الموضوع: رواية إخوة و أخوات

الحلـــــــ(( 2 ))ـــــــــــــــقة


في صباح يوم جديد.

بشرى عند الدرج: يالله بسرعه تأخرنا!!
العنود: يالله يالله هذا احنا جينا.
الهنوف: والله انا مالي خلق اطلع. بس عشانكم بس
الجازي وبأيدها ساندويتشه: وأنا بعد عشانكم بس
العنود: انتي تبين تقعدين حق البلع فهالأكل .
الجازي: شسوي اذا نفسيتي مفتوحه للأكل
بشرى: اقول خلونا نمشي بسرعة قبل لاتقلبونها محاضرة على الجازي الدبه
الجازي جلست على الارض وقالت:خلاص بطلت ماني رايحة معاكم
العنود: ياربي عليك. يالله قومي مو وقته الدلع الحين.
الجازي: مابي خلاص روحوا انتوا
الهنوف:خلاص كيفك بس راح يفوتك الأكل اللي راح نطلبه هناك.
الجازي بأبتسامة: أكل خلاص أجل يالله خلونا نمشي
بشرى: الحمدلله والشكر يالله أمشـــوا

((بعد وصولهم البحر))

الهنوف بحماس: ياللــــــــه شكثر البحر حلو وشفاف
العنود: أيـــــــــه مثلـــــي.
الهنوف: أقول انطمي انتي.
الجازي: أقولكم. شرايكم نسبح
بشرى: جنت أختي. وين نسبح قدام الناس
الجازي بأستظراف: بخليهم يغمضوا عيونهم
العنود: ياثقل دمك يالجازي.
الجازي: أجل خلونا نتسابق
الهنوف: نتسابق. نتسابق. يالله
بشرى: لا حبايبي أنا مافيني أسابق.
الهنوف بترجي: عفيه بشرى. عشاني بس هالمرة
بشرى: لا مابي.
العنود بترجي: يالله عاد بشروه لاتصيرين عنيده. خلي جمعتنا تصير حلوة.
الجازي بترجي: يالله بشرى وافقي
بشرى: مدامكم مصممين. خلاص ماشي راح اتسابق معاكم.

((ابتدوا البنات بالسباق واثناء التسابق طاحت الجازي على الأرض والبنات الباقين التفتوا عليها وضحكوا وهم بعدهم يسرعون لين اصطدمت بشرى برجال))

بشرى ابتعدت عن الرجال شوي وقالت بصراخ: يعني أنت ماتشوف قدامك
.: والله وجهي السؤال لك ياحلوة. مو أنتي كنتي تركضين ودايره وجهك على وراء
بشرى: حتى ولو. أنت تقدر توخر يوم شفتني اركض. بس انت تعمدت تصطدم فيني.
.: مع أني مو غلطان بس يالله عشانك يالحلوه. أنا أسف.
بشرى طنشته وراحت لخواتها.

((مع خواتها))

العنود بضحكه: هاه شسويتي مع الرجال. غسلتي شراعه
الهنوف: الصراحه الرجال حده جميل.لو انا منك أخذت رقمه واللي فيها فيها.
بشرى: هذا أنتي اللي تسوين هالشغلات مو أنا حبيبتي. هذا اللي ناقصني وش شايفتني بايعة نفسي والله شايفتني مثلك أخق من أشوف أي رجال حلو
الجازي قاطعتهم: أنتوا تتكلمون عن منو هاه. فهموني
بشرى: ليش خواتك مانشروا الخبر للحين
الجازي: من جاو من عندك وهم مافيهم ألا الضحك.
بشرى: غريبة!! المعلوم خواتي بخور سوق غريبه ماعلموك.(وحكت للجازي شصار معاها وبعدها الجازي قالت): وأنتي شسويتي له
بشرى: ماسكت عنه. عطيته العين البنفسجية. عشان لا يعودها و.
قاطعته العنود: بشروه
بشرى: هاه
العنود: هذا هو جاي قبالنا.
بشرى: شيبي بعد ملاحقني
العنود: علمي علمك. قومي شوفيه شيبي؟
بشرى: ويــــــــــــع. لا أقوم ولا شي.
الهنوف: أجل انا بقوم بروح أشوف شيبي!! ((ويوم بتقوم))
بشرى مسكت أيد الهنوف : أنتي انثبري أنا اعرفك من قمتي له بتخقين وبعدها بنلقاك بالمستشفى خلي الجازي تقوم له.
الجازي: اوووك انا رايحه له.
((وقامت للرجال وقالت): خير شبغيت ياخوي
: أنا اسمي وليد وحبيت أعتذر عن اللي صار مع اللي صدمت فيها. فياريت تقبل اعتذاري.
الجازي: خلاص مشكور وما قصرت. أنا بالنيابة عن أختي أقولك مسموح. الحين تبي شي ثاني
وليد: سلامتك. بلغيها سلامي وتحياتي.(( وراح عنهم))
((رجعت الجازي لخواتها وبشرى قالت)): شفيك قعدتي وياه ساعة ليش شقالك
الجازي: الصراحة هالرجال مؤدب. جا يعتذر لك عن اللي صار وياه. وقالي أسمه وليد
بشرى: وأنا شدخلني أذا اسمه وليد ولا خالد. خله يولي.
العنود: انا ايقنت أنه انعجب فيك.
الهنوف: مثل ماقالت العنود. الظاهر سلبتي عقله وقلبه.
بشرى: أقول بس يركدون.انطمي انتي وياها انتوا اللي خليتوني أوافق اتسابق معاكم غصباً عني وشوفوا شاللي صار.
الجازي: يمكن مكتوب لك انك تصطدمين فيه ويصير بينكم علاقة حب مثلاً.
بشرى: حب مع هالأشكال أقول بس خلونا نرجع البيت ترى ضاقت فيني الوسيعة. بلا حب بلا خرابيط.
العنود: ماصار لنا ساعة من وصلنا تبينا الحين نروح
بشرى: أجل خلاص أنا بروح وأنتوا خلكم قاعدين.
الهنوف: يانروح كلنا جميع. يانقعد كلنا جميع
الجازي: أجل خلاص يالله خلونا نمشي.
العنود: مدامكم كلكم بتروحون. أنا شيقعدني لحالي
بشرى: يالله أجل مشينـــــــــا.

((وركبوا السياره وراحو)).


التوقعات:

منو هذا اللي أسمه وليد وهل له قصة مع قصة البنات

الحـــــــ(( 3 ))ــــــــــلقة

في الجـــامعة.

هند: هاااااااااي بشرى
بشرى :أهليــــن هند
هند: شلونك حبيبتي
بشرى بدون نفس: زفت ولله الحمد
هند: ليش عاد
بشرى: على اللي صار لي أمس.
هند: شصار
بشرى: أمس اقولك رحت مع خواتي البحر. عاد خوااتي البلوه خلوني اتسابق معاهم عاد وانا اركض اصطدمت برجالالله يرجه
هند: ههههههه. وبعدين شصار
بشرى: غسلت شراعه وخليته بيزه ماتسوى.
هند:هههههههههه عسى عاد حلو
بشرى: مايهمني خليه يولي.
هند: خلينا منه الحين ووسعي صدرك. (( وسكتت شوي وتذكرت)): عالعموم نسيت اقولك.
بشرى: شنو
هند: انتي معزومة عالعشا مع خواتك في بيتنا.
بشرى: متى. اليوم
هند: أيــــه اليوم.اجل بكره
بشرى: ههههههه. خلاص حبيبتي . أحاول
هند: مو تحاولين ياحلوة. بتجين غصباً عنك.
بشرى: أوووك. بقول لخواتي وأعطيك خبر.
هند: أجل انتظر اتصالك

((في احـــدى الشركات))

العنود توها داخله مكتبها.
رحمة:العنود تو الناس ياقلبي. ليش جايه بعد
العنود: ليش انا تأخرت
رحمة: لا انتي أول وحده مداومة لاتخافين.
العنود: ههههههه. رحموه بلا استظراف
رحمة: ياحلوه. رئيس القسم ينتظرك.
العنود بدون نفس: اووووف.ياشينه على أول الصبح
رحمة: اقول بسرعه عجلي روحي له قبل لايفصلك.
العنود: يخسي أهو وأشكاله
((يدخل رئيس القسم))
رحمة: سكتي . سكتي هذا أهو جاي.
رئيس القسم:شرفتي يالعنود
العنود: أيــــه شرفت. عندك شي لاسمح الله.
رئيس القسم: شهالأسلوب الخايس اللي تكلميني فيه على اول الصباح.
العنود ببرود: والله هذا أسلوبي
رئيس القسم: ممكن تتركين كل اللي بإيدك وتجيني المكتب
العنود: والله عندي شغل وايدلم أخلص بعدين أفكر اجيلك.((ببرود)):أنتبه بعدين افكر اجيلك
رحمة أبتسمت ابتسامة خفيفة
رئيس القسم بتنرفز: أوووك يالعنود.بنشوف!! ((وطلع)).
رحمة: والله أنتي مو سهله يالعنود
العنود: أفا عليك بس.اجل هذا يتحكم فيني

((في بيت الدلوعات))

الهنوف في غرفتها وهي تكلّم بجوالها.

