الموضوع: روايه ظلم الدنيا

ولمن وصلوا لجمارك البحرين .
الشرطي : روح رقم 15
ابو محمد : اوكي تسلم
ووقف ابو محمد السيارة . ونزل من السيارة حامل الجوازات . وإلا جميع الشرطة يأتون بناحية ابو محمد .
احد الشرطة : نبي انفتش السيارة بالكامل خلى ينزلون
ابو محمد : إن شاء الله . يا عيال يالله قوموا يبون ايفتشون السيارة
" ويخرجون العيال من السيارة . ويقفون بره والشرطة محيطة بهم "
الشرطي يكلم المسؤل : اي ما عليه حاضر " ويوجه حديثه إلى البنات " : البنات تعالوا وراي . اهناك انفتشكم
روعة ترفع حاجبها وعلياء اتبوز والباقي مشوا ووصلوا البنات لمكان التفتيش الحجرة المخصصة . دخلو كلهم الحجرة . إلا الشرطي يقول : لالا . مو كلكم مرة وحدة وحدة وحدة
ام محمد : ننطر في الطريق . نقعد في الداخل . وهي تدخل الحجرة الثانية
الشرطي : لا ما يصير
وتدخل علياء اول وحدة وتقوم الشرطية بقفل الباب وهنا تخاف علياء . وادخلتها الحجرة المخصصة للتفتيش . وتأمر علياء بفصخ العباءة وتفصخها . وكل حين جزء تأمر من علياء ان اتفتشها . وعلياء خايفة وتسوي الي تبي منها وبعد وقت خرجت علياء من الحجرة . واخذت جوازها وطلعت بره .
علياء " توجه حديثها لأم محمد تبي اتقول لها شسوت فيها " : يمه
والشرطي ايطالع علياء ويأمرها بأنها اتروح . وتذهب علياء إلى جهة ابو محمد . واندهشت رأت السيارة كل الأبواب مفتحة . والأغراض مرمية في الشارع . . وتذهب بسرعة تبي تفهم القصة
ابو محمد : قعدي على الكرسي وانتي ساكتة
علياء " تطالع من حولها " : إن شاء الله
وبعد وقت . اينادي ابو محمد علياء . ويهمس في اذونها
ابو محمد " هامسا ً " : سمعي روحي قولي لأمج اذا قالوا لكم فصخوا اثيابكم قولي لها لا ترضى
علياء " تبداء بالبكاء " : اهم فصخوني اثيابي انه كاامل
ابو محمد " يعصب ويذهب ابو محمد بناحية الغرفة .والشرطة تلاحق ابو محمد . ويطلبون منه حالا ً يوقف مكانه . ولكن ما اهتم ويلحقه بشار . اما علياء فكان ابو محمد ماسكنها من ايدها . واهي تبجي
ابو محمد " بصريخ " : ام محمد طلعي من الحجرة . لا تخليهم ايفتشونش . طلعي . احنا ما سوينا شي
الشرطي : ما يصير هاي امر ولازم الكل يفتش
بشار : اسكت مالك حق اتفتش اخوااااتي . الحين اتخليهم يطلعون
الشرطي : سكت ولدك احسن لك
ابو محمد " يعصب " : تبوني اسكته . هذوني شتبون مني مفتشيني . وش جايفيني مال مخدارت . هدووني وهدوا اعيالي .
تخرج ام محمد وروعة الي تهاوشت مع الشرطية لأنها ما تبي تفصخ اثيابها .
ام محمد : مالكم حق اتفصخون اعيالي اثيابهم . ماسوو شي لكم مافي . خلونا
وعلياء لم تستحمل الوضع وانهارت في البجي
ابو محمد " مازال يصرخ " : جووف البنية شسويتون فيها . حرررام عليكم حرااام . بتستين واهي ما سوت شي ولاتدري بشي
الشرطي : انزين تعال اشوي اهناك عن الفوضة نتفاهم
ابو محمد : اييي الحين تتفاهمون بعد شنو . بعد ما سويتون الي تبون
علياء مو قادرة تستوعب شي . كل واحد ايصرخ من صوب . ويمر في ذاكرتها الشرطية شلون فصختها اثيابها . فانهارت في البجي . وهدت يد ابوها . والشرطة كانو محاوطينهم من كل جهة . وتركض علياء تهررررب بأتجاه السيارات تبي تطلع من المكان والجميع يلتفت لها
بشار " يصرخ " : علياااااااااااااااااااااااااء
والشرطة تركض خلفها . والمسدسات في ايدهم . اما علياء فكانت تبجي . ويمر في ذاكرتها يوم الشرطة تدخل البيت واتكسر الباب . وكل شي صار لها . والحين . وكانت تركض بلا وعي
واذا الشرطة قدروا يلحقونها ويحاوطونها من كل جهة . والمسدسات بناحيتها . ابو محمد والكل يركض لهم قبل ما يقتلونها
ام محمد " تصرخ " : لالالالالالالالالالالالا بنتي
ابو محمد : هدوهااا
علياء . تنظر إلى الشرطة . وتمرر نظرها إلى كل شرطي . ووتتكلم ببجي : شتبوون مني . تبون تقتلوني قتلووني . تبون تسجنوني مثل ابوي سجنوني . شتبون منا . حرمتونا من ابونا لمن كنا يهال . وكنا محتاجين له " وتشهق " : حرمتونا من كل شي . عيشتونا في فقر وظلم . ما خليتون لنا شي نفرح ابه وبيتنا وبقتونا . والسيارة واخذتونها . شتبون بعد كاااافي " وتمسك علياء راسها . وحست كل الي حولها ظلام اسود ويغمى عليها . وتسقط على الأرض
بشار : عليااااااء
والكل يركض بناحيتها والشرطة تتباعد عنها . ويقومون بأتصالات للأسعااف
ام محمد " ببكاء " : ردي علي يا علياء . ردي علي
ابو محمد : انا رايح اجيب ماي من السيارة
روعة " تلمس علياء " : علياااء قومي . علياء لا تسكتين . قوومي عليااء
اما بشار فكان من بعيد حاظن محمود علشان ما يخاف وقاعدين على الأرض .
فاطمة : عليااء قومي . لا تتطنزين . قوومي تكفين
اما علياء فكانت اعيونها مغمضة ولكنها تذرف منها الدموع . . وبعد فترة من الصريخ . يصل الأسعاف بصوته القوي . ويذهب بناحية علياء . وينزلون السرير ويحملونها ويذهبون
ابو محمد " والدمعة في عينه ينظر إلى الأسعاف . ويكلم ام محمد والباقي ": يالله قوموا . عن الطريق خلا اتمر السيارات . تعالوا قعدوا على الكراسي اهناك
فاطمة حاظنه ام محمد وتذهب معها . وروعة تمشي وراها قعدوا البنات ويا ام محمد على الكرسي . اما ابو محمد فأخذوا اهو و السيارة . وكذلك بشار علشان يفتشونه . وبعد فترة رجع بشار بس ابو محمد لا .
ام محمد : انه لازم اتصل لأم ناصر اقول لها كل شي
روعة : ما يصير حاولت التلفون مافي اهني ارسال . ما يتصل
فاطمة : يعني شلون بنقعد اهني لباجر الصبح
بشار : انزين . انا ابي اعرف الحين اهم ليش سووا كل هذا . شمسوي ابوي
ام محمد : ما تعرف شمسوي . مو لأنه باجر في مسيرة . وابوك الرئيس فيها
بشار : والحين على كل مسيرة بيسون لينا جذي . والله حالة
اما علياء فكانت في الأسعاف تتكلم وعيونها للحين مسكرتنها . : حراام عليكم . خلووني . لا لا
وبعد وقت وصل الأسعاف للمستشفى . ودخلوها بسرعة غرفة الطوارئ وجوا ليها الدكاترة وحاوطوها . وماي . وايسون ليها شغلات . وبعد وقت تفتح علياء عينيها بهدؤ وتنظر إلى حولها .
علياء : وين انه
الدكتور : انتي في المستشفى
علياء " تستغرب " : ليش شصار ؟
الدكتور : اغمى عليج
علياء" تتذكر شوي شوي " : اي اي " وتنتبه . وتجلس على السرير " : وين الباقي امي وابوي ؟
الدكتور : الحين راح ايجون لا تحاتي انتي بس ارتاحي لازم ترتاحين واتهدين
علياء " تنسدح على السرير " : إن شاء الله
وبعد فترة اكملت الشرطة التفتيش كامل وتركت عائلة ابو محمد تمشي ووصّل ابو محمد العيال البيت علشان يرتاحون وبعدين اهو مع ام محمد راحو المستشفى حق علياء
وبعد فترة . يصلا ابو محمد وام محمد للمستشفى . ويدخلان الغرفة على علياء
ابو محمد " يبتسم " : شخبارج علاية
علياء " ويها شاحب " : الحمدلله
ام محمد : يالله عاد ما اقدر انام الليلة بدون ما يكون حسج في البيت . وبعدين من احصل لي وحدة من الصبح اصرخ عليها " بمزح "
علياء : هههههه . ما عليه جوف الدكتور . لأن قال لازم انام الليلة . بس حتى انه ما احب انام في المستشفى
ابو محمد : اوكي امج بتقعد وياج الحين . وانه بروح اجوف الدكتور شيقول
علياء : اوكي
ويذهب ابو محمد إلى الدكتور . ويطرق الباب ويدخل الغرفة .
