الموضوع: ديوان كلمات الأغاني .

ورثي إحرامي






أنا مابي من الدنيا وصول للعيون الدعج
وأظن الصدق يكفي لوأموت وورثي احرامي

حبيبي جاهل ٍ طاغي يحسب إن الجوارح ثلج
وأنا مالي شفاه وفم صوتي ضيّع احلامي

إذا حبك ذبحني صد كلٍ له بموته نهج
تشهّد بالعجاج البيد قبل تموت قدامي

أنا غصن ٍوأنت اوراق والعاذل خريف وعج
و وش عذر الورق والغصن لا يابس ولا ظامي

غديت الشايب اللي عاصب ٍ راس الزمان الحرج
كبير ٍ حز ّم الدنيا على متنه ولا قامي

شليلي بالعفاف ابيض على حالته يومه نسج
تدور الناس والدنيا وأموت وورثي احرامي

محتاج لك

إنتي بكف و باقي الخلق في كف
متعليه في وسط قلبي ولك شان

في غير وصلك مالقلبي ترى شف
محتاج لك يا نور عيني وشفقان

لا جابوا اسمك صرت انا تقل مختف
مالي على نفسي الى اطروك سلطان

من غير حبك غضت عيوني الطرف
ياللي جمالك صار للزين عنوان

اريد انا قربك ترى ياغذا الحرف
و ان ماحصل موتي و دنياي سيان

عيون الصغار




وجهك غضب وجهك عروس
يضوي مدى يحرق نفوس
تشبه لك الشمس الشموس
و ما لمحتك

سلام يا أحلى الأنام
دربي مثل عينك ظلام
و ما وصلتك

يا صوتها الرايح وجاي
مابين أشواقي وشقاي
تشبه لك الونّه و ناي
و ما سمعتك

حبيبتي والبوح نار
إنتي أنا بكل إختصار
تشبه لك عيون الصغار
و ما عشقتك

يا مهرتي البيضا الأصيل
تلعب و انا صبٍّ نحيل
تشبهك غابات النخيل
و ما سكنتك

يا غاية الحلم المحال
مثلك أنا حلمي الوصال
يشبهك في الشاعر خيال
و ما كتبتك

تنهيدتين ونار





كلّمني عنّك

أبعرف كل شيٍ عنّك منّك

قلّي وش أول جروحك

قلّي وش آخر أمل ترجيه روحك

إحكي عن طبعك

وعن ربعك

عن اللي يهزّ دمعك

قلّي وش معنى الحياة

قلّي بأنفاسك متى قد قلت آه

إحكّ لي عن الحب

إحكّ لي إحكّ لي

إحكّ لي عن الشوق

طر بي فوق فوق

خذني منّك

وإحكّ لي عنّك

الصدق

إن الأمل من قبل أعرفك كذب

والتضحيه أوهام

وإني أنا من قبل أعرفك

كنت أعرف أنام

كان السهر مو هالسهر

لعب وأغاني وإختصار

صار السهر تفكير

صار إنتظار

صار إحتظار

صار السهر تنهيدتين ونار

يا منتهى أمري

بالهمس قلّي مرّه يا عمري

وطر بي فوق فوق

خذني منّك

وإحكّ لي عنّك

يا بعد حيي




اليوم يا بنت من زيي
الشمس واردت على ضيي
جيت انتخي بالوجيه البيض
يا عزوتي يا بعد حيي
الجادل اللي حلاها غير
ضيعت في شمسها فيي
بعيونها سلسبيل رماح
و الموت بالسود متهيي
موت و انا اموت انا بالموت
كثيرها غرّق شويي
لا قلت تكفين قالت جاك
و ان جيتها فجأة تعيي
و لا قلت مالي و مال الغيد
قالت وهم بينهم زيي ؟
و ان قلت انا تبت مالي كار
مقفي زمانين عن غيي
قالت و هي تلتفت للناس
طلال موته على يدي

مشتاق




مشتاق ومضنيني الفراق
يا عيونها خذي من عيوني تعب
واعطيني من جفنك فتور
وابكي علي لو بالكذب
مليت بك طبع الغرور
يا عيونها مشتاق
وللدمع مع جفني عناق
مشتاق ومضنيني الفراق
يا اجمل الخود
كنت الامل وانتي الوعود
وهجرني من هجرتيني دفا بيتي وانا فبرد الشتا موعود
ايا مسكين يا قلبي انا ماشي وهو يلتقت لك عود
ايا مسكينه يا روحي تحب اللي يعذبها و يزيد صدود
وحشتيني
كثر ما خانني هذا الزمن واكثر وحشتيني
احبك حب اكبر حيل من كلمة احبك واسألي عيني
يا اقرب من نظر عيني لعيني
يا ابعد من حنانك عن حنيني
امانه كيف تنسيني
وانا من ليلة التوديع الين الحين
احس ايديك بايديني