الهنوف: هلا حبيبتي نوف شلونك.
نوف: الحمدلله.ألا أقول. شالطاري عليك متصله علّي.
الهنوف: والله ماكو.أشتقت لك وحبيت اكلمك فيها شي
نوف: لا مافيها شي. بس أحس أن عندك سالفة بخاطرك تبين تقولينها.
الهنوف: لا سالفة ولاشي.بس لأني طفشانه حبيت أكلم أي أحد
نوف: يالله سولفي . أسمعك
((وقاطعها الخط الثاني اللي جاها على جوالها))
الهنوف: حببتي نوف. أكلمك بعدينعندي خط ثاني.
نوف: اوووك ياقلبي.
((وسكرت من نوف وردت على الخط الثاني))
الهنوف قبل لاترد: أوووفهذا شيبي بعد والله غثّة((وردت)): هلا بدر.بغيت شي
بدر: هلا حبيبتي. اخبارك
الهنوف وهي شايله السماعه عنها: حبيبتك بعينك يامال الخرعه.
بدر: ألووو. وينك. وين رحتي يالهنوف
الهنوف حطت السماعه بذونها : معاك يابدر.
بدر: حبيبتي الهنوف ممكن أشوفك اليوم والله مشتاقلك.
الهنوف بأنفعال: نعم وبصفتي شنو أشوفك
بدر: بصفتي خطيبك وزوجك بالمستقبل
الهنوف: ويــــــــــع.أنت من صجك
بدر: ألحين صرت بنظرك ويــع يالهنوف نسيتي بالأول كنتي تلاحقيني من مكان لمكان
الهنوف: أقول يركدون بس. ويالله مابي أشوف رقمك على جوالي.فاهمني ((وسكرت السماعه))

بعد دقايق: حلوه هذي يبي يشوفني ولا بعد يقول حبيبتي. مالت عليك من رجال.
خلني أقوم أشوف هالدعله وينها فيه. ((وطلعت من غرفتها ونزلت الصالة)).

على الدرج.

الهنوف: مشاعل عندنا وماحد قال لي
مشاعل: أيــــه عندكم. مالت عليك ياللي ما تسألين.
الهنوف وهي رايحه لهم: والله تدرين أشغال و أعمال و.
قاطعتها مشاعل: أقول لايكثر.يعني مستكثره 5 دقايق تسألين فيها عني أهي كلها: ""ألووو أخبارك. يالله باي""
الهنوف: ههههههه.خلاص عاد كليتيني بقشوري يالخبله
الجازي: الصراحه بردت خاطري مشاعل. زين تسوي فيك.
الهنوف: أنتي أخر وحده تتكلمين.
مشاعل: عالأقل الجازي أحسن منككل يوم تسأل عني وعن أخباري مو مثلك .مالت عليك.
الهنوف: وأنتي شفيك صايره كبريت اليوم. الظاهر ماكله فلفل قبل لاتجين.
الجازي:ههههههه.خلاص يابنات فكونا من سالفة التشره والعتاب الحين وفتحوا سالفه غيرها
الهنوف: أي والله غيروها ترى لاعت جبدي
الجازي: أقول مشاعل
مشاعل: هلا
الجازي: شنو السالفة اللي كنتي بتقولينها قبل لاتجي الهنوف
الهنوف: سوالف من وراي
مشاعل: أيه كنت بقولك يالجازي، بس يوم جات الهنوف هونت ماراح أقول بعدين تصكني عين
الهنوف: والله عيني مو حاره
الجازي: يالله يامشاعل قولي. تراك شوقّتيني.
مشاعل: ههههههه. شوقتّك ليش داخلين بمغامرة
الهنوف: هههههههه. بعدك على حركاتك ماتبطلين منها
مشاعل وهي تقوم عنهم: والله يابنات عمي مادري شقول لكم.
الهنوف: بتقولين ولا شلون
مشاعل: شلون
الجازي: قولي يالله خلصينا
مشاعل وهي عينها تلتفت على الهنوف والجازي: أنا انخطبت!!
((بشرى وهي داخله مع العنود)): ألف الصلاة والسلام عليك ياحبيب الله محمد
العنود: ككككللللللللللوووووشششش
مشاعل: بسم الله الرحمن الرحيم. من وين طلعتوا
العنود: من المصباح السحري
بشرى: شلونك يابنت عمي
مشاعل: والله الحمدلله بشوفتكم
الهنوف: ماعليك منهم وقولي لي. منو تعيس الحظ اللي بياخذك
مشاعل: تعيس الحظ بعينك. وجع يوجعك
العنود: ايــه صج منو الخطيب
مشاعل:واحد من معارف أخواني أسمه سعيد واللي عرفته عنه انه مؤدب وخلوق وهادي وكل شي فيه زين
الهنوف: عاد أسمه لايق عليك. ""سعيد و مشاعل""
مشاعل: اقول أستحي على وجهك. خيّلي عاد.
العنود: يالله مبرووك يامشاعل
بشرى: تستاهلين حبيبتي. مبروك
الجازي: مبرووك ياعروس
مشاعل: الله يبارك فيكم حبايبي الفال لكم ماعدا الهنوف
الهنوف: وليش عاد يالخايسه
مشاعل: لأنك الوحيده اللي ماباركتي لي.
الهنوف: بس؟! هذا اللي مزعلك تامرين أمر مبروك يا شعولتي
مشاعل: تو الناس ياقلبي تقولينها. كان انتظرتي ليوم الخطبه وبعدين قلتيها لي.
الجازي: ومتى ان شالله العرس
مشاعل: الصراحه أنا مو حابه أسوي عرس ولا أهو حاب هالفكره. فبيصير حفلة عائلية صغيره في بيتنا وبعدها نسافر على طول
الهنوف: وليش يالخبله ماتسوين عرس . خلينا نفرح ونرقص ونستانس
الجازي: والله يامشاعل أحسن لك كذا
الهنوف: أي أحسن أنتي بعد الزواج اللي مافيه طقطقه ووناسه مو زواج اصلاً
العنود: خلاص البنت على راحتها.ماتبي تسوي عرس بكيفها، أنتي شدخلك
بشرى: يالله انا استأذن بروح ارتاح بغرفتي لأني وايد تعبانه. سوري مشاعل لأني مابقدر اقعد معاك
مشاعل: عادي حبيبتي. روحي ارتاحي أنتي.
بشرى: يالله سلام ((وطلعت لغرفتها))
العنود: أيــــه ماقلتينا أخبارك


في غرفة بشرى.

بشرى تكلم بجوالها صديقتها هند: هلا هنوده حبيبتي.
هند: هاه وصلتي
بشرى: أيــــه من ربع ساعة تقريباً
هند: كلمتي خواتك ولا لسه
بشرى: عن شنو
هند: أمداك نسيتي
بشرى تذكرت العزيمة: لا والله للحين ماكلمتهم، الحين بروح لهم واقول لهم.
هند: انتظر اتصالك. سلام حبيبتي
((بشرى سكرت من هند وطلعت من غرفتها ونزلت الدرج لخواتها))

في الصالة

بشرى بأستغراب: وين راحت مشاعل
العنود: توها طالعه وتسلم عليك
بشرى: الله يسلمها. والله كان ودي تروح معانا الليله
الهنوف: وأحنا وين بنروح الليلة
بشرى: ليش أنا ماقلت لكم
العنود: لا ماقلتي شي
بشرى: الليله احنا معزومين عالعشا في بيت هند صديقتي أظن تعرفونها
العنود: وهل يخفى القمر.أكيـــد نعرفها
بشرى: انزين. الحين جاوبوني بتروحون أو لا
العنود: أنا من جهتي ماعندي مانع.
بشرى والتفتت على الهنوف والجازي: وأنتوا بتروحون أو لا
الجازي: مدام السالفة فيها عشا أنا موافقة
بشرى: ادري أنك موافقةوأنتي يالهنوف
الهنوف: أفكر بالموضوع
بشرى: شنو اللي بتفكرين ليش خاطبينك
الهنوف: ان شالله. الله يسمع منك.
بشرى: يالله ألحين أخلصي علينا. بتروحين أو لا
الهنوف: مدام الكل بيروح انا شيقعدني لحالي. قطوه مثلاً!!
العنود وهي تهز راسها وتبتسم

الحــــــــــــ(( 4 ))ــــــــــــــــــلقة

في بيت هند

هند وهي تفتح الباب بأبتسامة: هلا حبايبي. تفضلوا البيت بيتكم.
بشرى: كيفك ياهند
هند: تمام أنتي شلونك
بشرى: الحمدلله
العنود: شلونك حبيبتي هند
هند: الحمدلله بشوفتكم.تفضلوا
بشرى: بيتكم هدوء. ليش ماكو أحد
هند: لا ماكو أحد.أمي في بيت جدي.وأخواني بالمجلس مع أخوياهم
بشرى: أهــــــــا
الهنوف: هنوده اخبارك
هند: هلا حبيبتي سوري لهيت بالسوالف مع بشرى ونسيت اسلم عليك
الهنوف: عادي حبيبتي
((جلسوا وفصخوا عبايتهم))
هند: الجازي شلونك
الجازي: حبيبتي الحمدلله
هند بضحكة واستظراف: أخبار التمارين الرياضية
الجازي: ههههههههه. ماشي الحال . تسلم عليك.
هند: ترى بشرى وايد تحكي عنكم وخاصةً أنتي يالجازي.
الجازي: صج وشنو تقول عني
هند: تقول انتي مطلعه لهم قرون.هههههههه
بشرى أبتسمت والجازي التفتت عليها وقالت بغضب خفيف: انا مطلعه لكم قرون يالخبله
بشرى: الصراحة أيـــــــه
هند: ههههههههههههه. خلاص بلا نجره. انا اتغشمر معاكم بس.
العنود والهنوف: ههههههههههههههههههه. والهنوف قالت: عادي خليهم.أحنا متعودين.
الجازي: هند كأني لمحت عندكم مزرعة أحصنة اذا ماكان يتهيأ لي.
هند: لا ما يتهيأ لك.
بشرى: عاد الجازي تموت على ركوب الخيول.
الهنوف: أيـــــه. والدليل على هذا أبوي شاري لها مزرعة بأمريكا.
هند: أووه. أوووه. شعليك يالجازي. من قدك
الجازي انحرجت وبعدها قالت: مدام ماكان يتهيأ لي اجل بقوم اروح. يصير أركب
هند: خذي راحتك حبيبتي البيت بيتك أنتي روحي الحين على ما أجهز لكم العشا.
بشرى وهي تقوم: يالله وانا بجي أساعدك بالتجهيز.
العنود: تبون مساعده
هند: مشكورة حبيبتي. أنتي ارتاحي وأنا وبشرى بنقوم بالواجب.

