت غرفتها وهي تبكي . والباقي راحوا يركبون السيارة .





أوصلوا بيت ابو سعيد وقف راشد سيارته في نص الحوش ونزل النسوان وشاف عمه وهو جاي من المجلس الخارجي ونزل يسلم عليه . ابوسعيد قلط راشد في المجلس الداخلي وأمر بالقهوة لهم .
سولف شوي مع راشد وبعدين قاله انه بيروح يبدل ثيابه ويتوضأ لصلاة العشه وقاله لا تروح اقعد انطرني خلنا نروح المسجد مع بعض وعقب تتعشا معي وهو طالع قاله انه بيخليهم يجيبون له شيخة تسلم عليه . طلع ابو سعيد ورد الباب وراه




راشد اللي من التعب تمدد واخذ الريموت يفرفر في الدش بس وهو كاتم الصوت . وهو متمدد سمع شيء خلاه يقعد على حيله . كان صوت وضحه اللي يعرفه بين مليون صوت من الارتباك وعشان يسمع وش كانت تقول عدل سكر التلفزيون خير شر وركز مع صوت وضحه ما تخيل انه بيسمع صوتها بذي السرعة بعد ما اقنع نفسه انه ما هب سامعه أو شايفها مده طويلة . على الأقل إلى ان يعرف من أصحاب ذا الأرقام .





وضحه اللي كانت تكلم سارة : خلاص عاد انزلي ذلتينا ما يسوا علينا ذا الهدية ذا اللي جايبتها لنا ؟ هذا أنا انطرس عند باب الصالة .إيه أنا اللي عند الباب ادخلي .
أدخلت سارة وأحشرت المكان بصوتها وهي تسلم على وضحه . راشد حس أنها بطت رأسه من صوتها وحشرتها .
سارة بعد ما سلمت على وضحه : وضوح ان قالت الحين أنتي مب فاضيه لي .
وضحه باستغرب : ليه يعني
سارة : شفت الرنج الأسود . قلت بس حبيب القلب هنيه خلاص ولا أنتي صوبي
وضحه : أي رنج اسود ؟
سارة وهي تشر على سيارة راشد اللي كنت سيارتها السوبر واقفة قدامه : وحوله هذيه اللي واقف في نص الحوش
وضحه اللي شافت سيارة راشد بعد ما ريوست سيارة سارة بتطلع قالت : والله ما ادري اذا هو كان هنا ما حد قالي بس تعالي يمكن جايب أمه .
سارة : وضوح رويني إياه الله يخليج بس مره
وضحه : وين ارويس إياه اوديس مجلس الرجاجيل ؟
سارة : عادي بروح ما فيها شيء بدش وبقول لهم وين الدكتور راشد ؟ لي شفته بحب خشمه وبطلع .
وضحه عصبت على طريقة كلام سارة وقالت : ساروه وجدري
سارة : أنا أبي اعرف شيء واحد ؟. أنتي ما رديتيه؟ ليش تغارين عليه ؟ يختي خليني أترزق الله. يمكن ينعجب فيني ويأخذني ويرزني جنبه في الرنج .فديت اللي يركبون الرنج كلهم .
وضحه وهي تسوي نفسها ما هي بمهتمة : اذا تبينه عليس بالعافية . الطير وسبوقه
سارة اللي كانت مهتمة تعرف صدق قالت : وضوح تعالي بسالج سؤال بس أمانه أمانه تقولين الصدق . إذا أنعجب فيني راشد وتزوجني وشو بتسوين
وضحه اللي كانت تشوف سارة وهي تقرص عيونها فيها سكتت شوي وبعدين قالت : ولا شيء بس بتعدل وتزين وبحضر عرسكم وبحط لكم السم في العصر .عشان أذبحكم . وبرقص على جثثكم فوق الكوشة .لأني بكون افتكيت من الاعلل اللي على كبدي .
سارة : بل صج بدوية ما تتفاهمين ما نبيه خله كله لج
جاهم ابو سيعد وهم عند الباب سلمت عليه سارة وتحفاها ابو سعيد قال ابو سعيد لوضحه تقلط رفيقتها داخل عشان ما هيب عدله توقفها عند الباب ووضحه وسارة داخلين في الصالة بطل ابو سعيد باب المجلس الداخلي اللي كان مردود وقال : حياك يا راشد نروح المسجد


وضحه وسارة لفوا على طول يشوفون ابو سعيد من يكلم بعد ما اسمعوا اسم راشد
طلع راشد وهو منزل رأسه بسرعة وراح مع عمه المسجد اما سارة فقعدت تخز راشد من فوق إلى تحت عدل وقالت لوضحه قبل لا تلف عليها : صج أبدوي كشخه تحسينه رزه. . وشافت وضحه اللي كانت تتنافض وقالت لها : وضوح اشفيج
وضحه اللي كانت متأكدة أنا راشد أكيد سمعها تتكلم عليه : وش فيني فيني انه سمع ألحكي اللي قلناه كله . ذا اللي فيني يا العوبه

