يوميات مواطن قصة واقعيه

**طيفك وهم** · 25-Aug-2009,06:20 AM

في القسم
الضابط : ياعليوي الادله كلها ضدك والقضيه رايح فيها مافيها كلام اعترف افضل لك يمكن يتخفف عنك الحكم
عليوي : ياابن الحلال أي اروح فيها انا والله ماسرقت شي
الضابط : انت صحيح ماسرقت شي لانه صاحب البيت رجع في الوقت اللي كنت تبي تسرق فيه وفوق هذا هددت جاركم
عليوي : حسبي الله عليه والله ماسويت له ولا شي ياابن الحلال ولا قربت ارضه وانا مثل ماقلت لك ياحضرة الضابط حصلت باب الشقه مفتوح ودخلت خفت انه احد مسوي شي ولا لاقدر الله احد فيه شي ودخلتي البيت كانت من باب المساعده
الضابط : هذا الكلام كله مايفيدك انا ماني معك عشان ابيك تقول ماسرقت انا معك ابيك تعترف عشان لو صدر الحكم عليك يكون اخف
عليوي : بس انا ياابن الحلال ماسويت شي واللي سرق والله قابلته انا والوالد اسفل كنا مستغربين منه لانه كان يجري .
الضابط : طيب لو كلامك صح انا بساعدك بس تعرف هذ الشخص وانا بجيبه واحقق معه واخليه يعترف لو كان فعلا هو السارق
عليوي : لا مااعرفه
الضابط : طيب سيارته او أي شي عنه ؟
عليوي : لا
الضابط : اجل مافي قدامي متهم غير انت وصدقني بتعترف انه انت اللي سرقت
عليوي : بس ماراح اقول انه انا سرقت لاني ماسرقت
الضابط : ههههههههه لاتخاف معي بتعترف انا عندي اسلوبي بالقوه ولا بالطيب ياعسكري خذ المتهم وديه الحجز
عليوي : ياضابط والله ماسويت شي اني مظلوم
الضابط : تسعين في الميه يقولون مظلومين خلاص خذه
يأخذه العسكري وعليوي يصيح مايبي يروح

ام عليوي : ياابو عليوي اللي يخليك تجمل في ولدي وطلعه انت مالك الا ولدك عليوي
ابو عليوي : هو سجن ابوي ولا انا اللي وديته السجن انا ايش تبيني اسوي كله من جار السو هذه حامد الشر الله ياخذه عنا انا اشهد انه من اول ماسكن عندي وانا ماشفت منه خير لكن مااقول غير حسبي الله ونعم الوكيل انا بكلم حامد واشوف ايش بيصير معي

ابو عليوي عند حامد بالبيت
ابو عليوي : ياحامد هذا ولدي في السجن ظلم تنازل ياابن الحلال
حامد : ظلم !! أي ظلم وانا ماسكه وهو بيسرق الحرامي
ابو عليوي : الله ام طولك يااروح ياابن الحلال انا وولدي جينا وحصلنا بيتك فاتح وقلت لولدي يشوف لايكون احد فيه شي لاقدر الله
حامد : اقول احمد ربك ماجبت رجولك في القضيه هذي ولا كان بتروح فيها بس انا رغم هذي الحركه اللي سويتها فيني انت وولدك الا اني ماتهون عليه عشرة الجيره
ابو عليوي : يعني تقول اني انا حرامي تخسي انت ووجهك
حامد : اقول توكل على الله بيتك يومين وافضيه لك
ابو عليوي : حسبي الله عليك