((وراحت بشرى وهند للمطبخ والجازي طلعت لمزرعة الخيول))

يرن جوال العنود وترد: ألووو.ألوووو. ذكريات تسمعيني.((وينقطع الخط))
الهنوف: من اللي داق عليك ذكريات
العنود:أيـــــه ذكريات. بس انقطع الخط لأنه مافيه أرسال
الهنوف: زين اطلعي برا عشان يلقط معاك
العنود: هذاني بروح
((وطلعت العنود برا ودقت على ذكريات))

في المطبخ.

هند: أقولك خلاص ماعاد استحملها هالأستاذه. والله كرهتني بالماده.
بشرى: هههههههههه زين صيري معاها تمام. وراح تصير معاك تمام مثلي مع الدكتوره سوسن تذكرينها
هند: ايــــــــه اتذكرها. مسكينة تعبت معانا. بس هذي مادري كيف
بشرى: يالله. كلها سنة وتعدي انشالله.
هند: انشالله

((بعد دقايق))

هند طقت راسها بأيدها وبشرى قالت: شفيك
هند: نسيت أغراض من المخزن ماجبتها.
بشرى: زين روحي. شناطره
هند: بتروحين معاي ولا بتجلسين تنتظريني
بشرى: لا حبيبتي روحي أنتي. من اللي بينتبه على الأكل لو رحت معاك
هند: اوك اجل. انتظريني.

((بعد دقايق أخرى))

بشرى كانت تدور في الثلاجة على شي تشربه انفتح الباب الخارجي والتفتت وقالت: هذي أنتي ياهند
وانصدمت من الشخص الواقف قبالها وقالت: بسم الله الرحمن الرحيم هذا انت

في المزرعه مع الجازي.

الجازي كانت واقفة عند سور المزرعة والمدرب الهندي يتجه لها: ماما. أنت يبي يركب
الجازي: ياريت
المدرب: يالله تعالي ماما
الجازي: مشكور

((وركبت الجازي فوق احد الأحصنه وكانت بارعه وهي تتسابق فيه))

<< قرّب شخص عند سور المزرعه وناظر الجازي وهي راكبه وفرحانه وابتسم>>

بعد دقايق من المرح والفرح.

الجازي: خلاص تعبت. خلني انزل الحين وبعدين اجيلك ياحلو.
((وقفت الجازي وقررت تنزل وبعد مانزلّت رجلها الأولى انزلقت وطاحت على الأرض وصابها جروح بسيطه ودخل الشخص اللي كان واقف عند السور وراح لها))

.: سلامات. سلامات
الجازي بألم: الله يسلمك((بصراخ)):أأأأاااااي. رجلي تعورني.
.: ماعليه استحملي شوي. لين ما أروح اجيب لك شي يضمد جرحك.
الجازي هزت راسها بوجع: بس بسرعه الله يخليك.

في الصالة حيث ماكانت الهنوف منسدحه على الاريكه وتفرفر بالريموت بملل.

الهنوف: أوووف. هالتلفزيون مافيه شي يبرّد الخاطر. ياحوادث ياقتل يامدري شنو.
.: حبيبتي هند ممكن تســ.
((وانصدم باللي قاعده قباله وانها مو هند))
الهنوف قامت بأرتباك وعدلت نفسها وملابسها: هلا منو أنت
.((بغزل)): هلا والله هلا وغلا هلا بالنور اللي هال علينا من السماء.هلا
الهنوف بحيا وشوي تطيح غشيانه: لا. لا. ماقدر على هالكلام.
تقرّب منها وتقربت منها وقال: أنا قصي أنتي من ياحلوه
الهنوف: وأنا الهنوف.
قصي: الهنوف ياحلو الأسم وراعية الأسم
الهنوف: عيونك الحلوة.
قصي: مو أحلى من عيونك ياقلبي. اخبارك يالهنوف
الهنوف: الحمد لله تمام>>> ماشالله عندهم الحياة فرري
قصي: جلسي ليش واقفة

((وجلسوا الأثنين على الكنبه))

الهنوف: أنت زوج هند
قصي:ههههههههههههههههههه منو
الهنوف بأستغراب: شفيك تضحك
قصي: كلامك يضحكني.
الهنوف: وأنا شقلت غير سألتك انت زوجها لهند
قصي: لا حبيبتي.أنا أخوها
الهنوف: أهــــــــا . تشرفنا
قصي: وأنتي صاحبتها أكيد. مو
الهنوف: موووهههههههههه
قصي: ياحلو الضحكة على شفاتك
الهنوف: خلاص عاد. أنا استحي
قصي: ياعمري على اللي يستحون.
الهنوف حست بدوار وانسدحت على الاريكه مغمى عليها
قصي: بسم الله الرحمن الرحيم. خلني أقوم بس قبل لأحد يشوفني ويقول أنا مسوي لها شي.
((قام ومانسى يحط رقمه بشنطتها ((

مع العنود.

العنود: أيـــه ذكريات. اخبارك انتي متى راجعه بعد اسبوع
أوووووك ننتظرك. بالسلامه حبيبتي باي.

وحست العنود بخطوات جايه لها والتفتت وراها مصدومه: أأانــــــــت

((في المطبخ مع بشرى))

وليد: يامحلى الصدف. هذي المرة الثانية اللي التقيك فيها بنفس الاسبوع.
بشرى بأنفعال: محلى الصدف ألا اسوأ الصدف وانت الصاج.
وليد: ليش انا شسويت لك
بشرى:من دون ليش.ممكن الحين تطلع برا لأن وجودك مو مرغوب فيه.
وليد: والله بيتنا. وانا عجبني هالمكان وحاب اقعد فيه.
بشرى: عيل اشبع فيه. انا طالعه.
تدخل هند وتقول: سامحيني ياهند تأخرت عليك.((والتفتت مصدومة من اللي واقف قدامها)): وليد انت شلون دخلت
وليد: هههههههه من الباب، بعد من وين دخلت
بشرى بأحتقار: هذا اخوك ياهند
هند: أيـــــه. هذا اخوي وليد
بشرى: والله ونعم الاخو الصراحه
هند: ليش تعرفون بعض
وليد: مو من زمان.
بشرى: تذكرين السالفة اللي قلت لك فيها بالجامعه عن الرجال اللي صدمني
هند: أيـــه اذكر. شفيها
بشرى: الاخ اللي واقف قدامك أهو نفس الشخص اللي اصطدمت فيه.
هند: من جدك وليد
بشرى: اسأليه كاهو قدامك
وليد: صدفه حلوه مو صح ياهند
هند بهدوء: وليد تدل الباب اللي جيت منه
وليد: طبعاً ادلـــه
هند: ممكن الحين توريني عرض أكتافك وتتطلع برا
وليد: مايهون علّي اطلع وهالملاك الحلو قدامي.
بشرى ناظرته بأحتقار ودارت وجهها للجهة الثانيه بعصبية وهند همست لوليد انه يطلع((وطلع بعدها))
هند: معليش حبيبتي. لاتزعلين. امسحيها بوجهي.
بشرى بهدوء: لا عادي حبيبتي

في المزرعه مع الجازي.

((جاب الشخص للجازي ضمادات ولفها على رجلها))

: هاه والحين شتحسين به
الجازي: الحين احسن. مشكور وماقصرت
: واجبي
الجازي: ممكن وما عليك أمر توقفني. ابي اروح ادخل صالة البيت.
.: حاضر
((وقفها ومشت وهي تعرج وقاطعها الشخص وقال)): ممكن أساعدك.
الجازي: لا مشكور
.: زين اجل خليني أوصلك لين الباب عشان اتطمن عليك.
الجازي: مدام جذي. خلاص. ماشي

((مشى معاها وفي طريق باب البيت الشخص قال)): انتي تحبين الخيول
الجازي: ليش السؤال
: لأني حسيتك بارعه وعندك تعامل معاهم وانتي راكبه عليه .
الجازي: أنا وايد احب الخيول وأحسهم قريبين مني كثير.
.: وأنا كمان . اذا تضايقت أجي اركب عليهم ويعجبني الابيض اللي كنتي راكبه عليه
الجازي: إلا نسيت اسألك انت شسمك
.: انا طلال
الجازي: تشرفنا. وانا الجازي
طلال: تشرفنا يالجازي.

((وصلوا لباب البيت وقال لها)): اذا تبين شي او محتاجه شي اتصلي علّي. هذا رقمي
الجازي: مشكور ياطلال. يالله باي
طلال: باي

((ودخلت البيت))

مع العنود بالحديقة

العنود بدون نفس: وانا ابي اعرف ياناصر انتي ملاحقني وين ماأروح.يعني ما أفتك منك بالشركة تطلعلي بهذا البيت بعد
: عالعموم هذا بيتنا. وابي اعرف انتي شتسوين هنا ببيتنا
العنود: والله جايه ازور صديقتي. ولو أدري أن هذا بيتكم مادخلته بالأساس.
ناصر:صديقتك لايكون اختي هند
العنود: أيـــــه هند. عندك مانع مثلاً
ناصر: لا. بس شلون صديقتك وأنتي اكبر منها بكثير
العنود: أولاً/ العمر مو مهم
ثانياً: هذي صاحبة أختي وأحنا نعرفها ومتعودين عليها فهمت الحين وأظن مايخصك الموضوع لانها سوالف حريم
ناصر: أهــــــــا الحين فهمت
العنود بدون نفس:الحين تبي شي
ناصر: الله معاك

((انقهرت منه وراحت دخلت البيت))
.

