الموضوع: روايه دنيا غريبه

الجزء الخامس عشر
,,,,,,,,,,,,,,,,,

عبير بغرفه ريما جالسه قدام المرايه تعدل شعرها دخلت عليها ريما
ريما: وش عندك لابسه وين بتروحين خيانه من وراي طيب تكلمي قولي بطلع مو كذا وكاله من غير بواب
عبير: ههههههه اعصابك لايطق فيك عرق من قال اني بطلع!!
ريما: اجل اكييييد سعود جاء من السفر
عبير: لااا يعني أنا مالبس إلا لسعود ؟
ريما: اجل لاتقولين جتك الحاله اللي تجيني تلبسين وتجلسين قدام المرايه عشان تحسين انك طلعتي
عبير:ههههههه الله يشفيك
ريما: اجل ايش تكلمي
عبير: نجلاء صديقتي جايه الرياض كم يوم وكلمتني قالت بتمر تسلم
ريما: ياحليلها نجلاء من زمان عنها هي إلا الان عايشه
عبير: هههههه من يوم تزوجت ماجت الرياض يعني لها سنتين تقريبا
ريما: بس هذا مو مبرر لابسه وكاشخه كنك بتطلعين
عبير: اعوذ بالله منك يعني تبيني استقبل البنت ببجامه
ريما: لاااا بس خليك سبور البسي بنطلون ولا برمودا حنا في البيت
عبير: والله بناطيلي بالبيت ماجبت معي إلا ملابس الجامعه وكم لبس
ريما: عندي لبس جديد حلوووو
عبير: لا شكرا لبست
ريما: هي متى بتجي
عبير: قالت بعد المغرب
ريما: اهااااااا لاتسون تمونون تجلسون بالصاله لاني يمكن انزل اجلس فيها
عبير: هههه لا ياشيخه وليه ماتسلمين عالبنت ان شاء الله
ريما: اوووووووووه مشوار لازم اتروش بعدين البس بعدين انزل وغير كذا عندي مذاكره.
عبير: طيب طيب خلاص خليني انزل اشوف السواق جاب الاغراض
ريما: وبعد بعد رايحين السوبر ماركت ماقلتوا لي
عبير: هههههههههههههه بالله انتي اخر سنه بالثانوي كيف تبي تجيبين معدل وانتي 24 ساعه تبي تطلعين
ريما: قل اعوذ برب الفلق من شر ماخلق
عبير وهي طالعه: لاتنسين باقي المعوذات
ريما وهي رافعه صوتها: القهر يسوي اكثر



جلست ريما على مكتبها فتحت ماده الاحياء حضرت درس بكره وسكرت الكتاب رتبت شنطتها دخلت مواد بكره على حسب الجدول كانت بتنزل تحت عند التلفزيون بس تذكرت ان عبير بتجي صديقتها عندها قالت اكييد اللحين بتكرفني حطي وشيلي وودي هذا والحلى قسميه بصحون خليني هنا احسن راحت جلست على الكمبيوتر حذفت الملفات القديمه اللي فيه وجلست تحوس بالاخير شبكت نت لقت الاماراتيه " المهره" اون لاين

ريما كان نكها
طاقه اللثمه وراكبه همر مررررررررحبا
والاماراتيه كان نكها
حب وعيش دنياك بفرح ** صديت ولا اقفيت دايم في بالي هلا بج وينج يالقاطعه
طاقه اللثمه وراكبه همر موجوده بس عارفه ثانويه عامه وابي اشد حيلي
حب وعيش دنياك بفرح ** صديت ولا اقفيت دايم في بالي الله يوفقج
طاقه اللثمه وراكبه همر يسلمووووووو
حب وعيش دنياك بفرح ** صديت ولا اقفيت دايم في بالي فقدتج قلت وين البنت لايكون فيها شئ
طاقه اللثمه وراكبه همر ههههههه مادريت اني مهمه لهالدرجه
حب وعيش دنياك بفرح ** صديت ولا اقفيت دايم في بالي هههههههههههه شو هالنك انتي راكبه همر
طاقه اللثمه وراكبه همر لا سيكل بس غلطه مطبعيه
حب وعيش دنياك بفرح ** صديت ولا اقفيت دايم في بالي والله انج شئ تضحكين الواحد غصب
طاقه اللثمه وراكبه همر ليه مهرج!!
حب وعيش دنياك بفرح ** صديت ولا اقفيت دايم في بالي في اغنيه كل ماسمعتها ذكرتني فيج
طاقه اللثمه وراكبه همر أي اغنيه
حب وعيش دنياك بفرح ** صديت ولا اقفيت دايم في بالي اغنيه راشد المايد ناسيه اسمها بس هي كلمات فزاع اللي يقول فيها يامرحبا يامغلط في تليفوني

طاقه اللثمه وراكبه همر اهااااااا عرفتها اللي يقول فيها السعوديه ونجد
حب وعيش دنياك بفرح ** صديت ولا اقفيت دايم في بالي هيه روعه الاغنيه
طاقه اللثمه وراكبه همر ههههههه اكيد روعه عشان مدحنا فيها
حب وعيش دنياك بفرح ** صديت ولا اقفيت دايم في بالي فديتهم اهل نجد محد يسواهم
طاقه اللثمه وراكبه همر الله يخليك احرجتيني ترى ماتعودت اصير رسميه
حب وعيش دنياك بفرح ** صديت ولا اقفيت دايم في بالي حاسه فيج اهديها لج هاالاغنيه اسمعيها دايم عشان تذكريني