راشد اللي كان رايح مع عمه مشي للمسجد القريب منهم .تفكيره كان كله في وضحه واللي قالته هي ورفيقتها . رفيقتها تقول لها رعي الرنج حبيب قلبس ؟ معقولة لالالا وألف لا . راشد لا تخلي كلام النسوان يلعب بك . هي لو تحبك ما كانت ردتك . ويمكن هي تسوي كذا عشان توهمهم أنها ما تعرف حد ثاني والدليل أنها قالت لريفيقتها اذا تبينه أخذيه كيد بتقول لها أخذيه عشان أروح من طريقها ويخلى لها الجو مع حبيب القلب . لكن لا أنا اللي بوقف في حلقها لو اخذ أمية مره . هي أوصلت معها أنها تبي تسممني في عرسي . زين يالعجوز أنا بعرس وبقعد على الكوشة لكن اما ني برجال ان خليتس تعرسين ولا توصيلين كوشة برجلس . بس رفيقتها تقول أنها تغار علي يعني تحبني إيه اللي يغار يحب . تحبني ؟ تحبني أنا ؟
وتذكر فجأة كيف كان شكل وضحه يوم شافها من شوي كانت نظرة غصب عنه وما كان قاصدها بس يوم عدل قعدته بعد ما سمع صوتها لمحها من فتحت الباب كان معطته ظهرها ومأخذه زاوية عشان ما يكشفها الدريول من الباب القزاز حق الصالة هو صحيح ما شاف منها شيء غير ظهرها بس كانت أول مره يشوف وضحه بدون عباية على رأسها وضحه كانت لابسة بادي وردي وتنوره ورديه و . وإجلال بنفسجي على رأسها . لما رجع راشد يتخيل اللي شافه بلحظة قال هذي ما هب فلة . ذي باربي . صوت ابو سعيد وهو يكح رجع راشد للواقع وخلاه ينحرج من عمه . سبحان الله قلب المؤمن دليله كنه حاس أني أتخيل بنته . استغفر الله أنا وش قاعد أفكر فيه . عيب عليك يا راشد مهم صار هذي بنت عمك يعني شوفتك تعوذ من الشيطان وقول استغفر الله . استغفر الله استغفر الله. استغفر الله
ابو سعيد وهم واقفين عند باب المسجد قال : ما شاء الله عليك يا راشد زين يا أبوك الواحد يذكر ربه ويستغفره وهو رايح المسجد . الله يبارك فيك .راشد ما كان منتبه انه كان يستغفر بصوت مسموع .



ذي الليلة ما رقد فيها فيه راشد ولا وضحه كل واحد في هوى باله . وضحه تفكر في راشد اللي أكيد سمع كلامها عنه وش بيقول عنها ذا الحين .؟ هي فكرة انه حاقرها ما هي قادرة تتعود عليها أو تتقبلها إلى ذا الحين ؟ اجل وش بيسوي فيها بعد ذا اللي سمعه
اما راشد فكان كل ما غمض عينه يبي ينام قامت ترزز قدامه باربي البدوية





كان عمر شيخه خمسة عشر يوم بضبط في اليوم اللي تحددت فيه ملكة نجله . ابو سعيد عزم الرجاجيل من أهل ناصر على العشا عندهم بيجتمعون عقب صلاة المغرب في مجلس ابو سعيد . بيملكون أبهم وبعدين بيقعدون عندهم إلى العشاء . الكل اجتمع في بيت ابو سعيد من نسوان ورجاجيل والسبب ان ابو سعيد كان مسوي عشا المعرس وأهله اما النسوان فكانوا جواهر وعبير وأم راشد وأم سلطان اللي جات تونس مع العرب خصوصي أنها خلاص ما باقي على سفرهم الا يومين . وشذى اللي كانت جايه غصب عنها لان أمها ما رضت تقعد في البيت بالحالها .





العفسة كانت في المطبخ عند وضحه وحمده ونوف والجازي من الصبح وهم في المطبخ ما خلوا شيء ما سوه كله عشان خاطر عيون العروس اللي قاعدة في غرفة وضحه وتلعب سوني ولا كأنه ملكتها اليوم . نسوان بيت ابو راشد جو من عصر والجمعة للبنات صارت في الصالة اللي فوق اما الكبار فقعدوا في المجلس الداخلي على الساعة أربع ونص نجله بدت تتحول على وضحه وعبير في غرفة وضحه
وضحه لما شافت وجه نجله الشاحب قالت : نجول وش فيس
نجله عمتي بطني يتقطع على من الوجع . وبدت تبكي . وهي تقول بطنــــــــــــــــــــي عبير : سلامتك اجبي لك حاجه عشان المغص ؟
وضحه وهي تشر على عبير من فوق راس نجله عشان تسفها . قالت لنجله : ما عليس شر ان شاء الله . ولمتها وقالت لها: النون حبيبي ألملكه ما هي نفس الروحة للمدرسة إذا ما بغيتها قلتي بطني يعورني . هذا زواج. وحياه ثانية من ذا الحين قبل لا يجون الرجاجيل كانس ما تبين العرس. ندق عليهم نقول لهم لا تجون وعن الفضايح قدام العرب . ولا له داعي حيلة عوار البطن قديمة واجد وضحه كانت تتمنا ان نجله تعاف المعرس من كل قلبها عشان خاطر عبدالله
نجله : والله العظيم أني بطني يعورني أنتي ليه ما تصدقيني
وضحه : أمنت بالله . عبير حبيبتي روحي تحت في المطبخ الداخلي في داخل أول درج علبه صغيرة فيها مرة . سخني نص كوب ماي في سخان الماي الكهربائي وذوبي كم حبه مرة فيه وعطيها تشربه أنا ريحتي كلها طباخ من المطبخ بروح اسبح .





أدخلت وضحه الحمام بسرعة . كانت هي اللي بطنها يعورها لأنها وهي طالعه من المطبخ شافت خشم الرنج الأسود واقف في الطبيله ما تدري ليه حست أنها ما شافت راشد من زمان ؟ ليه خاطرها تشوفه ؟ وقامت تفكر وضحه ليه تعذبين حالس ؟ مع واحد ما هب من صوبس واحد ما فكر فيس وهو ما عنده الا أنتي قدامه واحد ما خاف انه يقول رأيه بكل صراحة فيس ؟ بس هو كان معي في الشاليهات غير غير يعني كيف ؟ غير وبس الله يسامحك يا راشد ليه تسوي فيني كذا ليه تعذبني معك سنين وأنت لي وأنا لك وفي أيام من بعد رجوعك تقول ما أبيها . وعقبها ترجع تتعامل معي بطريقة عكس كلامك وذا الحين خير شر ما تشوفني قدامك تعبت أفكر فيك وفي أفعالك خلاص يا وضحه لازم تنسين راشد تنسينه إلى الأبد .

