الموضوع: روايه يا دنيا لا تسكبي الدمعة على خد حساس

لماذا الفشل يتبعني (( الفصل الأول – الجزء 4 ))

تقوم آيا من الصباح تستعد وتتشيك عشان تقابل رفيقها المنتظر .
تحول وتأكل فطورها وتروح المدرسة بسرعة .
تدخل المدرسة وتروح الفصل ويمر اليوم إلى الحصة الخامسة .
بعد انتهاء الدرس:
آيا توقف: أستاذ . أستاذ
المعلم يرفع نظره لها : نعم
آيا:ممكن أروح لدورة المياه
المعلم:طيب بس لا تتأخرين
آيا : طيب
وفي فصل اكيرا
اكيرا : أستاذ أستاذ .
المعلم :نعم
أكيرا :ممكن أروح لدورة المياه
المعلم : لا
اكيرا :استاذ ضروري تكفى
المعلم: طيب بس ياويلك ان تأخرت
اكيرا: طيب
هناك في سطح المدرسة آيا تنتظر اكيرا جاها طاااااااير ويالله يتنفس
آيا : سلمات وش صار ؟
اكيرا : الله ياخذ هالمدرس ما بغى يطلعلني نشب في حلقي
آيا: ايه اهم شيء انك طلعت يالله قبل ما يدرون عننا
اكيرا: يالله
ويمشون سوى بسرعة وينزلون من الدرج . تشوف آيا معلمة الرياضيات
فجأة تطيح من الدرج ويسرع وراها اكيرا
آيا وهي ماسكه ركبتها : آآآه رجلي رجلي تعورني
اكيرا : وش فيك
تجي المعلمة بسرعة : سلمات ماتشوفين شر وش فيك
تمثل آيا إن فيها جرح وهي تحط القلس على ركبتها
آآآآآآآآآآآآآآآآآآآآآآآآآآآآآآآآآآآآه ركبتي تهي تهي آآه
المعلمة ماتدري وش تسوي: قومي قومي اوديك للطبيبة
اكيرا : يا الله تنزف ركبتها .
المعلمة :بسرعة لازم ناخذها للطبيبة
اكيرا بثقه : لالا سمعت اليوم إن الطبيبة ما حضرت
المعلمة : ياربي صح .وش السوات

اكيرا بكل بساطة شال آيا بين يديه وهو يقول للمعلمة :انا بوديها للمستوصف القريب من المدرسة استاذة روحي خذي لنا اذن من المدير لان اصابتها قوية يالله الحق عليها
المعلمة طايرة بوهتها: طيب طيب لحظه وش أسمائكم .
اكيرا وهو يركض : انا أكيرا وهي آيا
ويطلعون من المدرسة وينزل اكيرا آيا
اكيرا :الظاهر الأمور تمشي زي ما بغينا .ويرفع يده يصفقها بيد آيا
آيا : يس مثل بغينا وفجأه تغيرت ملامحها الى استفهام: لحظه لحظه انت وش دراك ان الطبيبة غايبة اليوم
أكيرا وهو يعدل ياقة بلوزته: احم احم سمعتها أمس تكلم المدير وتقوله إنها اليوم مهيب مداومة
آيا : اها ربي يحبنا ههههه
اكيرا : هههه .
اكيرا يغير نظرته اقول يله بسرعة نروح للمستوصف القريب لان إذا تأخرنا بيسألون المستوصف عنا عاد تخيلي ننكشف عقب الفلم اللي سويناه
آيا وهي تمسح القلس من ركبتها وتحط لزاق جروح: يالله بسرعه مو ناقصين
وينطلقون بسرعة برا المدرسة متجهين للمستوصف لقو عندهم زحمة حمدو ربهم ان عندهم عذر عشان يقدمونه للمدير اذا رجعوا
ويتجهون الى مدرسة صديق اكيراويدخلون بكل ثقة
الفراش من وراهم : هيه يا اولاد
اكيرا وآيا يلتفتون: نعم
الفراش: من انتم لبسكم ما يدل انكم من هالمدرسه
اكيرا : أيه إحنا من مدرسة قيشالي العليا ( اسم مدرستهم )
الفراش: طيب وش عندكم في مدرستنا .
اكيرا : احنا المسئولين عن صحة الغذاء المدرسي (صحة الغذاء المدرسي هي عباره عن مجموعة طلاب يطبقون على مدارس تختارها لهم مدرسة للتأكد من صحة الغذاء يكونون مرتدين نفس لبس المدرسة و توزع عليهم بطاقات تدل انهم من المسؤولين عن صحة الغذا)
ويطلع بطاقتين ( مزوره ) انهم من المسئولين عن صحة الغذاء المدرسي
الفراش : آه بس هم وعدونا انهم بيجون بعد شهر .
اكيرا : لا تغير الوقت وصارت بعض اللخبطة شوي عشان كذا اليوم هو يوم الزيارة لهالمدرسة
آيا تشوف أكيرا بتعجب من وين خرف هالكلام .
الفراش : آسف على ازعاجكم طيب تقدرون تروحون تفضلو من هنا الكفتيريا ويأشر بيده لناحية الكفتريا
اكيرا نزل راسه :لاعادي بالعكس هذا يدل على حرصك على المدرسة
آيا: شكرا ياعم
الفراش مبتسم: لاشكر على واجب
اكيرا يلتفت على آيا وهو يغمز لها: يالله مشينا ويتجهون للكفتيريا
آيا وهي متشققه من اللعبة : والله انك خطير عليك تأليف عجيب
اكيرا مستانس: اعجبك انا اكيرا مو حيالله.ههههههه
آيا:ياشين الوثوق ههههه
اكيرا:امشي امشي بس
دخلو الكفتريا