جلسوا البنات يسولفون لما استاذنت المهره وبعدها طلعت ريما من النت





جت نجلاء عند عبير ودخلتها المجلس
عبير: ياناس عالكتكوت اللي معك هاتي خلي بشوفه زين
اخذته عبير تلعبه شوي جلس يصيح
عبير: بس بس ياناس يجنن يانجلاء
نجلاء: هههههه بس صياح
عبير: والله صرتي دبه يانجلاء
نجلاء : وانتي ماشاء الله عليك نفس جسمك من سنتين
عبير: وش بيخربه ياحسره لاحمل ولا ولاده
نجلاء: الله يرزقك ياعبير
عبير: تعالي علميني وش اخبارك ووش اخبار امك زرتيها
نجلاء: أنا الحمدلله تمام وامي امس شفتها عند خوالي
عبير: رجلك جاي معك الرياض؟
نجلاء: لاااا جايه كم يوم وراجعه المشكله الجيه ماجت الابطلعه الروح
عبير: وش اخبار رجلك معك
نجلاء: على حطه يدك اللهم بعد سالفه الطرده من البيت صرت مااعطيه وجه حتى النوم انام بغرفه ثانيه احسه يحاول يتقرب لكن خلاص أنا مليت منه هو يحاول يحتك مو عشاني عشان نفسه انسان اناني
عبير: الله يعينك طيب كيفه مع ولده طاير فيه ولاعادي
نجلاء: عادي مايبيه يصيح وياويله اذا سمع صوته وهو يبي ينام تصير عندنا حرب
عبير: على كذا انتي لازم تاخذين مانع حمل اللحين تحملين وتجيبين بيبي ثاني وتبلشين بعمرك
نجلاء: لاتخافين على مدبره عمري أنا والله ياعبير ماجلسني معه إلا هالولد ولاكان طلبت الانفصال
عبير: لاااا حرام بعدين ولدكم يتشتت بينكم واخاف بعد ياخذه منك خاصه انك انتي بمدينه وهو بمدينه
نجلاء: لاتخافين انامدامي جبت الولد مستحيل افكر اتركه خلاص ارتبطت فيه بقوووه
دخلت عليهم ام نواف سلمت وجلست معهم شوي بعدها طلعت عشان تتركهم على راحتهم



ريما بعد ماسكرت النت نزلت تحت مالقت شئ تسويه حست بملل قالت خليني اروح البس واسلم على نجلاء لبست ونزلت بسرعه دخلت عليهم
ريما: السلام عليكم
الكل: وعليكم السلام
عبير: هاذي ريمااا
نجلاء : ياحليلك ياريما كبرتي مرررره تغيرتي
ريما: الله يسلمك
عبير: متى اخر مرره شفتيها
ريما: ليش الفضايح اخر مرره شافتني لما كنتي بالجامعه تلطعينا بالحر برى ننتظرك كنت انزل اناديك كنت بالمتوسط وكانت نجلاء تشوفني وانا اصبب عرق وقرف
نجلاء: هههههههههههه
عبير: كل شئ فيها تغير إلا لسانها
نجلاء: صار فيها منك تشبه لك
عبير: غريبه انتي اول وحده تقول كذا
ريما: أنا احلى طبعا
نجلاء:ههههه لااا والله كل وحده لها جمال خاص
ريما: خلاص اذا طلعت عبير علميني رايك ماابي احرجك اللحين مع صديقتك
نجلاء: ههههههههههههههههه
عبير: مسكينه مدري مين اللي بيطلع
ريما: طرده طيب!!
نجلاء: إلا الان انتم نفس العاده ماتركتوها انواع المناقر
ريما: أنا والله اني بريئه بس هي تغار مني ماتصدق تشوف معي شئ إلا تغار مني
عبير: ايييييييييه صح
نجلاء: وش اخبار الدراسه ياريما
ريما: الحمدلله ماشيه يلا استاذن أنا فرصه سعيده شفناك وكان ودي اشوف البيبي اللي معك بس مالي حظ شكله نايم
نجلاء: مو مشكله اصحيه عشانك
عبير: لاااااا خليه ينام مسكين
ريما وهي طالعه: يلا مع السلامه





بالليل خالد سهران مو راضي يجيه النوم حس انه من زمان ماكتب شئ خاطره او قصيده بعد ماخلص موسم الصيف ماجته طلبات واتصالات من الناس يطلبون فيها قصائد جلس عالمكتب ومسك القلم كان في باله كلام كثير بس مو عارف كيييف يجمعه جلس يكتب وبعدين يمسح ومره يقطع الورق ويبدا من جديد جلس على هالحال طول الليل على اذان الفجر تقريبا كان منتهي من كتابه قصيده فضفض فيها وطلع بعض اللي بداخله

ترتجف روحه ويغرق في سؤاله ** كييف ينسى اللي يحباللي يحب
كم قــعد في حــاله يطالع بحـــاله ** لاضحــك يـــكتب!! ويبكــي لاكـتب!!
يكتب اللــي مــر في دمـه وبالــه ** من ســبب او شــئ كان بـــلا سبب
ماطــلب غيـــرك ولاعنى خيــاله ** يم غيـــرك جــــاك يااريــــح تـــعب
مايقــارن فيك حتى اغلى حــلاله ** صرت الاغلى وأنت الاحلى والصعب
ذاب طبعـه حس في طبعـك بداله ** يضحـكه ضحكك ويغضبك ان غضب
يتذكـر كيــــف نسيــانك طرالـــه ** صـــار مايـــــدري يحــب او مايحب
ياسؤالـــه جــاوبه من هو بقاله ** يحضـــن ظلالـــــه مثل عيـن وهدب
وعن سؤاله يسـاله حتى سؤاله ** كيـف ينسى اللي يحب اللي يحب

"القصيده للشاعرمحمد الغرير"


خالد بالفتره الاخيره صار يحس بتانيب ضمير انه يفكربوحده متزوجه يعني على ذمه رجال ثاني لكن مهما حاول انه يبتعد عن التفكير فيها يلقى نفسه يرجع مررره ثانيه مل و تعب يبي يغير بحياته شوي بس وش يسوي !! كيييف يغير وهو مابيده شئ غير الكتابه!!.