وهذا جزء ثاني لعيونك خااkالد



الجزء الثالث والعشرون :




قبل صلاة العشا في بيت ابو سعيد آخر واحد دخل مجلس الرجاجيل الخارجي كان عبدالله . قال يمكن إذا تأخرت يكونون تملكوا واخلصوا هو ما هب ملزوم يحضر ألملكه بس أبوه مأكد عليهم كلهم يحضرون العشا عبدالله اللي كان واقف عند باب المجلس اخذ نفس عميق ورسم ابتسامة ناعمة على وجهه ودخل المجلس وهو يقول : السلام عليكم
ابو راشد اللي كان يكلم ناصر لف على عبدالله يوم اسمعه وقال : خلك أنت عبدالله اللي بيجيبه عبدالله جعلك تحيا . املكنا ضيع البيت وهو ذا الحين واقف على دور المحطة . رح جيبه .
عبدالله حس ان أبوه وهو يتكلم كأنه ماسك في يده فرد ويصوب عليه وكلمة رح جيبه كانت الطلقة . ما قدر الا انه يقول لأبوه : تم ذا الحين بروح له وطلع بسرعة من المجلس
راشد اللي كان عارف ليه عبدالله تأخر عليهم عوره قلبه على أخوه الصغير قام بسرعة هو بعد وقال وهو على باب المجلس لعبدالله : عبدالله اصبر أنا جاي معك .
راحوا يجيبون الاملك وهم في صمت شديد . راشد حب يحترم صمت عبدالله ومحاولته انه يكون غير مهتم للي يصير .







نزلت نجله مع عمتها وعبير في المجلس الداخلي ينطرون حمد اللي قال لها ان الاملك بيجي مع الشهود عشان يسألونها إذا هي موافقة ولا لا .اما باقي النسوان فادخلوا في المقعد إلى ان يروحون الرجاجيل
نجله كانت ترجف من تحت العباية اتصل حمد وقال لوضحه تبطل الباب وترده وتخلي نجله جنب الباب عشان يسألها الشيخ سألها الشيخ في حضور الشهود سعد وعم المعرس وافقت نجله وهي تضغط على يد عمتها عشان توقف الرجفة اللي فيها أول ما راحوا الرجاجيل وضحه كانت تبي تهدي نجله من الرجفة اللي فيها .قعدتها على اقرب كرسي ولمتها وهي تقول لها : ألف مبروك يا العروس
لكن نجله أحضنت وضحه بقوة كبيرة وهي ترتجف أكثر من قبل وقالت لها في أذنها لما شافت أمها واللي معها داخلين : قول لي انه حلم .
وضحه اللي استغربت قالت : لا حبيبي ما تتحلمين . خلاص ذا الحين أنتي عروس
وضحه قالت ذا الكلام عشان نجله تفكها. بس نجله لمتها أكثر وقالت بصوت اوطا في أذونها خلاها تتخيل أنها أسمعت اللي قالته نجله : قولي لي أن اللي صار في المستشفى حلم ؟
وضحه أفتحت عيونها على الآخر وهي تحاول تستوعب اللي قالته نجله .وبعد ما تأكدت وضحه ان نجله أكيد شافت أو أسمعت شيء من اللي صار في المستشفى لمتها بكل قوتها وقالت لها الكلمة الوحيدة اللي لازم تنقال ذا الحين : حلم . كان حلم .


غصب على عبدالله حضر الملكه .كان يشوف المعرس وهو شوي وتفكك براغيه من الفرحة . والله ما ني بلايمك . يا حظك ؟ من الليلة بتملك الدنيا وما فيها عبدالله كان يحس بوجع في صدره كان الوجع يقبض عليه أكثر وأكثركأنها يد تعصر صدره عصار. بس أول ما تملكوا فكته اليد اللي كانت طابقه على صدره وخلت في جوفه بقايا قلب . تفاجئ عبدالله براشد وهو واقف على باب المجلس يقول له بصوت يسمع اللي حواليه: عبدالله سيارتي ما ادري وش فيها ما تشتغل توصلني المستشفى داقين على عندهم حادث خطير ولازم أروح بسرعة
عبدالله بدون ما يرد عليه طلع على طول وراشد كان في ظهره





راشد بعد ما طلع مع عبدالله في سيارته تموا ساكتين اللي ان أوصلوا إلى المستشفى ووقف عبدالله السيارة قريب من باب الطوارئ حق المستشفى عبدالله اللي كان يشوف الشارع قدامه وهو ساكت ينطر راشد ينزل لف على راشد لما قال له : لا توقف أنا ما احد دق علي. بس كنت ادري انك ضايق من ذا اللي صار ولا بغيتك تقعد معهم أكثر. سكت راشد وهو متفاجئ بلمت عبدالله له وهو يبكي لمه راشد شوي وهو يفكر في عبدالله اللي دايم وهو يضحك ويتمسخر على الناس . عبدالله الرجال اللي يسبق سنه بمراجله يكون رقيق القلب بذا الشكل راشد قال لعبدالله عشان يرطب الجو شوي : حنا بنطول كذا ؟ بيشكون فينا الناس .



إلى الساعة 12 فليل وهم يتمشون في الشارع بس بعد ما بدلوا وصار راشد هو اللي يسوق السيارة . ارجعوا البيت اللي كان باين عليه ان أهله كلهم راقدين . عبدالله على طول راح لغرفته وسكر عليه الباب اما راشد فراح للمطبخ الداخلي بعد ما تأكد ان ما به حد من النسوان في الصالة أو المطبخ لأنه كان ميت من الجوع . وكان يستحي يقول لعبدالله تعال نأكل





راشد اللي كان حاط له غرشة بيبسي يشربها مع السندويتش اللي مسويه بمزاج واحد ميت جوع خبز أيراني وعليه جبن مع رشة ملح وفلفل كرستال. توه قاعد على الكرسي يأكل. شاف شيء يتحرك عند الباب . رفع رأسه ولقمته في حلقه . واللي شافه خلا لقمته توقف مكانها . كانت شذى اللي قررت أنها تلبس عباية وجلال عشان تلفت نظر راشد لها . جات على طول وأقعدت مقابل راشد على الطاولة