آيا تشوف الغذاء : يوه الصراحة انا ما أحب أكل المدارس أبدا وهذا طعمه شين ما يعجبني
اكيرا : هو فيه احد مشاورك . أقول عبي الاستبانه بكلمه ممتاز خلينا نخلص .
آيا : بس احنا ما قلنا الصدق
اكيرا : سوي اللي أقوله لك وأنتي ساكتة
ويخلصون من تعبئة الاستبانات بسرعة و يرقون للدور الثاني .
يتلفتون عليهم كل الطلاب لان لبسهم مختلف
آيا في نفسها: ياكرهنيلي لهالنظرات
اكيرا : يوه ذا وين فصله
آيا :اسأل احد من هاللي بياكلونا بنظراتهم كأننا كائنات فضائية
اكيرا: وانتي الصادقة
توه بيتحرك إلا يسمع احد من وراه يقول لوسمحت
اكيرا يلتفت ويكلمه : هلا
ويقابلهم طالب : انت اكيرا
اكيرا : أيهمن معي
الطالب : ما اصدق انك ما تذكرني
اكيرا : لا من انت
الطالب : انا تيدوس كنت معك في المتوسط نسيت . يوه مرت سنتين ما شفتك . الصراحة تغيرت
اكيرا بكذب : اها تيدوس اي اتذكرك والله المتوسط كانت ايام حلوة
الطالب: ايوة صدقت.
اكيرا : بالمناسبة تعرف وين " اساوا "
الطالب : ايه هو في فصلي .
اكيرا : والله ياليت توديني له
الطالب : ابببشر أممم من هالبنت الجميلة اللي معك
آيا تبتسم وتوها بترد
اكيرا : وين اساوا
آيا ميلت خشتها على جنب وفي بالها : ياخي خلني ارد ماتسمعه يقول جميلة مالت عليك
الطالب وعينه على آيا: ههه تفضل تفضل من هنا
ويروحون للفصل و اساوا حاط راسه على الطاولة
اكيرا : آيا اوقفي عند الباب لين اقولك ادخلي اوكي
آيا منقهره يقطع ام الذل: طيب
يدخل اكيرا الفصل.
آيا في نفسها : من اجل عين تكرم مدينة
وعيونها ترمش بترقب للرفيق الجميل المنتظر
اكيراوهو يتقدم لصديقة ويوقف قدام طاولته: احم احم
اساوا يرفع راسه .هنا آيا دوروها فاتحة خشتها وعيونها بتطلع من مكانها من هالمفاجئة
اكيرا مبتسم وهو يمد يده : من فتره طويلة ما شفتك . شلونك
اساوا يوقف ويسلم وهو مبسوط: انا بخير الحمد لله . شلونك انت
اكيرا : تمام
اساوا : والله أمس يوم اتصلت علي وقلت انك بتجي استانست مره .