مها بغرفتها جالسه تدور كتاب ضايع منها دخل عليها مشاري

مشاري: وش عندك تحوسين
مها: ادور كتاب
مشاري: يوووووو انتي ماتملييين من الكتب
مها: كل انسان له هوايه
مشاري: المهم ابي غداء والشغاله مو في المطبخ
مها: طيب انتظر شوي
مشاري: ان شاء الله إلا ماتلقين كتابك
مها: لااا ثواني بس
مشاري: شكلكم متغدين بدري اليوم
مها وهي تفتح الادراج: عادي زي كل يوم بس أنت يوم تتغداء بالبيت وعشره لاااا
مشاري بتردد: مها. اللحين بالجامعه عندكم لو اسالك عن بنت ممكن تجيبين اسمها
مها وتناظر اخوها بنظرات شك: اللــــه الجامعه كبيره طبعا صعبه
مشاري: لا أنا ماقلت اسالي عنها بكل الجامعه هي بنفس كليتك
مها: حتى لو صعبه
مشاري بيأس: اهااا طيب حطي لي غداء
مها: اوكي

دخلت عليهم ساره

ساره: سبحان الله مشااااااااري عندنا بالغرفه حدث عالمي
مها: هههههههه هو قال الغرفه اليوم منوره اكييييييد ساره مو فيها ودخل
مشاري وهو طالع: يلا أنا بطلع
ساره: اييييييه اذا دخلت الملائكه ذهبت الشياطين
مها: وش فيك انتي عليه
ساره: مافيني شئ بس هو يرفع الضغط يوم شافني طلع
مها: طيب عادي مو قصده شئ
ساره: إلا الااااااا قصده ونص هو اصلا مفشلنا بكل مكان
مها: وش هالكلام!!
ساره: انتي ماسمعتي خالد ذاك اليوم بالشاليهات وش يقول عنه!!!!!! ولانواف يمنع اخته تجي تسهر عندنا لحالها كله عشان مشاري!!
مها: تراه اخوك الكبير مهما سوى احترميه
ساره وهي طالعه: اووووووف كل ماقلنا شئ قالوا اخوك الكبير واخوك الكبير.






يوم الخميس الليل نواف كان طالع مواعد واحد من اخوياه بكوفي جلس عالطاولات اللي برى ينتظر خويه يجي التفت لقى واحد يطالع فيه نظرات حاده طنش لكنه لف مررره ثانيه لقى الرجال مازال يطالع فيه المشكله انه ماعرفه قال هذا الرجال اول مرره اشوفه بحياتي ويطالعني هالنظرات وش يبي من الحياه

طلب له كوفي وكوروسون جلس يطالع بالساعه حس ان خويه تاخر دق عليه
نواف: الوووووو
فيصل: هلا
نواف: وين الناس
فيصل: معليش تاخرت عليك كانت معي الوالده
نواف: طيب يلااا عجل علينا ترى طفشت
فيصل: اوكي 10 دقايق وانا عندك
نواف: مع السلامه
فيصل: فامان الله

سكر نواف من فيصل وجلس يتلفت يدور الرجال اللي كان يطالعه مالقى احد

بعد شوي جاء فيصل وجلسووا سواليف وضحك وتعليقات عالعالم
شاف الطاوله اللي جنبه جاء جلس فيها نفس الرجال ويطالعه بنفس النظرات التفت نواف على فيصل
نواف: فيصل شف الطاوله اللي جنبنا
فيصل: أي طاوله
نواف: اللي عاليمين تعرف اللى فيها
فيصل: لااا واالله اول مرره اشوفه
نواف: غريب هالانسان عليه نظرات
فيصل: طنش يارجال
نواف التفت عالرجال وكان شكله شاب صغير عمره باول العشرينات
نواف: نعم أي خدمه
تفشل الرجال ولف عالجهه الثانيه
فيصل: ماعليك منه
نواف: ناس ماتجي الابالعين الحمراء من دخلت هنا وهو انواع القز
فيصل: اقووووووول بس ماعليك أنت السنه هاذي مااخذت اجازه
نواف: لااااا قلت خليها بعدين
فيصل: يارجال أي بعدين تكرف كل يوم بعدين ماتاخذ اجازتك السنويه أنا اخذت الشهر وحسيت انه طار بسرعه

جلسوا يسولفون عن كل شئ يخطر بالبال

نواف: اوووه يالله أنا دخت جاني النوم
فيصل: خلاص اجل نشوفك بكره بالاستراحه لاتقول عندي دوام
نواف: ههههههههههههه
فيصل: والله الحكومه كنها داريه ان في ناس ماياخذون اجازات قالوا خل نعطيهم اياها بالقووووه
نواف: ههههههه خلاص ان شاء الله كاني فاضي مريتكم مع السلامه