ابو محمد : السلام عليكم
الدكتور : وعليكم السلام
ابو محمد : انا ابو علياء . يغيت اعرف الحين اهي وش فيها
الدكتور : حياك . اقعد
ابو محمد : الله يحيك
الدكتور : مشكلة بنتك الحين اهي تعاني من ازمة نفسية يعني صادها انهيار عصبي . واحنا ما ندري احتمال ايكون شديد او عادي . فراح اتكون مسؤليتكم تعرفون اذا شديد او عادي .
ابو محمد : شلون نعرف
الدكتور : انتو راح اتجوفنها في البيت اذا على اقل شي اتصرخ واتعصب واذا بجت تبجي واايد واتقول كل شي في قلبها يعني اهني اهي منهارة عصبيا واايد . واذا رجعت مثل ما اهي . يعني صار لها هذا بس ازمة وانتهت
ابو محمد : اها انزين الحين نقدر ناخذها
الدكتور : كيفك
ابو محمد : خلاص باخذها لأن اهي ما اتحب
الدكتور : وحاولوا اذا عصبت واايد تطلعون ابها اتهدونها اترفهون عنها لأنها مسكينة توها ياهلة وشلها بالأنهيار
ابو محمد : خلاص لا توصي اعرف لها انا . يالله عن اذنك
الدكتور : اذنك معااك
وبعدها . اخذ ابو محمد علياء ورجعوا البيت وطبعا صارت لسالفة علياء نشر على العائلة كلها . والكل خاف عليها .بس ام محمد طمنتهم وقالت الحمدلله .
وفي اليوم الثاني
علياء تقعد من النوم . وتنزل علشان تتفطر
ام محمد : وين وين وين
علياء " ترفع حاجب " : شنو وين بتفطر
ام محمد : انتي اليوم عندج راحة لا تتحركين ولا خطوة . كل شي تبينه يوصل لج يالله ردي الغرفة
علياء " تبي اتعجز ام محمد " : انزين بس الكمبيوتر ما تقدرون اجيبونا ليي فوق . لأني لازم اقعد ما اقدر
ام محمد : قلت لج كل شي بيوصل لج بنجيب لج الاب توب والواير موصل لفوق يالله روحي
علياء " تستانس " : اووووووكي
وتذهب علياء للغرفة . وبعد فترة تأتي الخدامة وفي يدها صنية الفطور وتقوم علياء علشان تاكل .
الخدامة : اذا خلصتين ناديني علشان اجي اخذه

علياء " ماتواطن الخدامة من عيشة الله . ترد عليها من غير نفس " : ادري
وتذهب الخدامة وعلياء تقعد تاكل . وبعدها نادت الخدامة . وراحت اتغسل ايدها وام محمد حطت لها الاب توب وواير النت دخلت علياء الغرفة واستانست واتقول في نفسها : يا سلام جذي العيشة ولا بلاش . كل شي زااهب
وتروح وتشغل ايميلها . وكانت رفيقتها وسن ونوف قاعدين. وطبعا ً علياء اول وحدة كلمتها اهي وسن وكانت المحادثة :
علياء : هلا
بعد فترة " وسن : اهليين
علياء : شخبارج ؟
وسن : تمام ويو ؟
علياء : الحمدلله
وايحل الصمت فتذهب علياء لتكلم رفيقتها نوف
(( نوف رفيقة علياء متعرفة عليها من المنتدى واهي كبر علياء في العمر واهي اصلها إماراتية . احيانا علياء تتوهق لأن ما تعرف بعض الكلمات الأماراتية . بس اتمشي وياها لأنها طيبة وحلوة . ))
علياء : سلام
نوف : عليكم السلام
نوف : شحالج
علياء : بخير الحمدلله و انتي ؟
نوف : بخير
علياء : الحمدلله
نوف : شخبارج ويا وسن
علياء : هاذي اهي . ماراح تتغير . نفس الأسلوب نفس المعاملة
نوف : بس خلاص لا تكلمينها اتعورين قلبج ليش
علياء : ما اقدر
وهنا تتكلم وسن
وسن : تكلمي
علياء : ما عندي شي اقوله . وبعدين انه كل اهدر . الحين دورج
وسن : شتبيني اقول . ما عندي شي
علياء : انزين
وتفكر علياء بخاطرة اتقولها لوسن . لأن دايما ً تكتب لها خواطر
علياء : يا حبيبتي انه احبج
وقلبي ما يذكر إلا اسمج
اموت في حبج
واذوب في قلبج
بس انتي حارمتني
وظالمتني من حبج
كله معافيتني
وتاركتني لحالي
ما تعطيني فرصة
اعبر عن حالي
ومع هذا قلبي ما راح ايقول
إلا احبج . ومستحيل اكرهج
يا حبيبتي
وبعد فترة طووووويلة ترد وسن : اها
علياء : شنو اها قولي رايج
وسن : الحين انه اظلمج . وما اكلمج . خلاص ما راح اكلمج علشان انفد الي في الخاطرة
علياء " حست ان وسن راح تقلب عليها " : يه يه يه شفيج الحين جم مرة اقول لج مو كل الي اكتبه فييج . احطه بس حق الصورة الجمالية . فهمي عاااد
وسن : شفهم . شفهم . اكلمج بهدؤ ما تبين . اكلمج بعصبية ما تبين . شتبيني اسوي لج
علياء " طفح الكيل عندها " : هيييييييه ابي اعرف الحين انه شقلت . خلالاص توبة ماراح اكتب لج خوااطر ولا همك الله . مادام هاي الجزاة الي احصله
وسن : اي اي سوي روحج مسكينة
علياء " بعصبية " : بس عااااد . كل ما اقول انج راح اتحسين فيني . واشوي اتحبيني . لا ما عندج . عندج هوااش . او التطنش . هاي الي شاطره فيه لو الحين انه في يوم طنشتج . سويتين ليي العمايل والمصاايب . والحين لمن انه اتطنش واتسوين ليي حركاتج عااااادي . خلالاص ما تبين اتكلميني لا تكلميني . مو بغصب السالفة
وسن : اوهووو . انه بمشي يالله باي
علياء في نفسها : حلي عنا يا " وتكلمها " : بااي
علياء تكلم نوف : نوف يالله الحين انه بقوم يالله باي
نوف : تعاالي وين ما اتحجيت معاج . ما عندي احد قعدي شوي
علياء : لالا ما اقدر . امي تبيني . بقعد بعد الغذة . نطريني اوكي
نوف : اكيييد
علياء : يالله باي
نوف : بباااي
وتصك علياء ايميلها . وتبداء بالبجي . واهي مغطيه ويها تماما وتدخل هنا ام محمد وتندهش من شكل علياء لأنها كانت تبجي بحرقة قلب .
ام محمد : علياء شفيج يمه . " وتقعد امامها وتحظنها " : يمه شفيج اتصيحين
علياء " تمسح دموعها . ولكن ما تقدر " : لا ولا شي . بس رفيقتي مريضة شووي . من جدي لاتحاتين
ام محمد " تخاف على علياء ان تنهار مرة ثانية " : انزين يالله مسحي دموعج الحين بتركب لج بت عمج نور
علياء " تستغرب " : وش جيبها
ام محمد : جت بعد شنو ايجيبها . يزاة الخير تبي تسأل عنج
علياء : انزين انزين خلها اجي
ام محمد " حست بأن علياء فيها شي بس مغيبة عليها . وحست ان علياء منهارة بشدة . لأن راح تبجي على كل شي ."
وبعد وقت تدخل نور الغرفة
نور : السلام عليكم
علياء : وعليكم السلام
وتسلم عليها نور واتحببها
نور : الحمدلله على السلامة
علياء : الله يسلمج
نور : ما تشوفين شر
علياء : الشر ما يجيش
وتقعد نور اتسولف اشوي ويا علياء وام محمد .
في الطرف الأخر وسن تتذكر كلام رفيقاتها يوم اتجمعوا في بيتهم
وسن منسدحة على السرير و تتذكر : علياء ههههههههه ضحكتيني . علياء اصلن محد ايحبها
وسن : وليش
مها : ههههههه . وراج ما تدرين . اولا ذي جذابة . ومعظم كلامها جذب وفوق ده . كانت تستغل البنات بكلامها الحلو وخواطرها السخيفة . وجم ابنية اتعذبت منها . اصلن علياء ما اتحب احد . علبالها الي صار لها من زماان .ويا بعض الناس . علبالها الناس كلهم حقودين ويكرهون . والله انج غبية اذا كلمتينها . انتي ما اجوفين ما عندها رفيجة عدلة
وسن " مندهشة بشدة " : امبله عندها رفيجاات حتى اكثر منج . ولا من كل الصفوف الأول والثاني والثالث . والكل يحبها ويكلمها .
مها : جذاااااااااااااااااااااااااااااابة . ومنافقة . وفتاانة كيفج اذا سوت فيج شي . لا تقولين ما قلنا لج
وسن وهي منسدحة على السرير وتكلم روحها بصوت مسموع : ليش يا علياااء ليش ؟
في بيت ابو ناصر
ام ناصر : وهاي كل الي صار وياهم
مريم : مسكينة علااية . ما تستاهل
زهرة : خلاا اليوم ننزل المنامة من زمان ما رحنا ومرة وحدة انجوف اخبار علياء
ام ناصر " توجه حديثها لأبو ناصر " : ما عندك شغل العصر
ابو ناصر : لا ما عندي خلاص بوديكم
تستانس مريم .