اكيرا: الله يخليك
اساوا بتسائل: مو قلت انك بتجيب معك شخص ثاني وينه ما اشوفه!؟
اكيرا : ايه لحظه شوي.
ويلتفت اكيرا ويقول : آيا ادخلي
آيا وهي ما ودها تدخل وتقول في نفسها : نعم يبيني ادخل
اكيرا : تعالي ولا تستحين
آيا في نفسها : الله من قله ما لقيت إلا انا استحي منك و من أشكالك
وتدخل يالله يالله وتوقف جنب اكيرا منزله راسها
الطالب اساوا عاجبته آيا قال : ماشاء الله من هذي يا اكيرا ؟
آيا وهي ميتة رعب في نفسها : تكفى لا تقول
اكيرا : هذيــ .<<<< وتضغط آيا على رجله
اكيرا : اح اح هذي << و تضغط مره ثانية
اكيرا وبصوت عالي : هذي رفيقتي
آيا بدهشة تشوفه
الطالب اساوا : وااااااااااااااااو اكيرا عندك ذوق
اكيرا بورطة : هه ههه هههه .تسلم
الطالب اساوا : مره تناسبون بعض
آيا ببتسامه تخفي دهشتها و تقول في نفسها : ايه مره . كثر منها
اكيرا: يالله يالحبيب صار لازم نرجع لمدرستنا الحين مع السلامة
ويسحب آيا ويطلعون برا بسرعة
الطالب اساوا: وش فيه اكيرا الحين مكلمني عشان يوريني صديقته ؟!
بعدين يبتسم وهو يتذكر شكلها : والله عندك ذوق يا اكيرا هالزين من يتركه
هناك قدام مدرسة اساوا وقفو الاثنين واكيرا يلهث وفي نفس الوقت مستحي من آيا تناظر لوجهه تستنى منه مبرر للي سواه
يوقف اكيرا قدام آيا بكل استحياء: آسف
آيا حمقانه : آسف على ايش على الحركة اللي سويتها وتقلده (هذي رفيقتي )ولا من هالصديق اللي فجعتني فيه قال ايش وتقلده (اجمل مني بيعجبك) هاااه. انت تبي تحرجني بس
اكيرا : لا والله ما كان قصدي كذا واللهالصراحة كان اجمل مني يوم كنا في المتوسط ما توقعت انه في سنتين بيتغير . وعشان أطلعك من المشكلة قلت انك رفيقتي فهمت
آيا بحزن : ايه فهمت . فهمت إن مالي نصيب أبدا . وكل مره أحاول فيها افشل . انا مالي نصيب ابدا
اكيرا رحمها: انا بحاول اساعدكـ.
آيا تقطع كلامه وهي تحرك راسها يمين ويسارو تسد اذانيها : خلااااااااااااااااااص . خلاص انا ما أبي اسمع أكثر
وتمشي شوي وتلتفت عليه والدموع في عيونها : شكرا لك اكيرا
بعدها راحت تركض ما تشوف دربها من الدموع
لحقها اكيرا وعلامات الحزن عليه لانه يحس ان هذي ثالث مره يتسبب في حزنها ونزول دموعها