راشد لما أقعدت شذى قدامه على الطاولة في المطبخ الداخلي حاول انه يقوم ويطلع بس شذى وقفته يوم قالت له بوجه حزين ونظرة مكسورة ما تعودها راشد من شذى : لا تقوم إذا كنت متضايق مني أنا اللي بطلع راشد أنا عمري ما تخيلت في يوم من الأيام ان الناس بتنفر مني إلى ذا الحد حرام عليك أنا ايش سويت لك عشان تتجاهلني وتعاملني كأني نكرة حرام. والله حرام عليك .
راشد اللي كسرت خاطره شذى قال حرام هي مهما سوت أو غلطت هي في النهاية بزر . رد عليها راشد : شوفي يا شذى أنا ما اتجاهلس أو اعاملس مثل النكرة أنا احميس من نفسس من الأحلام والأفكار اللي ما هي بموجودة الا في راسس .
ردت عليه شذى باحتجاج : بس هذي أحلامي وأفكاري أنا وكل إنسان يا راشد حر في أحلامه وأفكاره إذا هو ما يؤذي غيره .
راشد اللي حط السندوتش من يده في الصحن قال : معاس حق بس أنتي كنتي مؤذيه لي ولنفسس أكثر من مره . وكله بسبايب ذا الأحلام
عبير اللي بدت ترجع لطبيعتها قالت له : آذيتك لما عبرت عن مشاعري بعفويه وبدون ما أحاول أتصنع . عبرت عنها قدام الكل وبدون خوف لأني ما سويت شيء خطاء . قامت شذى بتطلع وقبل لا تطلع لفت على راشد وقالت : آسفة إذا كنت تأذيت مني ومن تعبيري عن حبك . بس على الأقل أنا اعبر قدام الكل ماهو مثل غيري اللي يدعون العفة والطهارة وهم قمت القذرة . وطلعت شذى من المطبخ بدون ما تلف على راشد اللي رفع رأسه بسرعة عن الصحن وهو مبحلق عينه فيها بعد الكلام اللي قالته

نجله كانت متوسده يد وضحه وهم نايمين على السرير في غرفة وضحه . كانت تحول توقف دموعها اللي ما هي بعرفه هي ليه تنزل . كانت حاسة بخوف وغربه من كل اللي حواليها. كانت متعلقة في يد وضحه طول اليوم مثل ما كانت تسوي وهي صغيره . حتى لما جاتهم أم ناصر بعد ألملكة تبي تلبسها العقد اللي هي جايبته هديه منها لنجله حاولت وضحه تخليها تفك يدها بس بدون فايدة وضحه كانت تتعذر عليها وتقول أنها مستحيه . ارفضت تخلي وضحه وترجع البيت . أطلبت من وضحه أنها تنيمها على يدها مثل ما كانت تسوي لها وهي صغيره .







وضحه اللي كانت منسدحه جنب نجله وهي حاضنتها وتدعي ربها ان نجله تكون صدقتها لما قالت لها حلم قالت له : النونو حبيبي ليه تبكين حرام عليس اللي تسوينه بعمرس أنت عروس المفروض انس فرحانة ومستانسه قولي لي جعلني فداس وش اللي فيس ؟
نجله وهي تمسح الدمع اللي يسيل على خدها : ما ادري ما ادري ليه ابكي
وضحه وهي تسحب يدها من تحت راس نجله وتقعد على السرير : ما به شيء اسمه ما ادري . لازم فيس شيء أو انس ضايقه من شيء ؟ أنتي ندمتي انس اعرستي؟
نجله اللي تمت منسدحه ومعطيه ظهرها لوضحه : عمتي عمرس حلمتي حلم حلو لدرجة انس تمنيتي انه يكون صدق؟
دمعت عين وضحه غصب عليها وهي تسمع سؤال نجله لها وقالت لها : إيه حلمت وتمنيت بس عرفت في النهاية ان الأحلام عمرها ما تتحقق . على الأقل بالنسبة لي أنا لكن الناس ما تتشابه في أحلامها. ناس تحقق أحلامهم قبل حتى لا يحلمون فيها . وناس حتى الحلم يبخل بنفسه عليهم . . وناس يتمنون لو يكون واقعهم حلم وينتهي . وذا الحين أنا اللي بنشدس وش ذا الحلم اللي حلمتي فيه

نجله سكتت شوي وبعدين قالت : ما ادري إذا لي حق أقول حلمي مجرد قول ولا لا ذا الحين ورجعت تسكت كأنها تفكر وتقيم كلامها قبل لا تقوله ورجعت تكمل : عيب لو البنت أحلمت بواحد مجرد أحلام نوم وتمنت في يوم من الأيام أنها تحقق بس عشان تعرف وش نوع أو حقيقة الشعور اللي كانت تحس فيه في الحلم أنا يوم أني كنت في المستشفى حلمت حلم غريب ومخيف بس كنت أحس بعد ما قعدت من النوم أني فرحانة ليه ما ادري
وضحه اللي كانت عرفه الحلم مسبقاً وتنطر التفاصيل من نجله قالت : وش الحلم اللي حلمتي به
نجله اللي إلى ذا الحين ما تحركت من مكانها قالت وهي معطيه وضحه ظهرها وتتبع بنظرتها المغيمة من الدموع حد طوفة الغرفة قالت : حلمت أني كنت ابكي في مكان كله ظلام كنت اسمع ناس يتكلمون كلام ما افهمه بس ما أشوفهم والظلام كان كل ما له ويزيد من حولي مشيت أتحسس خطاي وسط الظلام بيدي . فجأة حسيت بيد تمسكني وتجرني لنور باين من بعيد. كل ما قربنا من النور كان صاحب اليد اللي ما سكتني يبان أكثر. كانت عيني طول ما حنا نمشي عليه أبي اعرف هو من؟ بس يوم وصلنا للنور . جهرني الشعاع في عيني ولا قدرت أشوف وجهه في النور يوم لف على وقال : لا تخافين حتى الموت . ما يقدر يفرقنا . وفك يدي وراح يوم تعودت على الشوف في النور ما قدرت أشوف الا ظهره .
وضحه اللي ارتاحت ان نجله ما شافت أو أسمعت شيء من اللي صار وان الحلم اللي شافته كان مجرد حلم . ردت عليها : هااااااااااااااا ذا أكيد ناصر زين يعني الحلم بشارة خير لس .
نجله اللي رجعت تتعبر من جديد أقعدت وقالت : لا . ولفت على وضحه وهي تجهش في البكي وحضنتها وهي تقول : التفت على كان عبداللــــــــــــــــــــــــــــــــــــــــــــ ـــه .