بعد ذلك تم الحكم على عليوي السجن لمدة ثلاث سنوات

في زيارة لعليوي من صديقه فادي للسجن
فادي : كيف حالك ياعليوي ايش اخبارك ان شاء الله بخير
عليوي : ااااااااه ياصاحبي من وين بخير انا وين اصلا والخير وين من اول مادخلت هذا السجن المشؤوم وانا ماشفت خير
فادي : يارجال عسى ان تكرهوا شيئا هو خيرا لكم
عليوي : وين الخير انا حتى اللي كانت ببالي وخطبتها طلبت الحين مني الطلاق انا ايش اسوي انا حياتي صارت دمار ياصاحبي
فادي : وليه تبي الطلاق وانتم لسه ماسويتوا زواج ولا شي
عليوي : اااه مايبون حرامي انا والله مظلوم
فادي : انا والله عارف انك مظلوم وماشك واحد في الميه انك حرامي انا اعرفك زين ياعليوي ولو صدق ابوك انك حرامي انا ماصدق
عليوي : تخيل من نذالته وحقارته يدعي اني بغيت اضربه
فادي : صدق انه حقير ونذل
عليوي : هذي حياتي وانا في السجن مادري بعدين ايش بيصير اذا خرجت من هنا
فادي : يارجال ان شاء الله سهالات
عليوي : اي سهالات وانا بقضي من عمري ثلاث سنوات يعني الف وثمانين يوم بقضيها بلياليها هنا
العسكري : ياجماعة الخير الزيارة انتهت الحين
فادي : اشوفك على خير ان شاء الله
عليوي : ان شاء الله

بيت ابو عليوي
ام عليوي : الله يكون في عون ولدي عليوي ان شاء الله
ابو عليوي : اي والله الله يكون في عونه حسبي الله عليك ياحامد هذا حتى في المجالس وفي كل مكان راح يقول عليوي حرامي هذا ماخلا مكان الا فضحنا فيه
ام عليوي : حسبي عليه حتى بنت اخوه سعى في طلاقها
ابو عليوي : ماعليه ان شاء الله اول مايخرج عليوي من السجن بشوف له احلى من بنت اخوه بمليون مره
ام عليوي : عز الله انه بنت اخوه بنت اصول وانا كنت اتمناها لولدي عليوي
ابو عليوي : ايش نسوي عاد هذا امر الله مانقدر نسوي شي فيه

مرت الثلاث سنوات ومرت من عمر عليوي ثلاث سنوات كان يحلم فيها بالكثير لكن السجن حطم اشياء كثيره
اول ماطلع عليوي من السجن استقبله صديقه فادي
فادي : حمد الله على السلامه
عليوي : الله يسلمك والله مانسى وقفتك هذي طول عمري
فادي : اقول ترى بمشي واتركك من هنا لو عاد تقول الكلام هذا انت ياعليوي اخوي وصاحبي ولك معزه مايعلم فيها الا الله
عليوي : ماعزيت الا من عزك يافادي
فادي : تسلم والله الحين خلينا نروح لامك وابوك وشوي نتعشى سوا ان شاء الله انا عازمك
عليوي : عساك سالم بس انا مشتاق لسفرة امي وابوي وشوي بتعشى معهم
فادي : نبي نسهر عاد اليوم ولا بكره لازم ضروري
عليوي : لا واللي يرحم والديك مابي اسهر من بكره ان شاء الله بروح ادور لي عمل
فادي : ارتاح انت كم يوم وروح بعدين ملحق على العمل
عليوي : لا يااخوي كفايه الايام اللي قضيتها في السجن كنت احسب كل ساعه تمر كنت في السجن اوقات احس اني بتضارب مع الوقت ابيه يعدي ويمشي والحين بعد ماخرجت ابيه يتأخر لانه نفسي اعوض لو شي بسيط من ايامي اللي راحت
فادي : ان شاء الله يارجال معوض خير ان شاء الله

بعد ماوصل عليوي بيتهم وسلم على اهله وتعشى معهم وجلسوا بعد العشا
ابو عليوي : اقول ياولدي ترى الى الان انا ابي ازوجك وفلوسك ماحد نقص منها ولا شي
عليوي : تسلم لي ياابوي بس البنت اللي كنت ابيها راحت
ابو عليوي : الله ماخلق هذي البنت بس ياولدي اللي خلقها اكيد خلق احسن منها الله يرضى عليك ياولدي انت عارف قد ايش انا متشوق اشوفك مع عروستك تحت سقف واحد وحسبي الله على اللي كان السبب
عليوي : خلاص ولايهمك يبى سوي اللي تشوفه مناسب انا عصاك اللي ماتعصاك
ابو عليوي : الله يرضى عليك ياولدي
عليوي : امين يارب العالمين