يرجع الاثنين حزينين بدون اي فايدة و يدخلون المدرسة وتقابلهم مدرسة الرياضيات
المعلمة باهتمام: هاه بشروا وش اخبار ركبتك يا آيا
آيا ترفع راسها ووجهها يدل على إنها ميته من الصياح
اكيرا يتكلم بسرعه: ما فيها الا العافية يقول الدكتور إنها حاله عادية . والحمد لله ما صار لها شيء غير جرح بسيط في ركبتها .
يلتفت على آيا :صح آيا
تناظره آيا بعيون انهكها التعب و تمشي بهدوء وترقى الدرج ولا كأن احد كلمها.
نزل اكيرا راسه وقال في نفسه :ما الومك كل هاللي جاك مني
المعلمة تناظر اكيرا :وجهها ما يعجبني . ليش صايره كذا
اكيرا يصرف:ههه ايه هي تقول إن الجرح شوي يعورها
ويحرك يدينه :دلع بنات دلع بنات لا تاكلين هم ويمشي ويخليها في حيرتها
يمر اليوم وآيا بحزن ترجع البـيت وتصيح على السرير . واكيرا يرجع للبيت مهموم من اللي صار فيها
أحداث الفصل الثاني::الجزء الأول : اكيرا : المهم هيئي نفسك لان الحفلة الساعة 8 ونص الليل . خلاص
آيا : قلت لك منب جاية وشوله مصر
الجزء الثاني :
توما : آيا ممكن أسألك سؤال
تلتفت آيا عليه . : قول
توما : انتي تكرهينا
الجزء الثالث :الطالب كيو : انا وأنتي كلنا مالنا أرفقاء واجتمعنا اليوم . كأن القدر يبي
آيا : وش يبي
الطالب كيو يمسك يد آيا : آيا تصيرين رفيــــ.
الجزء الرابع :اكيرا : آيا أيا ردي آيا
ويهزها وما تتحرك .
اكيرا : آيا آيا

انا لست مجبورة (( الفصل الثاني – الجزء 1 ))

الام : آيا آيا يله قومي ليش اليوم متأخرة
تدخل الام على آيا و توخر الفراش عن وجهها : آيا ياالله قومي
آيا : يماه ما أبي اليوم اروح المدرسة
الام : خير ليش وش فيك
آيا : احس بتعب وما اقدر اروح للمدرسة
الام باستنكار: لكن .
الام وهي تشوف وجه بنتها ماعجبها: خلاص نومي وارتاحي .
في المدرسة ::
في الطابور الصباحي تتلفت يونا تدور آيا.
يونا : يوه هذي وينها اليوم
راي : مين ؟ آيا؟
يونا : ايه . ما شفتيها
راي : لا ما شفتها
يونا و هي تشوف طابور فصل آيا: ما اشوفها في الطابور انا من شفتها امس يوم رجعت شكلها ما يطمن لايكون غايبه ؟
راي : لا ما يكون الا الخير خلينا ننتظرها الى انتهاء الحصه الأولى اذا ماجت نسأل عنها فصلها و بعدين هي من النوع اللي يتأخر ؟
يونا : طيب ننتظر توقعتها هالسنه بتتعدل عن هالتأخير لكن ابو طبيع مايترك طبعه
في عالم التنصت ::
اكيرا لما سمع كل كلمه قالوها انبه ضميره فحط في باله قبل لايدخل فصله يروح لفصلها يسأل عنها .
دخل الجميع الفصل وجا الأساتذه بعد دقيقه وحده استأذن اكيرا بيروح للحمام ( اعزكم الله )وطلع راح بسرعة لفصل آيا يتلفت يمين يسار ما لقاها . سأل المعلم اللي في فصل آيا : الطالبة آيا اليوم غايبه
المعلم : ايه ولي أمرها تو متصل وعلمنا انها تعبانه وما تقدر تجي
اكيرا بخيبه امل: آه شكرا
يتوجه لفصله و يدخل بهدوء و يجلس على كرسيه
بعد انتها الدرس
يشوف اكيرا يونا وواضح انها قلقانه على صديقة عمرها وقف و راح لها
اكيرا: يونا لا تنتظرين آيا لأنها مهيب جاية
يونا ترفع راسها: والله وش دراك؟
اكيرا : قبل شوي وانا طالع للحمام مريت من غرفه المدير وسمعت
يونا : وش فيها . عسى ما تكون مريضة كانت أمس مهيب بخير
اكيرا في نفسه :كأنك حاسه