في بيت ابو علي
محسن : يما . المتى بننزل البحرين من زمان ما رحنا
ام علي : مادري . اسئل ابوك
محسن ايطالع ابوه
ابو علي : الحين اهم توهم امس ماشيين ممدى اشتقت ليهم
زينب : بابا . اهم ما جو بيتنا الا دقيقة صلوا وطلعوا
ابو علي : انزين افكر لبعدين يالله روحو درسوا حق معاهدكم
محسن وزينب : إن شاء الله
في بيت ام محمد
اتغدى الجميع . وعلياء نزلت تحت . وقالت مالا داعي اهي تقعد فوق واهي ما فيها شي . ورجعت علياء لطبيعتها . واستانست ام محمد وحتى اتصلت لأبو محمد وقالت له بس لهجة ابو محمد كانت غريبة وقال يبي ايكلمها اليلة في موضوع .
وبعد فترة تصل عائلة ابو ناصر لمنزل ابو محمد .
ام ناصر " تدخل غرفة الجلوس ": السلام عليكم
الجميع : وعليكم السلام
مريم " تذهب مسرعة إلى علياء " : علالالالالالالالالاء
علياء : هههههه هلا الريم
مريم تقعد بجانبها : شلون جذي وش صار عليش الحين كل اعضائج سليمة
علياء : ههههه اي تمام ما فيني شي
مريم : يعله فيني ولا فيش
علياء " ترفع حاجب " : من وين طالعة الشمس اليوم شها الحب
مريم : طولي عمري احبج . بس انتي مو ماعطتني ويه ورايحة ليي للوسن مالتج
علياء " تضايقت لمن سمعت اسم وسن " : انزين قومي انسولف فوق عن الفوضى
مريم : يالله
ام محمد : وين رايحين
علياء : بنروح فوق
ام محمد : اوكي
ويركبن فوق . ويقعدون في غرفة البنات
علياء : ها شخبارج ويا فتونه
مريم " تبتسم " : تماااام
علياء " في نفسها " : يا حظج مو انه مالت عليي " وتكلمها " : زين الحمدلله
مريم : وانتي
علياء " بحزن " : انه . اتهاوشت معاها قبل اشوي
مريم " متعودة على سالفة الهواش " : ما عليه . عقب يومين بتكلمون بعض وتنسون السالفة
علياء : لا ما اظن . احس انها واايد متغيرة علي . وحاسة ان ها السالفة راح اتخلي حد لعلاقتنا
مريم " حست من صج " : وشنو بتسوين الحين
علياء : ماكو يمكن اسويها بلوك . ديليت ما ادري
في غرفة الجلوس
روعة : اقول لج عاد يا سيسوو فشلت الشرطية اتفشل علبالها تقدر عليي

زهرة : اي اي من يقدر عليج انتي . مو اسمج روعة . كل الي اتسوين روعة وابدااع
روعة : هههههههه . زين جفتين اخر كلامي ويا ذيك النفرة
زهرة : لا شنو
روعة : اي قومي قومي على الكمبيوتر اراويج
في حين كانت ام محمد وام ناصر وفاطمة يسولفون سوالف حريم
الشخصيات ::
(( فاتن ( فتون ) : رفيقة مريم واهي اكبر منها بسنة . بس علاقتهم جدا قوية من بعض وما يقدرون ما ايكلمون بعض في اليوم واذا ازاعلوا . يعني نهاية الدنيا ))
وعلى السوالف والهدرة اذن اذان المغرب وصّلوا الجماعة واتعشوا احلى عشى على الضحك والفرفشة وصار الليل والي كانت ام محمد تنتظره بفارق الصبر علشان تبي تعرف الموضوع الي بيقوله لها ابو محمد
علياء ما حبت تسهر وراحت نامت . اما روعة فكانت قاعدة على الكمبيوتر . وبشار ايطالع التلفزيون مع فاطمة
دخل ابو محمد وراح لغرفتهم الي فيها ام محمد دخل عليها
ابو محمد : السلام
ام محمد : عليكم السلام . ها اتعشيت ؟
ابو محمد : اي اتعشيت
ام محمد : انزين . شنو الموضوع الي تبيني فيه
ابو محمد : انزين . الحين بقول . " ابو محمد مو عارف شلون يبدي الموضوع " : انزين . تعرفين شلون ولدتين علياء
ام محمد : ههههههههههه شلون ولدتها عاادي . مثل كل اخوانها
ابو محمد " يبلع ريجه " : لا . السالفة كانت غريبة انا اقول لج . انتي كنتي تدرين الي في بطنج بت صح
ام محمد " مستغربة من كلام ابو محمد " : اي صح
ابو محمد " يكمل " : انزين . انتي ولدتي بت . وكنتين تعباانة واايد . بس ها البنت ما كانت من نصيبنا . وماتت في اللحضة الي كانو بيجيبونها لج . بس انتي كنتي بتستينين . إلا تبيها لأن كان قلبج حاس . وانا ما كان عندي اي خيار . وانا في الممر علشان اقول لج الخبر . جفت ناس يتهاوشون ما يبون بتهم بيودونها مال ايتام مادري شنو وقفت معاهم كلمتهم . وقلت انا ابيها . واخدتها وعطيتج اياها . وانتي قمتي ربيتينها . بس علياء اهي مو بتج
ام محمد " مو مصدقة الي تسمع " : من صجك
ابو محمد : اي من صجي . وامها الحقيقية الحين تبيها . ولمن سمعت سالفة مرضها . قالت خلاص اهي تبيها الحين
ام محمد : وانت شعرفك بأمها
ابو محمد : كنت اتراسل وياها . واطرش لها مسجات واقول ليها كل يوم اخبار بتها . بس الحين اهي تبيها بس انا قلت ليها ان اهي الحين تعبانة . وما تقدر اتحصل ليها صدمة ثانية فخليها ترتاح وبعدين اخذيها . وعطيتها مهلة اسبوع
ام محمد : ما اصدق ما اصدق . علياء مو بتي . ولاهي من عائلتنا . بت غريبة ربيتها . لا مستحيل
ابو محمد : انتي ما لاحظتي انها ولا في شي تشبهج
ام محمد : امبله . بس مو لازم
ابو محمد : المهم عندج اسبوع واحد . عدلي علاقتج معاها . وشوفي شنو تحتاج مانبي انبين لأمها ان احنا مو مهتمين فيها .
ام محمد : انزين
وفي اليوم الثاني
تجلس علياء باكرا ً . وتذهب المطبخ . وتعمل لها فطور خفيف لها وينزل ابو محمد ويدخل المطبخ
ابو محمد " يبتسم ": الله الله على الطبّاخة . اتسوين لج اكل وما اتقولين ليي
علياء : ما دريت انك تبي . الحين تبي اسوي لك
ابو محمد : لالا ما يحتاي . بطلع الحين . يالله باي
علياء : باي " ولمن طلع ابو محمد قامت تتضحك وتكلم روحها بصوت مسموع " : ههههههه يا حليله ايسوي روحها متطور مثلنا . باي ههههههه
وتدخل الخدامة المطبخ .
الخدامة : ها علاء . شنو اتسوين
علياء : نعم منو علاء
الخدامة : انتي له
علياء " بملل " :لا ناديني علياء وبعدين انه كيفي شسوي مالج خص
الخدامة : انزين
وتطالعها علياء بنظرة احتقار وتحمل الصينية وتخرج عنها
الخدامة : ما عليه انا اراويش صبري شوي
وبعد ما اكملت علياء الفطور . ودت الصينية المطبخ . وراحت الغرفة علشان تقعد على الكمبيوتر .
فتحت علياء الكمبيوتر وعلى طول ما يشتغل دخل عليها بشار
بشار " والنوم في عيونه " : شمقعدنج ها الحزة
علياء " من دون ما تنظر إليه " : بعد
بشار " يدخل ويجلس " : انزين . اتفطرتين ؟
علياء : اي
بشار : وشنو اكلتين
علياء : بسك . حق الأكل اتسوي تحقيق . وش اكلت يعني سندويجة وجاي
بشار " يقوم من مكانه " : اروح اسوي لي فطور . قبل ما يقعدون اخواتج . وايخلصون عليي الأكل
علياء : اي اي روح لحق على عمرك
ويخرج بشار . وعلياء تكلم نفسها : بل عليه ولا يشبع هذا . ايخاف على دبته . ما يقدر يحرم روحه من وجبه اساسية
علياء . لم تفتح ايميلها لأن تدري محد قاعد من الصبح . فقررت تتصفح في صفحات المنتديات .
في حين تنزل ام محمد ومعها محمود . الي كان قاعد من النوم وقاعد يهدر .
سمعت علياء صوت محمود فخرجت له مستانسة واهي تغني : ويلي عليي ها الولد هذا الولد الي بحبه " طبعا اغنية من تأليفها "
ومحمود . قعد ايقول معاها وبعدين حظنته وقعدت اتحبب فيه . اما ام محمد فكانت اطالع علياء بحزن . اشلون محمود بيقدر ايعيش بدون علياء . واهو الي متعلق فيها . حتى النوم اينام معاها
علياء استغربت من نظرة ام محمد وتكلمها : يمه شفيج اطالعيني جذي
ام محمد " تنتبه " : لا ولا شي . انزين اكلتي لج شي
علياء : اي اكلت .