في الصباح عليوي مع صديقه فادي يبي يدخلون اول شركة عشان يدور فيها وظيفه
عليوي : تتوقع يقبلوني
فادي : ايه ان شاء الله بعدين الشركه طالبه وظائف سعوديين وانت معك شهادات كمبيوتر وغيره كثير واتوقع انت من اول المؤهلين
عليوي : ان شاء الله

في الشركة جا دور عليوي
الموظف : يااخ عليوي ممكن اشوف شهاداتك
عليوي : ابشر خذ هذي الشهادات
اول مافتح الموظف التاريخ ناظر عليوي
الموظف : يااخ عليوي هذا تاريخ له اكثر من ثلاث سنوات لو كنت في ذاك الوقت في شركة جيب منها انك كنت تشتغل فيها وراح تكون افضلية التوظيف لك
عليوي : لاوالله كنت بشتغل في شركة بس ماداومت فيها ولا يوم
الموظف : اجل كنت عاطل يعني في الثلاث سنوات اللي راحت كلها ؟
عليوي : تقدر تقول
الموظف : غريبه كل هذي الشهادات وماتوظفت ؟
عليوي : نصيب
الموظف : عموما يااخ عليوي لانه فيه غيرك متقدم كثير سؤال اخير
عليوي: تفضل
الموظف : زاد فضلك بس ياترى لك سوابق او لا ؟
عليوي حاس انه في موقف محرج : كيف سوابق يعني ماني عارف قصدك فيها
الموظف : يعني لو مالك ملف عند الحكومه تجيب لنا ملف يثبت هذا الشي وانت ان شاء الله احتمال كبير بتتوظف
عليوي : لاتتعبون انفسكم بس مالي نصيب فيها

اول ماخرج قابله فادي برا
فادي : ها بشر اخذوا ملفك ؟
عليوي : لا
فادي : وليه
عليوي : يقولون لك سوابق
فادي : لاحول ولاقوة الا بالله يلا ندور في كل مكان وظيفه
عليوي : يلا والله يكتب اللي فيه الخير
عليوي يخرج من شركة الى شركة من مكان الى مكان ومعه صديقه فادي وكل الشركات ترفض توظيف عليوي بحجة انه لك سابقه سرقه مرت الايام على عليوي وهو يبحث عن وظيفه لكن دون فائده

عليوي : يافادي انا تعبتك معي صراحه من مكان لمكان يوميا
فادي : عيب عليك حنا اصحاب
عليوي : انا ايش اسوي شركات ماتقبل مثلي تخيل حتى الناس اللي كنا نعرفهم بغينا نخطب منهم ورفضوا قالوا ايش مانزوج بناتنا حرامي انا ايش اسوي اذبح نفسي انا
فادي : يارجال اذكر الله
عليوي : الظاهر اني بصير من جد حرامي على الاقل اقول اني استاهل كل اللي يصير لي ولو احد ماقبلني لاني حرامي بقبل واقول هذا معه حق
فادي : هههههه يارجال انت عاقل وسيد العاقلين ايش حرامي وماحرامي عاد
عليوي : من اللي اشوفه من الناس لكن من جد انا قررت اصير حرامي
فادي : حرامي من جدك انت ؟
عليوي : ايه من جدي بشتغل حتى في مهنة حرامي
فادي : بس اللي اعرفه انك ماترضى تأكل حرام ياعليوي والحرامي ماهي مهنه اصلا
عليوي : من قال ماهي مهنه ؟ الا مهنة وستين مهنة وثاني شي انا مابي اكل حرام
فادي : عليوي انت الظاهر عقلك صار فيه شي اول مره اشوف حرامي بيسرق ويقول هذا مو حرام
عليوي : بس هذا انا بسويها وبتنطبق عليه ومابي اسرق واحد بدون ماخبره بعطيهم خبر لاتخاف انا جات من شوي فكرة في رأسي جهنميه
فادي : عليوي انا من شوي كنت اشك انه عقلك صار فيه شي لكن الحين انا متأكد انت على ايش ناوي ؟
عليوي : على كل خير انا ناوي اصير حرامي شريف
فادي : حرامي وشريف اول مره اسمعها هذي
عليوي : لاتخاف بعدين بقول كل شي الحين انا تعبت شوي خليني اروح البيت ارتاح
فادي : ابشر بس انتبه لاتسوي ولا شي الين تقول لي
عليوي : يصير خير بس بغيت اعرف حنا في اجازه صح ؟
فادي : ايه حنا في الاجازة الصيفية ليه تسأل ؟
عليوي : لا ولاشي