اكيرا يرد عليها بسرعه: او يمكن راحت عليها نومه هه هه
يونا : يمكن الله يستر على العموم شكرا اكيرا انك علمتني ماتدري وش كثر كنت قلقانه عليها الحين نسبيا ارتحت
اكيرا: لا ولو ماسوينا شي
صفرت الحصه و الكل رجع مكانه استعداد للماده التالية . مر اليوم بدون اي حدث جديد.غير ان فيه بعض من ابطالنا مشغول باله بالتفكير بحال آيا
جرس البيت يرن .
الام : مين << وتفتح الباب
اكيرا : مساء الخير انا اكيرا صديق ايا بالصف
الام : مساء النور هلا ياولدي تفضل
اكيرا : زاد فضلك بس كنت جاي اتطمن على آيا لأها غايبة فجبت لها دروسها اللي فاتتها ممكن اعطيهياه
الام : الله يعافك و يجزاك خير تعبت نفسك والله هي تعبانه شوي
وتمد الام يدها للداخل و تقول : ادخل ياوليدي بروح أقومها لك
اكيرا : لايا خاله مايحتاج تقولينها وهي تعبانه انتي عطيهياه و انا بروح وهوفي نفسه وده يتطمن عليها
الام : والله ماتروح وانت بنفسك بتسلمها الوجبات بيدك .
اكيرا مستانس بس ماوضح: ياخاله يوم ثان.
الأم تمسك يده و تجلسه و تقول : بروح اناديها لك ثواني بس
تروح و تخليه قبل ماتسمع منه اي رد.
تدخل غرفة آيا وتبعد الفراش عنها : و تهزها آيا . آيا قومي يالله بسرعه فيه واحد يبغاك تحت
آيا فاتحه عين وحده : واحد ولا وحده
الام : واحد واحدقومي انقزي عيب في الولد ينتظر ساعه
آيا تفز : من هو
الام تتصنع عدم المعرفه: وش دراني انا بسرعه بس بلا هالأسئلة اللي مالها سنع
آيا : وش اسمه
الام بقلة صبر: مااااا ادري بتقومين ولا اوريك الشغل السنع
آيا بخوف: طيب طيب
وتحول ببجامتها من الاستعجال . وتقابل اكيرا من على الدرج الشوشه منفوشه , حفيانه , وجه معفوس
رفع راسه اكيرا متفاجئ :آيا
آيا بدهشة : أأأ.أكـــيراااا
اكيرا استانس: واو متغير مره شكلك ما كأنك ذيك المهتمة بشكلها
آيا ترجع ركض لغرفتها تطمر درجتين درجتين سريع سريع تزين شعرها وتبدل ملابسها وتغسل وجهها وتحط قلس
وتحول بكل هدوء و رويه. ^^"
تشوف اكيرا لازال على وضعيته مبلم على الدرج تتجه له وتسلم عليه وقف لها ومد يده وصافحها
آيا: تفضل اجلس