شخصيات عائلة هند:

ناصــــــــــــــــــر

أنا ناصر رئيس قسم في شركة ضخمة واللي كله اتناجر مع اللي اسمها العنود طبعاً شفتوا كذا موقف حقي معاها بس لا تفكرون اني مو طيب ورومانسي. ترى انا عكس اللي شفتوه وعمري 28سنة.

قصـــــــي.

انا قصي طبعي اني رومانسي وجذاب وخفيف دم بعد أحب شي اسمه بنات أصغر من اخوي ناصر بسنتين وعمري 26سنة

طـــــــــــلال.

أنا طلال احب ركوب الخيل واحسهم قريبين مني طيب وحبوب وانا اصغر من قصي وعمري 24 سنة

وليـــــــــــــــد

أظن عرفتوني من الحلقة الثانية . انا وليد اللي اصطدمت مع بشرى يوم كانت تتسابق مع خواتها بالبحر انا والله اني طيب وخفيف دم وكل شي وعمري 22 سنة

هنــــــــــــــد

صاحبة بشرى المقربة منها وايد، يمكن اكون جدية نوعا ما لكن انا وايد فكاهية وعمري 21 سنة

ام ناصــــــر

طبعاً انا دوري قصير بالرواية والسبب الكاتب: ابيك مابيهم ماخلالي مساحه بالدور اللي عطاني اياه بس الله يسامحه
أنا ام العيال الخمسه وعندي مفاجأة للبنات الاربع والاولاد الاربعه في الحلقة الاخيرة .

الحلــــــ(( 5 ))ـــــــــقة.


((بعد مادخلت العنود صالة بيت هند))

الجازي: زين انك جيتي يامعوده.
العنود: خير شصاير
الجازي: الهنوف مادري شفيها غشيانه. وانا جالسه اصحي فيها ومهي راضية تصحى.
العنود جلست جنب الهنوف: الهنوف!!. الهنوف
الجازي: قلت لك مو راضية تصحى.
العنود: زين قومي جيبي لي مويه.خلني ارشه عليها.
الجازي: انشالله((وراحت))
العنود: الله يهداك بس يالهنوف هذا وقتك يغمى عليك.
تجي الجازي: العنود. أخذي المويه.
العنود: مشكوره حبيبتي.((ورشت على وجه الهنوف شوية ))
الهنوف تفتح عينها بشويش والتفت يمين وشمال: أنا ويني يابنات
العنود: حشى منتي بصاحية أحنا ببيت هند
الهنوف وهي تقوم: أيــــه صح. نسيت
العنود: شفيك شصار لك
الهنوف بهدوء: لا حبيبتي ماكو شي. بس حسيت بدوار خفيف
الجازي: انشالله مافيك شي.
الهنوف: ليش مو مصدقتني
تقاطعهم هند: يالله يابنات تفضلوا على الطاوله.
الجازي: صار لكم ساعتين بالمطبخ وتوكم تنشبون العشاء
هند تضحك: ماعليه حبيبتي سامحينا على تأخرنا. كله من بشرى
بشرى: وشفيها بشرى بعد
العنود: جاك الموت ياهندههههههههه
هند: لا بس كنا نقول أأأأ
العنود: كنا نقول متى راح نعزم هند على بيتنا. قلنا نحدد يوم ونخلي بشرى تقولك.
بشرى: صدقتكم.
البنات ابتسموا والجازي قالت: الى العشا يا بنات هيا.

((تعشوا البنات وبعد ساعة قرروا يمشون))

العنود: يالله يابنات خلونا نمشي.
هند: وين رايحين تو الناس.
بشرى: الحين أخوانك يمكن يبون يدخلون البيت ترى أحنا زودناها الصراحة
الهنوف: عاد زورينا ياهند
هند: انشالله حبيبتي.
العنود: يالله نشوفك على خير
بشرى: تصبحين على خير حبيبتي.
هند: وانتوا من أهله
الجازي: يالله باي ياهند
هند: باي جوجو
((قبل لا يوصلون باب البيت دخلت أم ناصر عليهم))
أم ناصر: كيفكم يابنات
البنات: هلا خالتي
أم ناصر: أنتوا طالعين
العنود: أيه والله طالعين. تامرينا على شي خالتي
أم ناصر: سلامتكم. بس ماقعدنا معاكم ولا شبعنا من شوفتكم.
بشرى: الجايات أكثر انشالله.
الهنوف: يالله ياخالتي الحين أحنا نستأذن.
أم ناصر: يالله حبيباتي. الله معاكم.

((وطلعوا وركبوا مع سواقهم ومشوا لبيتهم))

هند: تو الناس يمه. ليش مانمتي في بيت جدي أحسن.
أم ناصر: والله فكرت أني أنام بس مايهون علّي أتركك وأترك أخوانك.
هند وهي تحضن أمها: ياعمري يايمهالله يخليك لي انشالله
أم ناصر: أميـــــــــــــــن
يدخل عليهم وليد: شصاير مشهد درامي محزن
هند تضحك وأم ناصر تقول: وانت ماتجوز من سوالفك
وليد: ماقدر. شذنبي ان الله خلقني فكاهي.
يدخل طلال: من زينك ومن زين وجهك. حلايا هالوجه.
وليد: طلول انطم
طلال: أقول أركد.
أم ناصر: عفيه على أولادي. يالله تهاوشوا وكل واحد يجيب له سكينه ويقتل الثاني. يالله سريع
وليد: لا يمه. أحنا ماتوصل فينا للقتل
طلال: أيـــه توصل فينا للذبح
هند: ههههههههههههههههه
يدخل ناصر وهو يغني: ياست الحبايب ياحبيبه. يا أغلى من روحي ودمي. ياحنينه وكلك الطيبه الله يخليكي ياأمي
وليد: صح لسانك نصور
ناصر: نصور بعينك. أصغر عيالك تسميني نصور.
وليد: عادي. مطيحين الميانه.
ناصر: يمه ياقلبي أنتي. شلون تجين مع السواق وأنا موجود
أم ناصر: ماحبيت أشغلك ياقلبي أنت.
ناصر: تشغليني الشغل يولّي بس أنتي أمي حبيبتي حياتي.
هند: الله الله بالغزل على أخر الليل.
أم ناصر: أصيل ياولدي. الله يخليك لي ويوفقك.
طلال: وأحنا يعني مالنا رب
أم ناصر: ربكم فوق
قصي يدخل وهو يكلم بجواله: هلا حبيبتي. لا أنا بعدين أكلمك. يالله عمري. ((ويبوس السماعة ويسكر))
أم ناصر: وأنت مابتعقل عن سوالفك البطاليه
قصي:أوووه أنتي هنا ياروحي
أم ناصر: أقول لا تضيع الموضوع ورد علّي.
قصي: بعد يمه شسوي. لا شغله ولا مشغله.
أم ناصر: يعني مادورت الا بنات الناس تتسلى فيهم
هند: ياخي تزوج وفكنا
قصي: تو الناس على الزواج


في يوم جديد.

في بيت مشاعل.

شخصيات عائلة مشاعل.
نواس: يدرس بالخارج. ماله دور بالقصة وعمره 25 سنة.
مشاعل: البنت الكبرى فيها نوع من الكوميديا. عصبية طيوبه وعمرها 24 سنة
أبرار:اخت مشاعل. طيبه حبوبه وعمرها 20 سنة
سالم: أخو البنات. طيب وصايع بعض الشي. خاطب بنت خالته. وعمره 23 سنة.
أبو نواس: الأب الاعزب الذي يسعى لأرضاء أبنائه وبعدين عاد يتغير . طيب وفيه نوع من العصبية والشراسه وحدث حلو بيصير معاه
.
نرجع للحلقة

أبرار: ماقلتيلي شلون بنات عمي
مشاعل: الحمدلله بخير. يسلمون عليك
أبرار: الله يسلمهم. والله حسافة مارحت معاك.
مشاعل: محد قالك. حاولت فيك بس أنتي مارضيتي تقومين.
أبرار:عاد أنتي رايحه لهم من الصبح.وين تبيني أقوم.
مشاعل: قلعتك
أبرار: زين شرايك نتصل عليهم ونطلع سوا نتسوق
مشاعل: فكرة حلوه.
((ينزل سالم من الدرج)): هاي بنات
مشاعل: هايات سالم على وين طالع ومتكشخ بتطلع مع عطر
سالم: لا ماراح اطلع مع عطر اليوم. بطلع مع اصحابي شوي وبرجع.
مشاعل: اووك. انتبه على نفسك.
سالم: لاتوصين. ((وقف وقال)): يقولون رحتي بيت عمي.
مشاعل: أيــــــه. وشفيها اذا رحت
سالم: لا مو قصدي. بس بغيت أسألك اخبارهم
قبل لاترد مشاعل قاطعتها أبرار: اخبارهم ولا أخبارها
سالم: الأثنين
مشاعل: تمام بنات عمي. يسلمون عليك.
أبرار: بسألك سالم
سالم: شنو
أبرار: نواف بيطلع معاك
سالم:مو شغلك
أبرار: سلّم عليه وعطه بوسه نيابةً عني
سالم: أكلي تبن
مشاعل: ماعليك منها. الله معاك
((وطلع سالم))
أبرار: ياحبي له هالنواف
مشاعل: أنتي تحبينه وهو ما يحبك ولا يدري عن هوى دارك.
أبرار: بيحبني وبتشوفين.
مشاعل: انشالله. الله يسمع منك.
أبرار: حسبي الله عليك ياسالم، ياللي نسيتني اتصل على بيت عمي.
مشاعل: يالله اتصلي خلصينا.

يتبـــــــــــــــــــــــــــــــــــــــــــــــ ــــــــــــــــــــــــــــــــــع.
في بيت الدلوعــــات.