وهو طالع لاحظ ان الرجال جالس يتبع خطواته طنشه وراح ركب سيارته





رجع البيت لقى فارس عند التلفزيون راح جلس معه نواف هالفتره كان يتقرب من فارس ويحاول يصير صديق له خاصه بعد الشئ اللي اكتشفه عنه
نواف: السلام عليكم
فارس: وعليكم السلام
نواف: وييين الباقين
فارس: البنات بالمطبخ بيسوون شئ ياكلونه وابوي طالع وامي فوق
نواف: وش اخبار الدراسه
فارس: الحمدلله زينه
دخلوا عليهم البنات عبير معها شاندويشات وريما شايله صينيه العصير
نواف: ماتغديتوا
عبير: لا أنا ماكنت مشتهيه شئ دسم
نواف: مافي حلى أنا مشتهي حلى
ريما: لا للاسف مافي
عبير: ليتك قلت لي كان سويتلك
فارس: ريما مافي عصير مشكل
ريما: مدري رح شف بالمطبخ
اخذ نواف الريموت وجلس يقلب بالقنوات
نواف: القنوات هاذي من اللي مطلعها
ريما: أي قنوات
عبير: مو أنت مررره جلست عليه وشفرت القنوات اللي مو زينه
نواف: ايييه وحطيت لها رقم سري بس من اللي رجعهم
فارس: ايييييه الظاهر يوم خرب الدش الاسبوع اللي راح جاء واحد صلحه وبرمج القنوات وشكلها طلعت
عبير: عادي شفرهم مرره ثانيه
ريما: وش فيهم تشفرهم
نواف: اقول يمدحون الاكل كلي بس
ريما: تسكتني
فارس: اقوول نواف لاتحذف كل شئ
نواف: اقولهم قنوات تعبانه يقولون لاتحذف كل شئ شين بشيله بس انتم خلصوا اكل عشان اشفر
عبير: وش دعوه
ريما: تكفى يانواف عاد أنا التلفزيون اخر اهتماماتي
نواف: تصدقون أنا مااييد الديجتال عربسات احسن للعوايل
ريما: لااااااا ياشيخ والشباب عادي يشوفون اللي يبون
عبير: صح انتم ليه نظرتكم كذا عندكم الرجال حلال يشوف والبنت لا ترى الحلال بين والحرام بين
نواف: أنا ماقلت.
ريما: بعدين القنوات كلها بنات شبه عاريات حنا لو شفنا هم بنات زينا ممكن نبلعها لكن انتم خييييييييير تشوفون هالمناظر
نواف: البنت ممكن تقلد المناظر اللي تشوفها لكن الرجال لاااا
عبير: وأنت الصادق الولد حتى ان قلد شايل عيبه ولا لا ؟!!!!!!!
انصدم نواف من رد عبير عليه وجلس يبرمج القنوات
نواف: انتم النقاش معكم مايجيب نتيجه
دخل عليهم ابو نواف: السلام عليكم
الكل: وعليكم السلام
ريما: يبا تفضل ساندويشات عبير
ابو نواف: الحمدلله شبعان
عبير: يبا طيب عصير
ابو نواف وهو ياخذ العصير: وين امكم
فارس: قبل شوي شفتها فوق بغرفتها
نواف: يبا تذكر جارنا ابواحمد اللي نقل بيته من عندنا قبل كم سنه
ابو نواف وهو يحاول يتذكر: ايييييييه إلا كان قبالنا وش فيه
نواف: اليوم صدفه شفته عندنا بالشركه كان جاي يراجع رحت سلمت عليه هو ماعرفني يقولي تغيرت
ابو نواف: وينه القاطع من يوم ترك البيت ماطب الحاره
عبير: يبا اللحين هذا حال الناس عساهم يصلون الرحم مو عاد الجيران
ابو نواف: وانتي صادقه يابنيتي
ريما: على طاري صله الرحم ودي اروح عند ساره يوم الاربعاء
فارس: بسم الله الرحمن الرحيم قبل كم يوم كانت عندنا
عبير: يبا عمي من يوم راح سعود ماشفناه دقيت عليه مره قلت له تبي شئ محتاج شئ قال لا يمكنه مستحي مني كلمه أنت يبا خله يجي يتغدى عندنا ولا يتعشى
نواف: ايييييييه يبا مسكين عمي لايروح ولايجي إلا اذا لزمنا عليه
ابو نواف: خلاص بكلمه وبشوف
عبير: ان شاء الله يجي
ابو نواف: إلا سعود متى بيرجع؟
ريما: يوووووو قويه يبا كلنا ملينا منها بس محد تجرأ وقالها إلا أنت
ابو نواف: ريما اعقلي
نواف: ياناس البنت هاذي بدخلها موسوعه قينس للارقام القياسيه اطول لسان بالعالم
فارس: هههههههههههه
ريما: وأنت وش فيك تضحك طول الجلسة ساكت وان جت سيرتي شق حلقه
عبير: هو قال اسبوع عشره ايام يعني هاليومين ان شاء الله بيرجع
ابو نواف: الله يرجعه بالسلامه





في بيت ابو مشاري ساره دخلت على مها بالغرفه
ساره: مها ابوي يبيك
مها: يبيني ليش
ساره: مدري بس قال نادي لي مها
مها: وينه هو تحت
ساره: لا بالغرفه
راحت مها لابوها طقت الباب ودخلت
مها: السلام عليكم
ابو مشاري: وعليكم السلام
ابو مشاري: تعالي اجلسي بتكلم معك بموضوع
مها: سم يبا
ابو مشاري: شوفي يامها انتي اللحين كبرتي صار عمرك 20 سنه صح ولا لا؟
مها: صح يبا
ابومشاري: في وحده دقت على امك قبل كم يوم خطبتك منها
مها وهي مصدومه: انااااااااااا
ابومشاري: ايييه انتي أنا رحت سالت عنه الولد ماشاء الله ماعليه يمدحونه
سكتت مها

ابو مشاري: أنا قلت بخذ رايك قبل مايجون الناس ويخطبون رسمي
مها: من هم يبا الناس أنا اعرفهم
ابو مشاري: لا ماتعرفينهم هم جو عن طريق وحده تعرف امك انتي فكري بالموضوع وردي لي
مها: ان شاء الله يبا
ابو مشاري: واي شئ تبي تعرفين عنه تعالي اساليني وانا ماراح اقصر بعلمك بكل شئ اعرفه