في الليل عليوي بدأ يخطط لمهمته وبدأ يراقب بعض البيوت الكبار في أمل انه يحصل ناس سافروا لقضاء عطلتهم الصيفيه وبعد اسبوع من البحث حصل شقة وفله من اللي اهلها سافروا لقضاء الاجازة
عليوي قرر يدخل اول شقة ويسرق منها
دخل الشقة بدون مايصدر اي صوت وهو يدور في البيت جار صاحب الشقة لاحظ انه الباب مفتوح على خفيف وحس انه فيه حرامي فتح الباب وهو ماسك سكين بيده وعليوي اخذ كم غرض من البيت ولاحظ انه فيه احد دخل الشقة وحاول يمسك اعصابه واول مادخل الرجل للداخل يدور الحرامي قرر عليوي يكتب ورقة قبل مايهرب ويكتب فيها التالي : ( السلام عليكم يااخي انا والله محتاج ومالقيت وظيفه واسف على دخولي بيتك بدون وجه حق لكن هذا رقمي لو ماكنت محتاج اللي اخذته ارجوك سامحني فيه ولو ماتبي تسامحني هذا رقمي اتصل عليه ****055 برد لك اللي اخذته كاامل وشكرا ) كتب الورقة ووضعها على الطاوله بدون مايحس الرجل واول ماوصل عليوي لباب الشقه وهو يمشي بشويش لاحظه الرجل واخذ يصيح عليه : حرااااامي حراااااااامي
عليوي من خوفه رمى الكيس اللي فيه الاغراض وتركه وهرب
الرجل استغرب ووقف عند الطاوله وقرأ الورقه وضحك على عليوي وظن انه واحد مجنون

اليوم اللي بعده عليوي مع صديقه فادي
عليوي : اااااااه اللي صار لي هذا شي ماراح انساه
فادي : هههههههههههههه صراحه انت مجنون اول مره اشوف واحد يسوي اللي سويته انت
عليوي : ايش اسوي من الحاجه يافادي انا لازم اتوظف
فادي : صراحه انت اشرف حرامي قابلته في حياتي
عليوي : يارجال على الله بس
فادي : ناوي على سرقة ثانيه ؟
عليوي : ايه طبعا
فادي : هههههههه وبنفس الطريقه
عليوي : مادري بس الورقه لازم اكتب اللي كتبته فيها مابي اخذ شي ماحد يسامحني عليه
فادي : انت مجنون لكن شوفني اقول لك ماراح يسامحك احد
عليوي:نشوف يافادي صدقني بصير غني