راشد كان بينفجر رأسه من التفكير شذى وش كانت تقصد باللي قالته ومن تقصد بذا الكلام ؟ معقولة . لالالا . بس لا أكيد هي كانت تقصدها. بس هي وش اللي عرفها بذي السالفة شيء أكيد انه ما هب منها . ولا أظن ان عبود أو سعيد بيعلمون حد باللي صار ؟ اجل أكيد هي تعرف شيء ؟ يمكن تعرف أنها على علاقة بحد؟ ويمكن تعرف من بعد ؟ إيه ولا ما تكلمت بذا الثقة أنا لازم اعرف كل اللي تعرفه عن وضحه . إيه بس لازم اعرف بسرعة هم باكر بيسافرون . قرر راشد انه بكرة بيداوم نص يوم بس وبيرجع عشان يتحقق من شذى


وضحه : طبعاً بتشوفين عبدالله في الحلم لأنه آخر واحد شفتيه قبل لا يغمى عليس أنتي بنفسس قلتي ذا الكلام لعبير في الشاليه ولا نسيتي ؟
نجله اللي فكت عمتها وسنتدت ظهرها على راس السرير قالت : لا ما نسيت بس يمكن عشان عبدالله هو الوحيد اللي ما توقعت يقول لي ذا الكلام خلا ذا الحلم يتميز عندي وينحفر في راسي . ولما قامت تشوفها وضحه بنظرات غامضة فسرتها نجله أنها نظرات دفاع عن عبدالله . عشان كذا قالت : ما هب قصور فيه أقول ذا الكلام . لا. الرجال متفضل علي لولا الله ثم هو كان مت في مكاني لكن أنتي تعرفين ان أنا وعبدالله عمرنا ما تواطنا . دايم وحنا في صك وحك وكل واحد فينا ما يترك فرصة الا وتهاد مع الثاني فيه يعني عبدالله من البشر اللي ما تتوقعين انه يقول لس حتى الموت ما يفرق بينا ؟
وضحه : نجول أنتي ليه تقولين عليه كذا عبدالله ما هب أقشر ولا شراني ؟ وان جيتي إلى الحق أنتي اللي كنتي دايم تبدين المهاد معه عمره ما غلط عليس صدق ولا لا ؟
ابتسمت نجله كأنها تتذكر شيء وقالت : صدق . عمتي تذكرين يوم كنت اسقط كل سنة في الإنجليزي والرياضيات وأنا صغيرة ؟ في ثالث أعدادي كان السوني توه طالع وكنت أبي اشتري لي واحد حنيت على أبوي يجيب لي واحد . قال لي ما هب من بياض وجهس انجحي وعقب اطلبي قالت له أني بنجح السنة . قال اجل يومس تبين السوني ما فيه مدرسات ذا السنة . ادرسي بالحالس وإذا . أقول إذا نجحتي فلوس المدرسات لس . وأنا في سبيل السوني كنت مستعدة أوصل القمر ما هب ادرس بالحالي . علمت ربعي برهاني مع أبوي وقالت لهم ان حنا بدينا ننفذ الرهن أنا ادرس وهو كل شهر يحط عند أمي ألف ريال حقت فلوس المدرسات وقمت اتفوخر قدامهم أني بأخذ السوني ومعه كل اللعاب اللي في المحل . المهم صدق أني نجت في الرياضيات فوق الحفه بدرجه وحده والإنجليزي بخمس درجات . بس أني نجت اتصلت بربعي وتواعت معهم في القرص الذهبي
وحنا قبل باب المحل بخطوات بس خطوات فجأة طلع قدامنا عبدالله وسعد سلم عليهم أبوي وأنا وقفت شوي بعيد عنهم سمعت أبوي يبارك لعبدالله نجاحه وليتس شفتيني يوم ان أبوي طلع الثلاث ألف حقتي من بوكه وعطاها عبدالله . كنت أشوف فطوم ووسوم في المحل ينطرونيوقلبي يحترق من الحرة على فلوسي من ذاك اليوم وأنا شاربتن بغض عبدالله شرب
وضحه : اثرس ماديه وأنا مدري يا نجول ؟ وأنا أقول هي وش عندها على الصبي ؟
نجله : حرام عليس كنت بزر ومحتره على فليساتها. لكن يوم حنا كبرنا صار يحرني بالحكي لازم يخلي الكلمة في الأخيرة هي كلمته في أي مكالمة تلفون تصير بينا كان يدبل كبدي وإذا ما قدرت عليه سكرت في وجهه حتى في الشاليه كان يدبل كبدي بالمسجات اللي يطرشها لي . أسكتت نجله يوم شافت وضحه تشوفها وهي رافعة حاجبها . ورجعت تكمل : لا لا تشوفيني كذا أنا ما سويت شيء غلط السالفة وما فيها ان أنا وعبود كنا متواكلين عليس يوم طلعتي من شاليهنا ورحتي مع محمد مسعيد هو قال لي دقي على إذا وضحه جات علميني . وأنا عيت أعطيه رقمي واتفقنا ان حنا نرسل لبعض عن طريق البلوتوث بس واصلا حنا شفنا بعض بالصدفة بعد وهو اللي كلمني يسألني عنس ويقول انس ما تردين عليه عاد أنا خفت عليس بعد







وضحه اللي كانت تدري ان نجله أكيد ما تكذب عليها لأنها إذا تكذب عيونها تتم تدور في كل اتجاه . وهي كانت تتكلم وعينها في عين وضحه اللي قالت لها : نجول أنا ادري انس صادقة في كل اللي قلتيه لي بس ابغي اقولس شيء مهم واجد أنتي ذا الحين صرتي على ذمت رجال له حق عليس في كل شيء حتى في احلامس وافكارس احفظيه واحفظي نفسس فيه وذكري ربس . وتعوذي من الشيطان لو مر على بالس يوم خاطر أو حلم ما لس حق فيه . نجله اللي أفهمت عمتها وش تقصد عدل بذا ألحكي نزلت رأسها تشوف أصابع رجلها الممدودة قدامها . أسحبت رجلها ولمتها بيدها . وودعت بدمعه أخفتها عن عمتها كل طيف وحلم وخيال مر يوم في رأسها قبل ناصر