طلعت مها من عند ابوها وهي مستغربه من هالخاطب اللي جاء بهالوقت بالذات راحت غرفتها وهي تفكر بالموضوع وش اقولهم اللحين وابوي يقول الرجال ماعليه المشكله أنا ماسالته عنه ولاقلت وش يشتغل ولا ولا.!!! غبيه أنا المفروض اني سالته يمكن القى عييب فيه وارفض على طول لازم اقول لريهام خليها تفكر معي كييف اصرف اهلي






الصباح فارس وحمد بالمدرسه

حمد: وش فيك أنت متغير
فارس: عادي مافيني شئ
حمد: مدري من زمان ماطلعنا مع بعض
فارس: أنت إلى الآن تروح للشله التعبانه
حمد: لا رحت لهم كذا مرره اطق الباب محد يفتح لي سالت الحارس يقول الشقه اللحين للايجار طلعوا المستاجرين اللي فيها
فارس: احسن
حمد: ماتدري وين راحوااا
فارس: أنت وش تبي فيهم هذولا ناس نصابين يلعبون علينا يبونا بس نلحق وراهم
حمد: صح انهم احيانا يسون حركات ارجع البيت واكون مستحقر نفسي بس هم شقتهم وناسه
فارس: اسمع ياحمد اذا تبي هالناس وتبي تروح لهم ترى أنا مو خويك ولا اعرفك
سكت حمد وماعرف يرد على فارس لانه عارف ان اللي جالس يسويه غلط





مها بالجامعه تحكي لريهام سالفه الخطبه
ريهام: طيب انتي وش قلتي لهم
مها: ماقلت شئ ابوي قال فكري
ريهام: طييب اذا الولد زين ليش تردينه
مها: تستهبلين انتي
ريهام: لاتقولين لي خالد
مها: ااااااااه بس
ريهام: فكري بالعقل والمنطق الولد ماجاب خبرك
مها والعبره خانقتها: طيب وش تبيني اسوي اكثر من اللي سويته
ريهام: مها لاتضيقين صدرك
مها: أنا احب خالد ومستحيل افكر اخذ غييره
ريهام: طيب روحي قولي لاهلك اني أنا توي صغيره وماافكر بالزواج
مها: وتعتقدين هذا حل
ريهام: انتي قولي كذا بعدين ربك يحلها
مها: مدري ياريهام احس بضيقه صدر
ريهام: والله حاسه فيك بس خالد هذا لاحياه لمن تنادي الله يعينك يامها





يوم السبت رجع سعود من السفر ودق على عبير تتجهز عشان يمر ياخذها
دخلوا البيت وعبير مارضت لسعود يمسك شئ
عبير: خلاص حبيبي أنت رح خذ لك شور وارتاح أنا برتب كل شئ
سعود: ماراح المس شئ بس مشتاق لك
عبير: وانا اكثر بس لاتخاف أنا ماراح اطير بتقوم تلقاني
انسدح سعود عالسرير وراح بنوم عميييق عبير طفت النور وطلعت

.
.
.

بعد ساعتين صحى من النوم لقى عبير مصلحه عشاء جلسوا يتعشون بعدها طلع لها الهدايا اللي كان شاريها لها
عبير: مالك داعي جايب كل هالاشياء لي
سعود: أنا كم وحده عندي
عبير بدلع: حتى ولو المفروض ماادلعني بعدين مايملى عيني شئ
سعود: اموووووووت أنا عالدلع
عبير: سعود وش فيك مو على بعضك احس فيك شئ
سعود بضيق: لاااا مافيني شئ
عبير: علينا
سعود: يمكن تعب السفر
عبير: اكيييييييد؟!!!
سعود:اكييد
عبير: اذا كذا أنا عاذرتك
سكت سعود وقامت عبير ترتب اغراضه وترجع كل شئ مكانه

الجزء السادس عشر
,,,,,,,,,,,,,,,,,

دق جوال خالد شاف رقم غريب مااستغرب كان متعود لانه رقمه ناشره بكذا مكان يوم كان يعلن في الجريده
خالد: مرحبا
.: السلام عليكم
خالد: وعليكم السلام
.: اخوي ممكن اتكلم معك بموضوع
خالد: تفضلي
.: أنت ماتعرفني لكن أنا اعرفك يمكن تستغرب من وين جبت رقمك
خالد: لااااا عادي مااستغربت ولاشئ اساسا جوالي 24 ساعه يرن
.: لحظه لحظه
هنا ريهام تندمت انه دقت على خالد يوم شافت اسلوبه زياده على كذا لو درت مها انها دقت علي خالد ماتدري وش راح تسوي فيها
ريهام: اخوي كنت ابي قصيده اهديها
خالد: تهدينها لمين؟!!!!!!!
ريهام: صراحه منحرجه مدري وش اقولك
خالد: اختي تكلمي
ريهام: صراحه أنا احب واحد واموووت فيه لكن هو مافكر فيني حاولت اوضح له هالشئ والمح له لكن هو سوى نفسه مو داري طنشني
خالد: هههههههه طيب أنا وش دخلني بالموضوع
ريهام: ابيك تكتب لي قصيده تبين فيها حبي له وانه هو ماجاب خبري بهديها له
خالد: اولا اذا هو طنشك طنشيه ثانيا للاسف أنا مو عياده نفسيه تدقين تشكين لي عن حبيبك ثالثا وهو الاهم أنا مااكتب قصائد من هالنوع إلا لنفسي
ريهام: ليه أنت تحب!!
خالد: مو شغلك هذا شئ راجع لي تبين شئ ثاني
ريهام: لااااااا شكرا
خالد: مع السلامه وسكر الخط.