ام محمد : عيل مسكي اخوج . وانه بروح اسوي فطور لي ولأخواتج
علياء : اوكي
وتحمل علياء محمود وتذهب ابه في الداخل
في جهة اخرى . حملت الخدامة كاس فيه دهن مال الطباخ . وركبت فوق . واتسللت ودخلت داخل غرفة البنات . وراحت لخزانة ملابس علياء . وفتحته وصبت على اثيابها واغراضها . الدهن .
بعد فترة علياء اتمللت من المنتدى وقالت بتروح بتتسبح . وركبت فوق دخلت الغرفة وفتحت خزانتها . سحبت لها تي شيرت قدامها جافتا رطب طالعت الثياب من فوق لتحت جافتهم كلهم رطبين . وريحتهم خايسة . طالعت الباب . جافت عليه اثار شي مكتوت من فوقه لتحته . خافت علياء . وراحت اتنادي امها
علياء " اتنادي " : يمه . يمه
ام محمد : ها شفيج
علياء : تعاالي فوق ابسرعة . ابيج
ام محمد " تستغرب " : انزين
تركب ام محمد فوق . وتتجه لغرفة بناتها . وتدخل
ام محمد : ها شعندج
علياء : جوفي يمه . شنو في كبتي . الثياب كلهم رطبين وريحتهم خايسة
تتقدم ام محمد وتنظر إلى الكبت . وتلمس مكان الرطب وتشمه
ام محمد : هاي ريحته مثل مثل دهن مال الأكل
علياء " بعصبية " : وشنو جيبه في كبتي
ام محمد : وشدراني عنج
علياء : توني الصبح مفتحته ماكان فيه شي . شلون الحين صار
ام محمد : مو متهاوشة ويا احد من اخوانج . وسوو لج جذي
علياء : لا
ام محمد " تستغرب " : غريبة
علياء " تتذكر . وشكت في الخدامة . وعرفت شنو اتسوي ": يمه انه الحين بشيل الثياب الرطبين والي فوق وبوديهم الغسال . والباقي بخليهم احتاج إلى كاميره
ام محمد " ترفع حاجب " : وليش
علياء : بجوف من الي كتاه
ام محمد : جيل الحمدلله صبري بتصل لأبوج اذا ما يبيها بعطيج اياها
علياء : اوكي
وبعد فترة . على طول ما اتعدل علياء الثياب " اتكلم روحها " : علبالها ذكية او اتعبني . محد بيتعب وبيغسل الثياب من جد وجديد غيرج انتي . هيين تلعبين وياي . وراج ما تعرفين منهي علياء إن ما رجعتج بلدتج ما اكون انه علاء
وهنا تدخل ام محمد وفي يده الكاميره . وتفتحها علياء الكاميره واتخلي على الفيديو واتسجل واتغيب الكاميره بين الثياب . وتروح
ام محمد اجوف علياء وتبتسم على حركاتها .
ونزلت علياء تحت . وقعدت تهدر ويا بشار
بشار " اينادي " : ميري ميري
علياء " تستهزأ " : لا تنادي ميري شنو ميري . قول جبنة كيري
بشار : هههههههههه
وبصوت واحد مع علياء : كيري كيري كيري
وسمعت الخدامة إلا اهي ميري . وانقهرت . ومرة ثانية حملت كاس وراحت فوق . وسوت مثل الأول واهي ما تدري مسكينة ان الكاميره صورتها .
اهني علياء عرفت ان اهي . واستانست على ذكائها انها عرفت تقهرها وخلتها اتعيد الحركة . وبعدين راحت علياء فوق
وفتحت كبتها مرة ثانية واخذت الكاميره
روعة " بملل " : اووووووف عليج علياء . كل حين اتفتحين ها الكبت وشحاطه فيه . خلينا انام يه
علياء : نامي نامي . محد يودج . بس لمن اقول لج الخبر اخليج تنسين النوم
روعة " تفتح عيونها شوي شوي " وشنو الخير
علياء تقعد صوبها : الخبر عن الجالية الغربية
روعة : وشنو اهو
علياء تفتح الكاميره : لحظة
روعة اطالعها بأستغراب
وعلياء اتطالع الكاميره . وجافت الخدامة اتفتح الكبت . وعندها الكاس وكتت على الثياب . وتبتسم علياء ابتسامة ساخرة وتنظر إلى روعة
علياء : جوفي ها المقطع
روعة تلبس النظارة وتطالع إلى الكاميره .
روعة : شنو ده
علياء : هههااااي . علبالها الشاطرة تقدر عليي وتقهرني مثل ما اقهرها ما تدري ان اهي مو قدي
روعة : بل عليج ينخاف منج . انزين والحين شبسوين

علياء : شبسوي يعني . الكاميره بخلي ابوي يجوفه وبخليه ايوديها ديرتها
روعة " تفرح " : ايييييييييي اخييييييرا بتذلف عنا
علياء : وذيك الحزة بنسوي لينا حفلة ما صارت ولا استوت
روعة " تكمل " : وراح انقول انتصرنا والناصر الله . " وتصفق "
علياء : المهم يالله اروح اكمل مهمتي وانتي كملي نومتج
روعة : اي نوم . مافي نوم ابي اجوف اشلون تنطرد الجالية الغربية
علياء : لا ماراح تنطرد إلا لمن اتغسل اثيابي . واتحط عليهم كوم فورت ايصير ريحة مال الحدائق الأستوائية
روعة : هههههههههههه يالله روحي
وتذهب علياء بفرحة انتصار على الخدامة . لأم محمد
علياء : هاج يمه . جوفي من الجاني على نفسه
ام محمد : انجووف " وتنظر ام محمد إلى الكاميره . وتندهش " : بل . الخدامة جدي اتسوي
علياء : ايي . وانتي شعلبالج ايجي من الخدم غير المشاكل والمصايب وجرائم القتل
ام محمد : سكتي سكتي اوووش لا تسمعج . بعدين تقتلج بعد
علياء : اتخسي الا اهي تلمس شعره مني ان ما سدحتها في الأرض ودفنتها في ها البيت
ام محمد : بل طلعتي انتي اجرم منها . ينخاف منج
علياء : اييي . واذا ما سويتين ليي الا ابيه . برتكب فيج جريمه
" وتمثل علياء كأنها تمسك رقبة ام محمد . وتشنقها "
ام محمد : ههههههه اهو خلي رقبتي . شتبيني اسوي يا حضرة الرئيسة علياء
علياء " بفخر " : احم احم ابيج الكاميره تعطينها ابوي ايجوفها وايخلي الخدامة هاذي جبنة الكيري اتروح بيتهم ودولتها
ام محمد : إن شاء الله . اعطيني الكاميره . " وتاخذها من عندها . وتخرج علياء من الغرفة .
وصار وقت الغذة وجا ابو محمد واجتمعت العائلة على طاولة الطعام والكل ياكل . واهو ساكت . الا الفوضة الي بين ام محمد ومحمود علشان تأكله . ومحمود ما يبي .
وبعد الغذة . علياء قالت الحين الوقت المناسب ام محمد ما رضت اخذت علياء الكاميره وركبتها على التلفزيون علشان الجميع ايطالع وقامت علياء تتكلم
علياء : اليوم الصبح رحت افتح كبت اثيابي لقيتهم رطبين وريحتهم خايسة . ناديت امي . قالت ريحة الدهن مال الطباخ بعدين انه قلت لازم اعرف من الي سوو جذي في ثيابي . فما كان غير اني خليت الكاميره وطلع الي مسوي اهو " وتشغل الكاميره والكل يجوف . واهو مندهش وخايف .
ابو محمد "يرفع حواجبه بدهشه " : هاي الخدامة
علياء : اي يبه هاي الخدامة . وانه برااي ان اذا خليناها راح اتزيد افعالها اليوم دوري . باجر دور روعة وجذي لين ما كل واحد تنتقم عليه بطريقتها . فأقول لازم انت اتسفرها واترجعها ديرتها قبل ما يصير فينا شي
ابو محمد : اي عدل كلامج بس
علياء : لا بس ولا شي الخدامة احنا من زمان ما كنا نبيها بس خليناها علشان كنا في ايام مدارس ونحتاج إليها . والحين اسئل الكل فما راح تسمع غير ان احنا ما نبيها " وتغمز علياء لروعة . وروعة تبتسم "
ابو محمد : من يبي الخدامة منكم تظل
الجميع بصوت واحد : محد
ابو محمد : انزين علياء روحي نادي الخدامة
علياء : اوكي
وتذهب علياء اتناديها وتتقدم علياء على الخدامة بينما ما تدري علياء ان الخدامة سمعت كل الكلام ودرت ان علياء كشفتها فكانت حامله سجين في ايده من وره دخلت علياء الحجرة ووقفت والخدامة بعد وقفت
الخدامة : نعم بابا
ابو محمد : خلاص . احنا ما نبيج الحين اتروحين اجيبين اثيابج واتخليهم في شنطة وعلى اقرب طيارة راح ترجعين بلدتج
الخدامة " تبتسم ابتسامة ساخرة " : ما عليه بابا بس عقب ما اقتل علياء
" وتخرج الخدامة السجين وتهجم مثل الوحش على علياء . بينما الجميع اتجمد ولا عرفوا شنو ايسون . اما علياء فكانت تبتسم والضحكة في ويها
وما ان قدمت الخدامة السجين صوبها الا علياء بكل بطولة تضرب يد الخدامة . وتطيح السجين من يدها . وتضربها في بطنها بريولها . وتعطيها بوكس . وتسدحها في الأرض وتقعد فوقها وتقرب السجين من رقبتها وتقول بصوت عالي : تبين تذبحيني يالنذلة . انه الحين بدبحج . وتوها بتقتلها
يأتي صوت ابو محمد : علياء لا . لا علياء . بس
علياء تنصت لصوت ابوها واتقوم من على الخدامة الي كانت ترجف من الخوف . والسجين في يدها .