في اليوم الثاني راشد ما قدر حتى انه يداوم لأنه طول الليل ما رقد جيك على جدول العمليات لقى عنده عمليه وحده اليوم وجات من رب العالمين المريض كان سكريه مرتفع واجد ولا يقدر يسوي العملية الا إذا نزل السكر . رجع البيت ورابط في الصالة من الصبح . مصر ما يطلع منها الا إذا جات شذى قعد مع أمه وخالته ويم اسألوه هو ليه رد من المستشفى ؟ قال انه ما عنده شغل وقال يرجع يقعد معهم .
طال عليه الوقت وشذى ما جات . يمكن زعلانة لالا أكيد هي راقدة
أم سلطان وهي تمد يدها عليه بجوالها : أقول يا والدي شوف جوالي ما عرفت افتحه كل ما دقيت منه ما عطاني خط ؟ من يوم ما جينا إلى ذا الحين
راشد اخذ جوال خالته افتحه وطلع له طلب الرقم السري للجهاز . سألها : كم الرقم السري حق جوالس
أم سلطان : والله ما اعرفه . بس سلمان يعرف هو اللي جايبه لي . لكنه بايت من أمس عند صديقه.
راشد ضاق خاطره يوم سمع اسم سلمان وقال : خلاص أنا بخليه عندي إذا شفت سلمان في المجلس بخليه يفتحه لس . واخذ الجوال وحطه في جيبه بس عشان يسكر ذا الموضوع بسرعة لأنه شاف شذى طالعه من الغرفة وجايه صوبهم بكل دلع سلمت وقعدت معهم . راشد كان وده يأخذ العجايز ويطيرهم بس أنقذتهم بنت عمتهم اللي أدخلت عليهم فجأة . قلطوها في مجلس الحريم الداخلي . شذى اللي كانت تشوف راشد بنظرات كلها تحدي قامت ودخلت معهم تسلم على المره .
راشد كان على تكه و بيدخل يأخذ اعترافاتها بالعقال. رجع يرسم نفسه على كرسيه وهو يشوفها طالعه عليه من المجلس جات وقعدت جنبه وهي تقول : ما عندك اليوم شغل ؟
راشد وهو يجر ناعم : عندي . بس الصراحة أنا أمس ما قدرت أنام كنت أفكر فيس وفي الكلام اللي قلتيه .
أقطعته شذى بكل جراه : لا يا راشد أنت ما كنت تفكر فيني . كنت تفكر في الكلام اللي قلته وبس .
راشد رفع حاجبه وهو يقول : وش الفرق يعني في النهاية كل الطرق تؤدي إلى روما اقصد شذى
شذى : لا في فرق اللي مثلك ما يهمهم الا نفسهم وغرورهم . أوجعك الكلام اللي قلته أمس ولا ما كنت اليوم قاعد هنا تستناني ؟
راشد قرر ان أفضل وسيلة لدفاع هي الهجوم : إيه أوجعني ليه اكذب ؟ اللي قلتيه كلام ما هب بسيط أنتي تعرفين شيء عن جواهر هي مسويه شيء قولي لي علميني ؟ والله اذبحها ذبح
التطور السريع عند راشد في الحوار خلا شذى في حالة ذهول : أنت ايش اللي تقوله مين جاب سيرت جواهر في الموضوع ؟
راشد : أنتي ؟
شذى : أنا ؟
راشد : إيه .أمس تكلمتي عن اللي يدعون الطهارة وأنتي ما تعرفين غير جواهر يهمني أمرها ؟
ابتسمت شذى ابتسامة صفرة وقالت : لالالا رحت بعيد في أفكارك . اللي كنت اقصدها وحده ثانية بسم الله على مرت اخوي عنها .
راشد : أجوزي .
شذى : لا وأنت الصادق الوضيحي .
راشد اللي قدر يوصل مع شذى للمهم كان منتبه ومركز على كلمة تقولها قال وهو يرسم ملامح الاستغراب على وجهه : وضوح بنت عمي ؟ وش فيها
شذى : يعني تبي تقنعني انك ما تعرف شيء ؟
راشد : اعرف ويش ؟
شذى وهي تركز في عين راشد وتقول بكل تحدي وقوة : أنها تلاحق سلمان اخوي وتشاغله ويوم شافت وجه راشد صار احمر كملت : ايوه كانت تشاغله طول اليوم في الشاليهات وما تتركه بحاله الا إذا أنت جيت الظهار أنها ما تخاف من حد غيرك . سلمان كان يشتكي في البداية بس بعدين عرفت وبالصدفة أنهم صاروا على علاقة مع بعض أسكتت لما مسكها راشد من يدها بكل قوته وقال وهو يصر على ضروسه : أنتي كذبه .
شذى اللي تحاول تفك يدها من يد راشد قالت : إذا ما أنت بمصدقني روح شوف جوالها كله مسجات من سلمان . فك راشد يدها وهو يشوفها بنظرات احتقار وقام عنها وراح المجلس الخارجي حق الرجاجيل .






راشد قعد في المجلس حق الرجاجيل يفكر ويحلل الكلام اللي قالته له شذى بعد ما هدت أعصابه . ووصل إلى نتيجة وحده . ان سلمان هو الشخص الوحيد اللي يقدر يأكد كلام شذى أو يكذبه
راشد اللي كان موقف سيارته في بيت عمه من أمس نادى الدريول عشان يوديه في سيارة البيت بيت عمه صحيح هو راح الشغل بسيارة عبدالله بس ما يقدر يخلي سيارته عندهم واقفة





وضحه اللي من يوم ما قامت ما طرى على بالها راشد ابد كأن نجله أمس وهي تبكي عبدالله من قلبها بكت راشد من قلب وضحه في نفس الوقت راحت مع الخدمات تسنع صواني الذباح حقت العشا في الاستور . أسمعت صوت حد يصوت في الحوش على الدريول حقهم . في البداية ما ركزت بس بعد ما قرب الصوت من الاستور تأكدت انه راشد
راشد اللي يوم وصل بيت عمه لقى سيارة حمد مسكره على سيارته ولا يقدر يطلعها . ما حب يدخل البيت . كان خايف انه يشوف وضحه وهو في ذي الحالة ويعصب عليها أو يسوي فيها شيء وهو ما صدق قدر يسيطر على أعصابه فضل انه يسال الهندي يمكن عنده اسويج سيارة حمد أو يطرش حد من الخدمات تجيب المفتاح