((تنزل بشرى من غرفتها وتوقف على الدرج)) وتقول: عالعموم انا ناقصتني ثياب وأغراض ثانية وأبي اطلع السوق. تروحون معاي

((يقاطعهم صوت التلفون)): ترن ترن
الهنوف: أنا أرد((وردت)): ألووو هلا
:هلا الهنوف.
الهنوف بأبتسامه: أبراروه هذي أنتي عاش من سمع هالصوت.
أبرار: عاشت ايامك حبيبتي اخبارك
الهنوف: الحمدلله تمام.
أبرار: بغيت اسـألك قبل لا أنسى.
الهنوف: قولي اسمعك
أبرار: عندكم شي اليوم
الهنوف: ليش شصاير
أبرار: قررنا أنا ومشاعل نطلع اليوم نروح نتسوق. قلنا نقولكم عشان نطلع سوا.
الهنوف: عاد كأنكم تدرون. توها بشرى تقول ناقصتها شويه اغراض وتبي تروح السوق
أبرار: عيل خوش. سأليهم وعطيني خبر
الهنوف: لحظة أبرار بشرى تبي تكلمك
بشرى خذت السماعه: هلا أبرار. شلونك
أبرار: هلا بشرى الحمدلله تمام
بشرى: انتوا متى مقررين تطلعون
أبرار: والله ماكو وقت محدد.
بشرى: الحين الساعة كم
أبرار: الحين الساعة 2 ونص
بشرى: عيل خلاص بعد ساعة كونوا جاهزين.
أبرار: ماشي حبيبتي
بشرى: أبرار
أبرار: أمــري
بشرى: مايامر عليك عدو. بس بغيت أقولك اتصلي على بنات خالتك وسأليهم اذا بيروحون معانا وأحنا بنتصل على بنات خالتي بعد.
أبرار: انشالله يالله سلام.
بشرى صكت السماعة وقالت للهنوف: الهنوف. تعالي اتصلي على بنات خالتي وسأليهم اذا بيروحون معانا أو لا.
الهنوف: وليش ماتتصلين عليهم أنتي
بشرى بترجي: عفيه الهنوف تعالي اتصلي عليهم
العنود: روحي يالهنوف اتصلي عليهم. فكينا
الهنوف: راح اتصل عليهم. بس مو عشانك. عشان العنود بس.
((خذت الهنوف السماعة ودقت على بيت خالتها))

أم فيصل: ألووو. من معاي.
الهنوف: هلا خالتي عليا
أم فيصل: هلا حبيبتي الهنوف.
الهنوف: هلا فيك ياخالتي.
أم فيصل: شلونك يابنت أختي
الهنوف: الحمدلله تمام
أم فيصل: ليش القطاعه ياحافظ. صار لكم زمان مازرتونا.
الهنوف: والله تدرين ياخالتي الأشغال وايد.
أم فيصل: بلا أشغال بلا كلام فاضي. أسبوع الجاي الغداء ببيتنا. ومابي أي أعذار على الموضوع.
الهنوف تضحك: خلاص ماشي ياخالتي.نحاول. بغيت اسألك البنات موجودين
أم فيصل: كاهي شوق قبالي. تبين تكلمينها
الهنوف: عطيني اياها
((عطت أم فيصل السماعة لشوق)): هلا الهنوف
الهنوف: هلا حبيبتي. شلونك
شوق: تمام أنتي شلونك
الهنوف: الحمدلله.بغيت أسألك
شوق: هلا
الهنوف: بعد ساعة بنطلع نتسوق. تروحون معانا
شوق: أيــــه ليش لا.بس بخبر البنات ونعطيكم خبر.
الهنوف: ماشي حياتي. انتظرك.
شوق: باي.
((سكرت السماعة والعنود قالت)): هاه شقالوا
الهنوف: بتخبر البنات وبتعطيني خبر.

((بعد دقايق اتصلت أبرار وقالت ان بنات خالتها موافقين وبعدها دقت شوق وردت عليهم بالموافقة))

العنود: يالله خلونا نتجهز ماباقي شي.
بشرى: لحظة. ألا وين الجازي

في صالة التماريــــــــــن

البنات يدخلون صالة التمارين والعنود قالت: انتي هني واحنا قالبين البيت عليك فوق تحت
الجازي: جالسه اسوي تمارين.صار لي يومين ماسويت . خير شتبون
الهنوف: احنا بنطلع السوق. تروحين معانا او لا
الجازي: متى رايحين
العنود: بعد نص ساعة تقريباً
الجازي: يالله انتوا روحوا الحين وانا جايه وراكم.
بشرى: بلا روحوا بلا خرابيط. يالله أمشي خلصينا.((وراحت ومسكت ايدها وسحبتها معاها))

الحـــــــــ(( 6 ))ـــــــــــــــــلقة


((السياره الأولى))

غاده من طرف النافذه: شلونكم بنات
العنود: تمام ياغاده. انتي شلونك
غاده: الحمدلله شلونك يامشاعل
مشاعل: الحمدلله.
العنود: بلا كثرت حكي ويالله ركبي خلصينا.
غاده: لا حبيبتي. انا بركب بالسياره اللي فيها بشرى.
مشاعل: عشتوا. ليش احنا مو مالين عينك
غاده بخبث: الصراحه لا.
مشاعل: عيل طسي. مالت عليك.
غاده: يالله نلتقي هناك.
العنود: الله معاك

((السيارة الثانية))

أبرار: ماشالله عليكم. كلكم بتركبون هذي السياره
وصايف: تدرين ليش
أبرار: ليش
وصايف: لأن بشرى بنت خالتك موجوده فيها.
بشرى بغرور: ياربيييي. شذنبي ان الله خلقني حبوبه كذا.
أبرار: بدينا بالغرور.
غاده: بلا نجره الحين واستعدوا للطيران.
وصايف: استعدوا للطيران واربطوا الأحزمة.
البنات: هههههههههههههههههه.
بشرى: يالله امشي يارشيد، وخل عنك هالمجانين.
رشيد: حاضر ماما.

((السيارة الثالثه))

عطر بصراخ: وينها هذي. شقاعده تسوي داخل
الجازي: يعني ماتعرفينها.ماتجوز عن طبايعها.
شوق: الشرهه مو عليها، على اللي ينتظرها.
الجازي: كاهي جات.
((وركب الهنوف)): السلام عليكم.
عطر: عليكم السلام والرحمة بدري حبيبتي، تو الناس.
الهنوف بأستهبال: من عمرك حبيبتي. ليش انا تأخرت
رغد: لا حبيبتي مو أنتي اللي متأخره. أحنا اللي متأخرين عليك.
الهنوف: أشووا. عيل يالله خلونا نمشي.

((السيارة الثانية))

بشرى: ممكن يابنات شوي تنطمون تخلوني اتكلم مع اختي العنود
غاده: خذي راحتك.
بشرى اتصلت على اختها وفتح الخط: ألووو. هلا اختي.
العنود: هلا حبيبتي.أمــــري
بشرى: بغيتكم على طريقكم تمرون على هند تاخذونها معاكم. لأن سيارتنا ماتكفي.
العنود: اووك حبيبتي. أهي جاهزة
بشرى: إيـــــه جاهزة. بس انتي اذا وصلتي بيتهم نزلي لها.
العنود: ماشي حبيبتي
بشرى: يالله سلام.

((السيارة الأولى))

مشاعل: شفيها بشرى
العنود: مافيها شي. بس تبينا نمّر على صاحبتها وناخذها معانا.
مشاعل: زين هذا يدل طريق بيتهم>> وهي تأشر عالسواق
العنود: أيــــه يدل.((والتفتت للسواق)): عساف روح بيت هند بسرعة.
عساف: حاضر ماما.

((وصلوا لبيت هند ونزلت العنود من السياره ودقت الجرس وطلع ناصر))

ناصر: هذا أنتي
العنود: ممكن لو سمحت تنادي على اختك هند وتقول لها ان احنا وصلنا
ناصر بتردد:أأإإإأ بس هند الحين نايمة. تعالي لها بعدين
العنود: شلون نايمه واختي توها مكلمتها
قاطعهم صوت هند: العنود وصلتوا
العنود: أيـــه وصلنا.
هند: اووك. بس دقايق.
العنود ناظرت ناصر بأحتقار ومشت عنه.

((وبعد دقايق ركبت هند السياره ومشوا))

يتبـــــــــــــــــــــــــــــــــــــــــــــــ ــــــــــــــــــــــــــــــــــــــــــــــع

في الســــوق.

عطـر: يابنات تعالوا هذا المحل، اكسسواراته حلوه وتجنن.
بشرى: مو جايين معاك، تبين تدخلين انتي. دخلي.
عطر بصراخ: صحيح انتوا خونه، بس الشرهه مو عليكم، الشرهه عليّ انا اللي جايه معاكم
غادة: محد ضربك على أيدك ياحلوه
عطر: خلني أروح مع الهنوف أتمشى معاها وايد أحسن
وصايف: أحسن لك ياختي.
عطر بكدر: يعني ماكسرت خاطركم . ياحيوانه أنتي وياها.
بشرى: الله معاك عطر.
عطر تتوعد: مـــــاشي
((وراحت للهنوف))
الهنوف: هاه عطوره. شفيك مقهوره
عطر: مقهوره من أختك وأختي والبنات كلهم.
الهنوف بأبتسامة: ليش شسووا لك
عطر: قولي شاللي ماسووه.
الهنوف: أيـــه قولي لي شصار
عطر: عيل أقولهم خلونا ندخل محل الأكسسوارات يقولون لي دخلي أنتي لحالك، وأنا كل المحلات اللي يروحونها دخلتها معاهم
الهنوف: ماعليــه حبيبتي، أنا أروح معاك كل محل تبينه.
عطر: ياعمري أنتي ((وباستها))

((العنود مع مشاعل))

مشاعل وهي تجرب بلوزه عليها: شرايك يالعنود
العنود: حلوه وطالعه عليك أحلى.
مشاعل: بشتريلك وحده مثلي عشان نلبسها سوا. شنو تبين أي لون
العنود: أمممممأبي لون الأخضر.
مشاعل: أووك.تامرين أمر
العنود: تسلمين حبيبتي.