يوم قفلت ريهام انقهرت منه حست انه اهانها هي وش سوت عشان يرد عليها بهالاسلوب القاسي هذا جزاها كانت تبي تخدم صديقتها وتحاول تقربهم من بعض لكن باللحظه الاخيره ترددت خافت بسبب هالشئ تخسر صداقاتها لمها
اه اه يقهر يقهر مدري كيف مها تحبه يرفع الضغط شايف نفسه مغرور ياصبر الارض عليه مسكين يحس نفسه وسيم وشاعر خلاص العالم لازم يضربون له سلام ملكي
الله ياخذ الساعه اللي فكرت ادق عليه فيها





مشاري قلت طلعاته من البيت اول مررره يحس انه حب صار يكره البنات وسيرتهم كله من نجود هالبنت قلبت كيانه حتى يوم صار صادق وعها البنت مو راضيه تصدق يارب كيييف اقدر اوصل لهالبنت قطع عليه حبل تفكيره صوت الجوال
مشاري: هلا
منصور: وينك يارجال امس ماجيت
مشاري: كان راسي مصدع نمت بدري
منصور: اليوم نشوفك
مشاري: مدري والله أنا صحيت اليوم بدري كاني مانمت مريتكم
منصور: تعاااااااال فاتك امس طلال جاب خويته للشقه ياشييييييييخ قمر البنت حسافه عليه
مشاري: ههههههه والله انكم فاضييين كثير الحلوات
منصور: بس هالبنت غير
مشاري: غريبه من متى طلال عنده خويه ويطلعها
منصور: مدري عنه
مشاري: خلاص بحاول امركم اليوم
منصور: اوكي باي
مشاري: باي
سكر مشاري ورجع يفكر بلي شاغل فكره له فتره

في الشركه وبالتحديد في مكتب نواف الجديد الموظفين مجتمعين ويباركون له بالترقيه
المدير: الف مبروك
نواف: الله يبارك في عمرك
والشباب من كل جه يباركون له
المدير: بهالمناسبه حبيت اسوي احتفال صغير بمكتبي اشوفكم هناك يلا أنا بروح اكلم روساء الاقسام يحضرون معنا
نواف: تسلم والله يابو عبد العزيز ماله داعي تكلف علي عمرك
فيصل: احلىىىى من قدك صار لك مكتب لحالك
نواف: ههههههه ودك تجي معي
وليد: والله تستاهل يانواف
نواف: تسلم واللــــــــــه
فيصل: يلا أنا بلحق المدير ولاتتاخرون علينا
نواف+ وليد: ان شاء الله
وليد: اااااااه بس رحت وتركتني الحالي
نواف: ومن قال انك الحالك بيجبون لك موظف جديد معك تحت التدريب بيطلع ريحتك زي ماطلعت ريحتي
وليد: هههههههه الله يعين
نواف: بالله تذكر يوم تجي قبل سنتين وتدرب عندي ياانك رفعت لي ضغطي
وليد: هههههههههههه
نواف: يالله استلم يوم لك ويوم عليك
وليد: يلا تاخرنا عالمدير
نواف: يلا مشينا
راحوا مكتب المدير احتفلوا بالترقيه بحضور اغلب موظفين الشركه





وفي البيت لما عرفوا اهل نواف بترقيته الفرحه مو سايعتهم فرحوا له من كل قلبهم
ام نواف وهي تصيح: والله انك تستاههل ياوليدي
نواف: وش هالدموع يماااا
ام نواف: من الفرحه ياوليدي
نواف: هذا كله بفضل دعواتكم لي
ابو نواف: الف مبروك عقبال مانفرح بك عريس
نواف: هههههههه ان شاء الله يبا
ريما: حركات نواف ترقيت مبرووووك عطني الحلاوه
فارس: مبروك نواف
نواف: هههههههه أي حلاوه روحي نامي بس بدال ماتقول اخوي الكبير ترقى اروح اجيب له هديه
ابو نواف: بهالمناسبه بسوي لك عشاء
ام نواف: رجال وحريم بعد أنا بفرح بولدي عند الحريم
ريما: هههههه يما اجل بمسكها عليك ان شاء الله أنا اذا تخرجت سوي لي حفله كبيره
فارس: انتي تخرجي اول بعدين تكلمي
ابو نواف: خلاص يصير خير ابشوف يوم الخميس هذا قبل مايجي رمضان
ام نواف: اللي تشوفه
ريما: لحظه أنا ابي ملابس جديده
نواف: دولابك مليان
ريما: اللحين حفله اخوي البس لها شئ قديم من اللحين اقولكم اذا في حفله أنا ابي السوق
ابو نواف: ان شاء الله بس اسكتي اللحين
فارس: لقطي وجهك
نواف: انتم ماتشوفون ابوي يتكلم خلاص اسكتوا
يرن التلفون راحت ريما ترد عليه
ريما: نواف عبير تبيك بالتلفون
راح نواف رفع السماعه
نواف: هلالالالا وغلالالالالالا
عبير: مبروووووووك والله يوم قالت لي امي ماتتصور كيف فرحت لك
نواف: يسلموووو
عبير: سعود يسلم عليك يقول بيمر يبارك لك
نواف: الله يسلمك ويسلمه
عبير: يلا اجل اشوفك اليوم يمكن امر عليكم
نواف: اوكي مع السلامه
عبير: فامان الله

رجع نواف عند اهله وقاموا يخططون عالعشاء اللي بيسونه بهالمناسبه وطول ماهم جالسين وتلفون نواف ماسكت الناس يدقون يباركون له