اكيرا جلس بكل هدوء: شكرا
آيا: اكيرا وش عندك جاي
اكيرا : مو المفروض تضيفيني في بيتك
آيا : آه اسفه ثواني بس
تروح بسرعه و ترجع و في دها صينية فيها كاسين عصير
آيا و تمد له كاس عصير: تفضل
اكيرا وهو ياخذ منها الكاس: شكرا وش فيك اليوم غايبه
آيا: مالي نفس اروح المدرسة وأحس بشوية تعب
اكيرا : على الاقل كان قلتي ليونا امس انك بتغيبين لأنها المسكينه كانت تحتريك
آيا: يا الله . شلون نسيت ياقلبي عليها أكيد الحين بتزعل علي بأعتذر لها وهي بقلبها الطيب راح تعذرني
اكيرا : ماشاء الله عليكم الله يخليكم لبعض . بس مره ثانية علميها عشان قلبها الطيب
آيا بابتسامه هادئة: ان شاء الله الا ماقلتي وش عندك جاي في عز الظهر
اكيرا مبتسم : سمعت انك غايبة قلت بشوف وش اخبارك عسى ما يكون بسبب اللي حصل امس و عشان أعطيك اللي فاتك من الدروس
آيا بشويه ارتباك تحاول تخفيه: لا لا مو بسبب اللي صار امس اصلا نسيته
آيا تغير الموضوع على فكره من هو الطالب اللي في فصلي عطاك دفاتره
اكيرا : محد
آيا باستغراب : هاه اجل شلون جبت لي الدروس
اكيرا : ايه صح ما علمتك .
آيا : وش صار
اكيرا : صرت في فصلك
آيا بدهشة : نعم . لا مستحيل
اكيرا باستغراب : وشو المستحيل
آيا : طيب ليش نقلوك لفصلي
اكيرا : بسببك اليوم ما لقيت احد أتطاق انا وياه و تطاقيت انا وسوما وقرر المدير يغير لنا فصولنا وانا نقلوني لفصلك
آيا : يعني ما اقدر ارتاح منكم يا هالأربعه لو سنه لازم واحد منكم يصير معي . انا قايله إن حظي ردي
اكيرا مبسوط انها رجعت طبيعيه و تغير الموضوع: والله انا اللي حظي ردي أني صرت معك
آيا : طيب الطالب رانجي اليوم جاي
اكيرا : آه رانجي إلا جاي وسأل عنك .
آيا بصوت منخفض : أوه يا ليتني موجوده .
اكيرا : ايه صح تذكرت . آيا اليوم انتي فاضيه
آيا : بأكمل دفاتري و. ما ادري
اكيرا : اليوم ليله إجازة تقدرين تجين لحفله اليوم باسويها
آيا : حفله ؟!
اكيرا : ايه انا خلاص بعيش لحالي في بيت . واليوم احتفاليه عشان هالمناسبة
آيا : آه مبروك بس تراني منب جايه
اكيرا : ليش

آيا : ما لقيت إلا أقابل وجهك من حبي لك .
اكيرا : افا . ليه بس ترى كل الشباب بيحضرون وحتى صديقاتك
آيا بكبرياء : وإذا .انا مشغولة ومنب جايه
اكيرا : طيب يونا وراي بيصيرون موجودين
آيا : انا مصدع راسي ومالي خلق للإزعاج
اكيرا : طيب وإذا قلت إني ما شاورتك تجين ولا ما تجين
آيا : نعم
اكيرا : المهم هيئي نفسك لان الحفلة الساعة 8 ونص الليل . خلاص
آيا : قلت لك منب جايه وشوله تصر
اكيرا : انا قلت اللي عندي . يله انا بروح مع السلامة أشوفك اليوم
آيا : ايه مع السلامة . وللمعلوميه تراني منب جايه لا تحاول
اكيرا : طيب طيب
ويروح يمر اليوم وتحل آيا كل الدروس اللي فاتتها وكل واجباتها وتناظر للساعة إلا هي 7ونص
آيا : آه منب رايحه عناد له .
ويمر الوقت وهي بدت تحس بالطفش
تشوف الوقت 9 إلا ربع
آيا : المسكين راح الوقت ولا جيت هه عناد
ويرن جوالها رنه رسالة .
تمسك الجوال وتقرا الرسالة من رقم غريب ] عساك جاهزة . تراني عند باب بيتكم انتظرك نروح مع بعض . رانجي [ ^_^
تطير من الفرحة وتطل من الدريشة وتشوفه لابس قباعة
تروح وتلبس أحسن فستان عندها وتتشيك على الآخر .
تحول مسرعة وتفتح الباب .
آيا : عسى ما تأخرت عليك
يرفع راسه .
آيا : أأأكيرا
اكيرا : واو أشوفك ما صدقتي إني أرسلك رسالة . على طول طلعتي هذي المشغولة
آيا متورطة : نعم انا خلصت شغلي لا لا انا الحين عندي شغل وبرجع
تلف بترجع ويمسك يدها
اكيرا : انتي مجبورة هالمره
تحاول توخره ما قدرت