((شوق مع وصايف))

وصايف: تعالي شوقوه خلينا ندخل محل العطورات.
شوق: عاد تصدقين أنا ناقصتني عطورات بغرفتي.
وصايف: عيل يالله بسرعة خلينا ندخل.
((ودخلوا))
شوق: يامحمد هذي بكم
وصايف تهمس لشوق: سكتي فشلتينا هذا سعودي.
شوق: صدق والله مادريت أنه سعودي فكرته بنغالي.
وصايف: ههههههههههههههه.
شوق: ماقلتلي يا أخ هذي بكم
البائع: هذي 210 ريال.
شوق: هذي الأصلية
البائع: طبعاً الأصلية.
شوق: انزين عطنا منها ثنتين.
البائع: حاضر
((وحاسبوا وطلعوا))
وصايف: الصراحة اللي يجي معاك أنتي يتونس.
شوق: عيل شلون عيل

((بشرى مع غادة))

بشرى: هذي التنوره وايد حلوه وقصيرة، خلينا ناخذ منها حقنا وحق البنات.
غادة: يعني ناخذ تنانير من غير بلايز
بشرى: راح ناخذ بلايز لونهم أبيض، وراح ندخل محل الأحذية ونأخذ لنا بوت ابيض ونطلع حركات
غادة: ونبي كاب لونه على لون التنوره. شرايك
بشرى: أوووك خلاص.
غادة:يالله مشينا
تدخل عليهم هند: هاه شنو اشتريتوا
بشرى: والله قررنا نشتري تنانير وبلايز وكابات وجواتي بوت حقنا كلنا
هند: وانا شريت أكسسوارات حلوه لنا كلنا
غادة: شنو الألوان
هند: كل الألوان تقريباً.
غادة: شريتي لون ابيض. أو كحلي
هند: موجود
بشرى: عيل خوش، يالله خلونا نكمل أغراضنا


((الهنوف مع عطر))

.: يالحلو أنت. ياقمر.عطنا وجه دخيل الله.
الهنوف: الظاهر ماحصل له طراق على وجهه بالنعال.
عطر: لحظة بس، أنا أوريك فيه.
الهنوف: تعالي شبتسوين. خليه يولّي.
عطر راحت له: أنت شفت وجهك بالأول عشان تغازل وتقول كلام حلو روح عدّل أسنانك وبعدين تعال غازل. وجع يوجعك.
: شفيك علّي .أنا كلمتك مثلاً
عطر: لا كلمت خيالي.أقول طس عن طريقنا لا تشوف شي عمرك ماشفته.
: خوفتيني، شبتسوين يعني
عطر: أنا أوريك شنو بسوي. ((وراحت للسكوريتي وقالت له أنه هذاك الشخص يتحرش فيهم وراح له السكوريتي وطرده برا الشارع))
الهنوف: والله أنتي مو هينه
عطر: شنو مفكره عيل.

((أبرار مع الجازي مع رغد))

الجازي: الصراحة أنا تعبت من المشي بروح ارتاح وأكل لي شي
أبرار: وانتي كل حياتك أكل وشرب وبس
الجازي: مو ماكله شي من الظهر يعني حسي فيني، الأحساس نعمة
أبرار: انزين يالجازي. خلينا ندخل هذا المحل وبعدين سوي اللي تبغينه.
الجازي: أي محل
أبرار: محل الملابس
رغد: أيـــهخلونا ندخل كاهم مسوين عليه تخفيضات.
الجازي: أووك يالله مشينا
((دخلوا المحل))
رغد: ياربييي.ألوان البلايز مررره كوووول
الجازي بقهر: أنا ماتعجبني هالبلايز.
أبرار تضحك: ماتعجبك لأنها مو بمقاسك
الجازي بدلع: والله أنا رشيقه.
رغد: أيـــه واضح.
الجازي بأنفعال: بتسكتون عن التطنز ولا أطلع عنكم الحين
أبرار: خلاص، خلاص بنسكت.


((استمرت التمشية بالسوق لين الساعة 10 الليل وبعدها قرروا يمشون لبيوتهم وركبوا السيارات ومشوا))


((في السيارة الأولى))

بشرى: يابنات لا تنسون عزيمة بكره ببيتنا. ماشي
غاده: ولا يهمك يابشوره. أنا أول الحضور انشالله.
شوق: أووك حبيبتي ماراح ننسى
بشرى: يالله نلتقي بكره انشالله.
غاده: يالله مع السلامة
رغد - شوق: مع السلامه بشوره
بشرى: الله يسلمكم.

((ونزلوا ودخلوا بيتهم))


((في السياره الثانية))

الجازي: يالله حبايبي انقلعوا بيتكم ولا تنسون عزيمة بكره. مفهوم
عطر: ماراح ننسى.خلاص فكينا.
أبرار: يالله أشوفكم بكره.
الهنوف: سلمي على ولد عمي.
أبرار: يوصل.يالله سلام
((ونزلت أبرار وبعدها نزلت عطر مع وصايف وراحت الجازي والهنوف بيتهم))


((في السيارة الثالثه))

العنود: يالله حبيبتي، سلمي على أمك.
هند: الله يسلمك حبيبتي
مشاعل: مع السلامه هنوده
هند: مع السلامه مشاعل.
((ونزلت هند وبعدها نزلت مشاعل وراحت العنود بيتهم))

الحـــــ(( 7 ))ــــــلقة.

في صباح يوم جديد. الساعة 9 ونص.

العنود تدخل غرفة الهنوف وهي نايمه: يالله يابنت قعدي، كافي عليك نوم
الهنوف وهي تحط المخده على راسها: العنود اطلعي برا وصكي الباب وراك.
العنود: مو على كيفك تطرديني، والحين بتقومين قدامي.
الهنوف وهي تحط البطانيه على جسمها : والله تعبانه يالعنود خليني أنام شوي.
العنود وهي تشيل عنها البطانيه: بتقومين الحين والله اجيب لك ماي بارد وأرشه عليك
الهنوف وهي تقوم بثقل: خلاص ، خلاص بقوم. ((تتكلم بصوت واطي ماحد يسمعه غيرها)): حتى بالنوم محاسبينا.
العنود: شفيك تتحنطبين. شقاعده تقولين
الهنوف: لا حبيبتي. سلامتك
العنود وهي بتطلع: يالله انتظرك تحت. ((وطلعت متجهه لغرفة الجازي))
الهنوف:تنتظريني تحلمين الظاهر.((ورجعت نامت))

((في غرفة الجازي))

العنود وهي جالسة فوق سرير الجازي وتهمس بأذونها: الجازي،يالله قعدي كافي عليك نوم.
الجازي وهي تقوم بهدوء: صباح الخير حبيبتي
العنود: صباح النور والسرور عليك
الجازي: الساعة كم الحين
العنود: الساعة 9 ونص، يالله بسرعه قومي مجهزتلك خوش فطور. يعجبك!!
الجازي: ماشي حبيبتي، ألبس وأنزل
العنود: ننتظرك ((وطلعت وهي متجهه لغرفة بشرى))

في غرفة بشرى.

بشرى: ودي أكون أي شخص ثاني أي شخص عابر والتقاكــ
وبسألك وش منك جاني بالمقابل شاللي جاك
انت ماتذكر حناني كيف كنت اشري رضاك
كنت أشوف العمر فاني واللي يبقالي هواكــ.
العنود: الله الله على الصوت الحلو من أول الصبح، ((ووقفت قبال أختها)): صباح الخير ياحلوه
بشرى بأبتسامة: صباح النور.
العنود: شهالزين، شهالحلاة من الصبح صايره ملكــــه جمال السعوديه.
بشرى: عاد ملكة جمال السعودية مرة وحده
العنود: مو بس السعوديه، الا ملكة جمال العالم كله.
بشرى: الصراحه حرجتيني.
العنود: يالله ياحلوه الفطور جاهزننتظرك تحت.
بشرى: يالله جايه وراك. ألا بسألك، خواتي جلسوا
العنود: الجازي جلست بس الهنوف مادري عنها.
بشرى: ليش ماجلستيها
العنود: جلستها يعني ماتعرفين حركات أختك
بشرى تبتسم والعنود بادلتها نفس الابتسامة وطلعت.