في بيت ابو مشاري كانوا متجمعين على طاوله الطعام يتعشون
ساره: مها قربي الصحن
ام مشاري: سمي بالرحمن
مها: هي دايم كذا كن احد يركض وراها
ابو مشاري: الناس عالاكل يسكتون وهم ياكلون وانتم اصواتكم ماتطلع الاوقت الاكل
ساره: يبا وش فيك ماقلنا شئ
ام مشاري: مشاري الله يهديه من شوي وانا اصلح العشاء كان هنا تو رحت بناديه مالقيته
مها: اييييه أنا شفته وهو طالع
ساره: يعني غريبه على مشاري هو دايم طالع
ابو مشاري وهو قايم: الحمدلله مها اذا خلصتي عشاء تعالي عندي الغرفه ابيك
ساره: ماشاءالله عندكم اسرار
ام مشاري: كلي وانتي ساكته
مها: ان شاء الله يبا
ساره: وش يبي فيك
ام مشاري: لقافه

ساره: يمااا هي اختي مو بنت الجيران
مها: هههههه وانا وين بروح شايفتني
خلصت مها اكل وراحت عند ابوها وزي ماتوقعت فتح معها نفس السالفه الخطبه
ابو مشاري: خليتك فتره كافيه تفكرين انشاء الله تكونين قررتي
مها: يباااا مدري وش اقولك
ابو مشاري: تكلمي وش تبي تعرفين عنه شئ
مها: لاا يبا مو كذا السالفه
ابو مشاري: اجل ايش
نزلت مها راسها ماتدري وش تقول لابوها
ابو مشاري : تكلمي يامها قولي اللي بخاطرك واللي تبينه راح يصير
مها بتردد: يبا أنا احس اني توي صغيره ابي اكمل دراستي
ابو مشاري: اذا المساله الدراسه الدراسه مو سبب ترفضين عشانه نشترط عالولد تكملين دراستك
مها: لاااا الله يخليك يبا اللحين احس نفسي مو مستعده ولا افكر بالزواج
ابو مشاري بياس: براحتك يابنيتي اللي تشوفينه مع ان الولد ماينرد
ارتاحت مها يوم سمعت كلام ابوها حست ان حمل ونزاح
مها: مشكووور يبا الله يخليك لنا
طلعت من عند ابوها وهي مبسوطه بالرغم من الألم اللي بداخلها من صد خالد لها





يوم الخميس في بيت ابونواف كان العشاء بمناسبه ترقيه نواف عزموا الكل ماتركوا احد رجال وحريم عزموا عيال عمهم وعيال خالهم وجيرانهم وكل معارفهم واصدقاء نواف حتى ابو نواف قال لاخوانه لاتتركون احد يعز عليكم إلا اعزموه الرجال كانوا مجلسينهم بمجالس الرجال كان عندهن مجلسين والعشاء مسوين بوفيه بالحوش
اما الحريم فكانوا جالسين بمجلس الحريم وبالصالونات الداخليه للبيت كان البيت زحمه والكل مبسوط وفرحان ريما اصرت انها تروح السوق وفعلا راحت واشترت لها بدله حلوووه لونها ليموني كانت مناسبه للون بشرتها اما عبير كانت لابسه فستان ناعم قصير لونه تفاحي و ليلكي كان جايبه لها سعود باخر سفره سافرها
مها وساره كانوا لابسين سبورات هاديه مع اكسسوارات خلت اكشن باللبس
القهووه كانت شغاله رايحه وجايه هذا غير صياني الحلى اللي كانوا جايبينها طلبيه كان شكلها روعه
عالساعه10:30 دخلوا الرجال يتعشون بعدها بساعه دخلوا الحريم تعشوا وباركوا لهم مررره ثانيه وودعهم وطلعوا
الساعه 12:20 كان الكل طالع تقريبا مابقى في مجالس الرجال إلا المقربين ابو مشاري وعياله وابوسعود وسعود وخالد كان ابو مشاري يسولف لاخوانه بصوت واطي وكان خالد قريب منهم فسمع حديثهم كامل
ابو مشاري: والله ضاق صدري الرجال ماعليه كلام
ابوسعود: طييب كان حاولت فيها
ابو مشاري: البنت تقول بكمل دراستي
ابو نواف: هذا موب عذر المفروض قلتلها هو ماراح يمنعك تكملين دراستك
ابو مشاري: والله أنا ماقصرت حاولت فيها أنا وامها بس هي رافضه
ابوسعود: أنا من رايي اذا أنت شايف ان الرجال زيين لاتتردد اغصبها البنت ماتعرف مصلحه نفسها توها صغيره
ابو مشاري: مها ماشاء الله صار عمرها20 سنه ميب صغيره
ابو نواف: اجل توكل عالله ولاتشاور
ابو مشاري: مدري ماودي اغصب البنت على شئ ماتبيه
ابوسعود: البنت مالها شور اذا هو رجال كفووو
ابو نواف بخاطره يقوله ان البنت ماتعرف مصلحه نفسها هاذي عبير ضغطت عليها وغصبهتا على ولد عمها واللحين عايشه مبسوطه بس ماكان قادر يقول هالكلام قدام اخوه
ابو مشاري: الله يعين
ابو سعود: الله يكتب اللي فيه الخير يلا نستاذن حنا
ابو مشاري: وحنا بعد خلي نكلمهم عشان يطلعون