علياء : يبه لازم الحين تطلعها من البيت بدون ثياب ولا شي . ترجع بهدومها الي عليها
ابو محمد : يالله قومي . سود الله ويهج من خدامة
ويمسكها ابو محمد ويخرجهامن البيت اما الكل للحين مو مصدق الي صار قدامه
فاطمة : علياء . شلون سويتين جدي
علياء " بأبتسامة ساخرة " : كل الي بيتعدى حدوده وبيحاول ايضرني . ما بيحصل إلا جدي واكثر بعد
بشار : علياء علميني ها الحركات الي سويتينها علشان اغلب الربع
علياء : ما عليه . هاي الا حركات تيكوندوا . خلى ناصر ايعلمك
بشار : لا نويصر ما يرضى .
علياء : خلاص خلاص بعلمك
ام محمد " ضايعة في الطوشه " : شتعلمك واتعلمها . علياء انتي بنية لا تسوين ها الحركات واايد . ما يناسبج
روعة : هههههههههههه . مو مهم الحين . الحين الحفلة اتصير . اخيرا ودعناج يا الجالية
علياء مع روعة يقومون وبنفس الحركة ايدورون . وبصوت واحد : انتصرنا والناصر الله ايوه . وانتصرنا والناصر الله " وتقّوم علياء بشار . وروعة فاطمة ويسوون معاهم
اما ام محمد فكانت تتضحك على عيالها وعلى التناقم مع بعض وكل واحد ايحب الثاني بس كانت حزينة ليش انها راح تفقد حس الفكاهة في البيت وراح تخسر علياء .
.
.
.
وفي اليوم الثاني
الكل كان نايم من السهرة الي سهروها البارحة والحفلة لمغادرة الخدامة . وقعد الكل ساعة متأخرة في حين وصلت عائلة ابو علي إلى البيت وكان الكل نايم ماعدا ام محمد . والجدة .
وبعد فترة تصعد ام علي إلى غرفة النوم مالت البنات .
ام علي " بصوت عالي " : يالله قوموا . بسكم نوم . خيش قوموا
علياء " لمن سمعت الصوت اذكرت وعرفت ان صوت عمتها ام علي . فتشأمت وقالت " : اصبحنا واصبح الملك لله
ام علي " تفضل علياء في العيلة على الكل " : قومي قومي علاية . جبت لج الطبخة الي تحبينها
علياء " في نفسها اتقول " : هاي احسن شي فيش "وتكلمها " : مشكورة ما تقصرين يا احلى عمة
ام علي " توجه كلامها إلى الباقي " : يالله عاااد قوموا بسكم نوم
روعة " تتأفف " : افففففف . انه ما رقدت الا الصبح . تعبانة ابي انام
فاطمة : المتى الوصول " وهي تحك اعيونها "
ام علي : صار لينا تقريبا ساعة اهني
فاطمة : ايي عدل . " وتتثااوب "
ام علي " تمللت منهم وراحت "
فاطمة " تنط من مكانها " : شرااايكم على الخطة
علياء " تقوم " : تعجبييييييييييييييين
فاطمة : هههههههههههه
روعة : ما بغينا اتروح ياخي فهميها . مانبي انقووم . اهي لا تواصل . بس زين سوينا .
علياء " تقلد على صوت ام علي " : قومي قومي علااية . جبت لج الطبخة الي تحبينها
روعة وفاطمة " يقلدون على صوت علياء " : مشكورة ما تقصرين يا احلى عمة
الكل : هههههههههههههههههههههههههههههههه
وبعدها قامو البنات بالدور على الحمام يتغسلون ويبدلون اثيابهم . ولما كملوا اتغطوا ولبسوا الشيلة . ونزلوا للغرفة الي قاعدين فيها .
الكل : السلام
الجميع : عليكم السلام
ام محمد : اتريقتون والله للحين
علياء : لا . ما اتريقنا
ام محمد : عيل قعدوا الحين نتريق كلنا مرة وحدة
ام علي : تعالوا تعالوا اراويكم منتجات مال الشركة الي اتعامل وياها
روعة " ترفع حاجب . وتقول في نفسها : اي شركة ذي الهبلة الي ما غسلت اعيونها واشتركت معاها . " وتكلمها " :اي شركة هاذي ؟
سكينة " بأبتسامة " : avon
فاطمة :اول مرة اسمعها
ام علي " بتكبر " : شيسمعكم ابها هاي شركة راقية متطورة ايش الي ايخيكم توصلون لها
سكينة " بدلع " : كل المشاهير يتعاملون معاهم .
علياء " تتطنز " : لا زين زين . مبروك عليكم حصلتون الشركة الي يتعاملون فيها المشاهير . اقول ما جفتون مرة نانسي وانتون تشترون لكم
روعة وفاطمة يضحكون بصوت منخفض . "
ام علي : احنا ما نروح الشركة طلبيتنا الي نبيها توصل لنا لعند الباب انزين طبعا ما باخد من عندكم افلوس يعطونا مجانا ً . جوفو هاذي الحمرة . بخمسين ريال . وهكو انه حاطت ليي تبون ؟
ام محمد : بناتي ما يحطون لهم حمرات وخرابيط ابوهم ما يرضى
سكينة " بتطنز " : يوو يعني في الأعراس بيروحون ووجيهم فاضية على الطبيعة كل شي احلى
علياء " بمسخرة " : هي هي هي بايخة
سكينة اتطالع علياء بنظرة احتقار
روعة : انزين ما عندج اكسسوارات او جدي خرابيط ابي ازين تلفوني ؟
ام علي : لحظة اجوف لا ما عندي حق تلفونات حق الأيادي فيي
روعة : اجوف
" وتنظر روعة إلى الأشياء وكل شي مو حلو ومو ستايل قديم والوانه قوس قزح موب حلو . فكانت روعة بس تطالع بس ما خذت شي اما فاطمة اخذت لها عطر مع ان الريحة ماكانت لذاك الزود حلوة
ام علي : علااية جوفي هاي صبغ الأضافر وااجد حلو حتى الريم اخذت وزنوب بتي اخذي لج
علياء " من غير نفس ومن دون ما اتطالع " : ما ابي

ام علي " بتكبر وبعصبية " : حمدوا ربكم جايبت لكم اياهم ابلاش ترفسون النعمة اتكشخوا اشوي اخذوا لكم من الغاليين . والله خلاص اتعودتون على الأشياء الي بريالين او بثلاثة
علياء " عصبت من طريقة كلام عمتها " : اي لأن احنا متعودين على الي بريالين من جذي ما نبي الغالي . فلا اتعبين عمرج وبعدين من قال لج ان احنا نبي نتكشخ وقاعدين انطر علشان انصير مثل الناس . احنا بكيفنا الي نبي انسوي ولو نبي نشتري الشي حتى لو كان بمليون راح ناخذ
سكينة " بتطنز " : هههههاي بمليون . خلى يحصل لكم 100 اول بس حلو الواحد ان يحلم يشتري لي اشياء بهاي الأثمان
روعة " عصبت " : لا عادت زودتينها واايد . اقول احترمي نفسج وثمني الفاظج . ورا احنا طارين من عندكم اجيبون لنا افلوس . والشي الي راح ايجي من عندكم ما نبيه .
فاطمة : وحتى هاي العطر وانه اشمه علبالي ريحة مجاري . ما ابي يودوا " وتمده تعطيهم "
ام علي : طول عمركم اعيال فقر ولا راح تتطورون حتى اسلوبكم في الكلام . مال قديم
علياء " فقدت اعصابها . ورفعت من حدة صوتها " : تكفييييين عاد انتي يام التطور . انتو الأنترنت ما تعرفون تستخدمونه حتى الأسم ما تعرفون اتقولونه والله جوفي لبسكم الي كله من المجمعات ما اجوف شي حلو او متناسق احمر على وردي الحمدلله والشكر . والله الجناط الي يقول مال السفر مو مال ايد . اقول سكتي سكتي والي يعافيج لحد يسمعكم علباله انتو قوم عنتر
ام علي " عصبت " : احترمي نفسج . علبالج انه اصغر اعيالج ترفعين صوتج عليي . صج انج قليلة ادب . " وترفع ام علي ايدها على علياء تبي تصفعها . لكن علياء مسكت ايد ام علي بقوة ونزلتها بكل قوتها "
علياء : انتي اخر وحدة اتفكرين ترفعين ايدج عليي . لحشها لج حش فاهمتني .
ام محمد مو مصدقة الي تجوف كانت بس ساكتة واتجوف الهواش الي صاير . وما عرفت شنو اتقول او شنو اتسوي .