على طاولة الطعام

العنود: أختك ماجلست
الجازي: منو أي وحده فيهم
العنود: الهنوف يعني فيه غيرها.
الجازي: لو جلست بتشوفينها جالسه معاي
العنود: أنا شفت بنات عنيدات وايد، بس نفس هالبنت ماشفت.
الجازي: الظاهر جدها كان زبال.
العنود: أستحي على وجهك، عيب عليك.
الجازي: ههههههههههههههههه. عادي الحياة حلوه وسعيده.
((تنزل بشرى وتتجه لهم)): على شنو الضحك، ضحكوني معاكم.
الجازي: على أختك الهنوف.
بشرى: ليش شفيها
العنود: مافيها شي بس قاعدين نضحك عليها.
الجازي التفتت لبشرى وقالت: طالعة قمر ياقمر.
بشرى: مشكوره حبيبتيمن ذوقك
الجازي: هذي شاريتها البارح من السوق
بشرى: أيــــه من السوق
((تنزل الهنوف وتتجه لهم)): صباح الخير بنات. الله حيهم.
العنود: تو الناس، بعد ليش قاعده
الهنوف: والله حبيبتي أنا فكرت أني ما أقعد بس عشانك قعدت.
الجازي: سبحان الله ، من وين نازل عليك الأدب والطاعة
الهنوف: أدب ولا رياضيات
العنود: لا وأنتي الصاجه كيمياء وأحياء
بشرى: أحياء ولا أموات.هههههههههههه
الهنوف تضحك: حلوه يابشرى، بس لاتعيدينها.
بشرى: أسمعوا يابنات. عندي لكم خوش خبر
العنود: شنو
بشرى: من اليوم ورايح راح تنادوني بأسم ((المها)).
الهنوف: مبـــروك، مبروكمابغت تولد حليمه!!
الجازي: وأنا أقول هالكشخه وهالأبتسامة اليوم مو لله، لازم وراها شي.عالعموم مبروك
العنود: حبيبتي مبـــروك
بشرى: الله يبارك فيكم.
العنود: يابنات ألا بسألكم. حق العزيمه اليوم بتشترون من برا أو أحنا بنسوي الأكل
بشرى: خلونا نشتري من برا أحسن والله شرايكم يابنات
الهنوف: أيـــه من برا وايد أحســـن.
العنود: خلاص ماشي.
الجازي: روحوا اتصلوا عليهم وذكروهم، هذول ينسون بسرعة.
بشرى: هذي مهمة الهنوف مو مهمتنا.
الهنوف: أنا مالي شغل مو كل شي عليّ أنا.
بشرى: أنتي بتتصلين عليهم مو بتروحين لهم بيوتهم.
الهنوف: أوووف. خلاص الحين بتصل عليهم.
((وقامت ومسكت التلفون واتصلت على بيت مشاعل))
الهنوف: ألووو.
.: هلامنو معاي
الهنوف: عمي هذا أنت أخبارك، شعلومك، عساك بخير
بو نواس: والله الحمدلله.
الهنوف: أدري أنك ماعرفتني أنا الهنوف
بونواس: تعلميني فيك، أدري أنك الهنوف.
الهنوف: من اللي جنبك من البنات
بو نواس: جنبي أبرارتبينها
الهنوف: عطني أياها
بو نواس وخر السماعه عنه ومدها لبنته أبرار: هلا الهنوف
الهنوف: هلا أبرار. كيفك
أبرار: الحمدلله أنتي شلونك
الهنوف: تمام حبيبتي. بغيت أذكركم بعزيمة الليلة بس
أبرار: لا تخافين أحنا مو ناسين.
الهنوف: أجل يالله طسي
ابرار ضحكت: يالله باي
((وسكرت منها))
الهنوف دقت على بيت خالتها وردت عليها غاده: السلام عليكم.منو معاي
الهنوف ضحكت: حلوه هذي السلام عليكم.
غادة: هذا أنتي
الهنوف: أيـــه أنا.
غادة: خير شتبين متصله من الصبح
الهنوف: أنا مو متصله على سواد عيونك أنا متصله عشان أذكركم بعزيمة الليله.
غاده: تبين شي ثاني
الهنوف: وجع شهالنفس الخايسه من الصبح.
غاده: يالله باي
الهنوف: باااااايااااااااات
((وسكرت منها ودقت على بيت عطر بيت خالة مشاعل ورد عليها نواف: هلا مين معاي
الهنوف بأرتباك: ألووو، هلا
نواف: هلا حبيبتي أمري
الهنوف وخرت السماعه عنها وقالت: من متى حبيبتك ((ورجعت السماعه)): موجوده عطر
نواف: منو أقولها
الهنوف: قول لها الهنوف.
نواف: انتظري لحظة.
ونادى على أخته عطر وقال بصراخ: عطـــر وينك
عطر: شتبي تصارخ
نواف: التلفون حقك
عطر: منو
نواف: وحده أسمها الهنوف صوتها جهنمي.
عطر: أقول أستح على وجهك وعطني السماعة ((وعطاها السماعه )): ألوو هلا الهنوف
الهنوف: تو الناس تجين تردين
عطر: ماعليه حبيبتي سامحيني.
الهنوف: بس حبيت أذكركم على الليله.
عطر: ماعليه حبيبتي.
الهنوف: يالله وسلمي لي على وصايف معاك.
عطر: الله يسلمك، يالله باي
((وسكرت منها))
العنود: هاه بيجون أو لا
الهنوف: بيجون لا تخافون.
بشرى: عيل خلني أتصل على هند.
((اتصلت على هند وخبرتها وسكرت منها))

فجأة يطرق جرس الباب.

العنود: منو اللي جاي لنا من الصبح
بشرى: علمي علمكم
الجازي: عساه خير بس
وقاموا البنات وفتحوا الباب وتفاجأو من اللي كان واقف.

يتبـــــــــــــــــــــــــــــــــــــــــــــــ ـــــــع

الحــــــــ(( 8 ))ـــــــلقة

فجأة يطرق جرس الباب.

العنود: منو اللي جاي لنا من الصبح
بشرى: علمي علمكم
الجازي: عساه خير بس
وقاموا البنات وفتحوا الباب وتفاجأو من اللي كان واقف.
البنات: خــــــــالي!!
الخال تركي: أيـــه خالكم. شفيكم متفاجئين
البنات: لأن صار لك زمان مازرتنا.
الخال:من اليوم ورايح راح تشوفوني كل يوم.
العنود: خير انشالله
الخال: يعني بنتكلم عند الباب
الهنوف: أسفيـــن خالي. تفضل!!
((ودخل وقبل لا يجلس على الكنبه)) قال: أخباركم يابنات أختي
بشرى: والله الحمدلله نسأل عنك.
الخال: لو تسألون صج كان دقيتوا عليّ أو زرتوني.
الجازي: والله تدري ياخالي مشاغل هالدنيا.
الخال: ألا أبوكم ما جا من السفر
العنود: لا والله لين الحين ماجا وصار له شهر ماأتصل علينا.
الخال: يالله الله يرجعه بالسلامه.
البنات: انشالله.
الهنوف: هاه شعندك زايرناأكيد وراك شي.
الخال: وأنتي ماتغيرتي عن أسلوبك الخايس مع الناس
الهنوف: هذا سيفوه وهذي خلاجينه. والحين لاتضيع الموضوع وقول أخلص شعندك جاي
الخال: والله قررت أخطب لولدي نايف وقلت ماكو ألا بنات أختي يدورون له على عروس من معارفهم.
وقفوا البنات وحطوا أيدهم على خصورهم وكل وحده رافعت حاجبها وقالوا بصوت واحد بأنفعال: ليش أشتغلنا خطابات مثلاً
الخال: أنا مو قصدي كذا.
العنود: عيل شنو قصدك ياخالي
الخال: يعني اللي نعرفه أحسن من اللي مانعرفه.
الهنوف: وليش ماتأخذ وحده منا له
الخال بإرتباك: أأأأأأأأإإإإإ والله
الهنوف وهي تقول بنفسها: ادري ليش ماتبيه يرتبط فينا ،لأن احنا عوانس ومانصلح له
بشرى: لا لا لا خلاص أنا عندي لك خوش عروس وتناسب ولدك نايف، بس أنت خل كل شي عليّ.
الخال: يعني خلاص اعتمد عليكم
بشرى: أعتمد ياخالي
الخال: يالله عيل أنا استأذن.
الجازي: وين رايح ياخالي تو الناس.حتى ماشربت شي.
الخال: مره ثانيه حبيباتي. يالله سلام
العنود: سلام خالي
بشرى قاطعتهم: اقول ياخالي
الخال: امــري يابنت اختي
بشرى: ابيك تفضى لي يوم عشان ابي اروح معاك هذا المكان اللي يغيرون فيه الاسامي .
الخال: ليش وش راح تسوين هناك
بشرى: بروح أغير اسمي.
الخال: وانتي لين الحين تبين تغيرينه
بشرى بإنفعال: الحين ياخالي بتوديني أو لا
الخال: تامرين أمر يابنت اختي من عيني هذي قبل هذي>> وهو يأشر بعينه اليمين بالأول
بشرى: مشكور ياخالي>> وباسته فوق راسه
الخال: يالله مع السلامه

((وطلع الخال من البيت))

الهنوف تلتفت على اختها بشرى قصدي المها وتقول: ماتقولين لي منو البنت اللي بتخطبينها لولد خالك
المها: ماراح تصدقون
العنود: منو أهي


منو العروس اللي بيخطبونها حق نايف



في الليل.

الهنوف: يابنات. باركوا لبشرى على أسمها الجديد ((المها))
وصايف: سويتيها وغيرتيه
المها: أفا عليكم بس
عطر: مبروك يالخبله
المها: الله يبارك فيك ياغبيه
غاده: مبروووك.
شوق: مبروك يالمها
رغد: مبروك حبيبتي
المها: الله يبارك فيكم
مشاعل: والله أنتي حماره أبي أعرف سبب واحد بس، أسم بشرى شنو فيه
المها: مافيه شيبس أسم على غير مسمى عيل بذمتكم أنا بشرى ماشفت البشرى.
أبرار: هههههههههههههههههههه،، وأنتي كل سؤال عندك له جواب
المها: طبعاً مايهزني ريح.
قاطعتهم العنود: يالله يابنات تفضلوا على الطاوله.

((تعشوا وخلصوا وجلسوا عند التلفزيون وشاهدوا فيلم))

وصايف وهي تدمع عيونها: والله كسرت خاطري البطله مسكينه.
عطر: ترى هذا تمثيل مو صج.
المها: بس هذا شي من الواقع.
أبرار: هذا هم هالرجاجيل يكلمون وحده ويعلقونها فيهم وبعدين يرمونها مثل رمية الكلاب.
غادة: أي والله صدقتي
هند: اصابعك مو سوى يا أبرار مو كل الرجاجيل مثل بعض فيه منهم الزين وفيه منهم الشين
مشاعل: على طاري الرجاجيل، ذكرتوني. شهر الجاي ملكتي وسفري
العنود: يعني تطبقون المثل اللي يقول: خير البر عاجلُ
مشاعل: أيـــه بالضبط
شوق: عالعموم مبروك مقدماً.
مشاعل: الله يبارك فيك
الهنوف: يعني لساتك مقررة ماتسوين حفلة أو زواج
مشاعل: لين الحين مصممه مانبي عوار راس
الهنوف: مــــررره خبلـــه. خلك راح تندمين
مشاعل: على شنو اندم مالت عليك.
رغد: مبروك شوشو
مشاعل: الله يبارك فيك حياتي. الفال لكم
البنات: أميــــــــــــــــن.