جيت في ليله وادعه

جيت في ليلة وداعـــة تــايــة بين البيوت
صحت وينك جيت اودع عمري الي فيك ضاع
ماسمعت الا صدى صوتة وكان ارق صوت
ينطق اسمي ثم يهمس من متى انا احتريك؟
قلت وهمومي تغافل زفرة الحزن وتفوت
"هذا انا جيتك ليت الموت جاني قبل اجيك "
يعدها يادوب عدت عبرتة حد السكوت
قال وعيونة تغارق دمع "بسم اللة عليك "
قلت: يابن الناس عادي مورى هالموت موت
وش وراها لافقدت عيونك ولمسة يديك

رســــــــــــــاله

ياصاحبـي جيتـك اشكيلـك مـن أحوالـي
جيـت ومـادامـك رفيـقـي لـيـه أطوّلـهـا
العلـم ومـا فيـه يــا أول وآخــر أمـالـي
عندي رساله ولا ادري كيـف أوصلهـا
للـي سبتـنـي وأنــا مــن قبلـهـا سـالـي
أبيك توقـف معـي وتـروح وتسألهـا
وش فيهـا تفتـح علـي أبــواب عـذالـي
وتحـمّـل النـفـس حـاجـه مــا تحمـلـهـا
وش فيهـا رغـم الوفـا تتركنـي لحـالـي
وأنــا لجفـاهـا تـركـت الدنـيـا بأكمـلـهـا
إن كـان هـذا زعـل علمـهـا يالغـالـي
مـا كـان قصـدي ورب البـيـت ازعلـهـا
علمـهـا والـلـي يخـلـي قلـبـك الـخـالـي
عن ضيقتي وين وصلت من تجااااهلها
علمهـا كـم لـي وأنــا ماشـلـت جـوالـي
كـلـه علـشـاااان مــا اقـلــب رسايـلـهـا
وعلمهـا وشلـون لامــرت عـلـى بـالـي
أروح وأضــــم صـورتـهــا واقـبـلـهــا
وعلمها كيف انشغل عن كثرة أشغالـي
واسـرح واغمـض عيـونـي واتخيلـهـا
علمهـا عـنـي وعــن هـمـي وغربـالـي
علمهـا عـن كــل حـاجـه فــي تجهلـهـا
وان شفتهـا دنقـت تبكـي عـلـى حـالـي
انـسـى الـكـلام وتـذكـر كلـمـه وقـلـهـا
قــل شـاعـرك يعـتـذر ويعـاهـدك تـالـي
انـــه يـرتــب حسـابـاتـه مـــن أولـهــا
ويقـول حتـى القصيـد اللـي علـى بالـي
والله مـاعــاد اكـتـبـه كـانــه يـزعـلـهـا

ناس فوق وناس تحت

صعب لامنك فشلت وصعب لامنك لقيت
إن من يكره نجاحك يدري انك ما نجحت
امس ضقت ورحت اقلب ذكرياتي وانتهيت
عند صورة طفل صوته مثل صوتي لا انجرحت
وش مثل ؟؟ لا والله إلا هذا أنا يوم ابتديت
انطق حروفٍ تلعثم في لساني لا انمدحت
هذا أنا يوم الحياه فنظرتي عشرين بيت
ومسجدين ومدرسه من طين كم فيها اصطبحت
هذا أنا وأصبحت أتمتم (هذا أنا) حتى بغيت
اختنق بس القدر عيّا على موتي وطحت
وصاح صوت الطفل فيني انت من وين ارتميت
قلت أنا المستقبل اللي فيه كم همت وطمحت
امس كنت أبيك تكبر بس والله لو دريت
اني اللي عشت لجله مت عندك واسترحت
لو دريت إن الزمان يجر رجلي ما عديت
ولو دريت إن البحور بلا مواني ما سبحت
كان دربك لي طويل وكل ماشفتك هويت
قلت لك كبوة جواد وما كبيت إلا وجمحت
ليه تسمعني وتمشي آه ليتك مامشيت
وآه ليتك من كثر عثرات الأيام انتصحت
ضاعت احلامي وضل الحزن فيني واهتديت
للطريق اللي يوديني على دمعي ورحت
يالحزن ليتك مثل دمعي وتنزل لارقيت
بس أعرفك لو مسحت الدمع تبقى ما انمسحت
كان حلمي في وجود إنسان يبكي لابكيت
وصار حلمي في وجود إنسان يفرح لافرحت
كنت اشوف الناس مثلي كل ما جعت وضميت
ما دريت إن الاوادم ناس فوق وناس تحت
آآآه يا أول ذكرياتي خذني فحضنك نسيت
لأسألك عن وجه ابوي اللي معه ياما سرحت
خذني فحضنك ابغفى ياااااه مبطي ماغفيت
وان لمحت دموع عيني سو نفسك ما لمحت
خذني فحضنك وبعثر في جروحي وان قضيت
هزلي كتفي وقلي : عيب تبكي لو سمحت
اضحك وعلم زماني من أنا ومن وين جيت
طق باب الحزن واصرخ فيّ لامني فتحت
وضمني يمك وكمل ضحكتك لامن بكيت
ودي اذكر كيف كانت ضحكتي لامن فرحت