اما بشار ومحسن فكانوا حاضرين على كل شي وجافوا . وهنا يدخلون
بشار " والدمعة في عينه ": بس كافي خلاص كافي نجرة كافي الي تسونه . دوم متهاوشين . ياناس انتو موب غرب واجانب انتو اهل بدل مو كل واحد ايساعد الثاني كل واحد ايفكر اشلون يؤذي الثاني او شلون ايذله وايهينه . طالعوا من حولكم . جوفوا الناس شلون عايشة وانتو شلون جوف الدنيا اشلون تمشي وانتو تمشوا عكسها . واتقولوا الدنيا تظلمنا ومحد قاعد يظلم غيركم انتو
محسن " متأثر من الوضع " : اربع وعشرين ساعة تتهاوشون . جوفوا عائلتنا اي كبر كانت والحين جوفوها اشلون صارت . وين كنا وين صرنا . خوالي وتهاوشتون معاهم وافترقنا معاهم لمن انجوفهم ما انكلمهم حتى اعيالهم ما صرنا نعرفهم ليش كل هذا فيكم . ليش تكرهون بعض ليش ما احد ايداني الثاني . انتو يالكبار الي لازم اتعلمون اشلون انحب اهلنا . صرنا احنا انعلمكم . ليش ؟ ليش ؟
وتدخل زينب وتكمل على الكلام : انه طول عمري ما جفت اهل جذي اتحسر يوم اني اجوف رفيقتي كل اهلها صوبها وما اتحس بالنقص مو احنا شلي فيكم غير عن الناس . شلي فيكم . ليش اقلوبكم اتغيرت ليش الدنيا اتغيرت وغيرتكم معاها . ها القد احنا مو مهمين عندكم اتعلمونا من صغرنا على الكره والحقد . اتعلمونا على اشياء احنا ما نبيها . وغير هذا تجبرون على اشياء من دون ما تشوفون راينا اذا كنا احنا موافقين او لا
هنا سكينة رجعت لشخصيتها الطيبة وكملت على الكلام : صج احنا اغنيا . بس جوفوا حياتنا مو بالسعادة الي عايشينها خالي عبدالله . وين اخوي وين اختي كلهم ابعاد عنا كل واحد بديرة ايعيش ابروحه ولا يفكر حتى ان يسئل عنا . ليش يا يمه تبعدينا عن بعض . ليش ما اتحبين ان نكون ايد وحدة وقلب واحد كل واحد ايحب الثاني . كل واحد ايشيل هم الثاني . والله عاجبتكم العيشة الي عايشينها انتو الكبار تتهاوشون واحنا الصغار شذنبنا . ذنبنا ان عايشين معاكم . ذنبنا ان احنا من اهلكم الدنيا عمرها ما ظلمتنا بس انتو ظلمتوها وخليتوها تظلمنا وصار كل شئ من فعل ظلم الدنيا .
علياء كانت تبجي بهدؤ وتتذكر كل شي مر بحياتها .
كفاية
كفاية انتو ظلمتونا
وحرمتونا وذليتونا
حرمتونا من عم جنبنا
ايظمنا ويمسح دمعنا
حرمتونا من السعادة
والوفا والحب والصداقة
خليتونا في دنيا تظلمنا
ما تفكر فينا او ترحمنا
كفاية ما عملتوا فينا
كفاية ما جرحتو فينا
وين حبكم لبعض
وين قربكم لبعض
اتفرقتوا وفرقتونا معاكم
وخليتونا في غربة
انتو السبب فيها

في بيت ام ناصر
ام ناصر : قلت لا يعني لا . اليوم خالتج في بيت يدتج . وبنروح العصر اهناك ما في طلعه
زهرة : يما يما . انه المتى قعدت ويا خالتي او ويا عيالها انه كلهم ما اواطنهم
ام ناصر : استحي على ويهج هاي خالتج وبعدين بسج كل يوم و الثاني قلتي بتطلعي ويا رفيجاتج ابوج ما راح يرضى
زهرة : بلى يمه رضا وقال لي اقول لج
ام ناصر " بحزم " : ماكووو
زهرة " تحوس عند امها وتتلوس عليها " : يما . اخر مرة عاد . ها المرة غير بنتسوق . غير عن كل مرة بس نطلع ناكل . وبعدين يما توه الصبح بنروح نتسوق ونتغدى وبعدين يمديني ارجع واروح وياكم حق الخالة العزيزة .
ام ناصر " بتفكير " : ومن الي بيوديج وبيجيبج . انه مو متفرغة لج . بقعد بطبخ .
زهرة : نصور ما راح ايقصر
ام ناصر " اتمللت من حنة زهرة . تبي تنهي السالفة " : روحي سئلي اذا رضا بعدين فارجي و لاتتأخرين الساعة اربع انتي منرزعة في البيت فاهمة
زهرة " تحضن امها واتحببها " : مشكورة يا احلى ام في الدنيا . الله لا يحرمني منج
ام ناصر " تبعدها عنها " : روحي بس روحي . ذبحتيني حق المصلحة الله لا يحرمني منج
زهرة : لا يما افا عليج . اصلن انه اكثر وحدة في ها البيت احبج بس انتي ما تعطيني ويه كل شي حق الريم
ام ناصر " تذهب عنها " : زين انتي ما حصلتي الي تبين . يالله فارجي لأخوج
زهرة : افا عليج . طيراان اروح له
وتروح زهرة لأخوها ناصر . تدق باب الحجرة . وتفتحه واتطل براسها وتدخل
زهرة : نصوري نصوور
ناصر " يترك تلفونه " : نصور بعينج . اصغر اعيالج انا علشان نصور .
زهرة " تقعد بجنبه " : من حبي لك من جدي ادلعك
ناصر " يدري حركات اخته هاذي كلها بس علشان تبي شي منه " : خلصيني قولي شتبين ما يحتاج ها الف والدوران اضلين ليي ساعة .
زهرة : اوكي حبيبي قصرت علي المسافة اسمع ابيك عقب الصلاة اتوديني المول . علشان اهناك رفيقاتي مسوين جمعة راح نتسوق شوي وبنتغدى وبرجع البيت . شرايك ؟ شقلت ؟
ناصر " عارف السالفة " : انزين انزين . بس ولي الحين . وعقب الصلاة 12 اتكونين بارزة ما برزتي . دوري ربعج ذيك الحزة
زهرة " تستانس " : 12 إلا خمس بتلاقيني في السيارة انطرك
ناصر : انزين . ما كملتي بس ذلفي شعندج قاعده
زهرة " تطالع اخوها . وتغني " : خيالك خيال . مش عايدي
ناصر " يمسك المخدة ": ذلفي برع . لا باهذي على ويهج الحين
زهرة . تتضحك وتركض بره الحجرة
في حين مريم كانت قاعده تنتظر في الحديقة دقت الباب . علشان تطلع لرفيقتها وحبيبتها فاتن .
زهرة جافتها وراحت له
زهرة : شتسوين اهني في الشمس . دخلي داخل
مريم " تتلعثم " : ها لا ولا شي . اشم هوا طبيعي احس روحي مختنقة .
زهرة : لالا حلفي بس . يالله داخل جدامي . بسرعة
مريم " في نفسها " : هاي وقتج يا العقربة . وتكلمها : انزين انزين
وتوها مريم بتدخل داخل الا يدق الباب
زهرة : وين رايحة
مريم : بفتح الباب
زهرة : لا انه بروح
مريم : انتي ما عليج شيلتج انه عليي
زهرة : انزين . اجوف فتحيه قدامي
وتفتح مريم الباب بأبتسامة مشرقة .
فاتن : هلا مريوم " وتبتسم لها "
مريم : هلا
ويحضنون بعض
فاتن : اشتقت لج يالسبالة
مريم : وانه بعد
" زهرة تطالع المشهد . وتقول في نفسها : والله انهم سالفة ذيلين بس لالا المشهد مؤثر . اروح اتجهز احسن لي من احبج وتحبيني . وتذهب زهرة داخل "
فاتن : المهم ما اقدر اطول اكثر . ابوي ينطرني في السيارة هاج يودي هاي علشان تتذكريني
مريم "تاخذه " : ماراح انسااج .
فاتن : المهم طيارتي اليوم الساعة 7 . برجع عقب سبوع وشي . اهتمي بروحج . ولا تصيحين واايد . اوكي حبيبتي
مريم " والدمعة في عينها " : إن شاء الله . انتبهي على روحج . واكلي عدل . مو تنسين عمرج
فاتن " والدموع بدت تنزل " : ما ادري اشلون بقدر اعيش ها السبوع من دونج
مريم : اوكي خلاص خلاص . روحي الحين لاابوج يعصب عليج
فاتن : اوكي
ويحضنون بعض مرة ثانية وسمحوا للدموع تنزل بكل هدؤ .
فاتن : اوكي " وهي تمسح دموعها " : يالله باي
مريم : بااي
وتدخل مريم وهي حاملة الي عطتها اياه فاتن وكان عبارة عن قلب حليو محاوطة الريش والفرو . وداخله صورتها . ومعاها كانت رسالة .
زهرة وهي تشور شعرها : شعطتج العاشقة الولهانة
مريم : صورتها . وبعدين شخصج
زهرة : تكفييين خرعتيني
مريم : اوف

وتضع مريم القلب بجانب سريرها . وتخرج إلى الصالة علشان تقره الرسالة
وكانت الرسالة .
إلى حبيبتي مريوم .