((واستمروا جالسين يشاهدون التلفزيون ويسولفون لين شبعوا وبعدها كل وحده راحت على بيتها))



أسئلتي الماضيه.

منو العروس
ومنو ذكرى

الحــــ(( 9 )) ــــــــــلقة

في بيت ذكـــــرى.

ذكرى وهي تفتح الباب بتفاجأ: العنود
العنود: هلا حبيبتي الحمدلله على السلامه
ذكرى: الله يسلمك حياتي.((وتباوسوا بالخد))
العنود: اخبارك
ذكرى: الحمدلله تمام تفضلي حياتي.

((دخلوا وجلسوا على أحدى الكنبات)).

العنود: علميني أخبار السفره وشنو سويتي فيها
ذكرى بدون نفس: السفره زفت ولله الحمد
العنود بأستغراب: ليش
ذكرى: مادريتي
العنود: شنو
ذكرى: تطلقت.
العنود: هاه


في بيت أم فيصل

غاده: مامــــي
أم فيصل: شفيك شتبين
غاده: محتاجه فلوسجيبي يصفّر.
أم فيصل بأنفعال: أنا مو أمس عطيتك 1000 ريال على شنو صرفتيهم
غاده: تدرين الحين كل شي غالي وال 1000 ماسوت لي شي.
أم فيصل:
غاده: شفيك سكتي ألحين يمه بتعطيني أو لا
أم فيصل: كاهي المحفظة فوق الطاوله، أخذي منها المبلغ اللي تبينه. بس هاه!!
غاده: شنو
أم فيصل: مو تجيني بكره وتقولين لي تبين بعد، ألا بعد شهر.
غاده بأبتسامه: حاضر يمه، ياست الكل أنتي.
((وتركب الدرج متجهه لغرفة أختها شوق))

في غرفة شوق.

شوق جالسه عالمسن تكلم واحد.

"" أبيك أقرب من أنفاسي"" >>>هذا كان التوبك حقها
بأستهبال: هلا حبيبي

""سر حبي فيك غامض"" >>> هذا التوبك حقه
هلا ياقلبي وروحي وعمري أنتي.

"" أبيك أقرب من أنفاسي""
قبل لاتكتب: ويـــــع، هذا من صجه الظاهر وايد مصدق نفسه.

((تدخل غاده خطوه خطوه بدون صوت وتمسك كتف أختها بالقوه وتقول)): شقاعده تسوين
شوق مخترعه: بسم الله. شفيك خرعتيني.
غاده: أسفه
شوق: بعد ماخرعتيني تتأسفين
غاده: شقاعده تسوين. قولي لي
شوق: قاعده أكلم واحد خبل بالمسن.
غاده تلتفت على الجهاز وتقول: كاهو يقولك وينك.
شوق رجعت للمسن وكتبت

"" أبيك أقرب من أنفاسي""
معاك حياتي

"" سر حبي فيك غامض""
تدرين حبيبتي أني مشتاقلك موت.

غاده بضحكه: الأخــو مشتاق
شوق: ماخذ على نفسه مقلب أني أحبه.
غاده: كتبي ، كتبي له وأنا بعد مشتاقه.

"" أبيك أقرب من أنفاسي""
وأنا بعد مشتاقه لك بالحيل.

"" سر حبي فيك غامض""
زين ياقلبي متى راح أشوفك

غاده: بعد صار فيها شوفات وطلعات

"" أبيك أقرب من أنفاسي""
انشالله قريب حياتي.

غاده: من صجك أنتي
شوق: وأنتي صدقتي هذا اللي ناقصني بس.

"" سر حبي فيك غامض""
زين خليني أشوفك عالكام دقايق

"" أبيك أقرب من أنفاسي""
والله الكام خربانه بجهازي حياتي، بس أوعدك أذا طلعت اليوم السوق أخذه معاي وأصلح الكام عشانك بس.

"" سر حبي فيك غامض""
ياعمري أنتي.

""أبيك أقرب من أنفاسي""
حبيبي. أمي تناديني الحين، لازم أسكر الجهاز.

"" سر حبي فيك غامض""
زين متى بتفتحينه مره ثانيه

"" أبيك أقرب من أنفاسي""
أنشالله بالليل. يالله الحين. سلام

"" سر حبي فيك غامض""
باي قلبي.

شوق قبل لاتسكر الجهاز حطته بلوك.
غاده: زين سويتي.
شوق: بس والله أنهم وناسه.
غاده: والله لو يدري عنك أخوي فيصل بيكسر الجهاز فوق راسك.
شوق: وأهو شدراه يعني. ألا أذا أنتي قلتيله.
غاده: لاتخافين ماراح أقوله. نسيت أقولك!!
شوق: قولي.
غاده: أمي توها عاطيتني فلوس.
شوق: مره ثانيه
غاده: أيــــه مره ثانيه.
شوق: أنا أبي اعرف شي واحد أنتي وين تودين فلوسك
غاده: الأسعار الحين نار كلها غاليه.
شوق: حتى ولو. زين أنتي خفي شوي وخفي على أمي المسكينه.
غاده: والله كسرت خاطري أمي يوم قلتلها مره ثانيه أبي فلوس.
شوق: كسرت خاطرك لاتطلبين منها.
غاده: انزين بتروحين معاي السوق

نرجع لبيت ذكرى.

ذكرى: وهذي كل القصة.
العنود: زين ليش ماتفاهمتي معاه
ذكرى: هذا مو مال أحد يتفاهم معاه.
العنود: زين الحين شبتسوين
ذكرى: أبنتظر لين أنتهي من العدّة وبعدها راح أدور لي على واحد جديد
العنود: أنتي من صجك
ذكرى: أجل أمزح معاك
العنود: أكيد أنتي مو صاحيه.
ذكرى: الحين خلينا من سالفتي وعوار الراس وقولي لي!!
العنود: شقول لك
ذكرى: ما أنخطبتي ماجاك نصيبك لين الحين
العنود: من وين بيجي النصيب. هذا أنا راح أصّك الثلاثين وأنا للحين ماتزوجت ولا عيلّت.
ذكرى: تبيني أدور لك على واحد
العنود: لا ياحلوه مابي من معارفك.
ذكرى: ليش شفيهم معارفي
العنود: معارفك، اللي مطلق واللي ماخذ على زوجته وحده ثانيه واللي مريض واللي أرمل. والى اخره.
ذكرى: أنا اقترحت عليك وأنتي بكيفك.
العنود بضحكه: خلي اقتراحاتك حقك. يالله أنا استأذن الحين
ذكرى: وين تو الناس.
العنود: أنا تأخرت على خواتي، والحين لازم أروح.
ذكرى: أجل فمان الله
العنود: مع السلامه حبيبتي.

((وطلعت العنود من الباب والتقت بواحد توه داخل طنشته وراحت)).

ذكرى: جيت ياجسار
جسار: أيــــه توني جاي
ذكرى: تبيني انشب لك الغدا
جسار: أنتي تغديتي
ذكرى: أيــــه الحمدلله
جسار: أجل أنا بروح أرتاح شوي بغرفتي ولما أجوع بروح أكل.
ذكرى: ماشي.على راحتك
جسار: ألا بسألك
ذكرى: هلا
جسار: هذي رفيجتك اللي توها طالعه
ذكرى: أيـــه شرايك فيها
جسار: ليش أنا شفتها من قبل عشان أقولك رايي فيها
ذكرى بضحكه: اذا عزمت ترى أهي جاهزه
جسار طنشها وركب لغرفته.


في بيت الدلوعات.

المها كانت تذاكر والهنوف كانت تناظر التلفزيون ومرفعه الصوت.

المها بضيق: الهنوف ممكن تنزلين على الصوت شوي
الهنوف مطنشتها.
المها: الهنوف أنا قاعده أكلمك.
الهنوف: أسمعك بس ماني راده عليك.
المها: نزلي عالصوت شوي خليني أذاكر
الهنوف: روحي غرفتك وذاكري.
المها: ماحب أذاكر وأنا لحالي.
الهنوف: عيل تحملي اللي يجيك.(( ورفعت على الصوت زياده))
المها: تعاندين يالهنوف
الهنوف طنشتها مره ثانيه والمها انقهرت من حركتها وقامت وخذت الريموت وطفت التلفزيون.
الهنوف: شسويتي ياحماره
المها: عشان تعرفين تعاندين مره ثانيه
الهنوف بأنفعال على شويه هدوء: المها عطيني الريموت
المها: مب عاطيتك أياه ورويني شبتسوين.
الهنوف: عطيني الريموت بالطيب أحسن لك لا بتشوفين شي عمرك ماشفتيه.
المها: خوفتيني.
الهنوف راحت وخذت كاس مويه وكبته على كتب أختها المها.
المها بصراخ على حزن: ياحيوانه ليش سويتي كذا
الهنوف: أنا حذرتك بالأول.
((تدخل العنود وهي توها جاية من برا)): شفيكم صوتكم واصل للشارع
المها: شوفي أختك شسوت بالكتب حقي.
الهنوف: أهي اللي بدت بالأول
العنود: حركاتكم مثل الأولاد الصغارماراح اناقشكم الحين لأن راسي يعورني وبروح ارتاح،، ولم أكون فاضيه لكم بتفاهم معاكم.

((ناظرت كلا من الهنوف والمها ببعض بإستغراب على اختهم لأن هذي أول مره ماتجادلهم)).

انتظـــــــــروني بالحلقة العاشرة


توقعاتكم

منو جسار وشنو قصته، وهل بيكون له دور محوري بحياة العنود

أحداث مميزة راح تشوفونها بالحلقات الجايه اللي راح تكون مثيره وفكاهيه للغايه وكذلك رومانسيه


انتظروني