رجع خالد البيت وهو يفكر بكلام خواله اليوم عن مها ضاق صدره عليها انهم بيغصبونها على شئ هي ماتبيهمسكينه البنت جالسه مع البنات مبسوطه وخوالي جالسين يقررون مصيرها قال ايش اغصبها وييين حنا عايشين بغابه حراااام عليهم اللي يسونه ياويلهم من ربي عشان البنت ضعيفه ماتقدر توقف في وجيههم وتقولهم لاااااااا. قالوا حنا نعرف مصلحتها اكثر منها ايش التخلف هذا الناس طلعوا للقمر وهذولا إلا الان عايشين على عصر الاضطهاد والظلم اذا زوجوها وماتوفقت البنت ذنبها برقبتهم يغصبونهم على الزواج بعدين يجون يقولون ليش نسبه الطلاق عندنا مرررتفعه!!!!
ياللـــــه طيب هي ليش ماوافقت عالرجال مادام خالي يقول عنه والنعم فيه وماينرد معقوووووله هي تحبني وتفكر فيني زي ماقالت لي !! لا لا مااتوقع انها تحبني بهالمعنى هي يمكن معجبه فيني او تعجبها شخصيتي بعدين وهمت نفسها انه تحبني اكيييييييد اكيييد هذا هو الواقع ولا يمكن هي معها حق تبي تكمل دراستها وخاصه ان مها معروفه تحب الدراسه والمذاكره والكتب بس هذا موسبب مقنع
راح الليل وخالد يفكر بمها مرررات يحس انه راحمها ومررات يقول اكييد بيضيق صدري عليها هي مثل اختي بس لما يتذكر موقفها معه يوم تكلمه يقول لاااا البنت تحب تعب خالد من التفكير وكل مايحاول يبعد الموضوع من راسه يلقى نفسه رجع يفكر فيه مرره ثانيه لما سمع اذان الفجر قام وتوضى وصلى بعدها نام

دخل عليهم شهر رمضان الكريم وصار الكل يبارك للثاني بحلول هالشهر الفضيل وصرنا نسمع العبارات المعتاده " كل عام وانتم بخير" " مبارك عليكم الشهر" " شهر مبارك"
"الله يجعلنا من صوامه وقوامه" . "الله يعيده علينا وعليكم بالصحه والعافيه"
وجميييع المسلمين اللهم امييييييييين
بهالشهر تخضع الانفس لخالقها وتخشع القلوب ويتسابق المسلميين عالعبادات والاعمال اللي تقربهم من الله عزوجل





في بيت ابو مشاري البنات في المطبخ كل وحده ماسكه شغله بيدها ساره جالسه تلف السمبوسه ومها تصلح السبرنق روول دخلت عليهم امهم
ام مشاري: انتم إلا إلا ماخلصتوا يلا مابقى شئ عالاذان
ساره: تونا يمااا باقي ساعه
مها: بس ياشاطره الاشياء هاذي بتنقلي بالزيت ماراح ناكلها كذا
ام مشاري: مها اذا خلصتي اللي بيدك تعالي صلحي العصير
مها: ان شاء الله يماااا
ساره: خلصت اخيراااا
ام مشاري: الحمدلله عطي روجي خليها تقليها
ساره: يماااااا ماصلحتوا حلى
مها: واللي امي تشتغل فيه من الصبح وش تسمينه؟!
ام مشاري: ساره روحي شوفي اخوك نايم صحيه قولي له مابقى شئ عالاذان
ساره: يؤيؤ يرفع الضغط مايقوم روحي انتي يامها أنا دايم يهزئني اذا صحيته
مها: طييب روحي حطي التمر بصحون وانا بروح اصحيه





وفي بيت ابو نواف متجمعين عالفطور ازعاج وربشه واصواتهم طالعه
فارس: اااااذن
الكل: بسم الله
ام نواف: اللهم لك صمت وعلى رزقك افطرت
نواف: ريما صبي لي قهووه
ريما: أنا كل يوم كذا عالفطور انكرف ماعمري افطرت زي الناس
ابو نواف: اللهم اني صائم تعوذوا من ابليس
فارس: ريماااا وين كاسات العصير
ريما: ماااااري مااااااااااااااري جيبي كاسات
ام نواف: خلي الحرمه تفطر
ريما: هي ياعمري تتنكد عشاني ناديتها مررره وحده وانا كل يووم روحي جيبي ودي عادي عندكم
فارس: ههههههه هي موب ملسونه زيك
نواف: الحلى خطيير اليوم من مصلحه
فارس: اكييييييد أمي
ريما: حرااام عليكم أنا كل يوم اصلح لكم بس اليوم رجعت من المدرسه تعبانه نمت شوي
نواف: لذيذه يمااااااا
ابو نواف: وهي صادقه ريما امس كانت مسويه لنا حلى
ريما: محد يدافع عني إلا ابوي الله يخليه لي

قاموا ابو نواف والعيال يصلون وريما طلعت فوق صلاه التراويح تروح ام نواف كل يوم تصلي في المسجد وريما مو على كل حال مررره تكون تعبانه ومرره يكون عندها امتحان بكره





وبما ان رمضان كان ايام دراسه كان كل واحد يفطر ببيته إلا ايام الخميس كانوا يجتمعون عند ابونواف او ابو مشاري وخالد بما انه عايش الحاله كان كل يوميين يروح عند واحد من خواله يفطر عنده واحيانا عند صديقه سلطان عبير اصرت على سعود مثل كل سنه من اخذته انه يدق على امه وخواته يبارك لهم بهالشهر الفضيل سعود بعد ماكلم امه وخواته خلاها تكلمهم وهو كبرت بعينه زوجته يوم شافها تصر عليه انه مايقطع امه وخواته بالرغم انه بالبدايه كانت اكثر خلافاتهم حول هالموضوع يعني عبير من اخذت سعود غيرت فيه اشياء كثير للافضل إلا سالفه الحمل والعيال هو مو راضي يقتنع فيها ومصر عليها انها تاخذ حبوب منع الحمل لاجل غير مسمى لكن هي مازالت مساعيها انه تقنعه بهالموضوع زي مااقنعته بمواضيه ثانيه كان هو رافضها