ادري ان فراقي عنج راح ايكون صعب عليج . ولكن ما راح افترق عنج . راح ارجع لج فاتحة ايدي مرة ثانية . ومتشوقة لسماع دقات قلبج الي كل دقة تعبر عن مدى حبج لي . ومتشوقة لسماع كلامج الحلو . وسوالفج الي تونسنيي . يمكن ما عطيتج الوقت الكافي لتعبرين عن حبج بس حبي لج وانتي هم اتحبيني . هاي اكبر دليل وما يحتاج للأوراق والرسايل اتمنى في غيابي عنج . انج اتحافظين على نفسج ولا تفكريني اني راح اكون مرتاحة وانه بعيدة عنج لأن كل لحظة بتمر عليي بيكون خيالج وكلامج في ذاكرتي ومخي وقلبي . ما راح انساج . واتمنى انج بعد ما تنسيني
وفي النهاية ما بطول عليج . اتمنى ان الصورة اتحافظين عليها . واعتبريني قاعده جنبج . يالله تيك كير
باي .
مريم كانت دموعها تنزل . حضنت الرسالة وشمتها واتقول في نفسها : احبج احبج احبج .

في بيت ابو محمد
بعد الصراحة الي قالوها العيال اتجاه الكبار . هدائت الأمور ورجعت المياه إلى مجاريها اذ تصالح ابو محمد ويا اخوانها الي مخاصمنهم ولا ايكلمهم . رجع لأخوانه ولأخته وصارت الجمعة في البيت . والكل كان مستانس . اما علياء كانت حاسة بأن ام محمد مغيبة عنها شي فكانت اشوي مضايقة . مع ان كانت عندها مهمة كبيرة بانها اتخفف عل مريم من الحزن الي شايلتنا في قلبها .
علياء : بس مريوووم . كافي . يعني دموعج شراح اتسوي وبعدين اهي ما قالت لج بتهاجر علشان اشوفك وين يا مهاجر . اهي سفرة رايحه تستانس في ها العطلة وراجعة .
مريم " تمسح دموعها " : ما اقدر ما اكلمها . اسبوع وشي
علياء " اتطالعها بحنان " : وشدراج . يمكن تتصل لج انتي ما تعلمي الغيب . يمكن تتشوق لج واتروح لج مكان النت وتقعد اتكلمج .
مريم : اهي رايحة تفتر وادور لو تحبس روحها مكان النت .
علياء : شاسوي لج بعد . بس اتصبري اعتبري ان اهي ما سافرت مثلا كمبيوتركم خراب وهو في المصلح . " بملل " : اوووووه يالله الريم . بلا بياخة . شيلي ها الكشرة الي عليج يعني انه الحين اكلم من مثلا . محد يفهمني غيرج . بس يالله ريووم
مريم " تبتسم من خلف دموعها لعلياء " : انزين . الحين انتي ما قلتي لي اخر اخبارج ويا القاسية قلوبهم .
علياء " تضايقت " : بس تصطفل اهي بطريج وانه بطريج . يعني انه متقطعة على مرافقتها . سمعي عندي انه قاعده
مريم " تعرفها وبملل " : معرووفة . الي ما يبيني ما ابيه . والي ما ايثمني انه ما اثمنه ويروح ايدور ربعه .
علياء : ههههههههههههه . فديتها انه الي عارفتني وفاهمتني
مريم " تقمز لها "
في طرف اخر
زهرة : بايخ . وسخيف . اربع ما صارت راز لي الفيس اهناك فشلني قدام ارفيجاتي
روعة : حمدي ربج بعد ان وداج جوفي مصيبة غيرج اتهون عليج مصيبتج . الحين انه جم مرة البنات يعزموني وانه لا اروح امي ما تعرف وابوي مو متفرغ . والأخ العزيز في اوكرانيا من ايوصلني والحين كا انتي طلعتي وياهم اتغذيتي ودرتي وجيتي
زهرة : صح كلامج . بس بعد
روعة في نفسها : يا كثر ما تحن اشلون اسكتها اي لقيتها " و تكلمها " : ما قلت لج . اتهاوشت ويا الأخت
زهرة " مو مصدقة " : حللللفي
روعة : ايي . تعالي اروايج على البوتر
زهرة : غبييييية قلت لج لا تتهاوشين معاها . مسكينة . حرااام
روعة : ممكن نبي نقعد اشوي
زهرة : يالله من لساعة وانتي قاعدة قومي
سكينة : انزين لحظة اشوي اكمل بس دقيقتين وقايمة
روعة وزهرة : يالله ننطرج
سكينة : عااد مو على راسي . روحوا اشوي وتعالوا
روعة : انزين
زهرة : امشي خلى انسوي جولة تفتيشية على الأختين . كل متغيبين فوق . امشي انروح لهم
روعة " عجبتها الفكرة " : يالله
وهم في الطريق . جافوا محسن وبشار بيطلعون
روعة : بشااااااار
زهرة : محسسسسسن تعال اشوي
محسن : نعم . شنو تبين
زهرة : ابيك تشتري لي من البقالة على قولتكم
محسن : انزين شنو ؟
زهرة : ابي جبس ليز الحار . وابي كاكو مارس
بشار : وانتين . هي زوعة شتبين
روعة : احترم نفسك . ابي ابي . جيب ليي مثلها
بشار : انزين . بنجيبهم وبنحطه على الكرسي وبنطلع . بس بناديكم وانتون اجون
زهرة : على امرك . روح خلصنا
ويركبون فوق حق علياء ومريم . ويفتحون الباب مرة وحدة .
علياء " تنقز " : بسم الله الرحمن الرحيم . هي شفيكم
مريم : ميانين ما عليج منهم
زهرة : عليائو شتسوين قاعده اهني
علياء " ترقص " : دانس . شسوي يعني اسولف ويا الريم
روعة : وها السوالف ما تحلى لكم الا فوق
علياء : وه خفتين تكفيين . والله احنا بكيفنا وراحتنا الحين انتو شتبون
زهرة : نبي نعرف شتسون
مريم : انه اقول لج شنسوي "وتقمز لعلياء "
ويحملون المخدات . ويركضون بناحيتهم .
في حين روعة وزهرة طلعوا من الحجرة ركيض . زهرة : شيل عليها
مريم وعلياء : هههههههههههههههههههههههههههههههههههه
علياء : ئال ايه قال . شتسون . فايند يور كوارتر
مريم : فاااااال ان يور فيس
علياء : قيثمي فايث " ويصفقون بأيادي بعض "
واستمرت الفرحة على العوائل والجمعة بعد التفرقة الي دامت حوالي سنين . وعرفوا الكبار مدى الغلط الي غلطوها ودفعّوا قيمتها على العيال . فلكل كان حاس بالذنب . ليش انهم حرموا ها اليهال . من الفرحة . و الأهل والجمعة .
اخر يوم لبقاء علياء في العائلة
ام محمد وابو محمد اجتمعوا مع الباقي وقالوا لهم .اثناء نوم علياء . استيقضت علياء .
علياء " ترفع حاجب " : غريبة . وينهم . معقولة الكل قام من النوم . الحين الساعة جم " وتنظر الى الساعة " : توها 12
وتنزل علياء فرأت بشار يطالعها والدموع في عينيه ويطلع بره البيت
علياء " اتناديه " : بشااار بشااار . تعاال
علياء : شفيهم ذيلين . شسالفة مرة امي والحين بشار .
روعة تخرج من الغرفة . وترى علياء وتطالعها بنظرة حنان " : توج قاعده من النوم
علياء " وهي تغسل ويها " : ايي توني . " وتصك الماي " : الا بقول لج شفيه بشار ايصيح . ابوي صرخ عليه
روعة " تتلعثم " : ها ا . اي اي . ابوي قال له اييسوي رياضة وانتي تعرفين من احد ايقول له ايصيح
علياء " مستغربة من ارتباك روعة " : اها
علياء تدخل المطبخ . وتحمل لها سندويجة . وتروح الحجرة .
علياء : صباح الخير
الكل : صباح النور
ابو محمد : يالله انا طالع الحين يالله سلام
ام محمد وفاطمة : مع السلامة
علياء اتروح تقعد على الكمبيوتر واتفتح المسن
علياء : يما . محمد قاعد
ام محمد : انزين كلميه قولي له شخباره . شمسوي
علياء : هههه ايقول لج قاعد بين اربع طوف حتى حفظهم من كثر ما امقابلهم . يسئل ما تقدرون اجيبون . التذكرة رخيصة ايقول
ام محمد " اتفكر " : قولي ليه بنجوف . بسئل ابوه وبنجوف اذا قدرنا
علياء : اوكي
علياء : ايقول اذا وافق طرشو لي مسج قولو . والحين اهو بيقوم سلمي على الكل
وبعد ان انهت علياء محادثة اخوها محمد . تدخل هنا وسن اون لاين
علياء تبتسم . بس بعدين بوزت وظلت مدة علياء لا اتكلمت ولا اهي اتكلمت . بعدين علياء اتشجعت واتكلمت . وكانت المحادثة :
علياء : سلام
بعد فترة وسن : عليكم السلام
علياء : شخبار ؟
وسن : تمام
وسن : يالله برب
علياء : تيت
وبعدين بالغلط تكتب وسن الكلام : اي . انزين سووي انتي جدي احسن
علياء " تستغرب . شتهر هاذي " : ؟
وسن " في نفسها " : صج غبية . وشها الغلطة . وتكتب لها : بالغلط
علياء " انقهرت " : اها
علياء " في نفسها " : هاي اخر شي اتوقعته منج . تتهربين مني . ليش يا وسن . شسويت لج لكن ما عليه . راح تندمين . وذيك الساعة ماراح ايفيد ندمج
وتقوم علياء بعصبية من على الكرسي . وتاخد الجريد من الأرض وتشققها . وتشوت العاب محمود الي على الأرض وتقول بصوت عالي : انه اراويج هييين . علييي . ان ما نزلت راسج للقااع هيييييييين
فاطمة : علوي شفيش
ام محمد " تقوم لها " : عليااء . توج زينة وشحلاتج . شلي قلبج . علويه .