وضحه اللي كانت تشوف راشد من دريشة الاستور قالت لنيتا الخدامة بصوت واطي عشان ما يسمعها راشد . أنتي روحي شوفي وش يبي بس ما في كلام ماما وضحه هنا عشان أنا ما في عباية اوكي .
نيتا : ماما أنتي في جلال ؟
وضحه : بس ما فيه عباية يلا ً روحي






راشد اللي سأل الدريول عن السويج وما لقاه عنده . شاف نيتا وقال لها : تعالي وين بابا حمد ؟
نيتا : بابا حمد في نوم . أنت شنوا يبي
راشد : اسمعي روحي داخل قولي حق نفر داخل خلي يجيب مفتاح مال سيارة بابا حمد
نيتا وهي تشر على الاستور : سوي كلام حق ماما وضحه ؟
راشد اللي احتر يوم قالت له وضحه ولا انتبه لإشارة يدها . قال بحره : جعل ما به وضحه الله يأخذها ويفكني منها لا ما نبي من شينت الحلايا شيء قول حق الجازي سوي تلفون حق بابا راشد الحين. يلا سرعة .
وراح راشد يشغل سيارته ويسخنها






وضحه قعدت على اقرب قدر ذباح لقته ما تخيلت ان راشد يكرها إلى درجة انه يدعي عليها وقدام الخدم إلى ذا الدرجة أنا في نظره رخيصة وما لي عنده حشيمه ؟
يدعي علي ؟ أنا ليه ؟ وش هو اللي سويته فيه عشانه يدعي على ؟ معقولة عشان سالفة المسجات اللي في الجوال ؟يمكن ليه لا ؟أنتي وبعدين معاس إلى متى بتمين تعطينه الأعذار في كل اللي يسويه ؟ أنتي من ويش مخلوقة وش ذا الغباء اللي فيس ؟ بسس عمات قلب . بسسأنا ما ني بعميت قلب . أي واحد مكانه وشاف مثل ذي المسجات بيسوي مثله يا بقرة وش تبين منه بعد كل اللي سواه فيس ؟ طول عمرس وأنتي صابرة عليه . تحبيه ؟ ما أحبه بس لازم أحشمه ولد عمي وله حق ؟ولد عمس ضحكتيني الرجال ما يبيس فكيه برقبته وش تبين دليل وبرهان انه ما يبيس ؟ عندس الشريط . كلامه معس ضربه لس حقرانه لس قدم الكل . دمعت عين وضحه .وذا الحين يدعي عليس. يا خسارة. يا خسارة الغلا فيك يا راشد ورفعت وضحه رأسها بعد ما اتخذت قرارها الله يعطين العمر عشان أعلمك وش هي الدنيا اللي ما فيها وضحه يا راشد





راشد بعد ما رجع بيتهم نطر سلمان في المجلس بس إلى ان أذن الظهر وهو ما جاء بعد ما رجع من الصلاة لقى سيارته واقفة عند الباب دخل سيده عليهم في المجلس قال يمكن ألاقيه بس ما لقى حد أول ما دخل البيت لقاه هو وسعد قاعدين في المجلس الداخلي حق الحريم حاول راشد انه يمسك نفسه إلى أقصى حد دخل وسلم وقعد معهم شوي وبعدين قام ينبش الكرسي اللي هو قاعد عليه والكرسي اللي جنبه و قال : سلمان إذا ما عليك أمر عطني رنه على جوالي. حطيته هنا ولا عد شفته .؟
سعد: أنا بتصل لك عليه .
راشد: ما نبي منك شيء أستريح
سلمان اللي حب ينقذ الموقف بين الأخوان قال يمكن متزاعلين : أنا بتصل لك عليه بس كم رقمك ؟ عطني إياه مع فتح الخط ؟
راشد : ليه فتح الخط جوالك ما هب يا هلاً
سلمان : لالالا ما أحب استخدم الكروت . وبعدين أنا ما أغير رقمي عشان الشغل ممكن حتى إذا كانا في أجازة واحتاجوا لنا يطلبون .
استغرب راشد من كلام سلمان وتأكد لما قال سعد : عشان كذا أقول لك أنا اللي بدق عليك بلا خساير على الرجال .
راشد بعد اتصال سعد على جواله قام يهتز في جيبه قعد على طول عشان ما حد يلاحظ اللي في جيبه وهو ما سكه جات يده على جوال خالته طلعه وعطاه سلمان عشان يفتحه
سلمان : الله يهديها الوالدة كان عطت شذى تفتحه لها . أنا معطيها الرقم السري من يوم جينا الدوحة يوم أغير لهم الكروت
أخرقت كلمة الكروت أذن راشد . اللي قال : بعد هم أرقم سعودية ليه يا أخي ذا الخساير
سلمان اللي فتح جوال أمه قال : لا أمي وشذى حطيت لهم كروت يا هلاً
راشد مد يده لسلمان وهو يقول : عطني الجوال أنا بوديه لها . تدري أسوي نفسي أني ما يحتاج في الجوالات ابتسم سلمان وعطاه إياه وسعد يشوف أخوه واللي يسويه والله أقص يدي كان ما ورآك شيء

راشد أول ما طلع من المجلس على طول عطى لنفسه رنه من جوال خالته ويوم شاف الرقم صدمه كان الرقم اللي مطرش لجوال وضحه مسجات وهو اللي كان يتصل دايم عليه ويلاقه مغلق . فتح الرسائل وشاف الرسايل المرسلة ومعها قطع الشك باليقن . نفس الرسايل موجودة خالتي خالتي ليه يمكن سلمان يتصل من جوال أمه ؟ لا بس خالتي تقول انه عندها من يوم ما جو الدوحة ولا تعرف تفتحه . وهو يقول ان هو علم شذى كيف تفتحه شذى هي اللي .






نجله اللي نامت إلي الظهر قامت وهي نجله أميه وثمانين درجة عن نجله حقت أمس قامت تضحك وتسولف مع الكل حتى تينا اللي ما تدنيها . بعد جمعت الغد سوت اجتماع مغلق مع نورة ووضحه في غرفة ونورة اللي تحت لمناقشة استعدادات التجهيز للعرس ونفخت راس وضحه ونورة . الفستان القاعة . الكوشة .إلى ان انزعجت منها نورة وطردتها هي ووضحه اللي ما كان لها مزاج في الأساس لأي شيء بس ما حبت تخرب على نجله مزاجه





عبدالله قام بنفس مزاج نجله لا أحسن عن مزاج نجله يضحك ويسولف وطلع له رحله حق البحر مع الشباب من تحت الأرض.