اليوم التالي في اخر الليل وعليوي يلفلف في الشوارع وقف عند مركز تسويق كبير فجأه شاف واحد يرجع للسياره فتح باب السياره وطلع فلوس من المحفظه ورجع لمركز التسويق بدون مايقفل السياره
عليوي يتكلم بينه وبين نفسه : هذي فرصتي الحين
ويطلع ورقه وقلم ويكتب كلمة الاعتذار
راح بسرعه للسياره حصل المحفظه مليانه فلوس اخذ منها خمسين ريال وترك الورقه وهرب
بعد عشر دقائق
عليوي يكلم نفسه : الحين لو اخذت اكثر ماكان افضل باين انه الرجال الله منعم عليه انا صراحه غبي
فجأه اتصل الجوال ناظرعليوي بالرقم : هذا اكيد اللي اخذت الفلوس من سيارته بيشكرني لاني ماخذتها كلها
عليوي : اهلين
صاحب السياره : لاهلين ولاسهلين يالحرامي ياللي ماتخاف الله تفوعليك وعلى امثالك ومسوي تستهزي انت ووجهك تحط رقمك يخس على امثالك يالحرامي يالنصاب
عليوي يقاطعه :هي هي انت لايكثر كلامك احمد ربك ماخذت الا خمسين بس ماخذت كل المحفظه
صاحب السياره : ولك وجه تتكلم يالحرامي
عليوي : اقول عن الغلط
صاحب السياره : انا مااقول اي غلط انت حرامي وستين حرامي
عليوي : اقول لايكثر بس انا اللي اخذتها كلها خمسين والحين بردها
صاحب السياره : شكلك ناويني بسرقة ثانيه
عليوي : اقول فيه عامود قدام شوي مكتوب عليه ممنوع الوقوف بحط الخمسين في علبة موية صحه خذها منه والله لايكثر لامثالك فضل يالبخيل
ويقفل بعدها على طول
عليوي بعد ماقفل بيكلم نفسه : الحين القريطي البخيل القحروط هذا لو طاح له في حرامي محترف صح كان اخذ كل شي وفوق هذا السياره بعد لكن يحمد ربه طاح في حرامي قلبه طيب مثلي مايحب الحرام اااااه يالدنيا اللي خلت مثلي حرامي خليني ارمي فلوس هذا هنا

اليوم التالي في اخر الليل وعليوي بيكلم نفسه واقف بسيارته : الحين هذي شكلها بتجي سرقه على اصولها فله فاضيه اهلها ماهم فيه ياويلي على السرقه اللي كذا
ينزل عليوي للفله ويدخل ويقرر يروح الغرفة مباشره وهو يبحث يحصل صندوق فيه ذهب عليوي اول مايشوف الذهب ينهبل يصيبه هبال ويضحك من نفسه ويتكلم مع نفسه : ايه هذي السرقة السنعه اللي على اصولها مو اسرق خمسين ريال ولاكم حته من البيت هذا الذهب لو ينباع تقريبا يكفي رواتب سنه كامله خليني اكتب له واشكره لعل وعسى يتنازل عنها صدقه لي

اليوم التالي عليوي يفكر ايش يسوي للذهب : انا الحين ابيعه يعني ؟ لالامايصلح ابيعه هذا ذهب مو اي كلام بنتظر صاحب البيت يتصل لو بعد شهر

بعد اسبوع من السرقة رجع الرجل اللي مسروق ذهب زوجته دخلت زوجته الغرفة وهو اسفل توه دخل الفله فجأه سمع صياح زوجته وطلع جري للغرفة
صاحب البيت : ايش فيك عسى ماشر صياحك واصل للشارع
الزوجة : الذهب كله مسروق
صاحب البيت : ايش من جدك تتكلمي؟
ويتفقد الادراج ويحصل ورقة عليوي وعليها تاريخ السرقه اللي هي قبل اسبوع
الزوجه :انت ليه واقف روح بلغ
صاحب البيت : لالا ان شاء الله ذهبك بيرجع بدون حكومه بس انتي قولي ان شاء الله ماباعه الذهب من اسبوع مسروق مادري وحده من ثنتين انه الحرامي غبي اوانه الحرامي يحب يستهزئ فينا
ويترك زوجته وينزل للصاله يفكر في طريقة يرد فيها الذهب ويقرر يكلم عليوي ويتصل على رقمه
صاحب البيت : السلام عليكم
عليوي : اهلين وعليكم السلام
صاحب البيت : كيف الحال يااخ
عليوي : بخير الحمد لله انا الاخ عليوي من معي
صاحب البيت : يااخ عليوي انا صاحب المنزل ومارجعت الا اليوم وتفاجأت بورقه فيها هذا الرقم ويدعي انه صاحب الرقم هو اللي سرق فحبيت اتأكد
عليوي : اول حاجه انا اللي سرقت لكن لو متصل عشان تسب وتشتم وتقول حرامي وماني عارف ايش انا من الحين اقول لك لاتغلط ولاتسب ولاتشتم لو ماتبي تتصدق عليه بالذهب برده لك
صاحب البيت : يعني الذهب عندك مابعته ؟
عليوي : لامابعته صراحه كنت انتظر اتصالك
صاحب البيت :الحمد لله بس يااخ عليوي اللي اخذته موذهب اصلا
عليوي : اجل فضه هههههههه
صاحب البيت : لالا هذا مثل مايقولون ذهب مزور يعني مو حقيقي تعرف انت الحريم يلبسونه عشان يوهمون الناس انه ذهب
عليوي : لو ينباع بعشره ريال ماعندي مشكله فيه
صاحب البيت : ياابن الحلال انت عارف الحريم هذا مايجيب قيمه وهي مجمعه هذا من فتره يعني كل يوم تشوف هذي القطعه تناسب الثانيه وتأخذها حتى جمعتها كلها فياليت يااخ عليوي لوتكرمت تردها
عليوي : طيب اجيبه الحين ؟
صاحب البيت : ياليت لو انت فاضي
عليوي : بس اخاف مبلغ عني ؟
صاحب البيت :طيب ولايهمك في المكان اللي يناسبك
عليوي : توعدني ماتبلغ الشرطه
صاحب البيت : اوعدك وخذ حتى مني وعد رجال ايش تبغى اكثر من كذا
عليوي :اجل تدري بجيك البيت دام فيها وعد رجال
صاحب البيت : حياك الله في اي وقت
عليوي : الله يبقيك