علياء " بعصبية " : مالكم دخل فيني . محد لي دخل فيني . عسااني علة ان شاء الله محد له خص فاهميني . ولا حد يكلمني
ام محمد " خافت على علياء . اكيد الحين راح تنهار . شا سوي . لازم اطلعها الحين اتشم هوه واتغير جو
ام محمد : علياء . تعالي معاي اشوي . بنروح الحديقة . امشي وياي
علياء " تهداء نفسها " : انزيين
وتخرج علياء ويا ام محمد . وتوديها ام محمد حديقة هادئة وحلوة . علياء قعدت اطالع المكان . وهي ساكتة ومضايقة من تصرف وسن . ولا بعارفة اشلون راح اتكون النهاية
وبعد فترة
تعود ام محمد ويا علياء البيت . في حين علياء استغربت لوجود احد في البيت

علياء " رافعة حاجب " : من في البيت . نعال غريب
ام محمد " حست بأن الحين وقت رحيل علياء " : ما ادري .امشي انجوف
علياء دخلت الحجرة واستغربت هاذي معلمة وياهم في المدرسة . درستها فصل واحد .
علياء " اترفع حواجبها بدهشة " : معلمة حنان
حنان " والدمعة في عينها " : اي . تعالي يا بتي تعالي خليني احضنج
علياء " مو مصدقة الي تسمع " : شتقولين . معلمة فيج شي
حنان : علياء . انه امج . لا تقولين معلمة . امج انه وانتي بتي
علياء " مو مصدقة " : شنو ؟ لالالا هههه اكيد انتي تمزحين . لا مستحيل . انتي تمزحين معاي . قولي الصج . قولي ؟
حنان " تجهش بالبكاء " : يما . انتي بتي صدقيني . ما اجذب عليج قولوا لها . قولوا .
علياء : ابي دليل واحد ايقول انج امي . " وتبداء علياء بالبكاء "
حنان " ترفع عبايتها " : جوفي ريلي اليسار وريولج . الشامة نفسها.
علياء " ودموعها تذرف . تنظر إلى ريلها اليسار . وتطابقت الشامة " : لا . لا مستحييل ليش ؟ ليش ؟
حنان " تعطيها الصور " : جوفي ها الصور . هاي الصور تثبت انج بتي . وشلون اني عطيتج لأمج المزيفة .
علياء " تنظر إلى الصور . ولا تدري شنو اتسوي " : انتي انتي . انتي امي
حنان " تفتح لها ايدها " : اي انه امج . تعالي يمه خليني احضنج . تعالي لحضني
وتركض علياء إلى حضن امها الحقيقة . وحصلت علياء على دفئ حضن الأم الحقيقة . والي اهي قطعة منها
ام محمد انزلت رأسها على طرف الجدار . وكانت تبجي بهدؤ

.
.
.
.
وعاشت علياء سعيدة مع امها واهلها الطيبين . والكل كان يحبها وكانت امها تعوض عنها اتسوي لها كل الي تبي واشترت لها الي كان خاطرها يبي . وكانت كل يوم تطلع معاها . ويتسوقون . ويشترون . ويروحون السينما والمجماعات . يعني حياااة سعيدة . واخير الدنيا ابتسمت في ويه علياء
في غرفة علياء
تفتح علياء ايميلها لتره ما النهاية مع وسن
ورائتها انها اون ومسرعة كلمتها بدون هلا وشخبار
علياء : انه ابي اعرف . ليش انتي اتعامليني جذي ؟ . ليش انه شسويت فيج
وسن : ما سويتين فيني شي سويتين لربعي
علياء " مستغربة " : وشنو سويت لهم
وسن : علياء بس كافي جذب وتمثيل انه عرفتج وعرف اسلوبج والاعيبج على البنات . ما عندج إلا جذب في جذب . وتلعبين في المشاعر . واتعذبينهم . وفوق هذا تبيني اكلمج . ليش ناويه على عمري منج
علياء " بعصبية " : الحين انه جذي ؟
وسن : خلاص ما يحتاج اطولينها . عرفتين راي فيج . وها الصداقة الي بيني وبينج ما ابيها خلاص
علياء " بعصبية اكثر " : ممكن اعرف من الي قال لج ؟
وسن : ما يحتاج عرفت وخلاص
علياء : ما يصير تتهميني بشي انه ما اسوي . ولا براضيه اتقولين ليي من يمكن هاي انه متهاوشة معاها وحاقدة علي اطلع علي اشاعات
وسن : مها . ارتحتي
علياء : ايوه مها . تبين اقول لج هاي اهي شسوي فيني
وسن : الي سوت فيج سوت مو مهم عندي
علياء : هاذي الي ما تستحي على ويها . اهي اول من كانت تبي تذبحني مع ان انه ما سويت لها شي . في الأبتدائية واهي قلبها اسود عليي جافت السيارة بتصدمني وانه ما كنت منتبه خلتها تصدمني وعورت اريولي . يعني انتي ما تشوفيني ما امشي عدل على ريولي اليسار . ما تشوفين عميه . ما سئلتين السبب .
وسن : المهم انه انتهى كلامي معاج . يالله باي
علياء : باي
علياء بدت تبجي . وتدخل هنا ام علياء
ام علياء : يما . علاية شفيج حبيبتي .
علياء " تبجي " : يما
ام علياء . تحضنها . : بس خلاص يمه . خلاص . شفيج
علياء : ليش يمه الدنيا كل تظلمني . ليش محد يحبني . ليش الكل يكرهني مع اني ما سويت شي . ليش ؟ الي ايحب الكل صار يكرهم . والي قلبه طيب . صار جاسي . يما ليش الدنيا تمشي بالمعكوس . ليش الدنيا جدي . ليش
ام علياء : قومي حبيبتي . قومي خلا نطلع اشوي
علياء " تمسح دموعها " : يالله
في طرف اخر
يرن هاتف وسن . وتذهب لرفعه
وسن : هلا مها
مها : هلا وسون . شخبار
وسن : الحمدلله . وانتي
مها : بخير
مها : ها شسويتي على علياء
وسن : خلاص تركتها . ما بحاجيها
مها : هههههههههههههههههههههههههههههههههههههههههههه
وسن : وشله تتضحكين
مها : لأنج اضحكين
وسن " مستغربة " : ليييش
مها : يا هبلة هههههههههههههههههه . احنا انقص عليج بس كنا منقهرين ليش ان علياء اتحبج كل ها الحب . فسوين لج صادوووووووه
وسن " ترفع حواجبها " : يعني كل الي قلتون خطاء
مها : هههههههههههه اي خطاء
وسن : باي
في حين ام علياء كانت تسرع بالسيارة وكانت الأشارة صفرة وراح اتصير حمره . ولكن لم تستطيع الوقوف من السرعة . وطوفتها وتأتي سيارة اخرى من جهة اليمين . جهة علياء . ويحدث التصادم
علياء " بصريخ " : يمااااااااااااااااااااااا
في حين
وسن كانت تشرب ماء . ويسقط الكأس من ايدها . ويتحطم .
ام وسن : يما شفيش
وسن " مرتبكة " : لا ما فيني شي ما في شي
وبعد فترة . يأتي الأسعاف . ويحمل علياء الي كانت في غيبوبة . ام ام علياء فلم تصاب الا بالكسور .
وقد علمت عائلة ام محمد وام ناصر والكل كان ينتظر الدكتور شنو ايقول . ويرن هاتف مريم .
مريم " تبتعد عن المكان " : آلو
وسن " هلا مريم
مريم : هلا
وسن : وين علياء . بقيت اكلمها
مريم " تتلعثم " : علياء
وسن : اي
مريم : علياء في المستشفى واهي في غيبوبة من الحادث
وسن : شنو ؟
وسن : اي مستشفى
وتدلها مريم المكان وتأتي وسن بعد ساعتين مسرعة
وسن : وين ؟ وين ؟
مريم : اهني
تدخل وسن والدموع في عينها : علياء . علياء ردي عليي . علياء سامحيني . قصوا عليي . وخلوني اظلمج . علياء لا تعذبيني ردي عليي ما كنت ادري اسفة علياء علياء والله احبج . علياء ردي ولو بكلمه . لا تروحين ابعيد عني ما ابيج الا انتي . علياء
علياء تفتح عيونها ببطء وتفرح وسن
وسن " اتصرخ " : دكتووووووووور . تعالوا فتحت اعيونها
علياء " والدمعة في عينها " : جرحتي قلبي وذليتينه .
وسن : عل
وتدل علياء رأسها إلى الطرف الثاني . وتسلم روحها إلى الله . وتهجر هذه الدنيا . وبلاويها
وسن " تصرخ " : عليااااااااااااااااااااااااااااااااااااااااااااااا ااااااااااااء


النهـــــــــــــــــــــــــــــــــــــايــــــة