اما راشد فهو على حافت الانهيار . لا نوم . لا آكل . لا راحت بال .من أمس وهو راجع من صلاة العصر مع أبوه وسعد وسلمان اللي كان واعد خواته يوديهم السوق من عصر لأنها آخر ليلة لهم قبل السفر. اقعدوا يتقهون مع ابو راشد في الصالة راشد كان وده يدخل على شذى ويخنقها بيده . بس كان ما سك أعصابه في سبيل انه يتأكد من اللي في باله . أول ما اطلعوا عبير و شذى اللي كانت تشوف راشد بنظرات احتقار من الغرفة قام سلمان عشان يوديهم . أم سلطان وقفتهم عشان توصيهم يشترون أغراض لأختهم الكبيرة وعيالها وهي تكلمهم رن جوال شذى . قالت لها أم سلطان : قولي لأخوكي يصبر شوي
ردت شذى على الجوال بسرعة بدون ما تشوف الرقم . شذى : الو . .
سلمان ؟. . سلمان
أرفعت شذى الجوال عن أذونها عشان تشوف إذا الجوال فيه إرسال ولا لا




حست ان الدنيا تدور فيها مستحيل مستحيل . لفت ببطى صوب راشد اللي كان ماسك جواله في يده وهو يشوفها من فوق إلى تحت بنظرات تلتهب من الغضب و الحره اللي فيه . سكر الاتصال اللي مسويه من جواله . وطلع جوال خالته من جيبه وقام وهو يقرب من شذى وخالته إلى ان وقف قدامهم وقال : سمي يا أم سلطان جوالس ولف على شذى اللي كانت تشوف جوال أمها في يده وهو يقول : عسى ما شر جوالس فيه شيء ورجع يكمل لما أشرت شذى اللي نزلت رأسها في الأرض برأسها أشارة لا : والله يا خالتي كان ودي تقعدون عندنا أكثر على الأقل إلى ان تحضرون عرسي . هذي الجملة ما خلت شذى بس ترفع رأسها تشوفه الا خلت كل اللي في الصالة يشوفون راشد .
قالت أم سلطان : جعله مبارك يا راشد عزمت تعرس ؟ من بتأخذ ان شاء الله
راشد وهو يحط عينه في عين شذى قال : بأخذ هوى بالي وحالي ومالي وعزوتي . وشيخة البيض كلهم بعد اللي قاله راشد أبوه كان وده يقوم يرزف في الصالة من الفرحة واخيراً قرر راشد يسمع كلامه. اما شذى فتذكرت على طول الملف اللي كان في كمبيوتر راشد اللي كان اسمه ( الهوى ) تأكدت أنها وضحه ما أقدرت تمسك نفسها أكثر أرجعت لغرفتها بسرعة وهي تبكي.





وضحه اللي كانت قاعدة مع نورة ونوف العصر بعد ما راحت نجله بيتها . كانت تشوف ميمي بنت مبارك اللي أصرت أنها تجي معها تشوف فلة حقت الرومي جابتها نوف معها لان أبوها اللي كان رافض أنها تروح مع نوف بيت أهلها بعد الموقف اللي صار في الشاليه كان مسافر دورة أسبوع
وضحه وهي تعدل لفت شيخة اللي في حضنها بعد ما افتحوها الرومي وميمي اللي قاعدين قدامها يشوفون شيخه أسالت نوف : نوف أنتي رديتي على عمتس ؟
نوف : أرد على ويش ؟
وضحه : عن الموضوع اللي انفتح في الشاليه ؟
نوف بعد ما أفهمت قصد وضحه أشرت لها تصبر شوي . وقالت لميمي والرومي : قوما شوفوا يوغي ذا الحين جاء على أم بي سي ثريه وإشارة على تلفزيون الصالة . وبعد ما اطلعوا البنات من غرفة نورة لفت نوف على وضحه وقالت : وأنتي ليه تسالين ذا الحين عن ذا السالفة ؟
وضحه : أبي اعرف وش رديتي عليهم ؟
نورة : وضوح وش عندس
نوف : اصبري نورة وضوح أنا بقولس الصدق . أمي قالت لي لا تردين عليهم ذا الحين وقولي ان البنت تفكر إلى ذا الحين يمكن تغيرين رايس بعدين .
وضحه : وعمتس صدقت أني أفكر طول ذا الوقت
نوف : ما ادري بس هي كلت قلبي كل يوم تسال ما ردت عليس وضحه وأنا مره أقول تفكر ومره أقول تحاتي لا يصير مشاكل مع بيت عمي . ومن ذا الأعذار كل يوم بس تبين الصدق هي تحبس واجد ومن يوم ما أعرست وهي تشرق بطاريس كأنها شايفتس ولا هي مصدقه عمرها . أول كانت تلمح وتتمنى وعقب ما أعرفت انس رديتي راشد جابتها على البلاطة والعلم عند الله أنها مدخلتس في راس ولدها عدل الرجال لجاء طاريس قدامه قام يتسمع للحكي وصار وجهه حمر
أسكتت وضحه شوي بعد ما أسمعت كلم نوف وبعدين قالت : نوف قولي لامي أني غيرت رائي
نورة اللي أفهمت وضحه بس حبت تتأكد قالت : يعني ويش غيرتي رايس
وضحه : يعني. وسكتت لما أسمعت صوت ألمسج أفتحته وضحه بعد ما أعرفت الرقم المميز اللي مطرشه ابتسمت ابتسامة حزن وهي تقرا اللي فيه وامسحته على طول .
(( الخوف ظلما والقلوب أطفال
والشك سيفٍ يقطع الآمال
والهوى ملح الليالي وأجمل الأقدار
عنه لا تسأل حبيبي وفيه لا تحتار
العمر واحد والليالي قصار ))


ورجعت تكمل لنورة : يعني وفقت أتزوج مبارك






تحياتي**الحب المجروح**