بعد ماوصل عليوي عند الرجال بالبيت وسلمه الذهب
صاحب البيت : تبي الصدق بس تسامحني يااخ عليوي
عليوي: تفضل ويارجال انت اللي تسامحنا على دخولي البيت
صاحب السياره : صراحه في البداية ماصدقت انك حطيت رقمك ولما قلت انه انت صاحب الرقم قلت اكيد بتتمسخر فيني وتستفزني بس وانا صراحه كذبت عليك وقلت انه اللي معك مو ذهب وهو ذهب خفت انك تطمع فيه
عليوي : تبي الصدق ؟
صاحب البيت : تفضل البساط احمدي
عليوي : اول مرره اكتشف انه فيه اغبى مني واسمحلي على هذي الكلمه
صاحب البيت ياستغراب : وليه تقول كذا ؟ !!
عليوي : انا صحيح اني صدقتك لما قلت انه مو ذهب بس انا لو بغيت اخذه ماخليت رقمي او على الاقل ابيع الذهب في الفتره اللي راحت او جزءا منه
صاحب البيت : هههههههه بس انا مستغرب ليه بتسوي هذا كله وكم سرقه سرقتها بنفس الطريقه وايش اللي صار معك
يبدأ عليوي يسرد له ويحكي له اللي صار معه كله وبعد مانتهى عليوي
صاحب البيت جلس يضحك على عليوي : هههههههههههههههههههه جد انت اشرف حرامي شفتك بحياتي
عليوي : وانت الصادق اغبى حرامي لكن ايش اسوي الزمن حدني على هذا الشي
صاحب البيت : تبي الصدق انا ارتحت لك ياعليوي وعشان كذا انا بخدمك في الوظيفه
عليوي : وكيف كل مكان يقول سوابق مانبي
صاحب البيت : معارفي كثير ولاتخافي الواسطه فووق النظام انت اعطيني بكره ملفك ومايصير خاطرك الا طيب بس اهم شي لاتسرق هههههههه
عليوي : لاخلاص توبه وجزاك الله الف خير وكثر الله من امثالك
صاحب البيت : يااخ عليوي فيه غيرك كثير منهم المظلوم ومنهم التايب لكن المجتمع معاد يتقبلهم لكن الايام هذي حتى في السرقه اللي يأخذون شوي شوي ياوليهم سجن وتطبيق عقوبات لكن اللي يأخذون ملايين مالهم الا الله
عليوي اي والله صدقت يااخوي

انتهت قصة عليوي وترقبوا قصة موضوع اخر

اتمنى القى ردود فيها تقييم لهذه القصة

وشكراااااااا